1 usend lbeƹḍ n wuḏeyen seg lyehuwdiya al anṭakiya. aḏ uḏellen seḥfeḍen g aweṯen mmalen: «rahiy witmenƹemc kan almiy addehrem af leḥsab n cceriyƹeṯ n muwsa.» 2 yaxy ƹandenten buwlus aḏ bernaba ggeṯ. aḏ beƹd keceḥ, smuḏen lmumnin anekyen buwlus aḏ bernaba al uwrceliym aḏ lbeƹḍ n lmumnin tteniyeṯ bac aḥekren ayuh n lmucekleṯ nihnin yid imersal aḏ izmimen.

3 aḏ ceyƹenten tlamḏa. rzeffen al uwrceliym beƹd mag ƹeddan af finiyqiya aḏ ssamira. aḏ uwan y aweṯen disneṯ: «ḥetta lliy muc d wuḏeyen umennen s lmesiyḥ.» yaxy sefrḥen aweṯen s ayuh ggeṯ. 4 mniyn uṣellen al uwrceliym, freḥḥen sisen lmejmeƹ aḏ imersal aḏ izmimen. aḏ uwan buwlus aḏ bernaba y inuh matta yeggi rebbiy af ifesnesen lkul. 5 lekenti lmuminin lliy debƹen g iferryisiyen bbedden aḏ uwan: «yexs aggen lmumnin lliy muc d wuḏeyen s cceriyƹeṯ n muwsa we addehren.»

6 yaxy mleymen imersal aḏ izmimen y dwiy af ayuh. 7 aḏ beƹd mag uflayen af ayuh ggeṯ, yuwa buṭrus: ay ya yeṯma kennim tessennem lliy rebbiy iwazayiḏ s luwel bac aseṣleγ lebcareṯ y lliy muc d wuḏeyen bac aḏamnen siyes. 8 aḏ rebbiy lliy yessen matta g ulawen yecheḏ lliy netta yeqbelin madam yucesen rruwḥ lqudus mammeḵ yuceneγtiḏ. 9 rahiy netta yerreneγ kifkif madam ysendef ulawnesen s liyman.

10 mala maγer witetegemc matta yexs rebbiy? aḏ texsem aggem af tḵermin n tlamḏa ḥaja wiquddenc ibabnenneγ atqamen aḏ winqudc neccin zada. 11 rahiy neccin nesteƹqaḏ lliy tanemneƹ neccin yid nihnin s nnaƹmeṯ n siydneγ yesuwƹ.

12 lweqt ḏḏin, susmen midden lkul. aḏ aqimen sseγdan g buwlus aḏ bernaba lliy dugganesen af lmuƹjizaṯ aḏ lemayer aḏ leƹjayeb lliy sarneṯ af ifesnesen jar lliy muc d wuḏeyen.

13 beƹd mag kemlen dwiy yuwa yeƹquwb:

14 «sseγdeṯ ay yeṯma, yuweyawem simƹan mammeḵ yesmuqel rebbiy al lliy muc d wuḏeyen bac ayweza sisen cceƹb y netta. 15 mammeḵ uwan fellas lenbiya aḏ yetweri g lektab.

16 <beƹd ayuh tadereγ al tezeqqa n dawud

lliy tehdem tateterreγ.

taleymeγ iḍγaγen n lsisanis

we atenerreγ.

17 bac alderen midden lkul

midden lliy muc d wuḏeyen talzellen.

18 amyuh yuwa rebbiy s luwel. >

19 afelxaḍert n ayuh yexs winetṣeƹebc af lliy umennen seg lliy muc d wuḏeyen. 20 amma asennari we asennenmel abeṭlen uču n yssum lliy tucent y leṣnam aḏ zna aḏ uču n lliy yexneq aḏ iḏemmen.

21 afelxaḍert cceriyƹeṯ n muwsa s luwel seḥfeḍen diyes g tmurewin lkul. aḏ ƹezmenteṯ g lemjameƹ kul sebbeṯ.»

22 lweqt ḏḏin, mfehmen imersal aḏ izmimen aḏ midden lkul bac anekyen irgazen s γarsen yid buwlus aḏ bernaba al anṭakiya. ayuh n sen nihnin d yehuwḏa lliy mmelnas bersaba aḏ siyla lliy γarsen lqimeṯ temeqqart jar aweṯen.

23 aḏ urinasen: «slam seg awaṯenuwem, imersal aḏ izmimen al awaṯen lkul seg indin lliy muc d wuḏeyen g anṭakiya aḏ suwrya aḏ kilikiya.

24 nesla lliy lbeƹḍ n midden s γarneγ usnewemd man γiyr man asennenmel aḏ ḥeyrnawem s dwiysen. 25 yaxy nemfahem lkulna tanwaza awaṯen we atennenki al γarwem nihnin yid bernaba aḏ buwlus lγaliyen fellenneγ. 26 aḏ nihnin ucen imanesen y lxeḏmeṯ n siydneγ yesuwƹ lmesiyḥ. 27 aḏ qa nenkiy yehuwḏa aḏ siyla bac afenseṣlen matta nexs s imewnesen.

28 rahiy neccin am rruwḥ lqudus winγic anṯeqqel afellawem s iḥajeyen bexlaf ayuh n lwajeb. 29 yexs abeṭlem uču n yessum lliy yetweγres y leṣnam aḏ iḏemmen aḏ yssum n lliy yexneq. we abeṭlem zna. aḏ kan teggim ayuh rahiy teggim teṣbiḥt.

afenyedj rebbiy.»

30 yaxy rzeffen al anṭakiya mani sγuyen y midden bac amleymen. aḏ seṣelnasen lejwab. 31 mniyn ƹzement freḥḥen s ucejjeƹ lliy diyes. 32 aḏ wsiyn yehuwḏa aḏ siyla, ydugga rebbiy af imewnesen zada, nṣeḥen aweṯen ggeṯ aḏ cejƹenten.

33 beƹd ussan, ceyƹenten midden bac aḏulen al lliy nkiyyenten. 34 lekenti siyla yeƹjebbas qimi g anṭakiya. 35 aḏ qqimen diyn buwlus aḏ bernaba seƹzamen aḏ tbecren s dwiy n siydneγ aḏ yiḏesen ggeṯ d midden tbecren.

buwlus aḏ bernaba mferqen

36 beƹd ussan, yuwa buwlus y bernaba: «yya anreḥ anḥekker lḥal n aweṯeneγ g tmurewin lkul lliy nbeccer disneṯ s dwiy n siydneγ.» 37 yaxy yuwa bernaba: «yya anwiy iḏenneγ yuwḥenna lliy mmelnas merqes.» 38 lekenti buwlus wiyeqqil afelxaḍert yuwḥenna yedjin weḥdesen g bemfiyliya aḏ witeniƹewenc g ubeccer.

39 yaxy mkecḥen almiy mferqen. aḏ yewya bernaba merqes yeqdeƹ iylel al qubruṣ. 40 aḏ yewya buwlus siyla yiḏes yerzef beƹd mag baqqent aweṯen s lxiyr aḏ nnaƹmeṯ n rebbiy. 41 ireḥ al suwrya aḏ kilikiya bac ayṯebbet liyman n lemjameƹ n lmuminin.