1 Bakati besedzela pedlo neJerusalema, batjiba panzi unoyi Bhethifeji, paDombo leMitoba, Yesu akatuma badiyiwa babili, 2 eti kubali, "Yendani kunzi umbeli kwenyu mowhowana kakambe tjakasungiligwa tjina gondolo latjo; muzwisunungule mubuye nazo kundili. 3 Kukaba nenhu unoleba tjinhu kumuli, muhandule muti, ‘He banohaka zwihingisa,’ unowhozwiletja nekulibilidza."

4 Ikoku kwakayetikala kuti kuhhadzise tjakatjalebgwa nenlebesambeli eti,

5 "Budza nkololokadzi weZiyoni uti,

linga, mambo uwo unohha kukuli,

Akazwitebamisa, akatanha kakambe,

negondolo, mhulu yekakambe."

6 Badiyiwa bakayenda, bakathama sekwabaka babudziwa naYesu. 7 Bakabuya nekakambe negondolo latjo, bakatilika zwiyambalo zwabo pehhugwi kwazo, Yesu akatanha. 8 Bunji gwebanhu bakawala zwiyambalo zwabo muzila, bamwe bekatema nhabi dzemiti bakadziwala muzila. 9 Mabunga aka eyenda mbeli kukwe ne aka ewuntobela, aka emimila eti, "Whosana* kuNkololo waDavida! Wakakombolegwa iye unohha muzina laHe! Whosana pehhugwihhugwi!"

10 Wakati angina muJerusalema, nzi-nkulu wose wakadzongeka, banhu beti, "Ndiyani iwhoyu?"

11 Mabunga akahandula eti, "Ndi Yesu nlebesambeli unobva kuNazaretha, hango yeGalile."

12 Yesu wakangina muthempeli akatata bose baka betengesa netenga muthempeli, akapitula mathebuli ebanhu baka betengesa mari nezwigalo zwayibabo baka betengesa njiba. 13 Wakati kubali, "Kwakakwagwa kuyi, ‘N'umba yangu inowhodan'wa iyi in'umba yetembezela’; koga imwi moyithama guwhu lembava."

14 Mapofu nezwilema bakabuya kuwunli muthempeli akabatjidza. 15 Koga baphirisiti bakulu nebakwali bakati bebona zwinhu zwinotjenamisa zwaaka ethama, nebana bemimila muthempeli, beti, "Whosana kuNkololo waDavida!" bakahhala buhongola; 16 bakati kuwunli, "Nowha tjabanoleba?"

Yesu wakati kubali, "Ndowha; kati amuzotongobala lukwalo panoti, ‘Mumilomo yebana neyengawana kowhobhuda lumbidza kwakapelela’?"

17 Yesu wakabasiya, akabhuda munzi-nkulu akayenda kuBhethani, akanoyizela ko busiku igogo.

18 Mangwanana, obgwilila kunzi-nkulu, waka enahhala. 19 Wakati ebona nkuyu untome kwezila akayenda kuwunli, koga akuna tjaakanowana pawunli kuhhe kwemahhani woga. Wakati kuwunli, "Kusitjabe nentjelo unobhuda mukuli kene lini." Tjinyolotjo nkuyu wakaswaba.

20 Badiyiwa pabakawumbona bakatjenama kwazo beti, "Nkuyu watjimbidza swaba tjini?"

21 Yesu wakahandula eti, "Lebeswa, ndoti kumuli, hapa muna kugalamoyo musina kun'un'una, amutowhothama tjandathama kunkuyu koga, koga kene muti kudombo ileli, ‘Sipuka uposegwe mugungwa,’ kowhoyetikala. 22 Kene ini tjamunokumbila mumitembezelo, mowhotjiwamutjila, hapa muna kugalamoyo."

23 Yesu wakati atjingina muthempeli, baphirisiti bakulu nebawhola bakabuya kuwunli elipakati kwediya banhu, bakawumbhuzwa beti, "Zwinhu izwezwi nozwithama nesimba lipi, kakale ndiyani wakakupa simba ileli?"

24 Yesu wakabahandula eti, "Ndowhomubhuzwa mbhuzo; mukandihandula, ndowhomubudza kuti kungesimba lipi ndithama zwinhu izwezwi. 25 Bvubika kwaJohane kwakakubva poni? Kwakakubva kudzimu kene kwakakubva kubanhu?"

Bakakakabadzana tjekwabo beti, "Hapa tingati, ‘Kwakakubva kudzimu,’ iye unowhoti kutili, ‘Nentha yeni ngono musakagalamoyo muwunli?’ 26 Koga hapa tingati, ‘Kwakabva kubanhu,’ tohla lukawu gwebanhu; ngobe bose banogalamoyo kuti Johane waka eli nlebesambeli." 27 Ndizo ke bakahandula Yesu beti, "Atitoziba."

Iye wakati kubali, "Nami bo anditowhomubudza ke kuti kunge simba lipi ndithama zwinhu izwezwi."

28 "Ngono mokumbulani? Nlume waka ena bakololo babili; akayenda kuna wekutanga akati, ‘Nkololo wangu yenda unohinga kuminda yemahhambi nasi.’ 29 Wakahandula eti, ‘Anditohaka’; koga hule kwelubaka wakahandula nkumbulo akayenda. 30 Tate bakayenda kuna webubili bakaleba tjinhu itjo zwatjo; akahandula eti, ‘Ee ndoyenda tate,’ koga azoyenda. 31 Pabubili gwabo ndiwupi wakayeta kuda kwatate babe?"

Bakati, "Wekutanga."

Yesu akakoti kubali, "Lebeswa, ndoti kumuli baketisi nemhombgwe banongina mubumambo gweNdzimu kumutangila. 32 Ngobe Johane wakahha kumuli ali muzila yendulamo, amuzowunghalamoyo, koga baketisi nemhombgwe bakawunghalamoyo; nekene makati makubona ikoku, amuzohanduka mukawunghalamoyo."

33 "Iwhani tjimwe tjifananidzo. Kwakakuna nlume wakalima minda yemahhambi, akayihoha akatsha gomba leswinila wayini, akabaka dumba lefulefu lebalindi, akakotjiyisayidza bamwe balimi, akabe eyenda kuyimwe hango. 34 Lubaka gweyibva kwemahhambi gwasedzela, wakatuma balanda babe kuna baakasayidza minda, kuti banopiwa iye mitjelo; 35 baakasayidza minda bakabhata balanda babe bakaloba un'ompela, bakabulaya umwe, baka khikithidza umwe nemabgwe. 36 Wakapamha tumila bamwe balanda, banjinji kupinda bekutanga; bakababhata zwakafanana nebekutanga. 37 Wakapedzisila netuma nkololo uwe, eti, ‘Banowhoba nemazwibhato kunkololo wangu.’ 38 Koga bakati bebona nkololo, bakalebelesana beti, ‘Whoyu ndiye nghalinhaka; ayiwumbulayeni titole nhaka iye.’ 39 Bakawumbhata bakawumposela kuhhe kweminda, bakawumbulaya."

40 "Ngono hapa mweni weminda obuya unowhota etini kubanhu ibabo baaka asayidza minda?"

41 Baphirisiti bakulu nebawhola bakahandula beti, "Unowhobabulaya zwinogwadza ibabo babi baaka asayidza minda, ekotola minda iye eyisayidza bamwe banowhowumpa mitjelo muzwibaka zweyibva kwayo."

42 Yesu wakati kubali, "Amuzotongobala dziwhalo.

" ‘Bgwe ilo tjekwalo lakalambiwa nebabaki

ndilo latjiba bgwe linotambunudza mbako.

Ikoku kwaka kuli thama kwaHe;

kakale kohanhisa mumeho edu’ "?

43 "Ndizo ke ndomubudza, bumambo gweNdzimu mowhogutolegwa gukapiwa njudzi dzinozwala mitjelo yago." 44 *

45 Baphirisiti bakulu nebaFarisi bakati bewha zwifananidzo zwizwe bakaziba kuti waka eleba nekwabo. 46 Koga pabakayedza wunsunga, bakahla lukawu gwebanhu, ngobe banhu baka bewuntola senlebesambeli.