1 yesmuqel buwlus al lmejles, yuwa: «ay ya yeṯma. rahiy ḏbeƹeγ rebbiy s uliw aḏ nnitiw al ssuh.»

2 yaxy yuwa ḥenaniya rrayes n lkuhhan y yjen seg indin lliy bbedden tmas aywet buwlus af imis. 3 yuwayas buwlus: «afiwet rebbiy, ayya lliy yezƹem s barra, cqal cek tgeƹemzeḏ bac aḥekmeḏ s cceriyƹeṯ. yaxy txelfeteṯ aḏ tuwidasen alwetten.»

4 uwanas lliy bbedden dinet: «yenda tedeƹuḏ g rrayes n lkuhhan n rebbiy.» 5 yerrasen buwlus: «rahiy wisinnexc lliy netta d rrayes n lkuhhan, ayya yeṯma. yetweri g lektab: < wideƹƹuc y rrayes n cceƹbiḵ. > »

6 afelxaḍert buwlus yusi yessen lliy g lmejles iṣedduwqiyiyen aḏ iferryisiyen, iṣeddeƹ: «ay y yeṯma, neči d ferryisi memmis n ferryisi aḏ ṭuruh taḥekmen fella afelxaḍert temneγ lliy diyes tneḵri beƹd temettent.»

7 mniyn slen ayuh n dwiy, yuqeƹ xaṣem jar iṣedduwqiyiyen n lmejles aḏ iferryisiyenis. aḏ mzunen af sen, 8 afelxaḍert iṣedduwqiyiyen witemnenc s tneḵri aḏ lmleyka aḏ lerwaḥ. amma iferryisiyen temnen sisen lkul. 9 yuli ṣyaḥ, aḏ bbedden lbeƹḍ n lliy seḥfeḍen g cceriyƹeṯ seg iferysiyyen uwan: «γarneγ neccin, ayuh n argaz wiyeggi ḥaja, balek yuflayas rruwḥ naγ lmleyka.»

10 yerniy nuγu jaresen almiy yugeḏ lqayed n laf zunen buwlus af sen. yaxy yuwa y iƹesekriyen azwan we atxedfen we aterren al lmuƹesker. 11 iddin, yeḍherred siydneγ y buwlus yuwayas: «witeggac. rahiy mammeḵ techeḏdiḏ g uwrceliym taltcehdeḏ g ruwma zada.»

12 tajji, mfehmen lbeƹḍ n wuḏeyen af tmenγiwtis. aḏ djullen: «wintet winses kan almiy nenγi.» 13 aḏ inuh wsiyn iṭer n 40. 14 reḥḥen al imeqqaren n lkuhhan aḏ iwasseren. aḏ djullen: «rahiy winetḏeweq ḥetta ciy kan almiy nenγi.» 15 aḏ kennim lliy d ixfewen n lmejles tetqudum amlem y lqayed n laf afentiḏyenkiy ača. we arrem imanuwem tatsestnem yeqƹeḏ. we atnenγ neccin qebbel man ayeṣel al deh.

16 lekenti ayuh n lexber yesla siyes memmis n xutis n buwlus. yaxy ireḥḥas al lmuƹesker. yuwayas af mag smuḏnas. 17 aḏ yesγuy buwlus af yjen seg lquyyad n almiyyaṯ. yuwayas aywiy aydin n umezyan al lqayed n laf bac asimel af ḥaja.

18 yaxy yewyi. aḏ yuwa y lqayed n lef: «yesγuyiḏ meḥbus buwlus. yuweyiḏ afdeγeγ ayuh n umezyan afelxaḍert γares man afimel.»

19 yeṭṭef lqayed n laf amezyan diyn seg fusis qqimen weḥdesen, yuwayas: «matta texseḏ altemleḏ.»

20 yerras: «rahiy wuḏeyen smuḏen tanγen buwlus. aḏ tafemlen asentiḏerreḏ. we arren imanesen taƹewden atsesetenen yeqƹeḏ. 21 wisentiḏugeyc afelxaḍert iṭer n 40 d irgazen djullen witeten wisesen kan almiy nγent. aḏ jren imanesen bac atenγen. aḏ ṭuruh ssugumen asentiḏuyeḏ.»

22 yenkiy lqayed n laf amezyan ayreweḥ beƹd mag yuwayas: «wimmal y ḥed af lliy tewidiḏ.»

23 aḏ yesγuy y sen seg lquyyad n almiyyaṯ yuwayasen: «jreṯ mitin d iƹesekriyen bac areḥen al lqeyṣeriya g ttesƹa n ggiḍ. aḏ yiḏesen 70 seg lfursan aḏ mitin seg indin lliy tḥereben s rrumḥ. 24 aḏ zwayel y userkeb n buwlus bac ayeṣel labas al lḥakem filiks.»

25 aḏ yuri y lḥakem lejwab yemmal diyes:

26 «seg kuludiyus liysiyas slam al lḥakem meqqar filiks.

27 ayuh n argaz ṭṭefent wuḏeyen. aḏ smuḏen tatenγen. aḏ sliγ lliy netta d ruwmey, reḥḥeγ fiseƹ neči aḏ iƹesekriyen semenƹext. 28 aḏ uwyixt al lmejlesesen bac asneγ tuhemtis. 29 aḏ ufiγ lliy netta methum s uṯƹeddi af cceriyƹeṯ n muwsa. amma yeḍherriḏd lliy netta wiyeggi ḥaja bac ayetweḥbes naγ ayemmunγ.

30 aḏ sliγ lliy wuḏeyen smuḏen tatenγen. yaxy nkiyγeḵtiḏ ƹlewleh. aḏ uwiγ y lliy ckan siyes adesen ackan γareḵ. afyedj rebbiy.»

31 amyuh awyen iƹesekriyen buwlus ggiḍ al antiybetris mammeḵ yuwayasen lqayed n lef. 32 aḏ tajji rrend al lmuƹesker. aḏ djen lfursan areḥen yid buwlus. 33 mniyn uṣellen al lqeyṣeriya, ucent y lḥakem netta aḏ lejwab.

34 yeƹzem lejwab. aḏ ysesten buwlus af lebladis. mniyn yesla lliy netta seg kilikiya, 35 yuwayas: «taḥekreγ lmuckeltiḵ almiy usend lliy tackan siyeḵ.» aḏ yuwa y iƹesekriyinis aggen buwlus g leqṣer n hiyruwdus we aƹussen felles.