1 Kwakayetikala kuti Yesu apedza badiya kose ikoku, wakati kubadiyiwa babe, 2 "Moziba kuti hule kwemahhuba mabili kowhoba kwabe nzano wePhasika, Nkololo wenhu unowhotugwa kubanhu kuti bawunkowhomele patjileyanyo."

3 Baphirisiti bakulu nebawhola bakakokubungana palubahhe gwemphirisiti upehhugwi unoyi Khayiyafasi, 4 bakalangana kuti basunge Yesu nezila yakasumbikala bawumbulaye. 5 Koga bakati, "Tisikuthame nzano uli pakati ngobe banhu bangabva bemusa hhoba."

6 Yesu paaka ali muBhethani, mun'umba yaSimoni wakatongoba anabugwele gwemapele, 7 etjadla, kukahha kuwunli nkadzimayi akasenga kumbwana tjakatiwa nebgwe linoyi alabhasita, tjemafuta anantengo upehhugwi, akaadululila pan'holo uwe. 8 Koga badiyiwa babe bakati bekubona ikoku, bakamon'wa beti, "Anozanisigwani zwingapa? 9 Ngobe mafuta iyawa aangatengesewa nentego upehhugwi mari yawan'wa ikapiwa bahayi."

10 Koga Yesu, ekuziba ikoku, wakati kubali, "Modziyidzilani nkadzimayi iwhoyu? Kana wathama zwakanaka kundili. 11 Bahayi mogala munabo lubaka gose, koga imi amutowhoba nami tjoselele. 12 Dululila mafuta mumbili wangu kwaathama, wakuyetila ndilulamisila mbiganyo wangu. 13 Lebeswa, ndoti kumuli, kene poni panowhosumikigwa ndebo mbuya muhango yose, ikoku kwayetiwa nenkadzimayi iwhoyu kowholebgwa nekwako, kuli tjikumbuludzo nekukwe."

14 Ipapo umwe webadiyiwa babe baligumi nebabili, waka eyi Judasi Isikariyoti, wakayenda kubaphirisiti bakulu, 15 akababhuzwa eti, "Mowhondipani hapa ndingamupa iye?" Bakawunlipa nezwipivu zwesiliva zwili makumi matatu. 16 Kubvisila lubaka igogo wakahaka lubaka gwakatambunuka kuti awuntengese.

17 Muhhuba lekutanga lenzano weTjinkwa Tjisina Mbidzo, badiyiwa bakahha kuna Yesu, bakati, "Mohaka kuti tinomubaakanyila poni kuti mudle zodliwa zwephasika?"

18 Wakati, "Yendani kuwumwe nlume munzi-nkulu, muwumbudze muti, ‘Ndhiyi unoti, lubaka gwangu gwatjiswika; ndowhodlila phasika kun'umba iyo nebadiyiwa bangu.’ "

19 Badiyiwa bakathama sebudziwa kwabo naYesu, bakabaakanya zodliwa zwephasika.

20 Kwakati kwatjibe madekwana aligele pazodliwa ena badiyiwa babe bali gumi nebabili; 21 bakati bedla, akati, "Lebeswa, ndoti kumuli, umwe wenyu unowhonditengesa."

22 Bakahhigwa nebuyendasi kwazo, umwe newumwe akati kuwunli, "Kungaba imi, He?"

23 Yesu wakahandula eti, "Iwhoyo waseba nami mundilo ndiye unowhonditengesa. 24 Nkololo wenhu unoyenda sekwakwaka kwagwa nekukwe, koga kwakawubangalalila iwhoyo nlume unowhotengesa Nkololo wenhu! Kwakowhoba kuhine hapa iwhoyo nlume waasakazwagwa."

25 Judasi, iwhoyo wakawuntengesa, wakati, "Kungaba imi, Ndhiyi?"

Yesu wakahandula eti, "Wajalo."

26 Bakati betjadla, Yesu akatola tjinkwa, akaboka kuNdzimu, akatjipemula, akaswiswa badiyiwa babe, eti, "Tolani, idlani; umbili wangu iwhoyu."

27 Wakatola nkombe, akati atjiboka, akabaswiswa eti, "In'wani muwunli, mose; 28 ngobe iyawa malopa angu etjibvumilano, anotebuligwa banjinji kuti bayetigwe mazwibhatigwa matjinyo. 29 Ndomubudza anditjowhon'wa kakale kwemitjelo yemahhambi, kudza kuba ilelo hhuba landinowhokun'wa kuli kutshwa ndinamwi mubumambo gwaTate bangu."

30 Bakati batjimba lumbo gwakakwagwa, bakabhuda bakayenda kuDombo leMitoba.

31 Yesu wakati kubali, "Mubusiku gwanasi mose mowhopalala ngentha yangu; ngobe kwakakwagwa kuti, ‘Ndowhobulaya nlisi, mhwizi dzengubi dzikapalala.’ 32 Hule kwemusiwa kwangu, ndowhobambeli kwenyu kuyenda kuGalile."

33 Phethiro wakahandula, eti, "Nekene bose bepalala ngentha yenyu, imi andingamusiye."

34 Yesu wakati kuwunli, "Lebeswa, ndoti kukuli, igogu busiku gwanasi, gukurume lisanhu lalila, nowhoba watjindilandula katatu."

35 Phethiro wakati kuwunli, "Kene kulifa namwi, anditowhomulandula."

Bose badiyiwa babe bakajalo bo.

36 Yesu wakayenda nebadiyiwa babe kubugalo gunoyi Getshemani, akati kubadiyiwa babe, "Galani pano, nditjanotembezela hapayaa." 37 Wakatola Phethiro nebakololo baZebhedi babili, akatangisa hhigwa nebuyendasi nedziyidzika. 38 Akaba eti kubali, "Meya yangu ihhele buyendasi kwazo, kuswikila mulufu; galani pano, mulinde nami."

39 Wakamilika akayenda nhambwana, akapfigama akakotama buso gukakunha pasi, akatembezela, eti, "Tate bangu, hapa kuyetikala, nkombe iwhoyu ngawundipinde; koga ke, kusi ngekuda kwangu, koga kuli kuda kwenyu."

40 Wakabgwilila kubadiyiwa babe akabawana bakayizela; akaba eti kuna Phethiro, "Makonegwa tubula linda nami kwe awa in'ompela koga? 41 Lindani mutembezele kudze musingine mukulikwa, meya inoda, koga nyama ayina masimba."

42 Yesu wakapamha gobubili, akabva pabali akanotembezela eti, "Tate bangu, hapa kuli kuti nkombe iwhoyu awungapinde ndisawun'wa, kuda kwenyu ngakuyetikale." 43 Wakabgwilila kakale akabawana bakayizela, ngobe bakabekuligwa newhope.

44 Ebva kakale pabali, wakayenda kutjena nabo akanotembezela gobutatu, epamha matama iwo zwawo. 45 Wakabgwilila kubadiyiwa babe akati kubali, "Mutjilele munyaluluka zwenyu? Lingani, lubaka gwatjiswika, Nkololo wenhu unotengesewa mumaboko ebatjinyi. 46 Milikani, ayindeni; lingani, ntengesi wangu waswika."

47 Wakati etjalebeleka, kwakaswika Judasi, umwe webaligumi nebabili, ehha nembunga webanhu bakasenga mabhangatjeke nedziswimbo, bebva kubaphirisiti bakulu nebawhola bebanhu. 48 Ntengesi waka abapa tjilakidzilo, eti, "Iwhoyo wandinowhoputa ndiye; muwumbhate."

49 Wakasedzela kuna Yesu nekulibilidza, akati, "Kunyalala kumuli, Ndhiyi!" Akawumputa.

50 Yesu wakawun'handula eti, "Nkwinya, wabingani pano?"

Ipapo bakabuya bakawumbhata bakayenda naye. 51 Umwe webaka bena Yesu wakahomola bhangatjeke neluboko, akatema nlanda wemphirisiti nkulu, akawunthubula zebe. 52 Ipapo Yesu wakati kuwunli, "Bgwiliza bhangatjeke lilo pabugalo gwalo; ngobe bose banohingisa bhangatjeke banowhopaladziwa nebhangatjeke. 53 Nokumbula kuti ndingakonegwa kumbila kuna Tate bangu, tjinyolotjo banowhonditumila mabunga ebagwi bengwa ali gumi nemabili ebatumwa beNdzimu? 54 Ngono dzinga hhadzisika tjini whalo dzinoti kwakafanila kuti kube sayikoko?"

55 Mulubaka igogo Yesu wakati kulukawu gwebanhu, "Mabhuda makasenga mabhangatjeke nedziswimbo kunga kunoyi monobhata hhibava koga muwhobhata imi? Hhuba nehhuba ndakagala muthempeli ndidiya, koga amuzotongondibhata. 56 Koga kose ikoku kwayetikala, kuti kuhhadzisike whalo dzebalebesambeli."

Ipapo badiyiwa babe bose bakawunsiya bakatihha.

57 Bakabasunga Yesu bakawuntola bakayenda naye kuna Khayiyafasi mphirisiti upehhugwi, paka patjikubungana bakwali nebawhola. 58 Koga Phethiro wakabatobela elitjakulenyana, akadza akanoswika mun'ha wemphirisiti upehhugwi, wakangina bo, akanogala pasi nebalindi kudze abone kuti ini tjinowhoyetikala. 59 Baphirisiti bakulu nelubahhe gose bakahaka busupi gwemanyepwa gwaka gungathama kuti Yesu abulawe, 60 koga bakaguhaya, nekutobe kwakahha basupi banjinji bewunlebela manyepwa. Kubupelo kwakahha balume babili mbeli, 61 bakati, "Iwhoyu nlume wakati, ‘Ndotubula kolomola thempeli leNdzimu, ndikalibaka mumahhuba matatu.’ "

62 Mphirisiti upehhugwi wakamilika akati kuna Yesu, "Awuna n'handulo? Ini ikoku kunolebgwa nebalume ibaba nekuko?" 63 Koga Yesu wakanyalala. Mphirisiti upehhugwi wakati kuwunli, "Ndokutunisa neNdzimu mpenyu, utibudze kuti kene ndiwe Khirisitu, Nkololo weNdzimu."

64 Yesu wakawun'handula eti, "Majalo. Koga ndomubudza, kubva lubaka igogu mowhobona Nkololo wenhu aligele kuludli gweMasimba, ehha ali mumakole ekudzimu."

65 Ipapo mphirisiti upehhugwi wakapalula zwiyambalo zwizwe, akati, "Watuka Ndzimu. Titjahakilani basupi? Mawha tuka Ndzimu kwaathama. 66 Motini nekukwe?"

Bakahandula beti, "Iwhoyu wakafanila fa."

67 Bakakotjiwumpfila mubuso, bakawunloba; bamwe bakawupwawhula, 68 beti, "Lebesambeli, iwe Khirisitu! Ndiyani wakuloba?"

69 Phethiro waka aligele kuhhe mun'ha. Kwakahha n'hingikadzi kuwunli akati, "Nawebo wawuna Yesu Nghalile."

70 Koga iye wakakulamba mbeli kwabo bose, eti, "Anditoziba kuti noleba nekweni." 71 Akabva ipapo akayenda mugutukutu, umwe n'hingikadzi akawumbona, akati kubanhu baka balimile ipapo, "Iwhoyu nlumetate wayena Yesu wekuNazaretha."

72 Wakapamha akalamba, etuna, eti, "Anditowunziba iwhoyo nlume."

73 Kwapela lubakanyana baka belimile ipapo bakati kuna Phethiro, "Lebeswa iwe uwumwe wabo, ngobe lebeleka kuko kolakidza kujalo."

74 Iye wakatanga tukana ntome etuna eti, "Anditowunziba iwhoyo nlume."

Tjinyolotjo gukurume liba lilila. 75 Phethiro eba ekumbula matama alebgwa naYesu, eti, "Gukurume lisanhu lalila, nowhondilandula katatu." Akabhuda ipapo akayenda kuhhe akanolila zwinogwadza.