1 g tfeṣka n as 50, wsiyn lmumniyn lkul mleymen g umkan yjen. 2 yaxy slen lḥes qwi yused seg ujenna amellaḵ d aḍu mqqar yetzeffer g lḥuc lliy llan diyes. 3 aḏ zren timsi tetlebleb am ilsawen. aḏ yezwa af kul yjen sisen iles. 4 yaxy čuren lkulhum s rruwḥ lqudus. ḏwellen duggan s lγawi iḍen lliy yseḥfedasen rruwḥ lqudus mammeḵ aḏuflayen sisneṯ.

5 aḏ yusi diyes g uwrceliym lweqt ḏḏin ggeṯ d wuḏeyen deynin seg indin lliy usennesd seg lbulden lkul. 6 mniyn slen lḥes meqqar, usnesend midden. yaxy miren imewnesen afelxaḍert kul yjen yesγda disen duggan s leγutis. 7 fehhen nyeƹdel aḏ sestenen beƹḍhum:

«yaxy muc inuh lkul lliy ddugan seg ljeliyl? 8 mammeḵ zeγ yeseγda kul yjen sineγ leγweṯ n tammurt lliy yluled diyes? 9 rahiy diyes jarenneγ, iferritiyen aḏ imeddiyen aḏ iƹellamiyen aḏ seg indin lliy seknen jar lwiḏan aḏ lyehuwdiya aḏ kebbudukiya aḏ bunṭus aḏ asiya, 10 aḏ fiyrijiya aḏ bemfiyliya aḏ miṣr aḏ lqirineya g liybiya. aḏ jarenneγ ggeṯ usend seg ruwma 11 seg wuḏeyen aḏ lliy ḏwellen d wuḏeyen aḏ ikerritiyen aḏ ibiyeṯen. aḏ qa neccin neseγda disen duggananeγ s dwiyneγ af lmuƹjizaṯ lliy yeggineṯ rebbiy.»

12 yaxy fehhen aḏ ttumehemcen sestunen g beƹeḍhum: «matta lmeƹnas ayuh.» 13 aḏ yella mam yuwa aḏ netta yeddeṣ: «inuh skerren.»

14 yebbed buṭrus netta aḏ imersal ttenyaṯ lliy wsiyn ḥadec. iṣeddeƹ yuwa y midden:

«ayya wuḏeyen, ayya lliy seknen g uwrceliym lkul, sseγdeṯ dwiyw bac asnem leḥqiqeṯ. 15 inuh wiskirenc mammeḵ teḥsabem. rahiy wicci d tisseƹ n tajji. 16 lakin d ayuh lliy yuwa fellas nnabiy yuwiyl:

17 yemmal rebbiy:

<g ussan lliy tadesen

tasezwiγ rruwḥiw af midden lkul.

we aḏulen d lenbiya,

ṭarwiwiṯuwem aḏ yessiṯuwem.

we azren imezyennuwem tirejlin.

aḏ iwessernuwem atentezren g iḍeṣ.

18 g ussan diyn tasezwiγ rruwḥiw

af lliy umennen siyi lkul,

af irgazen aḏ tiseḏnan,

we aḏulen d lenbiya.

19 taggeγ leγrayeb g ujenna nnaj

aḏ lmuƹjizaṯ d lemayer af tammurt dday.

iḏamen aḏ timsi aḏ sḥab n dduxan.

20 aḏ qebbel man adyas as n rebbiy as diyn meqqar,

tayebbes ddu n tufuyt

tatezweγ teziri am iḏamen.

21 aḏ kul yjen ayeṭṭef g rebbiy ayemneƹ. >

22 ayya aṯ israyil, sseγdeṯ ayuh n dwiy: rahiy yesuwƹ nnaṣiriy yeggi rebbiy af ifesnis lmuƹjizaṯ. aḏ yeggi jarewem leγrayeb aḏ lemayer mammeḵ tessennem. 23 lekinti yedjawem rebbiy lliy yessen kul cey, afelxaḍert yexs amyuh ateṭfem we atṣelbem we atenγem s ifesn n weribekkaḍen. 24 aḏ rebbiy ysekri seg jar lliy mmuṯen aḏ ysefγi seg uγenna n tmettent afelxaḍert temettent witetequdduc atetṭef γares. 25 dawud yuwa g umkan n yesuwƹ:

<zerreγ g rebbiy zzaṯiw diyma,

yella af liminiw bac wituṭṭixc.

26 afelxaḍert n aydin yefreḥ uliw

ysebbeḥ ilsiw.

tariḥeγ aḏ neči ssugumeγ.

27 wiltetedjic g burriƹ n temettent,

wiltetarric neči meqdusiḵ d ijdi g leqber,

28 tsiḵendiḏ abriyḏ ṣbiḥ n temeddurt,

taferḥeγ ggeṯ afelxaḍert telliḏ diyma iḏiy. >

29 ayya yeṯma, ṭuruh tafenemleγ ayuh n dwiy zzaṯ midden lkul; babenneγ dawud yemmuṯ aḏ yemmunbel, aḏ lqebris yella al as wuh. 30 dawud nnabiy yessen lliy rebbiy yedjullas af lliy tadyas seg lxelfis lmesiyḥ we aygeƹmez af lƹercis. 31 yuflay af tneḵri n lmesiyḥ lliy isiḵenasted rebbiy aḏ yuwa lliy netta wiyetγimic g burriƹ n temettent aḏ wititarric d ijdi g leqber. 32 rahiy ayuh n yesuwƹ ysekri rebbiy seg tmettent aḏ neccin lkulna d cuhhaḏ. 33 mniyn iqamy rebbiy yeggi af liminis. yelqa s babis rruwḥ lqudus lliy yuƹeḏḏi siyes. aḏ ysezwad fellenneγ ayuh n rruwḥ lqudus. aḏ lliy tzarrem diyes ṭuruh diyneγ, aḏ teseγdim diyes. rahiy siyes netta. 34 rahiy dawud wiyulic al ujenna. aḏ netta yuwa:

yuwa rebbiy y siydi:

<geƹmez af almiyniw,

35 bac aggeγ leƹdaḵ adug iderniḵ. >

36 yexs asnem yeqƹeḏ, ayya aṯ israyil lkul. rebbiy yeggi yesuwƹ wuh lliy tediyem kennim g ifesnis imesmeren af ṣṣelib d siydnas aḏ d lmesiyḥ.»

37 mniyn slen lliy ḥderren ayuh n dwiy aḏ γennan ulawnesen, sesetnen buṭrus aḏ imersal ttenyaṯ: «matta aneg ayya ayeṯmeneγ.»

38 yaxy yerrasen buṭrus: «tabeṯ. aḏ adj ayettuzizdi kul yjen siwem we ayemen s ism n yesuwƹ lmesiyḥ, bac afenyeγfer ibekkaḍnuwem we afenyuc rruwḥ lqudus d lhediyeṯ. 39 ayuh n lweƹd y kennim aḏ y ṭarwiwiṯuwem aḏ y lliy bƹeḏḏen lkul, aḏ y indin lkul lliy tasenyesγuy rebbiynaγ.»

40 aḏ yerniy yuflay buṭrus y midden aḏ isiḵnasen g lxuṭbeṯ, yuwa: «fγeṯ seg ayuh n midden lliy ƹerḍen y rebbiy bac amenƹem.» 41 lliy slen dwiys ttuzizdyen, aḏ rnin as diyn 3,000 d lmumnin.

42 aḏ wsiyn lkulhum seγdan g dwiy n imersal diyma, dderren jmiyƹ, tzunun g aγrum aḏ tẓallan.

43 mniyn mmugneṯ lmuƹjizaṯ aḏ lemayer aḏ leγrayeb ggeṯ af ifesn n imersal, ugeḏḏen midden lkul. 44 lliy umennen wsiyn am argaz yjen aḏ yusi kul ciysen jmiyƹ, 45 aḏ wsiyn zenzan lliy γarsen bac azunen iflusen jaresen feleḥsab n mag yesetḥeq kul yjen sisen, 46 aḏ ttesend kul as al lheykel. aḏ tetten jmiyƹ g tzaγwinesen aḏ nihnin crehhen aḏ freḥḥen, 47 aḏ tsebḥen y rebbiy. aḏ wsiyn ƹejben y midden. aḏ yusi rebbiy kul as irenni midden y lmumnin lliy menƹen.