1 Yesu wakabhuda muthempeli oyenda, badiyiwa babe pabakahha bowunlakidza zwibakwa zwethempeli. 2 Wakabahandula eti, "Mokubona kose ikoku, amutokubona? Lebeswa, ndoti kumuli, akuna bgwe linowhosala lilipehhugwi kwelimwe ipapa, lisingowholigigwa pasi."

3 Wakati egala paDombo leMitoba, badiyiwa babe bakahha kuwunli baliboga bakabhuzwa beti, "Mutibudzeni, kowhobe kuli lini, kakale tjilakidzilo tjinolakidza hha kwenyu nekuti bupelo gwelubaka gweesedzela, tjowhobe tjili tjipi?"

4 Yesu wakabahandula eti, "Mutjenjele kuti kusibe nenhu unomulaha. 5 Ngobe banjinji banowhohha muzina langu, beti, ‘Ndimi Khirisitu,’ banowholaha banhu banjinji. 6 Mowhowha nekwengwa nebunyebenyebe nekwengwa; musilobgwe nehana ngobe zwinhu izwezwi zwakafanila yetikala, koga bupelo gowhoba gutjawhohha. 7 Tjaba tjowhomukila tjimwe tjaba, nebumambo gowhomukila gumwe bumambo, kowhoba nedzihhala* netengenyeka kwehango mumitunhu yakasiyana. 8 Kose ikoku konga tanga gwadza kwemimba."

9 "Banowhomulonga mukudziyidzika, bakamubulaya; tjaba tjose tjowhomuhema ngentha yezina langu. 10 Banjinji bawhofupatila bugalimoyo gwabo, bakatengesana bakahemana. 11 Kowhohha balebesambeli bemanyepwa banjinji bakatungamilila banjinji ntome*. 12 Ngentha yekuti bubi gowanda, ludo gwebanji gowhotelela. 13 Koga iwhoyo unosimidzila kukadza kukaba kubupelo unowhotjidziwa. 14 Ndebo mbuya iyeyi yebumambo inowhosumikigwa hango yose, sebusupi kunjudzi dzose; bupelo gukotjihha."

15 "Hapa mubona pabugalo gwakayengemala kwabemile mbipo inohemesa yepaladza, yakalebgwa nenlebesambeli Daniyeli, (unobala ngaawhisise), 16 ibabo bamuJudiya ngabatihhile kumatombo; 17 ukutjilungwane ngaasijite kuti anotola tjimukati kwen'umba iye; 18 umuminda ngaasihanduke kuti awhotola tjiyambalo tjitje. 19 Koga kowhobabangalalila ibabo bakazwisenga nebanomwisa mumahhuba iyawo! 20 Mutembezele kuti tihha kwenyu kusibe mulubaka gwembaba, kene kuli sabatha. 21 Ngobe kowhoba nedziyidzika kukulu, kusakatongoba yapo kubvisila pakutanga kwehango kudza kuba ngwenuwali, akutowhopamha kukabeyapo kakale. 22 Kadzene mahhuba iyawo aka asathubugwa, kwakusingawhoba nenhu unotjidziwa; koga nentha yebakahalugwa mahhuba iyawo anowhothubugwa."

23 "Kukaba nenhu unoti kumuli, ‘Lingani, whoyu Khirisitu!’ kene ‘Whoyaa!’ musikugalemoyo ikoku. 24 Ngobe kowhohha boKhirisitu bemanyepwa nebalebesambeli bemanyepwa, banowhothama zwilakidzilo nematjenamiso makulu, beyetila laha banhu, hapa kutubuka, kene nebakahalugwa bo. 25 Lingani, ndamubudza lubaka gusanhu gwaswika."

26 "Hapa beti kumuli, ‘Lingani, umutjilabanyika,’ musiyende ko; hapa beti, ‘Lingani, umun'umba dzamukati,’ musikugalemoyo ikoku. 27 Ngobe sepenya kwethari kubva kubhehhuba kunobonekwa kukadza kukanoti kumahwahhuba, hha kwenkololo wenhu kowhojalo bo."

28 "Kene poni pana tjakafila po*, magola anowhokubungana po."

29 "Tjinyolotjo hule kwedziyidzika kwemahhuba iyawo hhuba lowhoti zwi, mwedzi awutowhobantjena, nyenyedzi dzowhowa dzibva kudzimu, masimba ekudzimu anowhozunguzika; 30 kokotjiboneka tjilakidzilo tjeNkololo wenhu kudzimu, ipapo ke njudzi dzose dzemuhango dzowholila, kakale dzowhobona Nkololo wenhu ehha eli mumakole ekudzimu anamasimba negudzo gulu. 31 Unowhotuma batumwa beNdzimu babe nensindo nkulu welunyanga, ngono banowhokubunganya bahalugwa babe kubva kumabhiko mana ehango, kubva kugumwe bupelo gwekudzimu kunoti kugumwe."

32 "Diyikani tjidiyo kubva mutjifananidzo wenkuyu. Hapa lutabi gwenkuyu guba gunyolo, gutangisa sinila mahhani, mobva maziba kuti tjilimo tjeesedzela. 33 Kwakajalo bo ke, hapa mubona zwinhu zose izwezwi, zibani kuti waba* pedlo, waba pankoba. 34 Lebeswa, ndoti kumuli, tjizekugwana itjetji atjitowhopela zwinhu zose izwezwi zwidza zwiyetikala. 35 Kudzimu nehango kowhopinda, koga matama angu atowhopinda."

36 "Koga akuna unoziba nekwehhuba ilelo nelubaka igogo kuhhe kwaTate boga, kene ibo batumwa bekudzimu, kene iye Nkololo. 37 Sekwakwaka kuli iko mumahhuba aNowa, hha kweNkololo wenhu kowhojalo bo. 38 Ngobe semumahhuba iyawo kusanhu kwaswika nkubila, baka bedla ben'wa, belobola belobogwa, kudza kuswika hhuba lakangina Nowa mukepe, 39 abazotongoziba tjimwe kudza kuswika nkubila ukabatola bose. Ndizo ke hha kweNkololo wenhu kowhojalo bo. 40 Mulubaka igogo balume babili banowhoba beli muminda, kowhotogwa un'ompela kukasala un'ompela. 41 Bafumakadzi babili banowhoba bali paduni bekhwa; kowhotogwa un'ompela umwe akasiyiwa. 42 Ndizo ke, tjenjelani, mulinde ngobe amutoziba kuti He wenyu unohha hhuba lipi. 43 Koga zibani whoku, kuti kadzene mweni wenzi waka aziba kuti mbava inohha muna gupi lubaka busiku, unoba akalinda akasabvumila kuti mbava ingine mun'umba. 44 Ndizo ke namwi bo galani makazwilulamisa; ngobe Nkololo wenhu unowhohha mulubaka gwamusingakumbulile."

45 "Ndiwupi ke n'hingi wakatjenjela unogalikabgwe, wayi nahe uwe alinge bahingi benzi, kuti abape zodliwa mulubaka gwakafanila? 46 Wakakombolegwa iwhoyo n'hingi unowhowanika nahe uwe ethama sayikoku pahanduka kukwe. 47 Lebeswa, ndoti kumuli, unowhowunthama mbhati wezwinhu zose zwaanazo. 48 Koga hapa iwhoyo n'hingi ali n'hingi mbi, ekoti tjemumoyo, ‘He wangu wanonoka handuka,’ 49 ekotangisa loba bamwe bahingi baanohinga nabo, edla kakale en'wa nebalaladzi, 50 he wen'hingi iwhoyo unowhohha muhhuba n'hingi iwhoyo laasingakumbulile nemulubaka gwaasingazibe. 51 He uwe unowhowumpalulanya, akawunsa kubugalo gun'ompela nebatjengeli; ikweno banhu banowhokuwa bekalobanya meno ngentha."