1 cawel lliy yusi iγella aḏ yetjella tayenγ tlamḏa n siydneγ. ireḥ al rrayes n lkuhhan. 2 yeḍlebi. yuwayas ayeri y lmejmeƹ n wuḏeyen g dimecq bac atƹewnen af iṭṭaf n irgazen aḏ tseḏnan lkul lliy debƹen g ayuh n abriyḏ. we atendeγen ketfen al uwrceliym. 3 yerzef. mniyn ḥeḍerbac tayeṣel al dimecq, iwelƹej fellas ddu seg ujenna. 4 yaxy yuda af tammurt. yesla mam yemmalas: «cawel ay cawel, maγer tḍelmeḏ diyi.»

5 ysesetni cawel: «d mam cek ay siydi.»

yaxy yerras: «neči d yesuwƹ lliy tḍelmeḏ diyes, al lemmi teqimeḏ teḥrenneḏ am aγyul.» 6 yuwa cawel aḏ netta yeterjiji: «ayya siydneγ matta taxseḏ ggeγ?» yerras: «kker aḏef al tmura yella mam tafimel metta taggeḏ.»

7 amma indin lliy wsiyn yid cawel bkemmen fehhen afelxaḍert slen ṣṣut aḏ wizrin ḥed. 8 yekker cawel, imir ṭiṭawinis lekenti wiyezri ḥaja. yaxy nzeγent seg fusis, seḏfent al dimecq. 9 mani yeqqim 3 d ussanaṯ wizerc aḏ witet wises.

10 aḏ yusi g dimecq yjen seg tlamḏa ismis ḥenaniya yusesd siydneγ g tirjelt yesγuyas: «ay ḥanenya.» yaxy yeweyas «qa usiγd ay siydneγ.»

11 yaxy yuwayas siydneγ: «ureḥ al ccareƹ lliy lmmelnas ccareƹ lliy yeqƹeḏ. aḏ sesten af argaz seg ṭersuws ismis cawel. yella yetẓella ṭuruh g tzaqqa n yehuwḏa. 12 aḏ yusi cawel yezra g tirjelt argaz ismis ḥenaniya tayeḏef felles we ayeg felles fusis, ayeḏwel izer.»

13 yuwa ḥenaniya: «lekenti ay siydneγ uwaniḏ ggeṯ n midden af ḍḍulem meqqar lliy yeggi y lliy umennen siyeḵ g uwrceliym. 14 aḏ mammeḵ ucennas imeqqaren n lkuhhan lḥeq bac ayeṭṭef kul yjen iḍelleb g rebbiy s ismiḵ.»

15 yaxy yuwayas siydneγ: «kker ureḥ rahiy waziγ ayuh n argaz bac aysaṣel ismiw y midden ttanyaṯ aḏ y lmulukesen aḏ y aṯ israyil. 16 aḏ tassiḵneγ mennit yexs ayettuƹeḏeb afelxaḍert n ismiw.»

17 ireḥ ḥenaniya, yuḏef al tzaqqa n yehuwḏa, yeggi fusis af cawel, yuwa: «ay cawel uwa. rahiy siydneγ yesuwƹ lliy yeḍherreḵd g ubriḏ yenkiyiḏ al γareḵ bac aḏuleḏ tzarreḏ we ačareḏ s rruwḥ lqudus.»

18 yaxy ƹlewleh tuda seg ṭiṭawin n cawel ḥaja am tiqecriwin yeḏwel izer. aḏ yekker yettuzizdi. 19 aḏ yeča, terred diyes rruwḥ. aḏ yeqqim ussan yid tlamḏa g dimecq.

20 ƹlewleh yuḏel yetbeccer g lemjameƹ n wuḏeyen yemmal: rahiy yesuwƹ am memmis n rebbiy. 21 fehhen midden uwan: yaxy muc d wuh lliy yusi ineq g lliy tbecren s ysem n yesuwƹ g uwrceliym? yaxy muc d netta lliy yused al deh bac atenyeṭṭef we ateniwi ketfen al imeqqaren n lkuhhan?

22 amma netta yeḏwel d lfeleḥ g ubeccer. aḏ yeqqes imewen n wuḏeyen lliy dderen g dimecq s lḥikemtis. aḏ yusi yeseḵen lliy yesuwƹ netta d lmesiyḥ.

23 aḏ beƹd ussan d iziraren, smuḏen wuḏeyen g dimecq atenγen. 24 yaxy ifeq sisen. aḏ nihnin wsiyn tƹussun ggiḍ uggas af lbiban n tmura bac atenγen almiy tayeffeγ seg yjen sisen. 25 yaxy uwynt lbeƹḍ n tlamḏa ggiḍ. ggent g isni. aḏ sezwent s tzarwin s nnaj ssuwr.

26 mniyn yuṣel al uwrceliym, ireḥ al tlamḏa lekenti ugeḏḏen siyes afelxaḍert wuminenc lliy netta yeḏwel d tilmiḏ. 27 yaxy yewyi bernaba al imersal. aḏ yuwayasen mammeḵ yeḍherresd siydneγ g ubriḏ aḏ yuflayas. aḏ mammeḵ yuḏel yetbeccer s ysem n yesuwƹ man γiyr tiwdi g dimecq.

28 yuḏel yetreḥ yettesed yiḏesen g uwrceliym yetbeccer s ysem n siydneγ yesuwƹ. 29 aḏ yusi yetkaceḥ g wuḏeyen n lyuwnan. yaxy smuḏen tatenγen. 30 mniyn slen yeṯmas awyent al lmersa n lqeyṣeriya. aḏ nkiyyent al ṭersuws.

31 aḏ lweqt ḏḏin yusi lmejmeƹ n lmumniyn g lyehuwdiya aḏ ljeliyl aḏ ssamira af xiyr ƹlihi. aḏ yṯqewa g liyman aḏ tiwdi seg rebbiy aḏ yerniy lƹeded n lmumniyn s rruwḥ lqudus.

32 aḏ buṭrus lliy yusi irezzef s umkan al umkan ireḥ al lmumnin g ludda. 33 aḏ yufa dinet meclul ismis iniyas γares 8 d isuggesen yezzel. 34 yuwayas: «ay iniyas yseḥleyaḵ yesuwƹ lmesiyḥ. kker layem tesuytiḵ weḥdeḵ.» yekker ƹlewleh.

35 yaxy zrent lliy seknen lkul g ludda aḏ g ljiheṯ n caruwn, aḏ umennen s siydneγ.

36 aḏ tusi g yafa ijeṯ seg tlamḏa ismis ṭabiyṯa, aḏ lmeƹnas teγzelt. aḏ tusi telha diyma g igga n lxiyr aḏ ƹawn n iqellilen. 37 yaxy temmuṯ ussan diyn, sirdenteṯ. aḏ ggenteṯ g lbiyt nnaj leƹli. 38 mniyn slen tlamḏa lliy buṭrus g ludda, nkiynas sen irgazen tjehanas mmalen «aseneγd ṭuruh.» 39 yekker ireḥḥesen.

mniyn yuṣel, uwyent al leƹli. yaxy ƹerḍentas tedjalin tƹeyeḍneṯ seḵnentas g tsuriyin aḏ leḥweyej lliy tusi ṭabiyṯa tgenna disen.

40 yaxy yuwayasen afγen seg lbiyt, yesjeḏ yetẓella. wembeƹd yenneḍ al lliy temmuṯ yuwayas: «ay ṭabiyṯa kker.» yaxy tmir ṭiṭawinis. mniyn tezri tgeƹmez.

41 yezellas fusis. ysekriṯ. aḏ yesγuy y lmumnin aḏ tedjalin yeresnted tedder. 42 yaxy slen midden g yafa s ayuh n lmuƹjizaṯ aḏ umennen s siydneγ ggeṯ sisen. 43 aḏ yeqqim buṭrus g yafa ussan al yjen d debbeγ ismis simƹan.