1 lweqt ḏḏin, yuḏel lmelek hiyruwdus iḍellem nyeƹdel g lmejmeƹ. 2 yenγa yeƹquwb uwas n yuwḥenna s ssiyf. 3 mniyn yufa lliy ayuh freḥḥen siyes wuḏeyen, yetṭef buṭrus zada g ussan n tfeṣka n tqurset. 4 beƹd mag yṭṭefi, yeggi g lḥebs tƹussun felles 4 n terbaƹin kul ijeṯ diyes 4 n irgazen. aḏ yusi yesmuḏ tayeḥkem fellas zzaṯ wuḏeyen beƹd tfeṣka n uƹeddi.

5 yeggi g lḥebs. aḏ lmejmeƹ n lmumnin wsiyn tjahan y rebbiy g tẓaliṯsen bac ayferej fellas.

6 g yiḍ lliy yesmuḏ diyes hiyruwdus tayeḥkem af buṭrus, yusi wuhnit yeṭṭes jar sen irgazen aḏ ikettef s sen n tseleslin. aḏ yusi zzaṯ lbab diyes iƹessesen tƹussun af lḥebs. 7 yeḍherred lmleyka n rebbiy, aḏ iwelƹej ddu g lbiyt, iwet lmleyka buṭrus af ljenbis ysekri. aḏ yuwayas: «kker fiseƹ.»

yaxy udaneṯ tiseleslin seg ifesnis. 8 aḏ yuwayas lemleka: «qqen leḥzamiḵ, tirdeḏ ṣebeṭiḵ.» yeqqen aḏ yireḍ. aḏ yuwayas: «ireḍ bernusiḵ teḏbeƹdiḏ.» 9 yeffeγ buṭrus ydebbeƹ diyes. aḏ netta yeḥsab lliy netta g tirjelt. aḏ wiyessinc lliy matta iṣaras af ffus n lmleyka nembelḥeq. 10 ƹeddan seg azzaṯ n mkan n uƹussu mezwar aḏ wissen. mniyn uṣellen al lbab n lḥebs lliy yusi d uzzal, yugay al tmura imir weḥdes. aḏ ffeγen. aḏ beƹed mag uṣellen al lexer n ccareƹ yedjiy lmleyka ireḥ.

11 lweqt ḏḏin, yerresd y buṭrus ccahed n lƹqel yuwa: «ṭuruh umenneγ lliy rebbiy yenkiy lmleykes ysemenƹiḏ seg hiyruwdus aḏ mag xsen wuḏeyen.» 12 mniyn yefhem aydin, ireḥ al tzaqqa n meryem yedjis n yuwḥenna lliy mmelnas merqes mani mleymen ggeṯ d lmumnin ḍelben g rebbiy.

13 mniyn iwet af lbab berrani, tused texuddimt ismis rewda bac atḥaker d mammun. 14 tefhem ṣṣut n buṭrus. yaxy seg lfreḥtis tetuw, witmirc lbab amma treḥ tetbeccer g lliy llan jaj s isas.

15 yaxy uwanas «cem tetxerfeḏ.» lekenti tuweyasen: «aha rahiy nembelḥeq.» yaxy uwan: «balek d lmleyka n buṭrus.» 16 amma buṭrus yeqqim yečaṯ g lbab almiy mirnas. zrent fehhen.

17 yaxy yuwayasen s fusis bac asusmen. aḏ yeḥkeyasen mammeḵ ysefγiy rebbiy seg lḥebs. aḏ yuwa «mleṯ y yeƹquwb aḏ aweṯen af ayuh.» aḏ yeffeγ ireḥ al mkan iḍen.

18 mniyn yeṣbeḥ, uḏeffen iƹesekriyen g beƹeḍhum aḏ qqimen sestunen: «matta iṣar y buṭrus.» 19 mniyn yuwayasen hiyruwdus aγtettiḏ aḏ wityufi, ysesten iƹessesen aḏ yeḥkem s tmenγiwtesen. wembeƹd iḥewel hiyruwdus seg lyehuwdiya aḏ yesken g lqeyṣeriya.

20 aḏ yusi iγeccec af midden n ṣuwr aḏ ṣeyda. yaxy ugeḏḏen aḏ nkiyyen mam ireḥ al bilastus maqqar n ixuddimenis ḍelben g smaḥ, afelxaḍert wsiyn dderen seg lxiyr n lmemelkeṯ n hiyruwdus.

21 as lliy tayqabel hiyruwdus indin lliy nkiyyenten yireḍ lbasis n lmuluk aḏ ygeƹmez af lƹercis yetteg g lxiṭab. 22 yaxy ṣedƹen midden: «ayuh d ṣṣut n yjen seg irebbiyen muc d ṣṣut n lƹebd.» 23 yefreḥ hiyruwdus aḏ wiyeḥmiḏc rebbiy. yaxy iwettiy lmleyka n rebbiy ƹlewleh. aḏ hjemneṯ felles tikečewin yemmuṯ.

24 amma dwiy n rebbiy yuṣel al ggeṯ d midden. 25 aḏ wsiyn bernaba aḏ cawel ggen lwajbesen g uwrceliym. aḏ rrend al anṭakiya aḏ yiḏesen yuwḥenna lliy mmelnas merqes.