1 Mulubaka igogo Yesu wakapalama mudziminda kuli nsi wesabatha; badiyiwa babe baka bena hhala, bakakowha miholo yezwidlo bakadla. 2 Koga baFarisi bakati bekubona ikoku, bakati kuwunli, "Linga! badiyiwa babo banothama tjisingabvumigwe yetiwa muhhuba lesabatha."

3 Wakabahandula eti, "Amuzotongobala tjakayetiwa naDavida, abhakhwa nehhala, nayibabo baaka enabo. 4 Kuti wakangina tjini mun'umba yeNdzimu akadla Tjinkwa Tjakayengemala, tjaaka asingabvumigwe dla iye kene ibabo baaka enabo, tjaka tjili tjebaphirisiti koga? 5 Kene amuzobala munlayo kuti muhhuba lesabatha baphirisiti muthempeli banotjinya sabatha tjini, koga abana nlandu? 6 Ndomubudza, tjikulu* pathempeli tjiyipapa. 7 Kakale kadzene maka maziba kuti kobvani kuti, ‘Ndoyemula mawhilangoni kusi tjibhayilo,’ moba musingawane nlandu banhu basina nlandu. 8 Ngobe Nkololo wenhu ndihe weSabatha."

9 Ebva ipapo wakayenda akanongina kusinagogu labo. 10 Mukati kwaka kuna nlume unaluboko gwakahwehwana. Beba bewumbhuzwa beti, "Kumunlayo lapa muhhuba lesabatha?" kuyetila kuti bawuntilike nlandu.

11 Eba ebahandula eti, "Hapa umwe pakati kwenyu, enamhwizi in'ompela ikowila mugomba muhhuba lesabatha, haangayiduse? 12 Tjilemela tjenhu tjikulu kungapani kupinda mhwizi! Ndizo kumunlayo thama tjinhu tjibuya muhhuba lesabatha." 13 Eba eti kunlume iwhoya, "Tambunudza luboko gugo."

Iwhoyo nlume eba egutambunudza, gwakalulama, gukatambunuka segumwe. 14 Koga baFarisi bakabhudila kuhhe bakanolangana kuti bangawumbulaya tjini.

15 Yesu, eziba nekwayikoku, wakabva ipapo. Banhu banjinji bakawuntobela, akabalapa bose, 16 akabalaya kuti basibudze bamwe nekukwe. 17 Ikoku kwakakuhhadzisa tjakalebgwa nenlebesambeli Isaya.

18 "Whoyu nlanda wangu wandahala,

ndhikani wangu unohanhigwa nemoyo wangu.

Ndowhosa Meya yangu muwunli,

unowhosumikila ndulamo kuBataya.

19 Haatowhokakabadzana nenhu kene thama hhoba,

akuna unowhowha whi lile mudzizila;

20 haatowhovuna luhanga gwakaleleka

kene dzima tjivoni tjinopfungayila,

edza eyeta kuti ndulamo ikunde,

21 neBataya banowhogalabgwe muzina lile."

22 Kwakakohhisiwa kuwunli mbebebe yebhofu igegwe nemeyambi, akayilapa, mbebebe yakalebeleka kakale ikabona. 23 Banhu bose bakatjenama, bakati, "Kungaba iye Nkololo waDavida iwhoyu?"

24 Koga Bafarisi bekuwha ikoku bakati, "Whuhingisa Bhelezebhule koga, he wemeyambi, kungata kuti iwhoyu nlume atate meyambi."

25 Eziba mikumbulo yabo, wakati kubali, "Gose bumambo hapa gwakapalalana pakati tjekwago gopalala, kakale akuna nzi-nkulu kene n'umba inogwa tjekwayo inowhoma; 26 kakale hapa Satane etata Satane, unogwa tjekukwe; bumambo gugwe gowhoma tjini ngono? 27 Kakale hapa imi nditata meyambi ndihingisa Bhelezebhule, bakololo benyu banodzitata behingisa yani? Ndizo banowhoba batongi benyu. 28 Koga hapa kuli Meya yeNdzimu yandinohingisa tata meyambi, kobva kuti bumambo gweNdzimu gwatjihha kumuli."

29 "Kene nhu angangina tjini mun'umba yenhu wakasima akakuba nhundu dzidze, kuhhe kwekuti atange asungilila iwhoyo nhu wakasima? Ekotjikuba zwe."

30 "Usinami unogwa nami, ne usingakubunganye nami unopaladza. 31 Ndizo ndomubudza, banhu banowhoyetigwa mazwibhatigwa lose jinyo nejinyo letuka, koga tuka Meya akutowhoyetigwa mazwibhatigwa. 32 Kene yani unoleba zwakayipa nekweNkololo wenhu unowhoyetigwa mazwibhatigwa; koga kene yani unoleba zwakayipa nekweMeya Yakayengemala atowhoyetigwa mazwibhatigwa, kene mulubaka igogu kene mulubaka gunohha."

33 "Thamani nti ube mbuya, nentjelo wawo ube mbuya; kene muthame nti ube mbi nentjelo wawo uyipe; ngobe nti unozibgwa ngentjelo wawo. 34 Imwi ludzi gwenyoka! mungaleba tjini tjakalulama, imwi makayipa? Ngobe nlomo unoleba zwihhele mumoyo. 35 Nhu wakalulama, mukululama kukwe kobhuda tjakalulama, koga nhu mbi, mububi gugwe kobhuda tjibi."

36 "Ndomubudza, muhhuba letongewa banhu banowhozwitjenesa nekwelimwe nelimwe dama lisina n'hingo laba leba; 37 ngobe ngematama awo nowhosunungugwa, kakale ngematama awo nowhowan'wa nlandu."

38 Nayigogo lubaka elebeleka, bamwe bakwali nebaFarisi bakati kuwunli, "Ndhiyi, toyemula bona tjilakidzilo tjinobva kumuli."

39 Koga wakabahandula eti, "Tjizekugwana tjibi kakale tjisingagalikebgwe kuNdzimu tjohaka tjilakidzilo; koga akuna tjilakidzilo tjatjinowhopiwa kuhhe kwetjilakidzilo tjenlebesambeli Jona. 40 Sayikoku Jona akaba muntumbu wewhobe, kwemahhuba matatu, siku nesikati, Nkololo wenhu bo unowhoba pasi mumoyo wehango kwemahhuba matatu, siku nesikati. 41 Banhu bekuNiniva banowhohha mbeli muhhuba letongewa bena tjizekugwana itjetji bekatjiwana nlandu; ngobe bakahanduka pakusumikila kwaJona, tjikulu* pana Jona tjipano. 42 Mambokadzi wekuBurwa unowhomuka muhhuba letongewa ana tjizekugwana itjetji akatjiwana nlandu; ngobe wakabuya ebva kubupelo gwehango ewhowha butjenjebvu gwaSolomoni, tjikulu* pana Solomoni tjipano."

43 "Hapa meyambi yabhuda munhu, inopalama muhango pasina vula ihaka nyaluluka, koga ikakuhaya. 44 Inokotjiti, ‘Ndowhobgwilila kun'umba yangu kwandakabva.’ Hapa ibuya inowana kusina tjimukati, yakatshwayigwa kakale yakabaakanyiwa. 45 Inokotjiyenda ke inobuya nedzimwe meya dzili kutondeka dzakayipa kuyipinda, dzihha dzingina dzigala mukati; mamo ebupelo enhu iwhoyo anoyipa kupinda ekutanga. Kowhojalo bo kutjizekugwana itjetji tjibi."

46 Etjalebeleka kubanhu, meyabe nebanun'una babe bakama kuhhe, behaka lebeleka naye. 47 (Umwe pakati kwabo wakati kuwunli, "Iwha ngeno! Meyabo nebanun'una babo bamile kuhhe, banohaka lebeleka nawe."*)

48 Koga wakawun'handula eti, "Ndiyani mme bangu, kakale ndiboyani banun'una bangu?" 49 Etondeka badiyiwa babe, wakati, "Ababa mme bangu nebanun'una bangu! 50 Ngobe kene yani unota kuda kwaTate bangu bakudzimu unun'una wangu, nehazwadzi, namme bangu."