1 Ilelo zwalo hhuba Yesu wakabhuda mun'umba akanogala pawhunde yegungwa. 2 Banhu banjinji bakawunkubunganila, kwakata kuti adze agale mukepe; mbunga wose wakama munsetje. 3 Wakababudza zwinhu zwinjinji ngezwifananidzo.

Eti, "Whililani! Ndzwali wakayenda enodzwala. 4 Wakati ewaya, imwe mbewu ikawila muzila, nyunyi dzikabuya dzikayidla. 5 Imwe mbewu yakawila pana mahalabgwana, paka pasina mavu manjinji, ikalibilidza mela nekuti kwaka kusina mavu manjinji, 6 koga kwakati hhuba litanha mela ukatshwa; saku waka usina midzi wakabva waswaba. 7 Imwe mbewu yakawila mumimhiwa, mimhiwa ikakula ikazwiya mela. 8 Imwe mbewu yakawila pamavu akanaka ikazwala, imwe kwakapamhiwa kagulu, imwe kuli makumi matanhatu, imwe kuli makumi matatu."

9 Yesu wakafidza eti, "Unazebe ngaawhe."

10 Badiyiwa bakakotjihha kuwunli beti, "Molebelekelani nabo nezwifananidzo?"

11 Wakabahandula eti, "Imwi makapiwa luzibo gwezwakasumbikika zwebumambo gwekudzimu, koga ibo abazogupiwa. 12 Ngobe iwhoyo unako unowhopiwa kunjinji, akaba nekwakawanda; koga usina, nayikoko kwaanako unowhokutolegwa. 13 Ndizo ndilebeleka nabo nezwifananidzo, ngobe nekutobe bebona abatobona, nekutobe bewha abatowha, kakale abatowhisisa. 14 Kohhadzisika lebesambeli kwa Isaya kunoti.

" ‘Mowhowha koga amutowhowhisisa,

kakale mowhobona koga musikuse munkumbulo.

15 Ngobe mimoyo yebanhu ibaba yanyamba,

zebe dzabo dzolemegwa newha,

nemeho abo batjiwahhalila,

swiyo bangabona nemeho abo,

bakawha nezebe dzabo,

kakale bakawhisisa nemimoyo yabo,

bakahandukila kundili kuti ndibapodze.’ "

16 "Koga akakombolegwa meho enyu ngobe anobona, nezebe dzenyu dzakakombolegwa ngobe dzowha. 17 Lebeswa, ndoti kumuli, balebesambeli banjinji nebanhu bakalulama banjinji bakabeyemula bona tjamunobona, koga abazotjibona, newha tjamunowha, koga abazotjiwha."

18 "Tjiwhani ke kuti tjifananidzo tjendzwali tjolebani. 19 Hapa nhu ewha ndebo yebumambo koga esingayiwhisise, mbi unohha etola tjakadzwagwa mumoyo uwe; iyeyi ndiyo mbewu yakadzwagwa muzila. 20 Mbewu yakawila pana mahalabgwana, kobviwa iwhoyo unowha dama, tjinyolotjo eliwamutjila nekuhanha; 21 koga nentha yekuti alina midzi muwunli, lotjila kwelubaka nyana, panoswika bulemo kene dziyidzika ngentha yedama, unobva anyala moyo tjinyolotjo. 22 Mbewu yakawila mumimhiwa, kobviwa iwhoyo unowha dama, koga da zwinhu zwehango nehanhila fumwa kukotshambidzila dama, likosaba nemitjelo. 23 Mbewu yakadzwagwa mumavu akanaka, kobviwa iwhoyo unowha dama akaliwhisisa; lebeswa unoba nemitjelo yakapamhiwa, imwe kagulu, imwe kuli makumi matanhatu, imwe kuli makumi matatu."

24 Wakababudza tjimwe tjifananidzo, eti, "Bumambo gwekudzimu gungafananisiwa nenhu wakadzwala mbewu yakanaka muminda iye; 25 koga kwakati banhu balilele, tjita tjitje tjakahha tjikadzwala dihwa pakati kwezwidlo, tjikamilika tjiyenda. 26 Zwidlo zwakati zwamela zwikakula, zwatjifunda, dihwa likaboneka bo. 27 Balanda bemweni wenzi bakahha kuwunli beti, ‘Tate, kati maka musadzwala mbewu yakanaka muminda yenyu? Kwaba nedihwa tjini kakale?’ 28 Wakabahandula eti, ‘Itjita tjakakuthama ikoku.’ Balanda beba beti kuwunli, ‘Mohaka kuti tiyende tinolisipula?’ 29 Akabahandula eti, ‘Aa; ngobe mungati musipula dihwa mukosipulilanya nezwidlo. 30 Letjani kose kukule kudze kunoti palubaka gwevuna. Palubaka gwevuna ndowhobudza banoba bevuna kuti. Kubunganyani dihwa kutanga mulite masunga anowhopisiwa; mukotjikubunganya zwidlo muzwihhise kutjidandale tjangu.’ "

31 Wakababudza tjimwe tjifananidzo, eti, "Bumambo gwekudzimu gonga mhudzi yemasitadi nhu yaakadzwala muminda iye; 32 ndiyo mhudzi nhukununu panayidzo dzose, koga hapa yakula iwhuluwhulu kupinda zwilimwa zose kakale inokula ikaba nti, nyunyi dzemumhepo dzobuya dzibaka zwihaka munhabi dzawo."

33 Wakababudza tjimwe tjifananidzo. "Bumambo gwekudzimu gonga mbidzo mfumakadzi yaakatola akasa muzwilizanyo zwitatu zwebgwisa, zwikadza zwikabila zose."

34 Kose ikoku Yesu wakakuleba kuli zwifananidzo; haana tjaakaleba kubali esingalebe tjifananidzo. 35 Ikoku kwakakuhhadzisa tjakalebgwa nenlebesambeli.

"Ndowhohhula nlomo wangu ndileba zwifananidzo,

ndowholeba tjabe tjakasumbikala kubvila pabambiwa kwehango."

36 Wakamilika esiya gubungano lebanhu akangina mun'umba. Badiyiwa babe bakahha kuwunli, beti, "Mutitjenesele tjifananidzo tjedihwa muminda."

37 Wakahandula eti, "Unodzwala mbewu yakanaka uNkololo wenhu; 38 minda ihango, mbewu yakanaka kobviwa bana bebumambo; dihwa kobviwa bana benhu mbi, 39 kakale tjita tjakabadzwala ndisatane; gowho ibupelo gwetjibaka, banokowha ibatumwa beNdzimu. 40 Sedihwa likubunganyiwa lipisiwa nemoto, kowhojalo bo pakupela kwetjibaka. 41 Nkololo wenhu unowhotuma batumwa babe, banowhodusa mubumambo gugwe kose kunohhisa jinyo nebayeti bezwibi bose, 42 baka baposela mubibi lemoto; imhomo banhu banowholila bakalobanya meno. 43 Bakalulama banowhopenya sehhuba mubumambo gwaTate babo. Unazebe ngaawhe."

44 "Bumambo gwekudzimu gonga fumwa yakasumbikala muminda, nhu yaanoti ayiwana akayifumika; kukotjiti ngentha yehanha kukwe akayenda enotengesa kose kwaanako akatenga minda iyeyo."

45 "Kakale bumambo gwekudzimu gonga ntengi unohaka ndalama dzakanakisisa, 46 paakawana ndalama in'ompela inantengo upehhugwi, wakayenda akanotengesa kose kwaanako akayitenga."

47 "Kakale, bumambo gwekudzimu gonga njanga yakaposegwa mugungwa ikabhata njudzi dzose dzewhobe; 48 yakati yahhala, banhu bakayikwebela pansetje bakagala pasi bakahala dzakanaka bedzisa mutjidla dzakayipa belaha. 49 Ndizo kowhojalo pabupelo gwetjibaka. Batumwa beNdzimu banowhobuya bethewula babi mubakalulama, 50 bekobaposela mubibi lemoto; imhomo banhu banowholila bakalobanya meno."

51 "Makuwhisisa kose ikoku?"

Bakawun'handula beti, "Ee."

52 Eba eti kubali, "Ndizo wose nkwali watjiba ndhiyiwa mubumambo gwekudzimu unonga mweni wenzi unodusa mudula lile fumwa dzwa nefumwa whulukugwi."

53 Yesu wakati atjipedza zwifananidzo izwezwi akabva ipapo, 54 eswika muhango yakanyi kukwe wakabadiya musinagogu yabo, bakatjenama, beti, "Nlume iwhoyu wawana poni butjenjebvu igogu nemihingo mikulu iyeyi? 55 Haata iye nkololo wembehhi? Meyabe abatoyi Mariya? Banun'una babe haata Jakobe naJosefa naSimoni naJuda? 56 Nehazwadzi dzidze dzose atinadzo pano? Ngono iwhoyu nlume wakakuwana poni kose ikoku?" 57 Bakawugwadziligwa.

Koga Yesu wakati kubali, "Ndimuhango yakanyi kukwe nemun'ha uwe koga nlebesambeli paasingakudziwe." 58 Haazothama mihingo mikulu minjinji ipapo, ngentha yesagalamoyo kwabo.