1 yuṣel buwlus al derba aḏ al listera lliy yusi diyes yjen seg tlamḏa ismis timuṯawus. yedjis seg wuḏeyen lliy menen aḏ babis d yuwnaniy. 2 aḏ wsiyn aweṯen g listera aḏ yquniya cekren g timuṯawus. 3 yaxy yecreh buwlus af iweyis yiḏes y ubeccer. aḏ idehri afelxaḍert wsiyn wuḏeyen g aydin n umkan ssenen lliy babis d yuwnaniy. 4 aḏ buwlus aḏ ayuh n aweṯen nnaḍḍen s umkan al umkan tbecren s luwṣayaṯ lliy mfehmen fellesneṯ imersal aḏ izmimen g uwrceliym bac aggen sisneṯ midden. 5 aḏ yusi liyman n lemjameƹ n lmuminin yeteṯquwa aḏ leƹdedesen imeγγer as baƹd as.

6 yuwayasen rruwḥ lqudus witbecrenc s siydneγ g asiya. yaxy rzeffen al fiyrijiya aḏ γelaṭya. 7 mniyn uṣellen al leḥduḏ n miysiya, nnaḍḍen al biyṯiniya. lekenti rruwḥ n yesuwƹ yuwayasen wisteḏfenc. 8 yaxy ƹeddan af miysiya g ubriḏesen al lmers n teruwas. 9 yiḍ diyn, yezra buwlus g tirjelt argaz seg meqduniya yetjeheyas, yemmal: «qdeƹ iylel al meqduniya tƹewendeneγ.»

10 lweqt ḏḏin, nefhem lliy rebbiy yexs anbeccer g meqduniya. yaxy nesmuḏ asenreḥ fiseƹ.

11 nuli g lbabur seg lmers n teruwas al samuṯraki. aḏ al ača nkemmel terzeft al lmers n niyabuwlis. 12 aḏ s yin al filibbi temeqqart n tmurewin n meqduniya lliy steƹemrenteṯ iruwmiyen. aḏ neqqim diyes ussan. 13 as n sebbeṯ, neffeγ seg tmura al cceṭ n lwaḏ balek anef mkan lliy lmeḏḏen wuḏeyen tẓallan diyes. aḏ neqqim ndugga y tseḏnan lliy mleyemneṯ. 14 aḏ jaresneṯ ijeṯ seg tmura n ṯiyatira tezenza g leqmac d ḥbari. tetzella diyma y rebbiy aḏ ismis liydiya. aḏ nettaṯ tusi teseγda diyneγ. yaxy imir rebbiy ulis bac ataqbel dwiy n buwlus. 15 mniyn zizdines nettaṯ aḏ middenis, tjeheyaneγ bac anreḥ al γares, tuwa: «kan tufim lliy neči nembelḥeq umenneγ s siydneγ ḏfeṯ al tzaqqaw.» yaxy nƹedda.

16 ijuwas, mniyn tanreḥ aneẓẓal, teƹreḍḍeneγ ijeṯ yeskenniṯ rruwḥ n uteggez. aḏ wsiyn lesyaḏis rebḥen ggeṯ d iflusen seg tegzis. 17 aḏ tuḏel teggur deffer buwlus aḏ defereneγ tetṣeyyeḥ: «ayuh n midden d leƹbaḏ n rebbiy lliy yeƹla, tafensiḵnen abriyḏ n mneƹ.» 18 aḏ teqqim tetteg amyuh ussan almiy iγeccec buwlus ggeṯ. aḏ yenneḍ al rruwḥ lliy diyes yuwayas: «s ysem n yesuwƹ lmesiyḥ ffeγ siyes.» yeffeγ ƹlewleh.

19 mniyn ufen lesyaḏis lmeṣwarsen ykemmel, ṭṭefen buwlus aḏ siyla awyenten al ssaḥeṯ temeqqart bac aḥekmen fellasen. 20 aḏ awan y lḥukkam: «ayuh n sen n irgazen d wuḏeyen aḏ tteggen g lehrej d meqqar g tmurenneγ. 21 mmalen y midden aggen iḥejeyen yexs witenqebelc aḏ wintegc sisen necci lliy d iruwmeyen.» 22 yaxy γecceccen midden fellasen. aḏ skeṣnasen lḥukkam leḥweyjesen. aḏ ḥkemmen fellasen s lfelqeṯ. 23 wettenten s ṣṣut ggeṯ. aḏ ggenten g lḥebs. aḏ uwan y uƹessas meqqar n lḥebs ayƹus yeqƹeḏ. 24 yeggi ayuh n argaz mammeḵ uwanas; yeggin g lḥebs n jaj. aḏ yeggisen idernesen g tilweḥin.

25 azgenyeḍ, mniyn yusi buwlus aḏ siyla tẓallan aḏ tsebḥen y rebbiy s izli aḏ imeḥbas seγdan disen, 26 yuqeƹ zelzal d meqqar. ixelxel lsisan n lḥebs. aḏ imir lbibanis aḏ iqqan n imeḥbas lkul.

27 yesfeqqed aƹessas meqqar yid zelzal. mniyn yezra lbiban miren yeḥsab imeḥbas rwellen. yenzeγγed ssiyfis bac ayenγ imanis. 28 lekenti buwlus iṣeddeƹ: «wineγc imaniḵ. rahiy lkulna nella deh.»

29 yaxy yeḍleb nnir. aḏ ineggez al jaj aḏ netta yeterjiji. yezzel azzaṯ buwlus aḏ siyla. 30 aḏ ysefγin al barra ysesetnin: «ay ya lmuƹelmin, matta yexs aggeγ bac amenƹeγ?»

31 uwanas: «men s siydneγ yesuwƹ amenƹeḏ cek aḏ neseniḵ.»

32 wembeƹd becrent netta aḏ lliy yiḏes s dwiy n siydneγ. 33 yaxy yewyin iddin ƹlewleh idewayin. aḏ zizdines netta aḏ nnasenis lkul. 34 aḏ yewyin al tzaqqas. yeggasen ṭṭewleṯ n uču. aḏ yefreḥ ggeṯ netta aḏ nnasnis afelxaḍert umennen s rebbiy.

35 tajji nkiyyen lḥukkam iƹesekriyen bac mlen y umeqqar n iƹessasen aysiyeb buwlus aḏ siyla. 36 yuwa ƹessas y buwlus: «nkiyyeniḏ lḥukkam bac afensiybeγ, fγeṯ af imanuwem ṭuruh wittegeṯec.»

37 yaxy iγeccec buwlus yuwa y lliy usend: «wetneneγ zzaṯ midden menγir lḥukem aḏ neccin d iruwmeyen. aḏ gnaneγ g lḥebs. mammeḵ aγensiben man γiyr man snen midden lkul. aha, yexs adesen nihnin we aγensiben.»

38 aḏ uwan iƹesekriyen y lḥukkam af mag yuwa buwlus. yaxy ugeḏḏen mniyn slen lliy nihnin d iruwmeyen. 39 aḏ usend ḍelben g smaḥ. aḏ seybenten. aḏ uwanasen afγen seg tmura diyn. 40 yeffeγ buwlus aḏ siyla seg lḥebs. aḏ reḥḥen al tzaqqa n liydiya, mani ufen aweṯen aḏ cejƹenten. wembeƹd ffeγen seg tmura.