1 ijuwas ireḥ buṭrus aḏ yuwḥenna al lheykel bac azellen tẓalliṯ n tmeddiṯ. 2 aḏ af lbab n lheykel lliy mmelnas imi lliy yezƹem yusi yetgeƹmaz argaz d meclul s manis yluled. aḏ wsiyn midden kul as teγentiḏ bac ayeḍleb ṣṣedqeṯ seg indin lliy teḏfen al lheykel.

3 mniyn yezra buṭrus aḏ yuwḥenna taḏeḏfen yeḍleb s γarsen ṣṣedqeṯ. 4 yaxy smuqelnas yeqƹeḏ, aḏ yuwayas buṭrus: «smuqleneγ.» 5 yaxy yerceq ṭiṭawinis disen. yesugum asucen ṣṣedqeṯ. 6 yuwayas buṭrus: «wiγri la lfejreṯ la wureγ. lekenti tafuceγ lliy γari; s ysem n yesuwƹ lmesiyḥ lliy seg nnaṣira, yya kker yyur.» 7 aḏ s fusis limina ysekri.

yaxy ƹlewleh uzellen iḏemmen g idernis aḏ inerzewnis. 8 ineggez yebbed yuḏel yeggur aḏ iƹedda yiḏesen al lheykel aḏ netta yeggur yetneggez aḏ yetsebbeḥ y rebbiy. 9 zrent midden lkul lliy llan diyn yeggur yetsebbeḥ. 10 mniyn ufent d aydin n neḍlab meclul lliy yusi diyma yetgeƹmaz zzaṯ lbab miren imewenesen aḏ wifhimenc mammeḵ iṣar aydin.

11 mniyn yusi aydin n argaz ikerci g buṭrus aḏ yuwḥenna, fehhen midden. aḏ fzeƹen mleymen fellasen g lburṭal n suleyman. 12 mniyn yezra aydin, yuweyasen buṭrus:

«ayya aṯ israyil maγer tfehhem afelxaḍert n ayuh? aḏ maγer tesmuqulmaneγ amellaḵ s lquderteneγ naγ s dyenteneγ nerry yeggur? 13 rahiy rebbiy n ibrahiym aḏ isḥaq aḏ yeƹquwb, rebbiy n ibabnneγ imejjed memmis yesuwƹ lliy tucimt kennim s ifesnuwem al tmettent aḏ ternim tluzzem biylaṭus lliy yusi tatiseyyeb bac atyenγ.

14 rahiy d kennim lliy tluzzem biylaṭus bac ayenγ meqdus ṣbiḥ aḏ teḍlebbem seyyeb n yjen ineγ g umkanis. 15 aḏ tenγim lliy yettuc g temeddurt, lekenti rebbiy ysekri seg jar indin lliy mmuṯen aḏ neccin anecheḏ af aydin. 16 aḏ s liyman s ismis, yerra ismis lquweṯ y ayuh n argaz lliy tessennemt aḏ tzarrem diyes. rahiy liyman s yesuwƹ yucas ṣṣeḥeṯ kamla zzaṯuwem.

17 neči sseneγ, ay ya yeṯma lliy kennim aḏ imeqqernuwem witeggimc yiḏes teṣbiḥt afelxaḍert witsinemc. 18 amyuh rebbiy yeggi matta yuwa af imewen n lenbiya lkul seg lemmi lliy lmesiyḥ lliy yenkiy tayettuƹeḏḏeb. 19 tabeṯ y rebbiy teḏwelmas bac afenyeγfer ibekkaḍnuwem. we afendesen ussan n lefrej s rebbiy. 20 we afenyenkiy tijekkelt iḍen yesuwƹ lmesiyḥ lliy iwezeyewemtiḏ. 21 afelxaḍert lazem ayeqqim lmesiyḥ g ujenna almiy adyas lweqt lliy tayferrej diyes rebbiy af ddunyeṯ mammeḵ yuwa af imewen n lenbiyas ṣbiḥen s luwel.

22 yusi muwsa yuwa: «rahiy lliy diyma yella tafenyenkiy seg yeṯmewem nnabiy am neči. ggeṯ lliy tafenimel lkul. 23 aḏ lliy witegc s dwiys ayemmukes seg midden n rebbiy.»

24 aḏ af ayuh n ussan uwan lenbiya lkul seg ṣemwyil al lliy usend beƹdis. 25 y kennim lliy yuƹeḏ siyes rebbiy lenbiya. aḏ kennim d iwriṯen n lƹehd lliy yeggi rebbiy yid ibabnuwem. yuwa y ibrahiym: «s lxelfiḵ tanumreγ midden lkul n tammurt.» 26 amyuh yenkiy rebbiy memmis y kennim d imezweren bac afeninumer we afenyer af igga n bekkeḍu.»