1 ussan diyn rnin tlamḏa. aḏ xernennen wuḏeyen iberraniyen af ibeldiyen afelxaḍert tedjelinesen wileqinec lbayesneṯ seg lƹineṯ lliy ttucenteṯ kul as.

2 yaxy sγuyen imersal af tlamḏa uwanasen: «widyettic siyes anedj beccer s lmesiyḥ bac anelha s uca n lƹineṯ. 3 ayya yeṯmenneγ wazeṯ 7 siwem d ṣbiḥen aḏ čuren s rruwḥ lqudus aḏ tmesniwt bac aggen ayuh n lxeḏmeṯ. 4 we anelha neccin s tẓalliṯ aḏ ubeccer.»

5 yeƹjebbesen ayuh n dwiy. yaxy wazan istifanus aḏ netta yečur s liyman aḏ rruwḥ lqudus, aḏ filibbus, aḏ burxurus, aḏ nikenur, aḏ tiymun, aḏ berminas, aḏ niqulawus lliy seg anṭakiya yeḏwel d uḏay. 6 aḏ uyenten al imersal lliy ẓullen aḏ ggen ifesnesen fellasen. 7 aḏ yerniy dwiy n rebbiy yuṣel al ggeṯ d midden. aḏ rnin ggeṯ lliy ḥefden g uwrceliym. qbellen ggeṯ d lkuhhan s yesuwƹ aḏ umennen.

8 istifanus lliy yečur s nnaƹmeṯ n rebbiy aḏ lqudretis, yusi yetteg leƹjayeb aḏ lmuƹjizaṯ d lemayer zzaṯ midden. 9 yaxy bbedenas irgazen n lmejmeƹ n leḥrar lliy wsiyn d ičiwen lliy usend seg lqiriniya aḏ liskenderiya aḏ midden iḍen seg kilikiya aḏ asiya. aḏ qqimen tkaceḥen diyes. 10 lekenti wiquddenc rren af lḥikemtis aḏ rruwḥ lliy ydugga af imis. 11 yaxy ucen iflusen y lbeƹḍ n midden bac amlen lliy nihnin slen istifanus ideƹƹu g muwsa aḏ rebbiy.

12 aḏ čuren fellas ulawen n midden aḏ iwesseren aḏ lliy seḥfeḍen g cceriyƹeṯ. yaxy ṭṭefent. aḏ awyent al lmejles meqqar.

13 aḏ uγend mam yecheḏ felles s tkerkas. aḏ uwan lliy netta diyma ideƹƹu g lheykel aḏ cceriyƹeṯ. 14 aḏ uwan: «neslas yemmal: < rahiy yesuwƹ nnaṣiriy tayehdem lheykel we aybeddel lefrayeḍ lliy yucenextend muwsa. > » 15 mniyn smuqelnas lliy llan g lmejles meqqar lkul zren uḏmis yetreq amellaḵ d uḏem n lmleyka.