1 «ayya aweṯen, ayya iḏbaba, sseγdeṯ ṭuruh difeƹiw af imaniw.» 2 mniyn ufent yduggeyasen s leγweṯ teƹebrenit, rnin susmen. yaxy yuwa:

3 «neči d uḏay, luleγd g ṭersuws lliy tella g kilikiya. lekenti turebbiγ g ayuh n tmura. aḏ ƹzemmeγ af γemelayil terbiyeṯ n cceriyƹeṯ n ibabnneγ. aḏ usiγ witeqqexc g rebbiy am kennim ṭuruh.

4 aḏ usiγ durruγ g ayuh n abriyḏ. aḏ xseγ anγeγ lliy debƹen diyes; tezeleγ deffer irgazen aḏ tseḏnan aḏ tegexten g lḥebs. 5 rrayes n lkuhhan aḏ izmimen d cuhhaḏ af ayuh n dwiy. rahiy awyiγ s γarsen lejwabaṯ al yeṯmesen g dimecq bac alƹewnen af iṭṭaf n indin lliy diyn. we atendeγeγ al uwrceliym bac atuƹeqben. 6 zzel, mniyn ḥeḍerbac tadeṣleγ al dimecq, iwelƹej fella ddu d meqqar seg ujenna. 7 yaxy udiγ af tammurt. aḏ sliγ ṣṣut yemmeliḏ: < cawel, cawel, maγer tḍelmeḏ diyi. >

8 rriγas: < d mam cek ay siydneγ. > yuwa: < neči d yesuwƹ nnaṣiriy lliy tḍelmeḏ diyes. > 9 aḏ lliy wsiyn iḏiy zren ddu. amma wislinc ṣṣut lliy yduggeyiḏ.

10 yaxy sesetneγ: < matta aggeγ ay siydneγ?>

yerriḏ: < kker aḏef al dimecq aḏ diyn tafemlen man aggeḏ. > 11 aḏ nzeγniḏ lliy iḏiy seg fusiw afelxaḍert usiγ wizerrexc beƹd mag zriγ aydin n ddu lliy ijehher.

12 yusi g dimecq argaz ismis ḥenaniya iteggeḏ seg rebbiy mammeḵ tuwa cceriyƹeṯ aḏ cekren diyes wuḏeyen n dimecq. 13 yusiḏd. yebbed. yuwa: < ayya uwa cawel smuqel. > yaxy ḏwelleγ zerreγ. aḏ zrixt zzaṯiw. 14 aḏ yuwa: < rebbiy n ibabnenneγ iwezayeḵ bac asneḏ matta yexs we azreḏ weddin lliy d ḥeqqani we asleḏ ṣṣutis. 15 rahiy tastedleḏ d ccehed bac amleḏ y midden lkul af lliy tezrit aḏ teslit. 16 amma ṭuruh matta tesugumeḏ? kker bac attuzizdiḏ. aḏ zelz ibekkaḍniḵ, teḍelbeḏ s ismis bac afyeγfer rebbiy. >

17 beƹd ayuh, rriγd al uwrceliym. mniyn usiγ tẓalliγ g lheykel feγeγ seg ayuh n ddunyeṯ. 18 yaxy zriγ siydneγ yemmeliḏ: < ffeγ fiseƹ seg uwrceliym. rahiy middenis wilγisenc abecreḏ siyi. >

19 awiγas: < ay siydneγ rahiy ssenen lliy neči usiγ ruzzuγ g lemjameƹ af lliy umennen siyeḵ bac atenḥebseγ we atenwetteγ s ṣṣut. 20 aḏ ḥderreγ mniyn yemmuṯ istifanus lliy yetbeccer siyeḵ. aḏ rliγ af tmenγiwtis. aḏ ƹusseγ af leḥweyej n lliy nγent. >

21 lekenti yeweyiḏ: < kker tafnekyeγ yebƹeḏ, al midden iḍen muc d wuḏeyen. > »

22 aḏ wsiyn midden seγdan g mag yemmal. amma mniyn yuflay af midden lliy muc d wuḏeyen, ṣedƹen: «nγ ayuh n argaz, wiyestehelc temeddurt.» 23 aḏ uḏellen tṣeyḥen aḏ tcalan s leḥweyjesen aḏ tcetƹen g ijdi al nnaj.

24 yaxy yuwa lqayed n laf y iƹesekrinis aseḏfen buwlus al jaj, we atwetten s ṣṣuwṭ bac asennen maγer midden tṣeyḥen amyuh.

25 mniyn qqenent bac atwetten, yuwa buwlus y lqayed n 100 lliy tmas: «yaxy yettesed siyes g lqanuwn n ruwma iwat n yjen d ruwmey qebbel man aḥekmem fellas.»

26 mniyn yesla lqayed n 100 aydin, ireḥ al lliy anjis yuwa: «matta tetteggeḏ cek? ayuh n argaz d ruwmey.»

27 yaxy ireḥ bac ayṯebbet weḥdes. aḏ ysesten buwlus: «cek nembelḥeq d ruwmey.» yuwayas «ayya.»

28 yaxy yuwa lqayed n lef: «neči ḏfeƹƹeγ ggeṯ d iflusen bac aḏuleγ d ruwmani.» yaxy yuwa buwlus: «neči luleγd d ruwmani.»

29 lweqt ḏḏin bƹeḏḏen felles iƹesekriyen lliy wsiyn tatwetten. aḏ mniyn iṯebbet lqayed n laf lliy netta d ruwmey, yugeḏ ggeṯ afelxaḍert iketfi s tseleslin.

30 al ača, yesγuy lqayed n laf af imeqqaren n lkuhhan aḏ lliy g lmejles, bac ayessen leḥqiqeṯ n buwlus lliy imiras iqqanis aḏ ysebeddi zzaṯesen.