Milagres de Jesus

Yesu Unolapa Mapofu Mabili

27 Yesu wakapindilambeli ebva ipapo, mapofu mabili akawuntobela, emimila eti, "Nkololo waDavida, mutiwhile ngoni."

28 Wakati engina mun’umba, mapofu akahha kuwunli; Yesu akababhuzwa eti, "Mogalamoyo kuti ndotubula kuthama ikoku?"

Bakahandula beti, "Ee, He."

29 Wakabhata meho abo, eti, "Segalamoyo kwenyu, ngakuyetikale kumuli." 30 Meho abo akabva apofunuka. Yesu akabakowhomesedza eti, "Mube nelebeswa kuti akuna nhu unoziba nekwako."

31 Koga bakayenda bakanobudza banhu muntunhu wose iwhoya.

Yesu Unotjidza Mapofu Mabili

29 Yesu nebadiyiwa babe bakati bebhuda muJerikho mbunga nkulunkulu ukawuntobela. 30 Kwaka kuna balume babili baka bali mapofu baka baligele ntome kwezila, pabakawha kuti Yesu unopinda nayipapo, bakatanga mimila beti, "He, nkololo waDavida, mutiwhile ngoni!"

31 Mbunga wakabatjemela uti ngabanyalale; koga ibo bakamimilila pehhugwi beti, "He, Nkololo waDavida, mutiwhile ngoni!"

32 Yesu wakama akabadana akati kubali, "Mohaka kuti ndimuyetileni?"

33 Bakahandula beti, "He, tohaka kuti meho edu abone."

34 Yesu wakabawhila ngoni, akabhata meho abo, tjinyolotjo bakabva babona, bakawuntobela.

Yesu Unotjidza Bhofu paBhethisayida

22 Bakaswika kuBhethisayida. Bamwe banhu bakahhisa nlume waka ali bhofu, bakawunkumbilisisa kuti awumbhate. 23 Wakabhata nlume waka ali bhofu neluboko, akawuntungamila baka bhuda munzi; akati awumpfila mumeho, akawumbiga maboko, akawumbhuzwa, eti, "Kuna tjawunobona?"

24 Wakamilidza meho, akati, "Ndobona banhu; beyenda yenda semiti."

25 Hule kwayikoko wakawumbiga maboko kakale pameho awe; akabona zwakanaka, wakapofunuka akabona zwinhu zose zwili tjimo tjakwako. 26 Yesu wakawusunungula kuti ayende kanyi kukwe, eti kuwunli, "Usitongogala wangina munzi."

Yesu Unotjidza Mantshi Tjembebebe

31 Wakati abva muntunhu weTire epalula pakati kweSidoni akaswika kugungwa leGalile ali pakati kwentunhu weDikapolisi. 32 Bakahhisa kuwunli umwe waka ali mbebebe kakale ali mantshi. Bakawunkumbila kuti awumbige maboko. 33 Wakawuntola akayenda naye ntome bebhuda mugubungano, akasa zwinyala zwizwe muzebe dzidze akapfila mate aka kunha lulimi gugwe. 34 Wakati alinga pehhugwi kudzimu wakaliga dikahana, akati, "Efatha," hapa kuhanduligwa kobva kuti "Hhulika."

35 Tjinyolotjo zebe dzidze dzika hhulika lulimi gugwe gukasununguka akalebeleka zwakanaka. 36 Wakabalaya kuti basibudze nhu; koga wakati abalaya kujalo, ibo bakabudza hango yose. 37 Betjenama kwazo beti, "Unothama zwinhu zose zwakanaka tjose. Unota kuti bomantshi zwiwhe nembebebe dzilebeleke."

Yesu Unolapa Bhofu Bhathimewusi

46 Bakaswika kuJerikho. Kwakati Yesu nebadiyiwa babe kose negubungano lebanhu gulugulu bebhuda muJerikho, umwe nlume webhofu unoyi Bhathimewusi, nkololo waThimewusi, waka aligele ntome kwezila ekumbila lubhatsho, 47 paakati ewha kuti ndiYesu weNazaretha akatangisa mimila eti, "Yesu, Nkololo waDavida, mundiwhile ngoni!"

48 Banhu banjinji bakawuntjemela bakawumbva kuti anyalale, koga wakayendilambeli emimilila pehhugwi kwazo eti, "Nkololo waDavida, mundiwhile ngoni!"

49 Yesu wakama akati, "Muwundhaneni."

Ndizo bakalidana ilelo bhofu beti kulili, "Iba netjilopa; milika, unokudana!"

50 Lakalahila kutjena ngubo yalo, likapapadzuka likayenda kuna Yesu.

51 Yesu wakati kulili, "Unohaka kuti ndikutileni?"

Bhofu lakahandula liti, "Rabhi, ndohaka kuti ndibone."

52 Yesu wakati kuwunli, "Tjiyenda, galamoyo kuko kwakuthama ukanaya."

Tjinyolotjo wakabva apofunuka, akatobela Yesu muzila.

Yesu Unopodza Bhofu Lakalitjila Nekumbila

35 Kwakayetika kuti atjibe pedlo neJerikho, umwe nlume webhofu waka aligele ntome kwezila ekumbila; 36 ewha bunga liyenda ntome kukwe, wakabhuzwa kuti koyetikani.

37 Bakawumbudza beti, "Yesu wekuNazaretha unopinda ipapa."

38 Wakamimila eti, "Yesu, Nkololo waDavida, mundiwhile ngoni."

39 Baka balimbeli bakawuntjemela beti ngaanyalale; koga iye wakamimila newhi lipehhugwi, eti, "Nkololo waDavida mundiwhile ngoni!"

40 Ndizo Yesu wakama, akalaya kuti ahhisiwe kuwunli; wakati atjibe pawunli akawumbhuzwa, eti, 41 "Unohaka kuti ndikuyetileni?"

Iye wakahandula eti, "He, ndohaka kuti ndibone kakale."

42 Yesu wakati kuwunli, "Bona; galamoyo kuko kwakuthama ukanaya."

43 Tjinyolotjo wakabona akawuntobela, ekudza Ndzimu; banhu bose bakati bekubona ikoku, bakalumbidza Ndzimu.

Yesu Unotjidza Nlume Wakazwagwa Ali Bhofu

1 Yesu wakati eyenda muzila, akabona nlume waka alibhofu kubvisila pakuzwagwa kukwe. 2 Badiyiwa babe bakawumbhuzwa beti, "Rabhi, ndiyani wakatjinya, ndiye nlume iwhoyu kene bazwadzi babe, kuti adze azwagwe ali bhofu?"

3 Yesu wakahandula eti, "Akuta kuli kuti nlume iwhoyu wakatjinya, kene ibo bazwadzi babe, koga ibhofu kuyetila kuti mihingo yeNdzimu ilakidziwe muwunli. 4 Takafanila hinga mihingo yewakandituma, kutjimasikati, busiku gowhohha, pasingowhoba nenhu unotubula hinga. 5 Hapa nditjimuhango, nditjedza tjehango."

6 Wakati ejalo, akapfila mate pasi akathama dope nemate akahhodza meho enlume iwhoyo nedope, 7 eti kuwunli, "Yenda, unongula kugan’wa linoyi Silowamu" (Kuleba kuti Tumwa). Ndizo wakayenda akanongula akahanduka obona.

2 kukahha nghwele wemapele kuwunli, akapfigama pawunli eti, "He, hapa muhaka mungandiyeta ndikapola*."

3 Yesu wakatambunudza luboko gugwe akawumbhata, eti, "Ndohaka, pola*!" Tjinyolotjo mapele akapela, akapola. 4 Yesu eba eti kuwunli, "Usibudze nhu. Koga yenda, unozwilakidza kumphirisiti, kakale upe tjipo selaya kwaMozisi, kuyetila kuti gube busupi kubanhu."

2 Banhu bakahhisa kuwunli nghwele wakalobgwa negulukadzi, alilele panhobo; Yesu wakati ebona galamoyo kwabo eba eti ku nghwele, "Sima nkololo wangu; watjiyetigwa mazwibhatigwa matjinyo awo."

3 Koga bamwe bakwali mumikumbulo yabo bakati, "Iwhoyu nlume unotuka Ndzimu!"

4 Koga Yesu eziba mikumbulo yabo, wakati, "Kungentha yeni mu alakana zwibi mumimoyo yenyu? 5 Ndikupi kulelu. Leba uti, ‘Wayetigwa mazwibhatigwa matjinyo awo,’ kene leba uti, ‘Milika uyende’? 6 Koga ke ndohaka kuti muzibe kuti Nkololo wenhu una masimba muhango, eyetila mazwibhatigwa matjinyo." Wakati kunlume wakalobgwa negulukadzi, "Milika, tola nhobo iyo uyende kanyi kuko."

7 Wakamilika akayenda kanyi kukwe.

10 Mukati kwaka kuna nlume unaluboko gwakahwehwana. Beba bewumbhuzwa beti, "Kumunlayo lapa muhhuba lesabatha?" kuyetila kuti bawuntilike nlandu.

11 Eba ebahandula eti, "Hapa umwe pakati kwenyu, enamhwizi in’ompela ikowila mugomba muhhuba lesabatha, haangayiduse? 12 Tjilemela tjenhu tjikulu kungapani kupinda mhwizi! Ndizo kumunlayo thama tjinhu tjibuya muhhuba lesabatha." 13 Eba eti kunlume iwhoya, "Tambunudza luboko gugo."

Iwhoyo nlume eba egutambunudza, gwakalulama, gukatambunuka segumwe.

30 Koga mezwale baSimoni baka balilele begwala bugwele gweluhhahhamo*, bakawumbudza nekwabo. 31 Akabe ebatola neluboko akabamilidza, bugwele gweluhhahhamo* gukapela mubali, bakatangisa bapakulila zodliwa.

Yesu Unolapa Nhu

40 Kukaswika nhu kuna Yesu, nghwele wemapele, (akapfigama ewunkumbila) eti, "Hapa muda zwenyu, muna masimba enditjenesa."

41 Yesu wakawuwhila ngoni, akatambunudza luboko akawumbhata eti, "Ndoda; tjenesewa." 42 Tjinyolotjo, mapele akawunsiya akatjenesewa.

3 Kwakaswika banhu bana, baka bakasenga umwe waka alobgwa negulukadzi*. 4 Bakakon’wa swika pedlo naYesu nentha yebunji gwebanhu, bakakwakwamula imwe ntha yedenga len’umba bakajitisila nhobo yaaka alilele payili unogwala. 5 Yesu wakati ebona galamoyo kwabo, akati kunghwele, "Nkololo, wayetigwa mazwibhatigwa matjinyo awo."

6 Kwaka kuna bamwe bakwali baka baligele ipapo, mumimoyo yabo beti, 7 "Ndiyani iwhoyu unoleba ejali? Unoleba haya! Ndiyani ungayetila mazwibhatigwa matjinyo kuhhe kweNdzimu yega?"

8 Tjinyolotjo Yesu wakaziba mumeya iye kuti banozwibhuzwa, akati kubali, "Kungentha yeni muzwibhuzwanya zwinhu zwakajali mumimoyo yenyu? 9 Ndikupi kulelu kuti nditi kuna wakalobgwa negulukadzi*, ‘Wayetigwa mazwibhatigwa matjinyo awo,’ kene kuti, ‘Milika utole nhobo iyo uyende’? 10 Koga ke, kuti mutjibona ke kuti Nkololo wenhu una masimba muhango, eyetila mazwibhatigwa matjinyo." Wakati kunlume wakalobgwa negulukadzi* 11 "Ndoti kukuli, milika utole nhobo iyo uyende kunzi uwo."

12 Tjinyolotjo wakamilika akatola nhobo iye bakalinga bose, akayenda; kwekuti bakasala baka kahabala bose, bakakudza Ndzimu, beti, "Atanhu tikakubona kwakajali."

Nlume Unaluboko Gwakahwehwana

1 Wakangina musinagogu kakale, ngono kwaka kuna nlume imhomo waka analuboko gwakahwehwana. 2 Bakawunlingisisa, kudze babone kuti kene unowhowuntjidza muhhuba lesabatha, kuyetila kuti bawuntilike nlandu. 3 Wakati kuna waka ana luboko gwakaswaba, "Milika, ume pakati kwebanhu." 4 Wakababhuzwa eti, "Kumunlayo kuti muhhuba lesabatha uthame tjibuya kene tjakayipa, kuti utjengetedze butjilo kene kuti ubulaye?"

Koga ibo bakanyalala. 5 Akabalinga bose nemoyo unogwadza, egwadziwa nekuti baka bana mimoyo mikukutu, akabe oti kuna iwhoyo nlume, "Tambunudza luboko gugo." Akagutambunudza, luboko gugwe gwaka gwatjilulama.

Yesu Unotjidza Nlume Unabugwele Gwemapele

12 Kwakayetika kuti ali muwumwe nzi-nkulu, kwakabuya nlume waka ali hhele mapele, wakati abona Yesu akakotamisa n’holo akapfigama mbeli kukwe akawunkumbilisisa eti, "He, hapa muda zwenyu mungandiyeta ndikatjena."

13 Wakatambunudza luboko gugwe, akawumbhata eti, "Ee! ndoda, tjenesewa." Tjinyolotjo mapele akapela.

18 Kwakahha bamwe balume bakasenga ntengate nenhobo umwe nlume waka egwala, akalobgwa negulukadzi, bakabehaka ngina naye bawunladzike mbeli kukwe; 19 koga bakahaya zila yabangangina nayo nentha yebunji gwebanhu, bakatanha pehhugwi kwen’umba iyeyo bakawunginisa nemudenga ali panhobo, bakawunghadzika pakati kwebanhu, mbeli kwaYesu. 20 Wakati ebona galamoyo kwabo, akati, "Nlumetate, wayetigwa mazwibhatigwa matjinyo awo."

21 Bakwali nebaFarisi bakatangisa bhuzwa beti, "Ndiyani iwhoyu, unolebeleka etuka Ndzimu? Ndiyani ungayetila mazwibhatigwa matjinyo kuhhe kweNdzimu yega?"

22 Koga Yesu aziba mikumbulo yabo wakabahandula, eti, "Kungentha yeni muzwibhuzwanya mumimoyo yenyu? 23 Ndikupi kulelulelu, kuti, ‘Wayetigwa mazwibhatigwa matjinyo awo,’ kene kuti, ‘Milika uyende’? 24 Koga ke kudze muzibe kuti Nkololo wenhu una masimba muhango, eyetila mazwibhatigwa matjinyo" wakati kunlume wakalobgwa negulukadzi, "Ndoti kukuli, milika, tola nhobo iyo uyende kunzi uwo."

25 Tjinyolotjo wakamilika mbeli kwabo akatola nhobo yaaka alilele payili, akabva ipapo, akayenda kunzi uwe, elumbidza Ndzimu.

Nlume Unaluboko Gwakahwehwana

6 Umwe nsi wesabatha, paakangina musinagogu akadiya, kwaka kuna nlume waka ana luboko gwakahwehwana. 7 Bakwali nebaFarisi bakawunteya, behaka bona kuti unowhotjidza kene muhhuba lesabatha, kuyetila kuti bawuwanile nlandu. 8 Koga iye wakaziba mikumbulo yabo, akakoti kunlume unaluboko gwakahwehwana, "Milika, ume pakati." Akamilika. 9 Ipapo Yesu akati kubali, "Ndomubhuzwa, kumunlayo kuti uthame tjakalulama muhhuba lesabatha kene kuti uthame tjakayipa, kuti utjengetedze butjilo kene kuti ugupaladze?" 10 Wakabalinga bose ekotjiti kunlume iwhoyo, "Tambunudza luboko gugo." Akathama ejalo, luboko gugwe gwaka gwatjitambunuka.

Yesu Unolapa Nlanda weNlume wekuRoma

1 Wakati apedza lebeleka nebanhu akangina muKhaphenawume. 2 Kwaka kuna umwe nlawuli webagwi bengwa bali gulu, waka ana nlandalume uwe waaka eda kwazo, nlandalume iwhoyo waka egwalilofa. 3 Wakati awha nekwaYesu, akawuntumila bawhola beMaJuta kudze banowunkumbila kuti abuye ewhotjidza nlandalume uwe. 4 Bakati baswika kuna Yesu tjinyolotjo bekawunkumbilisisa beti, "Nlume iwhoyu wakalizanila kuti muwuntile ikoku, 5 ngobe unoda tjaba tjedu kwazo, wakatibakila sinagogu."

6 Yesu wakayenda nabo. Wakati atjibapedlo nen’umba, nlawuli webagwi bengwa bali gulu wakatuma bakwinya babe kuwunli, benoti, "Tate, musizwidziyidze, andizolizanila kuti mungangina mun’umba yangu. 7 Kene imi ndahla ndibona ndisakafanila kuti ndingahha kumuli. Koga lebani dama, n’hingi wangu unowhopola. 8 Nami bo, ndinhu unohinga elipasi kwemasimba ebapehhugwi kwangu, ndina bagwi bengwa bapasi kwangu, ndoti kuna whoyu, ‘Yenda,’ akayenda, kuwumwe ndoti, ‘Ihha ngeno,’ unohha, ndoti kunlandalume wangu, ‘Thama whoku,’ akakuthama."

9 Yesu paakawha matama iyawa, wakatjenamisiwa nenlume iwhoyu, akatjebuka gubungano laka liwuntobela akati, "Ndomubudza, kene iko mu Isirayeli andizotongowana bugalimoyo gwakajali."

10 Ibabo baka batumwa bakati batjibgwilila kun’umba, bakanowana nlandalume waka egwala anaya.

11 Kwaka kuna umwe nkadzimayi waka ali tjilema eyetiwa nemeyambi kwemakole gumi nehhanakadzi, waka akakotama, asingatubule tambunuka. 12 Yesu wakati ewumbona, akawundhana akati kuwunli, "Nkadzimayi, wasunungugwa mubulema gugo." 13 Akawumbiga maboko, tjinyolotjo akatambunuka, akalumbidza Ndzimu.

Yesu Unopodza Nlume Unogwala

1 Umwe nsi wesabatha wakayenda kun’umba yewumwe ntungamili waka ali Mfarisi kunodla zodliwa, baka bakawunlinga. 2 Kwaka kuna nlume mbeli kukwe waka akazwimba makumbo nemaboko. 3 Yesu wakalebeleka nebazibi benlayo nebaFarisi, eti, "Kumunlayo podza munsi wesabatha, kene aa?"

4 Koga bakanyalala. Akawuntola akawumpodza, akawunletja akayenda.

Yesu Unopodza Banhu Baligumi

11 Wakati alimuzila eyenda kuJerusalema akapalama pakati kweSamariya neGalile. 12 Wakati engina muwumwe nzi akahanganidziwa nebamwe balume bali gumi, baka bana bugwele gwemapele, bakama kulenyana naye. 13 Bakamimila beti, "Yesu, He, mutiwhile ngoni."

14 Wakati ebabona akati kubali, "Yendani munozwilakidza kubaphirisiti."

Bakati betjimuzila betjayenda bakabva bapola. 15 Umwe wabo wakati ebona kuti wapola, akabgwilila hule, elumbidza Ndzimu newhi lipehhugwi; 16 wakaswika akawila pasi mbeli kwaYesu akaboka kwazo. Waka ali Nsamariya. 17 Yesu wakati, "Banhu batjenesewa babesi gumi? Bamwe bali hhanalume baponi? 18 Kwahayika wahanduka ewholumbidza Ndzimu kuhhe kwentaya iwhoyu?" 19 Wakati kuwunli, "Milika uyendezo, bugalimoyo gugo gwakutjidza."

Polesewa paGan’wa

1 Hule kwayikoku kwakabe nenzano wemaJuta, naYesu bo wakayenda kuJerusalema. 2 Sangwenu muJerusalema paNkoba weMhwizi kwaka kuna gan’wa, linodan’wa netjiHhebheru kuyiBhethesida, lina makutukutu mahanu. 3 Ipapo kwakakuna bagwele banjinji balele po, mapofu, zwilema, nebakalobgwa negulukadzi. 4 *[Mugumwe lubaka ntumwa waHe waka edelukila mugan’wa ebva kudzimu, ehha edzonga vula. Waka etangila bamwe ngina mugan’wa hule kwedzongewa kwevula waka epola bugwele gwaanago nekutobe guli gupi.] 5 Ipapo kwaka kuna umwe nlume, waka egwala kwemakole alimakumi matatu anahhanakadzi. 6 Yesu wakawumbona alilele ipapo, akaziba kuti waka egwala kwelubaka gulefulefu, ndizo wakawumbhuzwa eti, "Unohaka naya kene?"

7 Nlume unogwala wakati, "He, akuna nhu ipapa ungandisa mugan’wa vula payinodzongeka, ndoti nditjahaka ngina, umwe ebe engina enditangila."

8 Yesu wakati kuwunli, "Milika, tola nhobo iyo, uyende." 9 Tjinyolotjo nlume iwhoyo wakabva anaya, wakamilika akatola nhobo iye akayenda.

Nsi wakayetika kose ikoku waka uli nsi wesabatha.

46 Ndizo wakaswika kakale kuKana muGalile, kwaaka athama vula ikabe wayini. MuKhaphenawume kwakakuna nlume ugombgwa waka egwaligwa nenkololo. 47 Wakati ewha kuti Yesu wahha kuGalile ebva kuJudiya, wakayenda akanowunkumbila kuti ahhe ewhotjidza nkololo uwe, ngobe waka egwalilafa. 48 Ndizo ke Yesu wakati kuwunli, "Kuhhe kwekuti mubone zwilakidzilo nemakaabadzo amungagalemoyo."

49 Gombgwa lakati kuwunli, "Tate, ihhani mwana wangu asanhu afa."

50 Yesu wakati kuwunli, "Yenda, nkololo uwo unowhotjila."

Nlumetate iwhoyo wakagalamoyo dama lakalebgwa kuwunli naYesu akayenda zwe. 51 Wakati atjimuzila, balanda babe bakawun’hanganidza bakawumbudza kuti nkololo uwe wanaya.

52 Ndizo wakababhuzwa kuti lubaka ni gwaatangisa ba hine, bakati kuwunli, "Luhhahhamo gwakapela hhulo masikati, mu awa yekutondeka kubvisila hhuba libhuda." 53 Tatayi bakaziba kuti ndigo lubaka Yesu paakati kubali, "Nkololo uwo unowhotjila." Ibo tjekwabo bakagalamoyo, kose nen’ha wabo bose.

54 Yetji nditjo tjilakidzilo tjebubili tjakayetiwa naYesu paakahha kuGalile ebva kuJudiya.

20 Kwakahha mfumakadzi waka atjiba nemakole aligumi nemabili egwala bugwele gwebhihha malopa, hule kukwe, akabhata mpeto wetjiyambalo tjitje; 21 eti mumoyo uwe, "Hapa ndingabhata tjiyambalo tjitje koga, ndowhonaya."

22 Yesu wakatjebuka, ewumbona akati, "Sima, nkololokadzi; galamoyo kuko kwathama ukanaya." Tjinyolotjo nkadzimayi wakabva anaya.

25 Kwakakuna umwe nkadzimayi waka egwala bugwele gwebhihha malopa kwemakole ali gumi nemabili. 26 Waka adziyila kwazo eyenda kubalapi, atjipedza kose kwaaka anako, bugwele gusingabe hine, koga guyendilambeli. 27 Waka awha nekwaYesu, wakayenda hule kukwe pakati kwebanhu akabhata tjiyambalo tjaYesu. 28 Ngobe waka eti, "Dzene ndatubula bhata tjiyambalo tjitje ndinganaya."

29 Tjinyolotjo bhuda malopa kwakama; akawha mumbili uwe kuti watjinaya bugwele gwapela.

43 Kukati nkadzimayi waka anabugwele gwebhihha malopa kwemakole ali gumi nemabili, kusina nlapi unotubula wunlapa, 44 akabuya hule kukwe, akabhata mpeto wetjiyambalo tjitje; tjinyolotjo bhuda malopa kukama. 45 Yesu wakati, "Ndiyani wandibhata?"

Banhu bose bakalandula, Phethiro nebamwe bakabelipo bakati, "He, mbunga unomuzwiya umusundanyidza imwi mukoti ndiyani wandibhata!"

46 Yesu wakati, "Kunanhu wandibhata ngobe ndawha kuti masimba abhuda mundili." 47 Nkadzimayi ebona kuti haangazwisumbike, wakasedzela etetema, akawila mbeli kukwe akaleba mbeli kukwe nebanhu bose kuti wawumbhatilani, kakale kuti tjinyolotjo wabva apola. 48 Yesu wakati kuwunli, "Nkololokadzi, galamoyo kuko kwathama ukanaya; yenda nekunyalala."

Nkololokadzi weNtungamili, neMfumakadzi Wakabhata Jila laYesu

18 Etjalebeleka, kwakaswika ntungamili akapfigama mbeli kukwe eti, "Nkololokadzi wangu utjambotjinyika; koga ke buyani muwumbige maboko, unowhomuka."

19 Yesu wakamilika akawuntobela, nebadiyiwa babe.

23 Yesu paakaswika kun’umba yentungamili, ebona balidzi benyele, nembunga webanhu uthama hhoba, 24 wakati, "Ibvani; ngobe nsikana haazofa koga ulele." Bakawunseka. 25 Kwakati banhu batjibhudila kuhhe, akangina akawumilidza neluboko, nsikana akamuka.

22 Kukaswika umwe webatungamili besinagogu, zina loyi Jayirosi, paakabona Yesu wakapfigama pamakumbo awe. 23 Akawunkumbilisisa eti, "Nkololokadzi wangu ntukununu wefa. Ndomukumbila mubuye mowhumbiga maboko, kuyetila kuti anaye, kakale atjile."

24 Ndizo Yesu wakayenda naye; banhu banjinji bakawuntobela, besundanyidza.

38 Paakaswika kun’umba yentungamili wesinagogu, wakabona sagadzikana kwebanhu, banhu bakabelila kakale bembila pehhugwi. 39 Wakati angina akababhuzwa eti, "Motilani hhoba yose iyeyi kakale molilani? Nsikana haazofa ulele."

40 Bakawunseka bulengwe. Koga iye wakati abadusa mun’umba, akatola tatayi namayi bensikana nebaaka ahha nabo, bakangina kwaka kulilele nsikana. 41 Ewumbhata neluboko wakati kuwunli, "Thalitha kowumi" kunobva kuti, "Nsikana, ndoti kukuli muka."

42 Tjinyolotjo nsikana wakamuka akayendayenda (waka anamakole ali gumi nemabili). Bakatjenama kwazo.

31 "Ngono ndowhobafananisa nani ibaba banhu bayitjetji tjizekugwana. Bakafanana nani kene? 32 Banonga bana bagele pabugalo gwetengesela, bedanilila bamwe beti, ‘Tamulidzila nyele amuzozana, tikamba njimbo dzelufu amuzolila.’ 33 Ngobe Johane Mbvubiki wakabuya esingadle tjinkwa esingan’we wayini; moti, ‘Una meyambi.’ 34 Nkololo wenhu wakahha edla kakale en’wa, ngono moti, ‘Lingani, tjidli nenlaladzi, nkwinya webaketisi nebatjinyi.’ 35 Koga ke butjenjebvu golayidziwa ngebana bose bago."

Yesu ali Kunzi weMfarisi unoyi Simoni

36 Umwe webaFarisi wakawunkumbila kuti anodla naye, akayenda kun’umba yeMfarisi, akanodla. 37 Umwe mfumakadzi munzi-nkulu iwhoyo, waka ali ntjinyi, wakati aziba kuti Yesu unodla kun’umba yeMfarisi, akabuya nekumbwana tjakayetiwa nebgwe linoyi alabhasita, tjemafuta anonhuwilila,

41 Kwakabuya nlume waka eyi Jayirosi waka ali ntungamili wesinagogu; akawila pamakumbo aYesu akawunkumbilisisa kuti ayende naye kun’umba iye, 42 waka ana nkololokadzi un’ompela, unamakole angaba gumi nemabili, waka egwalilofa.

Wakati oyenda banhu bakawunsundanyidza.

49 Etjalebeleka kwakaswika umwe nlume ebva kun’umba yentungamili wesinagogu, akati, "Nkololokadzi wenyu watjinyika; musitjadziyidze Ndhiyi."

50 Koga Yesu wakati akuwha akawun’handula eti, "Usihle; galamoyo koga, iye unowhonaya."

51 Wakati aswika kun’umba akadzibisa nhu wose ngina mun’umba, kuhhe kwaPhethiro naJakobe naJohane, natatayi namayi bemwana. 52 Banhu bose baka bekuwa belilila mwana; koga wakati, "Musilile; haazofa koga ulele."

53 Koga bakawunseka bulengwe beziba kuti wafa. 54 Wakabhata nsikana neluboko akadanilila, eti, "Mwana, muka." 55 Meya iye ikahanduka, tjinyolotjo akamuka; akabalaya kuti bawumpe zodliwa adle. 56 Bazwadzi babe bakatjenama kwazo; iye akabakowhomesedza kuti basibudze nhu tjayetika.

Lufu gwaLazaro

1 Kwaka kuna umwe nlume wekuBhethani unoyi Lazaro waka egwala, Bhethani unzi paka kugala Mariya naMaritha, hazwadzi dzidze. 2 Iwhoyu Mariya waka egwaligwa nehazwadzi iye Lazaro, ndiye iwhoyo wakawhohhodza He nemafuta akawumbuhika makumbo ehingisa mavudzi awe. 3 Ndizo ke hazwadzi dzidze dzakatumila dama kunaYesu dziti, "He, iye wamunoda unogwala."

4 Koga Yesu wakati ekuwha akati, "Gwala ikoku akute kwelufu, ndekwegudzo leNdzimu, kuyetila kuti Nkololo weNdzimu awane gudzo ngentha yako."

5 Sangwenu Yesu waka eda Maritha nenun’una uwe naLazaro. 6 Ndizo wakati ewha kuti Lazaro unogwala, akagala mahhuba mabili pabugalo gwaaka aliko. 7 Hule kwayikoku wakati kubadiyiwa babe, "Ayindeni kuJudiya kakale."

8 Badiyiwa bakati kuwunli, "Rabhi, ngwenu zwako maJuta ayehaka mukhikitidza nemabgwe, ngono moyenda ko kakale?"

9 Yesu wakahandula eti, "Akuna ma awa gumi nemabili muhhuba? Hapa nhu eyenda masikati, haatokunhiwa, ngobe unovonekegwa netjedza tjehango ino. 10 Koga hapa nhu eyenda busiku, unokunhiwa, ngobe tjedza atjipo muwunli." 11 Wakaleba ejalo, akakoti kubali, "Nkwinya wedu Lazaro wayezela, koga ndoyenda ndinowumusa muwhope."

12 Badiyiwa bakati kuwunli, "He, hapa kuli kuti wayezela, unowhonaya."

13 Ipapa Yesu waka eleba nekwelufu gwaLazaro, ibo bakakumbula kuti waka eleba nekwenyaluluka akayezela. 14 Yesu akabe ebabudza patjena, "Lazaro wafa,

Yesu Unodzikamisa Dutu

23 Paakangina mukepe, badiyiwa babe bakawuntobela. 24 Tjinyolotjo, kwakamilika dutu linabuhongola mugungwa, kwekuti kepe tjaka tjatjihhaligwa nemabundo evula; koga iye waka alilele. 25 Bakayenda benowumusa beti, "He, mutitjidze, topalala."

26 Eba eti kubali, "Eke banhu bana bugalimoyo gutukununu. Nentha yeni muhla?" Eba emuka etjemela mhepo negungwa; kube kunyalala.

27 Bakatjenama beti, "Unhu wakatini iwhoyu, unowhiligwa nemhepo kose negungwa?"

15 Kwatjiba madekwana, badiyiwa babe bakahha kuwunli beti, "Pano ihango, kakale kwahwa; paladzani banhu bayende kumizi banotenga zodliwa zwabo."

16 Yesu wakati, "Abazofanila yenda; mubapeni tjabangadla."

17 Bakawun’handula beti, "Tina zwinkwa zwihanu newhobe mbili koga."

18 Eba eti, "Mukuhhiseni ngeno." 19 Eba eti banhu bagale pabuhwa; akatola zwinkwa izwezo zwihanu newhobe idzedzo mbili, akalinga pehhugwi kudzimu, akakombolela, akapemulanya akaswiswa badiyiwa zodliwa, badiyiwa bakapa banhu. 20 Bose bakadla bakaguta. Bakawolela zwipemu zwezodliwa zwasala zwikahhala zwitundu zwiligumi nezwibili. 21 Banhu bakadla bakabengaswika zwiwulu zwihanu, betjilume boga, kusingabagwe betjikadzi nebana.

25 Mahhakuyedza wakabuya kubali, eyenda pehhugwi kwevula.

Yesu Unopa Zodliwa Banhu Bali Zwiwulu Zwina

32 Yesu wakakotjidana badiyiwa babe ekati, "Ndowhila ngoni bunga ileli, ngobe taba tose kwemahhuba matatu, abana tjabanodla; kakale anditoda kuti nditi ngabayende nehhala, ngobe kungayetikala bakuligwe nehhala bawe muzila."

33 Badiyiwa beba beti kuwunli, "Ngono mutjilambanyika tingawana poni tjinkwa tjingagutsha bunga gulugulu zwingapa?"

34 Yesu eba ebabhuzwa eti, "Muna zwinkwa zwingana?"

Beba behandula beti, "Zwili kutondeka, newhobe nhukununu homanana."

35 Ebudza banhu kuti bagale pasi pamavu, 36 wakatola zwinkwa zwili kutondeka newhobe, atjiboka kuNdzimu wakazwipemula akazwipa badiyiwa, badiyiwa bakapa mabunga. 37 Bakadla bose bakaguta; bakawolela zwipemu zwezodliwa zwasiyiwa nebanhu zwikahhala zwitundu zwili kutondeka. 38 Kwakadla banhu beli zwiwulu zwina betjilume, kusingabagwe betjikadzi nebana.

Lipiwa Kweluketo Gwethempeli

24 Bakati beswika kuKhaphenawume, baketisi bakabuya kuna Phethiro bakawumbhuzwa beti, "Ndhiyi wenyu unolipa luketo gwethempeli wali?"

25 Phethiro wakahandula eti, "Ee, unolipa."

Phethiro wakati angina mun’umba Yesu akatanga lebeleka naye eti, "Nokubona tjini, Simoni? Bomambo behango banotola luketo kuna yani? Kubakololo babo* kene kubamwe*?"

26 Phethiro paakahandula eti, "Kubamwe*."

Yesu wakati kuwunli, "Kobva kuti bakololo bakasununguka*. 27 Koga atitohaka bagwadzisa, iwe tjiyenda kugungwa, unoteya whobe newhuka, whobe yawunobhata kwekutanga ukayihhula nlomo nowhowana kuna loso linantengo upehhugwi; ubape ilo, unlipo wangu nawe."

Yesu Unolonga Nkuyu bhiso

18 Mangwanana, obgwilila kunzi-nkulu, waka enahhala. 19 Wakati ebona nkuyu untome kwezila akayenda kuwunli, koga akuna tjaakanowana pawunli kuhhe kwemahhani woga. Wakati kuwunli, "Kusitjabe nentjelo unobhuda mukuli kene lini." Tjinyolotjo nkuyu wakaswaba.

20 Badiyiwa pabakawumbona bakatjenama kwazo beti, "Nkuyu watjimbidza swaba tjini?"

21 Yesu wakahandula eti, "Lebeswa, ndoti kumuli, hapa muna kugalamoyo musina kun’un’una, amutowhothama tjandathama kunkuyu koga, koga kene muti kudombo ileli, ‘Sipuka uposegwe mugungwa,’ kowhoyetikala. 22 Kene ini tjamunokumbila mumitembezelo, mowhotjiwamutjila, hapa muna kugalamoyo."

37 Kukakomilika dutu gulugulu, vula dzalo dzikangina mukepe tjikabe tjohhala vula. 38 Yesu waka ali kuhule mukepe alilelezwe panhobo akasazamila nsazamilo; bakawumusa beti, "Ndhiyi, amuna hanya kuti tepalala?"

39 Akabe emilika etjemela mhepo, eti kugungwa, "Dzikama! Nyalala uti whu!" Mhepo ikanyalala kukabe nekunyalala kukulukulu. 40 Akabe oti kubali, "Mohlilani zwingapa? Amuna bugalimoyo?"

41 Bakahla kwazo bakati umwe kuwumwe, "Ndiyani iwhoyu unowhiligwa nemhepo nange gungwa lose?"

35 Hhuba lakati lohwa, badiyiwa babe bakabuya kuwunli bakati, "Pano ihango, kakale hhuba lahwa; 36 paladzani banhu, bayende kumizi nekubugalo gupedlo banozwitengela tjabangadla."

37 Wakabahandula eti, "Mubapeni tjabangadla." Badiyiwa bakati kuwunli, "Tingayenda tinotenga zodliwa zwemari ingapa madinari* ali makhulu mabili tibape badle?"

38 Wakati kubali, "Muna zwinkwa zwingana? Yendani munohola."

Bakati baziba bakati, "Tina zwinkwa zwihanu newhobe mbili."

39 Wakababva kuti bagadze banhu pasi bali mabunga pabuhwa gunyolo. 40 Bakagala pasi bali mabunga, amwe mabunga bali gulu amwe bali makumi mahanu.

41 Wakati atola zwinkwa zwihanu newhobe mbili akalinga pehhugwi kudzimu, akakombolela, akapemula zwinkwa, akazwipa badiyiwa babe kuti bazwigadzike mbeli kwebanhu; akabakobela bose whobe mbili. 42 Bakadla bose bakaguta. 43 Bakanunga zwitundu gumi nezwibili zwezwipemu zwakasala zwezwinkwa newhobe. 44 Bakadla zwinkwa baka bali zwiwulu zwihanu, kubagwa banhu betjilume koga.

48 Wakabona kuti banohinga zwakabangalala kudze bandise kepe nentha yekuti mhepo njinji yaka igwisana nabo, kukati mahhakuyedza akaswika kubali enangayila pehhugwi kwevula, enga unoyi unopindazwe. 49 Koga ibo bakati bebona eyenda pehhugwi kwegungwa bakakumbulila kuti ipuku bakabe bemimila; 50 nekuti bakawumbona bose, bakahla.

Koga tjinyolotjo wakalebeleka eti kubali, "Gadzikanani, ndimi, musihle!" 51 Wakangina mukepe pabaka balipo. Mhepo ikanyalala, bakatjenama kwazo,

Yesu Unopa Zodliwa Banhu bali Zwiwulu Zwina

1 Mumahhuba iyawo, kwakati kwakubungana mbunga nkulunkulu kwazo, banhu besina tjabanodla, Yesu wakadana badiyiwa babe, akati kubali, 2 "Ndowhila ngoni banhu ngentha yekuti bagala nami mahhuba matatu kakale akuna tjabanodla. 3 Ndikati ngabatjibgwilila kumizi yabo benahhala inowhobakulila bakawila muzila; kakale bamwe babo bakabva kulekule."

4 Badiyiwa babe bakahandula beti, "Nhu ungawana poni tjinkwa tjingagutsha banhu bose ibaba ipapa mutjilambanyika?"

5 Wakababhuzwa eti, "Muna zwinkwa zwingana?"

Ibo bakati, "Zwili kutondeka."

6 Wakati banhu bagale pasi pamavu; akatola zwinkwa zwili kutondeka, atjiboka kuNdzimu wakazwipemula akazwipa badiyiwa babe kuti bazwipe banhu; badiyiwa bakata bejalo. 7 Baka bana whobe nhukununu homanana; atjiboka kuNdzimu, wakati nayidzo bo dzipiwe banhu. 8 Bakadla, bakaguta; bakawolela zwipemu zwezodliwa zwasiyiwa nebanhu zwikahhala zwitundu zwili kutondeka. 9 Banhu baka bangaswika zwiwulu zwina.

Yesu Unotuka Nkuyu

12 Tjimuka bebva kuBhethani, Yesu wakaatjiba nehhala. 13 Ebona nkuyu unamahhani uli tjakule nyana, wakasedzela eti pamwe angawana makuyu. Koga akawana usakazwala unamahhani koga, ngobe kwakakusi lubaka gwezwala kwawo. 14 Eba etuka nti iwhoyo eti, "Kusitjabe nenhu unowhotongodla mitjelo iyo kene lini."

Badiyiwa babe bakawuwha ejalo.

Tjidiyo Tjinobva paNkuyu

20 Tjimuka mangwanana bepinda, bakabona nkuyu iwhoya watjiwoma kubvila kumidzi. 21 Phethiro wakaalakana, eba eti kuna Yesu, "Rabhi, lingani! Nkuyu wamakalonga bhiso watjiwoma!"

22 Yesu wakahandula eti, "Galanimoyo kuNdzimu. 23 Lebeswa, ndoti kumuli, hapa kene yani eti kudombo ileli, ‘Sipuka, uwile mugungwa,’ kakale esingan’un’une mumoyo uwe koga egalamoyo kuti tjaanoleba tjowhoyetikala, unowhotjitigwa. 24 Ndizo ndomubudza, kene ini tjamunokumbila ngentembezelo, galanimoyo kuti matjitjiwamutjila, mowhoba natjo. 25 Hapa mutembezela, kunanhu wamakagwadziligwa, muwuyetile mazwibhatigwa, kuyetila kuti Tate babo bakudzimu bamuyetile bo mazwibhatigwa matjinyo enyu.

Yesu Unodana Badiyiwa Bekutanga

1 Kwakayetika kuti banhu bemanikidza kuti bawhe dama leNdzimu, waka alime pagan’wa gulugulu leGenesareti. 2 Wakabona zwikepe zwibili zwilimile pagan’wa, babhati bewhobe baka babhuda muzwili bengudza njanga* dzabo. 3 Wakangina mutjimwe kepe tjakatjili tjaSimoni, akawunkumbila kuti atjisundile mukati nyana muvula, akagala pasi akadiya banhu ali mukepe.

4 Wakati apedza lebeleka akati kuna Simoni, "Nginani pakadzika mujitise njanga dzenyu mubhate whobe."

5 Simoni wakahandula eti, "He, tahinga zwakabangalala busiku gose, atina kene tjatabhata, koga nentha yekuti ndimwi maleba totjowhojitisa njanga." 6 Bakati bata sayikoko bakabhata whobe njinji kwazo, njanga dzabo dzaka dzopaluka, 7 bakadana bamwe babo, baka bali kuzwimwe zwikepe, kuti babuye bawhobabhatsha, bakabuya bakababhatsha, bakahhadza zwikepe bubili gwazo zwikagulo nyula*. 8 Simoni Phethiro abona ikoku, wakapfigama mbeli kwaYesu eti, "Ibvani pandili He, nentha yekuti ndinhu uhhele tjinya!"

9 Iye nebamwe baaka enabo, bakatjenamisiwa nebunji gwewhobe dzabaka babhata. 10 Jakobe naJohane, bakololo baZebhedi, baka bali bakwinya baSimoni, bakatjenama bo. Yesu wakati kuna Simoni, "Usihle, kubvila ngwenuwali unowhoba ubhata banhu."

11 Bakati badusila zwikepe kumhili, bakasiya kose, bakawuntobela.

Yesu Unodzikamisa Dutu

22 Limwe hhuba wakangina mukepe nebadiyiwa babe akati kubali, "Ayitjulukileni seli yeya yegungwa." Bakatangisa yendesa kepe, 23 batjimugwendo iye wakabhakhwa newhope akayezela, kukabuya dutu mukati kwegungwa, kepe tjakatjehhala vula, beba mumboli. 24 Bakayenda bakanowumusa, bedanilila beti, "He, He, tapalala!"

Ipapo wakamuka akatjemela mhepo, nemiduka kwevula. Kose kwakama kukabe nekunyalala. 25 Akakoti kubali, "Galamoyo kwenyu kuponi?"

Ibo behla bakatjenama bakati umwe kuwumwe, "Ndiyani ngono iwhoyu, unotjemela mhepo kene gungwa kukawuwhilila?"

Yesu Unodzikamisa Dutu

22 Limwe hhuba wakangina mukepe nebadiyiwa babe akati kubali, "Ayitjulukileni seli yeya yegungwa." Bakatangisa yendesa kepe, 23 batjimugwendo iye wakabhakhwa newhope akayezela, kukabuya dutu mukati kwegungwa, kepe tjakatjehhala vula, beba mumboli. 24 Bakayenda bakanowumusa, bedanilila beti, "He, He, tapalala!"

Ipapo wakamuka akatjemela mhepo, nemiduka kwevula. Kose kwakama kukabe nekunyalala. 25 Akakoti kubali, "Galamoyo kwenyu kuponi?"

Ibo behla bakatjenama bakati umwe kuwumwe, "Ndiyani ngono iwhoyu, unotjemela mhepo kene gungwa kukawuwhilila?"

Yesu Unotjidza Nhu Unameyambi

26 Bakaswika kuhango yebaGerasini, yaka ili seli kweGalile.

12 Hhuba latewuka badiyiwa babe bali gumi nebabili bakahha kuwunli bakati, "Paladzani banhu, bayende kumizi nekubugalo gupedlo banowana zodliwa nepabangalala; ngobe pano ihango."

13 Koga wakabahandula eti, "Mubapeni tjabangadla."

Ibo bakati, "Tina zwinkwa zwihanu newhobe mbili koga, kuhhe kwekuti tiyende tinotenga zodliwa zwebanhu bose ibaba." 14 Kwaka kuna balume bangaswika zwiwulu zwihanu.

Wakati kubadiyiwa babe, "Itani kuti bagale bali mabunga ana banhu bali makumi mahanu."

15 Bakathama bejalo, baka bagadza pasi. 16 Akatola zwinkwa zwihanu newhobe mbili akalinga pehhugwi kudzimu, akaboka akazwipemula, akazwipa badiyiwa babe kuti bape banhu. 17 Bakadla bakaguta bose. Bakawolela zwipemu zwaka zwasala, zwikahhala zwitundu zwiligumi nezwibili.

Nzano webukwe paKana

1 Muhhuba lebutatu kwaka kunanzano webukwe kuKana muGalile, mayi baYesu baka baliko, 2 naYesu bo waka akokewa kunzano webukwe, kose nebadiyiwa babe bo. 3 Wayini yakati yapela, mayi baYesu bakati kuwunli, "Abatjina wayini."

4 Yesu wakati kubali, "Aa aa! mme, Ngono kuneni nami? Lubaka gwangu agwanhu gwaswika."

5 Meyabe bakati kubalanda, "Muthame tjimwe netjimwe tjaanobe amubudza itjo."

6 Kwaka kuna hali dzemabgwe dzitanhatu dzaka dzakabigwa ipapo, dzinohingisiwa panlenje wemaJuta wetjenesewa, imwe neyimwe yadzo yaka ingina malitha angaba makumi ali hhanakadzi kunoti malitha aligulu lina makumi mabili. 7 Yesu wakati kubalanda, "Hhadzani hali idzedzi nevula." Bakadzihhadza dzikati tupu. 8 Akakotjiti kubali, "Tjitjelani imwe, mundopa mbhati wenzano." Bakayeta bejalo. 9 Mbhati wenzano wakati alabila vula yakayayetiwa ikabe wayini, akasaziba kuti wayini iyeyo inobva poni (nekutobe balanda ibo bakayitjela bakabeziba), mbhati wenzano wakadana nkwaha 10 akati kuwunli, "Umwe newumwe nhu unopa banhu wayini inozipa kutanga, kukotjiti hapa banhu ban’wa batjilaladza, kukotjihha inoyipa; koga iwe watjengeta wayini inozipa kukadza kukabe ngwenuwali."

11 Yeli ndilo jenamiso lekutanga lakayetiwa naYesu kuKana muGalile elakidza gudzo lile, badiyiwa babe bakagalamoyo muwunli.

6 Wakangoleba ikoku kuti alike Filiphi, kanha wake eziba zwe kuti unowhothamani.

7 Filiphi wakawun’handula eti, "Makulu mabili emadinari* haangatenge zwinkwa zwekuti umwe newumwe angowana kuhomanana kwebhata bula."

8 Umwe webadiyiwa babe, unoyi Andhireya, nun’una waSimoni Phethiro, wakati kuwunli, 9 "Kuna mbisana ipapa una zwinkwa zwihanu zwebhali newhobe mbili, koga kungalizana banhu bose ibaba?"

10 Yesu wakati kubali, "Thamani kuti banhu bagale pasi." Kwaka kulihhele buhwa ipapo; ndizo banhu bakagala pasi; kwaka kuna balume bangaswika zwiwulu zwihanu. 11 Yesu wakakotola zwinkwa, akaboka Ndzimu, wakati apedza boka, akakobela ibabo bakabaligele pasi; akathama ejalo bo newhobe, bose bakadla sekwabaka betubula. 12 Bakati badla baguta, akati kubadiyiwa babe, "Wolelani zwipemu zwasala, kusibe netjinozanisika." 13 Ndizo bakawolela zwipemu zwezwinkwa zwebhali zwihanu zwakazwasiyiwa nebakabedla, bakahhadza zwitundu zwiligumi nezwibili.

19 Kwakati kepe tjatjiyenda kwemakhilomitha angaba mahanu kene matanhatu, bakabona Yesu eyenda pehhugwi kwegungwa esedzela pedlo nekepe. Bakahla, 20 koga iye wakati kubali, "Ndimi, musihle." 21 Bakahanha kuti bawunginise mukepe, tjinyolotjo kepe tjakabva tjaswika pahango kwabaka beyenda.

Yesu Unozwilakidza kuBadiyiwa bali Kutondeka

1 Hule kwayikoku Yesu wakazwilakidza kakale kubadiyiwa pamhili yegungwa leThibheriyasi; wakazwilakidza sawhoku. 2 Simoni Phethiro, naTomasi unoyi Phahla, naNathaniyeli wekuKana kuGalile, nebakololo baZebhedi, nebamwe badiyiwa babe babili baka bali panhu pan’ompela. 3 Simoni Phethiro wakati kubali, "Nditjanobhata whobe."

Bakati kuwunli, "Towhoyenda nawe." Ndizo ke bakabhuda bakangina mukepe, koga busiku igogo akuna tjabakabhata. 4 Kwakati koyedza, Yesu akama pansetje wegungwa, koga badiyiwa bakabasingazibe kuti ndiYesu. 5 Yesu wakati kubali, "Bakhwinya, muna whobe?"

Bakawun’handula beti, "Aa."

6 Wakati kubali, "Poselani njanga yenyu kuludli gwekepe, mowhowana dzimwe." Ndizo bakayiposela bakakosatubula yikakatila kuhhe, nentha yebunji gwewhobe.

7 Ndhiyiwa iwhoya waka ediwa naYesu wakati kunaPhethiro, "NdiHe!" Simoni Phethiro wakati ewha kuti ndiHe, akambala zwiyambalo zwizwe zwapehhugwi, ngobe waka azwimbulila hinga, akatjulukila mugungwa. 8 Koga bamwe badiyiwa bakatobela belimukepe bekakata njanga ilihhele whobe, ngobe bakabasikule nemhili, koga baka bali nhambo ingaba mamitha ali gulu kubva pamhili. 9 Bakati beswika pamhili, bakawana moto wemasimbe ipapo, kwakahahikiwa whobe pehhugwi kwawo, netjinkwa. 10 Yesu wakati kubali, "Lesini dzimwe whobe dzamutjambobhata."

11 Ndizo Simoni Phethiro wakatanha kepe akanokwebela njanga kuhhe kwegungwa, ilihhele whobe whuluwhulu, dziligulu nemakumi mahanu ana whobe nhatu, nekutobe dzaka dzili njinji zwingapo, njanga yaka isapaluka.

Galabgwe Kwenlawuli webagwi bengwa

5 Yesu wakati angina muKhaphenawume, kukahha kuwunli nlawuli webagwi bengwa bali gulu, ekumbila lubhatsho, eti, 6 "He, n’hingi wangu ulele kanyi wakalobgwa negulukadzi atotubula muka, unowha zogwadza kwazo."

7 Yesu eba eti kuwunli, "Ndowhobuya ndiwhowunlapa."

8 Nlawuli webagwi bengwa bali gulu wakahandula eti, "He, andizolizanila kuti mungangina mun’umba yangu. Lebani dama koga, n’hingi wangu unowhonaya. 9 Namibo ndinhu upasi kwemasimba ebapehhugwi kwangu bo, ndina bagwi bengwa bapasi kwangu. Ndoti kuna whoyu, ‘Yenda,’ akayenda; kuwumwe ndoti, ‘Ihha ngeno,’ unohha. Ndoti kunlandalume wangu, ‘Thama whoku,’ akakuthama."

10 Yesu wakati ewha matama iyawa, akatjenama, akati kuna baka bewuntobela, "Lebeswa ndoti kumuli, kene iko mu Isirayeli andizotongowana bugalimoyo gwakajali. 11 Ndomubudza, banjinji banowhobva kubhehhuba nekumahwahhuba, banowhogala bakadla na Abhurahhamu na Isaka naJakobe mubumambo gwekudzimu, 12 koga bakololo bebumambo banowhoposegwa kuhhe, kuhhele hhalima; imhomo banhu banowholila bakalobanya meno." 13 Yesu wakati kunlawuli webagwi bengwa, "Yenda! Ngakuyetikale segalamoyo kuko kuti kowhoyetikala."