1 Kwakakohha bamwe baFarisi nebakwali kuna Yesu bebva kuJerusalema, bakati, 2 "Nentha yeni badiyiwa babo betjuluka nlenje webawhola? Ngobe abatongula maboko hapa bedla zodliwa."

3 Koga wakabahandula eti, "Kungentha yeni imwi bo mutjuluka nlayo weNdzimu ngentha yenlenje wenyu? 4 Ngobe Ndzimu wakati, ‘Lemekedza tate namme babo,’ kakale, ‘Iwhoyo unoleba zwakayipa nekwatatayi kene mayi, ngaafe kwelebeswa.’ 5 Koga imwi moti, ‘Hapa kene yani ebudza tatayi kene mayi eti, tjipo tjandowhomupa tjapiwa Ndzimu, haazotjafanila lemekedza tate babe.’ 6 Ndizo ke, ngentha yenlenje wenyu, mathama kuti nlayo weNdzimu usibe nen'hingo. 7 Imwi batjengeli! Waka akatambunuka Isaya elebesambeli nekwenyu, eti.

8 " ‘Banhu ibaba banondilemekedza nemilomo yabo,

koga mimoyo yabo ikulekule nami.

9 Akuna tjakunohinga ndinamata kwabo,

ngobe bediya milayo yebanhu sekunoyi milayo yangu.’ "

10 Wakadana banhu, ebadanila kuwunli, akati kubali, "Iwhani muwhisise. 11 Akuta tjinongina munlomo tjikothama nhu akasayengemala, koga tjinobhuda munlomo, nditjo tjinothama nhu akasayengemala."

12 Badiyiwa bakahha bakati kuwunli, "Moziba kuti baFarisi bamon'wa bewha tjamaleba?"

13 Wakahandula eti, "Wose nti usakadzwagwa naTate bangu bakudzimu unowhosipugwa. 14 Siyanani nabo; mapofu ebatungamili. Hapa bhofu litungamila limwe bhofu, bubili gwawo anowila mugomba."

15 Koga Phethiro wakati kuwunli, "Mutitjenesele tjifananidzo itjetji."

16 Wakahandula eti, "Namwi bo amanhu mukaba nekuwhisisa? 17 Amutowhisisa kuti kose kunongina munlomo kopindila kuntumbu, kupinda kunobhuda kuhhe kwembili? 18 Koga itjetjo tjinobhuda munlomo tjibva mumoyo, yetji nditjo tjinothama nhu akasayengemala. 19 Ngobe mumoyo kobhuda mikumbulo mibi, nebulaya, nebupombgwe, nepinga*, neswada, nebusupi gwemanyepwa netukana. 20 Izwezwi zwinhu ndizo zwinothama nhu akasayengemala; koga dla usangula maboko akutothama nhu akasayengemala."

21 Yesu wakamilika ipapo, akayenda kuntunhu weTire neSidoni. 22 Kwakahha kuwunli mfumakadzi wekuKhenani waka egala muntunhu iwhoyo, elila eti, "Mundiwhile ngoni, He, Nkololo waDavida; nkololokadzi wangu ugegwe nemeyambi kwazo."

23 Koga azowun'handula. Badiyiwa babe bakahha bakawunkumbilisisa, beti, "Muwutateni, ngobe unotitobela etiyetila hhoba."

24 Wakabahandula eti, "Ndakatumiwa kumhwizi dzakalahika dzeludzi gwa Isirayeli koga."

25 Koga mfumakadzi wakahha akapfigama mbeli kukwe, eti, "He, mundibhatshe."

26 Wakawun'handula eti, "Akuzonaka kuti utole tjinkwa tjebana uposela mbgwa."

27 Mfumakadzi wakahandula eti, "Ndobvuma, He, kene idzo mbgwa bo dzodla mabhurupfuru anowa pathebuli yabatezi badzo."

28 Yesu wakawun'handula eti, "Umfumakadzi unabugalimoyo gusihoma! Ngakuyetikale seyemula kuko." Nkololokadzi uwe wakabva alapika tjinyolotjo.

29 Yesu wakapindilambeli kubva ipapo akayenda esumha negungwa leGalile. Wakatanha dombo, akagala ipapo. 30 Banhu banjinji bakahha kuwunli, behhisa banohudza, mapofu, zwilema, mbebebe, nebamwe banjinji njinji, bakabasa pamakumbo awe, akabalapa, 31 banhu bakatjenema, bebona mbebebe dzelebeleka, zwilema zwalulama, banohudza betubula yenda, mapofu ebona; bakakudza Ndzimu wa Isirayeli.

32 Yesu wakakotjidana badiyiwa babe ekati, "Ndowhila ngoni bunga ileli, ngobe taba tose kwemahhuba matatu, abana tjabanodla; kakale anditoda kuti nditi ngabayende nehhala, ngobe kungayetikala bakuligwe nehhala bawe muzila."

33 Badiyiwa beba beti kuwunli, "Ngono mutjilambanyika tingawana poni tjinkwa tjingagutsha bunga gulugulu zwingapa?"

34 Yesu eba ebabhuzwa eti, "Muna zwinkwa zwingana?"

Beba behandula beti, "Zwili kutondeka, newhobe nhukununu homanana."

35 Ebudza banhu kuti bagale pasi pamavu, 36 wakatola zwinkwa zwili kutondeka newhobe, atjiboka kuNdzimu wakazwipemula akazwipa badiyiwa, badiyiwa bakapa mabunga. 37 Bakadla bose bakaguta; bakawolela zwipemu zwezodliwa zwasiyiwa nebanhu zwikahhala zwitundu zwili kutondeka. 38 Kwakadla banhu beli zwiwulu zwina betjilume, kusingabagwe betjikadzi nebana.

39 Hule kwepaladza mabunga, wakangina mukepe akayenda kuntunhu weMagadani.