1 yuwa aγribas y buwlus: «qa neseγda, defeƹ af imaniḵ.»

yaxy iqam buwlus fusis yuḏel ydugga, yuwa:

2 «ay ya lmelek aγribas, freḥeγ lliy tadefƹeγ af imaniw zzaṯiḵ, we arreγ af lliy tehemniḏ siyes wuḏeyen lkul. 3 aḏ cek tesenneḏ leƹweydesen aḏ kecḥesen. aggeḏ lemruweṯ wesseƹ lbaliḵ iḏiy.

4 rahiy wuḏeyen ssenen mammeḵ usiγ, afelxaḍert ddereγ jar middeniw g uwrceliym smanis d meckun. 5 aḏ madam ssenniḏ amyuh, lukan xsen lḥeq rahiy cheḏḏen lliy neči d ferryisiyi, debƹeγ g lmeḏheb lliy yuƹer g ddinenneγ. 6 aḏ kennim tetḥekamem diyi as uh afelxaḍert ssugumeγ ayeg rebbiy lliy yuƹeḏ siyes ibabnenneγ.

7 aḏ wecci leƹcayer 12 n ceƹbenneγ tẓallan ggiḍ uggas, aḏ ssugumen rebbiy ayeg lweƹdis. afelxaḍert n ayuh n usugem tehemniḏ wuḏeyen, ayya lmelek. 8 maγer witetemnemc lliy rebbiy taysekker lliy mmuṯen?

9 usiγ ḥsabeγ lliy yexs ggeγ ljehdiw g uḥareb n ysem n yesuwƹ nnaṣiriy. 10 qqimeγ tḥerebeγ disen g uwrceliym beƹd mag ucenniḏ imeqqaren n lkuhhan lḥeq bac aggeγ ayuh. aḏ ggiγ ggeṯ d lmuminin g lḥebs. aḏ usiγ twefeqeγ almiy cewereniḏ g lmejles af tmenγiwt n yjen sisen. 11 aḏ ƹeḏbexten zzaṯ lemjameƹ lkul bac akefren b ssiyf. aḏ kerhexten almiy reḥḥeγ tezeleγ fellasen g tmurewin lliy bƹeḏneṯ.

12 mniyn lqiγ seg imeqqaren n lkuhhan lḥeq bac areḥeγ al dimecq g ljurtesen, 13 zzel zriγ, ayya lmelek, g ubriḏ ddu yetreq iṭer n ddu n tufuyt yetwelƹej fella aḏ af lliy iḏiy. 14 nuda lkulna af tammurt, sliγ ṣṣut yesγuyuyiḏ s leγweṯ teƹebrenit yemmal: < cawel, ay cawel maγer tetḥerebeḏ diyi, al lemmi taqimeḏ teḥreneḏ am aγyul. >

15 yaxy sesetneγ <d mam cek ay ya siydi?>

yuweyiḏ: < neči d yesuwƹ lliy tḍelmeḏ diyes. 16 kker bbed af iderniḵ. rahiy ḍherγeḵd bac afeggeγ d xdimiw. we adleḏ d ccehed fella s ayuh n tirjelt lliy tezridiḏ diyes ṭuruh, aḏ s tirejlin lliy teltezreḏ disneṯ beƹd as uh.

17 rahiy tafsemenƹeγ seg wuḏeyen aḏ seg midden iḍen lliy tafnekyeγ al γarsen ṭuruh, 18 bac asentmireḏ ṭiṭewinesen we afγen seg tellest al ddu, aḏ seg lḥukem n cciyḍan al lḥukem n rebbiy, we atweγefren ibekkaḍnesen, we aydel γarsen mkan jar indin lliy ṯqedsen s liymansen siyi. >

19 aḏ seg lweqt ḏḏin wiggiγ ken mag yuweyiḏ fellas siydneγ g tirjelt, ayya lmelek aγribas. 20 uḏelleγ becreγ midden n dimecq, aḏ midden n uwrceliym beƹdesen, aḏ indin n lyehuwdiya lkulha, wembeƹd becreγ ḥetta midden lliy muc d wuḏeyen. aḏ awiγasen lkulhum ateben, we aḏulen al rebbiy we aggen lxiyr bac atṣeḥ ttubtesen.

21 aḏ afelxaḍert becreγ lliy muc d wuḏeyen, ṭṭefniḏ wuḏeyen g lheykel aḏ smuḏen talenγen. 22 lekenti rebbiy yesteḥfeḍ fella al ssuh. aḏ s uƹewnis netta tbeddiγ zzaṯ iqellilen aḏ zzaṯ imaqqaren d ccehed af lḥeq. aḏ witeffeγeγc af mag yuwa muwsa aḏ lenbiya lkul; 23 yuƹeḏ rebbiy tayenkiy lmesiyḥ we ayḥus aγenna. we ayekker d mezwar seg jar lliy mmuṯen. we aybeccer s ddu ceƹbenneγ aḏ midden lliy muc d wuḏeyen.»

24 mniyn yuṣel buwlus g ddifaƹis al ayuh n dwiy, iṣeddeƹ festus yuwa: «tehbelleḏ ay buwlus, neƹtis lƹezmiḵ yseheblaḵ.»

25 yaxy yuwa buwlus: «ayya lḥkem festus neči wihbilexc, neči dduggiγ g dwiy n lḥeq aḏ ṣwab. 26 aḏ lmelk lliy duggiγas ṭuruh yessen ayuh n iḥejeyen lliy duggiγ fellasen. aḏ neči sseneγ lliy yesla sisen lkul afelxaḍert wiṣerenc g tellest.

27 ayya lmelk aγribas, tetemneḏ s lenbiya? neči senneγ lliy cek tetmneḏ sisen.»

28 yaxy yerras aγribas: «yenda g ufercu n lweqt texseḏ alterreḏ d lmesiyḥiy.»

29 yuwa buwlus: «g ggeṯ naγ g frcu n lweqt kifkif. rahiy tẓalliγ y rebbiy afelxaḍriḵ aḏ afelxaḍert n inuh lkul bac ḏulen am neči amma menγir ayuh n tseleslin.»

30 beƹd ayuh yekker lmelek aḏ lḥakem aḏ berniki aḏ lliy ḥderren. 31 ffeγen seg mkan diyn aḏ nihnin mmelen y beƹeḍhum: «ayuh n argaz wiyeggi ḥaja yestahel afelxaḍertis temettent naγ lḥebs.»

32 aḏ yuwa aγribas y festus: «lukan muc ayuh n argaz yexs atali ckeytis al lqeyṣer rahiy nseybi.»