1 Yesu wakati apedza lebeleka matama iyawa, akabva muGalile akayenda kuntunhu weJudiya, seli yaJorodani. 2 Banhu banjinji bakawuntobela, akabatjidza ikweno.

3 Bamwe baFarisi bakahha kuwunli bewhowunlika bebhuzwa beti, "Kumunlayo kuti nlume alambane nenkadzi uwe, ewunlambila kene ini zwako?"

4 Yesu wakahandula eti, "Amuzobala kuti wakababumba kubvila kutangisa wakabathama wetjilume newetjikadzi, 5 kakale wakati, ‘Ngentha yayikoku nlume unowhosiya tatayi namayi akanamatilana nenkadzi uwe, bubili gwabo banowhoba nyama in'ompela’? 6 Abatjibabili, koga batjiba nyama in'ompela. Ndizo ke tjabhatshanyiwa neNdzimu, ngakusibe nenhu unotjipalalanya."

7 Bakati kuwunli, "Nentha yeni ngono Mozisi akalaya kuti nlume awumpe lukwalo gwelambana, ekoti ewuntata?"

8 Wakati kubali, "Ngentha yebukukutu gwemimoyo yenyu Mozisi wakabvumila kuti mulambane nebakadzi benyu, koga kubvila kutangisa kwaka kusakajalo. 9 Kakale ndoti kumuli. Kene yani unolambana nenkadzi uwe, kuhhe kwekuti athama bupombgwe, eba elobola umwe, wathama bupombgwe."

10 Badiyiwa bakati kuwunli, "Hapa kuli kuti kwakajalo pakati kwenlume nenkadzi uwe, salobola kuhine."

11 Koga Yesu wakabahandula eti, "Akuta banhu bose bangawamutjila ndebeleko iyeyi, kuhhe kwebakayipiwa koga. 12 Ngobe kuna ngomwa dzakazwagwa dzakajalo, kuna dzimwe dzakayetiwa ngomwa nebanhu, kakale kuna dzimwe ngomwa dzakazwithama ngomwa dziyetila bumambo gwekudzimu. Unotubula wamutjila tjidiyo itjetji, ngaatjiwamutjile."

13 Bamwe banhu bakahhisa bana batjetjana kuwunli kuti ababige maboko, koga badiyiwa babe bakabatjemela ibabo banhu. 14 Koga Yesu wakati, "Letjani bana bahhe kundili, musibadzibise; ngobe bumambo gwekudzimu ndegwebakajali."

15 Wakababiga maboko, akamilika akayenda.

16 Umwe wakahha kuwunli akati, "Ndhiyi, nditjipi tjiyeto tjibuya tjandakafanila thama kudze ndibe nebupenyu gusingapele?"

17 Wakati kuwunli, "Unondibhuzwilani nekwetjibuya? Un'ompela koga umbuya. Hapa uhaka ngina mubupenyu gusingapele tjengeta milayo."

18 Nhhuhha wakahandula eti, "Ipi?"

Yesu wakati, "Usibulaye, usithame bupombgwe, usikwibe, usilebele nhu manyepwa, 19 lemekedza tate babo na meyabo, kakale ude mbakidzani uwo nezila yawunozwida iwe."

20 Nhhuhha wakahandula eti, "Yose iyeyi ndakayitobela; ini tjandinotayila?"

21 Yesu wakati kuwunli, "Hapa uhaka ba nhu wakatambunuka, yenda unotengesa kose kwawunako, upe bahayi, nowhoba nefumwa kudzimu; ubuye, unditobele."

22 Nhhuhha wakati ewha ikoku, akayenda anabuyendasi; ngobe waka anafumwa njinji.

23 Yesu wakati kubadiyiwa babe, "Lebeswa, ndoti kumuli, kowholema kuti mfumi angine mubumambo gwekudzimu. 24 Ndopamha kakale, ndomubudza, kulelulelu kuti kamela lipalame muhuli yelunji, pana kuti mfumi angine mubumambo gweNdzimu."

25 Badiyiwa babe pabakawha ikoku bakatjenama kwazo, bakati "Ngono ndiyani ungatjidziwa?"

26 Yesu wakabalinga akati kubali, "Nebanhu akutoyetika. Koga neNdzimu zwinhu zose zoyetika."

27 Phethiro akaba eti kuwunli, "Bonani, iswi takasiya kose tikatobela imwi. Ngono towhowanani?"

28 Yesu wakati kubali, "Lebeswa, ndoti kumuli, muhango tshwa, hapa Nkololo wenhu atjigala patjigalo tjitje tjegudzo, imwi makanditobela mowhogala bo pazwigalo zwili gumi nezwibili zwetonga, mutonga njudzi dzili gumi nembili dza Isirayeli. 29 Wose wakasiya mizi, kene bakuluyi kene banun'una kene hazwadzi, kene tatayi kene mayi, kene bana, kene minda, nentha yezina langu, unowhowamutjila kwakapamhiwa ka gulu kakale unowhodla nhaka yebutjilo gusingapele. 30 Koga banjinji bekutanga banowhoba bekupedzisila, bekupedzisila banowhoba bekutanga."