1 smuḏen anerzef al iyṭalya af iylel. aḏ yusi yetƹussu af buwlus aḏ lbeƹḍ n imeḥbas iḍen lqayed n 100 ismis yulyus seg lfirqeṯ n uγusṭus. 2 nerkeb g lbabur tused seg dremita tatenneḍ af lemmerasi n asiya. aḏ ireḥ iḏenneγ rsterxus seg tesaluniki n meqduniya.

3 al ača, nuṣel al ṣeyda. aḏ yeggi yulyus ṣbiḥ yid buwlus, yedjiy ayreḥ al leṣḥabis bac asucen matta yexs. 4 aḏ neffeγ seg ṣeyda g iylel af cceṭ g ttega n qubruṣ afelxaḍert aḍu yusi s zzaṯ. 5 neqdeƹ iylel lliy tman kilikiya aḏ bemfiyliya. nuṣel al lmers n miyra g liykiya. 6 aḏ diyn, yufa lqayed n 100 lbabur tused seg liskenderiya. aḏ tatreḥ al iyṭalya. yselyeneγ diyes.

7 teyyur lbabur s ufercu ussan. aḏ s ljehed d mmeqqer neqreb seg lmers n kiniydus. lekenti aḍu wiγenyedjic ankemmel abriyḏenneγ. yaxy nreḥ g ttega n ljezirṯ n keriyta beƹd mag nƹedda af iγef n selemuwni. 8 aḏ beƹd mag neyyur cceṭ cceṭ s tƹeb, nuṣel al mkan mmelnas lmers lliy yezƹem tman tmura n lisaya.

9 nḍeyyeƹ ggeṯ d lweqt aḏ iƹedda nefdu. aḏ teḏwel terzeft g iylel tuƹer beƹd mag ƹeddan ussan n uẓwum n tkuffart g lexriyf. yaxy yuwa buwlus y ibeḥḥaren n leflukeṯ: 10 «ayya irgezen. rahiy terzeftenneγ ṭuruh d lexṭer d meqqar af lbabur aḏ lliy diyes aḏ af tmeddurtenneγ zada.» 11 lekenti lqayed n 100 yusi ydebbeƹ g dwiy n lqubṭan n lbabur aḏ lmulatis muc g dwiy n buwlus.

12 aḏ afelxaḍert ayuh n lmers wiṣelleḥc aqimi diyes g tejrest, cerehen lγalebiyeṯ n midden af terzeft bac aḏeṣlen al lmers n fiyniks lliy g keriyta. aḏ lliy tmir af lqibelt mγerreb aḏ mbeḥḥer mγerreb bac aƹeddan diyes tejrest. 13 aḏ yekkerred aḍu seg lqibelt, ḥseben ibeḥḥaren tateniduz al lmers n fiyniks. yaxy qamen lmugleƹ aḏ yyuren tman cceṭ n keriyta.

14 lekenti ƹlewleh aḍu d meqqar mmelnas cerqi beḥri yekkerred seg amas n ljezireṯ. 15 yaxy iduz lbabur lliy witqudc atebbed zzaṯ aḍu lliy yewyeneγ

16 al ttega n ljezireṯ d temeckunt ismis kuwda. aḏ beƹd tƹeb nqud aner lbabur n usemneƹ al umkanis. 17 aḏ fiseƹ ggen ibeḥḥaren lazem. sunden tizerwin af lbabur. aḏ lewḥen lmugleƹ afelxaḍert ugeḏḏen ateniwi aḍu al ijdi n cceṭ n liybiya. aḏ yeqqim aḍu yetares g lbabur.

18 yerniy aḍu fellenneγ ggeṯ. yaxy al ača, uḏellen senkazen seg leƹbeyeṯ n lbabur. 19 aḏ g as wi 3 , lewḥen reγleṯ n lbabur s ifesnesen. 20 ƹeddan ussan winezric disen tufuyt aḏ iṯran. aḏ yeqqim aḍu almiy neḥseb maƹdc anemneƹ.

21 aḏ wsiyn lliy rezfen g ayuh n lbabur beṭlen uču ussan. yaxy yusesend buwlus yuwa:

«ay y irgazen, tezrim mammeḵ yexs aslem dwiyw aḏ witrezfemc seg keriyta bac amenƹem seg lexṭer aḏ lexsareṯ. 22 lekenti ṭuruh tafenemleγ, witegeḏec. rahiy wiyetmetti ḥetta d yjen siwem. amma lbabur akehaw taterez.

23 yeḍherriḏd yiḍ wuh lmleyka s rebbiy lliy d rebbiyw aḏ y netta neči tẓalliγ. 24 yuweyiḏ: < witegeḏec ay buwlus, lazem tabeddeḏ zzaṯ lqeyṣer, aḏ rebbiy yucaḵ temeddurt n lliy rezfen iḏeḵ lkul. > 25 witegeḏec ayya irgazen. rahiy temneγ s rebbiy, aḏ mammeḵ yuweyiḏ tayṣar. 26 lekenti lazem tatemluweḥ lbabur al ijeṯ seg ljuzur.»

27 zegenyeḍ, beƹd 14 n iḍan, yusi aḍu yugay diyneγ g iylel n driya al mani winessinc, ḥseben ibeḥḥaren lliy neccin neqreb seg lber. 28 yaxy qasen ndeq n iylel ufent 20 d tiddiyaṯ. aḏ beƹd fercu ƹewden qasen ufent 15 d tiddiyaṯ. 29 aḏ ugeḏḏen ateḏƹes lbabur al iḍγaγen. yaxy sezwanas deferris 4 n lemgeleƹ ssugumen g tajji meḥterin.

30 aḏ smuḏen ibeḥḥaren tarulen seg lbabur, we asezwan lbabur n mneƹ. aḏ rren imanesen tasezwan lemgeleƹ s zzaṯ. 31 yuwa buwlus y lqayed n 100 aḏ iƹesekriyen: «kan witγiminc ayuh n ibeḥḥaren g lbabur, witmenƹemc.» 32 yaxy qdeƹen iƹesekriyen tizerwin n lbabur n mneƹ. djenteṯ atuda g aman.

33 mniyn ḥeḍrbac tayeṣbeḥ, yuwa buwlus y midden lkul ačan: «rahiy γarwem 14 d ussanaṯ tesugumem g tiwdi aḏ witečim disen ḥaja. 34 yellaṯ čeṯ bac aquddem amenƹem. rahiy wixesser ḥetta d yjen siwem ḥetta zzaw seg ixfis.»

35 aḏ iqam aγrum. yerza yuḏel itet beƹd mag yeḥmeḏ rebbiy zzaṯ midden lkul. 36 yaxy ṭmanen lkulhum. aḏ čen. 37 aḏ nusi g lbabur 276. 38 aḏ beƹd mag cbeƹan, lewḥen irden g iylel bac asenekzen seg leƹbeyeṯ n lbabur.

39 mniyn yeṣbeḥ, wiquddenc ibeḥḥaren asennen mkan lliy llan diyes. amma zren lxeliyj af cceṭ. aḏ smuḏen taḏersen lbabur al γares kan qudden. 40 yaxy qdeƹen tizerwin n lemgeleƹ. aḏ djenteṯ atreḥ. aḏ miren tizerwin n ddefeṯ bac aquden adersen lbabur. aḏ qamnas craƹis mzzaṯ. aḏ yyuren al cceṭ yeduzzu disen aḍu. 41 lekenti lbabur tuṣel al mkan jar sen lwiḏan. yaxy yendeq zzaṯis g ijdi. aḏ yuḏel lbaqis yetrezza s lquweṯ n lemwaj.

42 aḏ smuḏen iƹesekriyen anγen imeḥbas bac wiyetƹewem ḥetta d yjen sisen al cceṭ we ayerwel. 43 lekenti lqayed n 100 lliy yexs aysemneƹ buwlus wiyedjic iƹesekrinis aggen matta axsen. aḏ yuwa y lliy tquddun aƹumen areḥen al cceṭ qebbel ttenyaṯ. 44 aḏ lliy witquddunc aƹewmen asreḥḥen af tilweḥin n lbabur naγ af lliy yefdelled siyes. aḏ amyuh uṣellen lkul al cceṭ labas ƹlihum.