1 Kwakati pakuzwagwa kwaYesu muBhethelehhema, muntunhu weJudiya, mulubaka Hherodi ali iye mambo, kwakaswika muJerusalema batjenjebvu baka bebva kubhehhuba. 2 Beti, "Uponi iye wazwagwa ali Mambo wemaJuta? Tabona nyenyedzi iye kubhehhuba, tahha kuwhowunamata."

3 Mambo Hherodi ekuwha ikoku, kwakawumanikanya, kan'ompela nebanhu bose bemuJerusalema. 4 Waka kubunganya bose baphirisiti bakulu nebakwali, akababhuzwa kuti Khirisitu unowhozwaligwa poni.

5 Bakawun'handula beti, "MuBhethelehhema leJudiya, ngobe kwaka kwagwa nenlebesambeli kuti.

6 " ‘Nawebo Bhethelehhema, hango yaJuda,

awuta ntukununu pabatungamili baJuda,

ngobe mukuli kowhobhuda ntungamili

unowholisa banhu bangu banoyi Isirayeli.’"

7 Hherodi wakakodanila ntome batjenjebvu, akawha kubva kubali kuti nyenyedzi yabonakala gupi lubaka. 8 Wakati kubali, "Yendani kuBhethelehhema munohakisisa nekwemwana iwhoyo, hapa muwuwana, mundibudze, kuyetila kuti nami bo ndiyende ndinowunamata."

9 Bakati batjiwha matama amambo, baka yenda, bakabona iyeyiya nyenyedzi yabaka babona kubhehhuba yakabatungamila, ikadza ikanoma pehhugwi kwayipapo kwaka kuna mwana. 10 Bakati beyibona nyenyedzi bakahanha kupindisisa; 11 bakangina mun'umba bakabona mwana enaMariya, meyabe, bakapfigama bakakotana bakawunamata, bakahhula whomo dzabo bakawumpa zwipo, zeezi nenyonje nemafuta anonhuwilila anoyi mure.

12 Hule kwekuti Ndzimu abalaya ngewoloto kuti basibgwilile kuna Hherodi, bakabgwilila kuhango yabo neyimwe zila.

13 Batjiyenda, ntumwa waHe wakaswika kuna Josefa ngewoloto, eti, "Milika, tola mwana nameyabe, mutihhile ku Igipita, mugale ko ndidze ndikubudze uyeteni, Hherodi unovima mwana kuyetila kuti awumbulaye."

14 Wakamuka, akatola mwana namayi busiku, akayenda ku Igipita, 15 wakagala ikweno Hherodi akadza akatjinyika, kuti kuhhadzisike tjakalebgwa naHe ngenlebesambeli, eti, "Ndakadanila Nkololo wangu kuhhe kwe Igipita."

16 Hherodi atjibona kuti batjenjebvu bawuntjengela, wakamon'wa kwazo, akatumila whi linoti kubulayiwe bose bana betjilume, muBhethelehhema nemuntunhu iwhoyo wose banamakole mabili kuyenda pasi. Igogu lubaka gwakaguyendidzana nelubaka batjenjebvu pabakabona nyenyedzi, sebudza kwabo Hherodi.

17 Ipapo kwakahhadzisika tjakalebgwa nenlebesambeli Jeremiya, eti,

18 "Kwakawhakala guwo

munzi-nkulu weRama,

Rasheli elilila bana babe;

elamba nyaladziwa,

ngobe batjibulawa."

19 Kwakati Hherodi atjifa, ntumwa waHe akaswika ngewoloto kunaJosefa ku Igipita, 20 eti, "Muka utole mwana nameyabe, uyende kuhango ye Isirayeli, batjifa baka bevima butjilo gwemwana." 21 Wakamilika etola mwana namayi, akabgwilila kuhango ye Isirayeli.

22 Koga wakati ewha kuti Akhelasi unotonga hango yeJudiya mubugalo gwatatayi Hherodi, wakahla yenda ko. Wakati atjilumwa zebe muwoloto, akayenda akanogala muntunhu weGalile, 23 wakagala munzi-nkulu unoyi Nazaretha, kuyetila kuti kuhhadzisike tjakalebgwa nebalebesambeli, kuti, "Unowhodan'wa eyi Nanzarini."