1 Lukwalo gunolondesedza ludzi gwaYesu Khirisitu nkololo waDavida, nkololo waAbhurahhamu.

2 Abhurahhamu wakazwala Isaka, Isaka ali tate baJakobe, Jakobe ali tate baJuda nebakuluyi nebanun'una babe, 3 Juda ali tate baFarezi naZera ebazwala nenkadzi unoyi Thamara, Pherezi ali tate baHhezironi, Hhezironi ali tate ba Aramu; 4 Aramu ali tate ba Aminadabhu, Aminadabhu ali tate baNashoni, Nashoni ali tate baSalimoni, 5 Salimoni ali tate baBhowazi ewunzwala naRahhabhu, Bhowazi ali tate ba Obhedi ewunzwala naRuthi, Obhedi ali tate baJese, 6 Jese ali tate bamambo Davida.

Davida waka ali tate baSolomoni, ewunzwala nenkadzi waka ali nkadzi wa Uriya 7 Solomoni ali tate baRehobhowamu, Rehobhowamu ali tate ba Abhija, Abhija ali tate ba Asafu, 8 Asafu ali tate baJehoshafati, Jehoshafati ali tate baJoramu, Joramu ali tate ba Uziya, 9 Uziya ali tate baJothamu, Jothamu ali tate ba Ahazi, Ahazi ali tate baHezekhiya, 10 Hezekhiya ali tate baManase, Manase ali tate ba Amoni*, Amoni* ali tate baJosiya, 11 Josiya ali tate baJekhoniya nebakuluyi nebanun'una babe mulubaka gwetapwa beyendisiwa kuBhabhiloni.

12 Hule kwetapwa beyendisiwa kuBhabhiloni Jekhoniya wakazwala Sheyalithiyeli, Sheyalithiyeli ali tate baZerubhabheli, 13 Zerubhabheli ali tate ba Abhiyudi, Abhiyudi ali tate ba Eliyakhimu, Eliyakhimu ali tate ba Azo, 14 Azo ali tate baZadoku, Zadoku ali tate ba Akhimu, Akhimu ali tate ba Eliyudi, 15 Eliyudi ali tate ba Eliyaza, Eliyaza ali tate baMathani, Mathani ali tate baJakobe, 16 Jakobe ali tate baJosefa, nlume waMariya, iye wakatshibama Yesu unoyi Khirisitu.

17 Ndizo kubvisila kuna Abhurahhamu kunoswika kunaDavida, zwizekugwana zose zwaka zwili gumi nezwina, kubvila kuna Davida kunoswika lubaka gwetapwa beyendisiwa kuBhabhiloni, zwizekugwana zwili gumi nezwina, kubvila pakutapwa beyendisiwa kuBhabhiloni kunoswika pakuzwagwa kwaKhirisitu zwizekugwana zwili gumi nezwina.

18 Ndizo zwagwa kwaYesu Khirisitu kwakaba nayeyi zila. Mme babe Mariya waka ewhobhikila kuna Josefa, besanhu batongoyizela bose, waka wan'wa akazwisenga mimba yeMeya Yakayengemala. 19 Josefa atjibe nlume uwe, ali nlume wakatambunuka asingade wumbhatisa honi mutjaba, wakaba nenkumbulo welambana naye banhu besingazibe. 20 Etja alakana nekwako, wakahhigwa newoloto, wakawolota ntumwa waHe eti kuwunli, "Josefa, nkololo waDavida, usihle tola Mariya abe nkadzi uwo. Ngobe wakazwisenga mimba yeMeya Yakayengemala. 21 Unowhotshibama nkololo, uwuntumile zina linoyi Yesu. Unowhotjidza banhu babe mumatjinyo abo."

22 Kose ikoku kwakayetikala kuti kuhhadzisike tjakalebgwa naHe ngenlebesambeli, eti, 23 "Bona! mhandala inowhozwisenga, ikatshibama nkololo, zina lile lowhoyi Imanuweli" (kunobva kuti, "Ndzimu unaswi").

24 Josefa akamuka muwhope, akatobela tjaalayiwa nentumwa waHe, akatola nkadzi uwe; 25 azotongongina mungubo naye akadza akatshibama nkololo. Josefa akawuntumila zina linoyi Yesu.