1 Hule kwemahhuba matanhatu, Yesu wakatola Phethiro naJakobe naJohane nun'una waJakobe, akabatungamila eyenda nabo pehhugwi kwedombo lefulefu, pabakaba boga. 2 Wakahanduka mamo mbeli kwabo, buso gugwe gukapenya sehhuba, zwiyambalo zwizwe zwikaba zwitjenatjena setjedza. 3 Ipapo kukaboneka pabali Mozisi na Elija, belebeleka naye. 4 Phethiro eba eti kuna Yesu, "He, kwakanaka kuti tipano; hapa muda, ndowhobaka matumba matatu ipapa, lenyu nelaMozisi nela Elija."

5 Akati etjalebeleka, gole linopenya likabakwitidza, whi limugole liba liti, "Iwhoyu ndiye Nkololo wangu wandinoda, unondihanhisa kwazo. Muwuwhilile!"

6 Badiyiwa pabakawha ikoku, bakawila pasi bakakotamisa miholo behla kwazo. 7 Yesu wakayenda kubali akababhata, eti, "Milikani, musihle." 8 Bakati bemilidza meho abo, akuna nhu wabakabona kuhhe kwaYesu yega.

9 Bakati bejita mudombo, Yesu akabakowhomesedza eti, "Musibudze kene nhu tjamabona, kuswikila Nkololo wenhu amusiwa kubafi."

10 Badiyiwa bakawumbhuzwa beti, "Ngentha yeni bakwali beti Elija wakafanila buya kutanga?"

11 Wakahandula eti, "Elija unobuya, kakale unowhogadzikanya zwinhu zose; 12 koga ndoti kumuli Elija wakatjibuya kale, abazotongowunziba, koga bakawunta keni ini tjabanoda. Ndizo ke kose neNkololo wenhu banowhowundziyidza bo nayiyeyo zila."

13 Ndizo badiyiwa bakawhisisa kuti wayelebeleka nabo nekwaJohane Mbvubiki.

14 Bakati babgwilila kumbunga, kukahha nlume kuwunli akapfigama mbeli kukwe eti, 15 "He, ibani nemawhilangoni kunkololo wangu, ngobe unabugwele gwezwifafa, gowundziyidza kwazo; lubaka gunjinji unowila mumoto nemuvula. 16 Ndabuya naye kubadiyiwa benyu, bakon'wa wuntjidza."

17 Yesu wakahandula eti, "Ekee! Tjizekugwana tjisina bugalimoyo tjakakombama, ndowhoba namwi kukadza kukaba lini? Ndowhomuyetila moyonlefu kukadza kukaba lini? Muwunlesini kundili." 18 Yesu wakatjemela meyambi ikabhuda mumbisana, mbisana akabva anaya.

19 Badiyiwa bakahha kuna Yesu bakawumbhuzwa bali boga beti, "Kungentha yeni iswi takonegwa yitata?"

20 Wakati kubali, "Nentha yekuti muna bugalimoyo gutukununu. Lebeswa, ndoti kumuli, hapa muna bugalimoyo gungapa mhudzi yemasitadi, mowhoti kudombo ileli, ‘Ibva ipapa ube hapayaa,’ lowhobva; akuna tjamusingawhotubula thama." 21 * ✝

22 Badiyiwa bakati bakakubungana muGalile. Yesu akati kubali, "Nkololo wenhu watjibapedlo netugwa mumaboko ebanhu. 23 Banowhowumbulaya, kakale unowhomusiwa muhhuba lebutatu."

Ipapo badiyiwa bakahhala buyendasi.

24 Bakati beswika kuKhaphenawume, baketisi bakabuya kuna Phethiro bakawumbhuzwa beti, "Ndhiyi wenyu unolipa luketo gwethempeli wali?"

25 Phethiro wakahandula eti, "Ee, unolipa."

Phethiro wakati angina mun'umba Yesu akatanga lebeleka naye eti, "Nokubona tjini, Simoni? Bomambo behango banotola luketo kuna yani? Kubakololo babo* kene kubamwe*?"

26 Phethiro paakahandula eti, "Kubamwe*."

Yesu wakati kuwunli, "Kobva kuti bakololo bakasununguka*. 27 Koga atitohaka bagwadzisa, iwe tjiyenda kugungwa, unoteya whobe newhuka, whobe yawunobhata kwekutanga ukayihhula nlomo nowhowana kuna loso linantengo upehhugwi; ubape ilo, unlipo wangu nawe."