1 Yesu atjipedza laya badiyiwa babe bali gumi nebabili, wakamilika eyenda kunodiya nesumikila mumizi-mikulu yabo.

2 Johane elimujele wakati ewha nekwemihingo yaKhirisitu, akatumila dama ngebadiyiwa babe 3 eti kuwunli, "Ndimwi unowhohha, kene timilile umwe?"

4 Yesu wakabahandula eti, "Yendani munobudza Johane zwamunobona nezwamunowha. 5 Mapofu anopofunuka nezwilema zoyenda, bagwele bemapele banotjenesewa, bomantshi zowha, bakafa banomusiwa, nendebo mbuya inosumikigwa kubahayi. 6 Wakakombolegwa usingandigwadziligwe."

7 Bakati bemilika boyenda, Yesu eba etangisa lebeleka kumabunga nekwaJohane. "Makayenda kutjilambanyika munobonani? Luhanga guzunguziwa nemhepo? 8 Makamuyendilani? Kunobona nlume wakambala zwiyambalo zwakanaka? Ibabo banombala zwiyambalo zwakanaka bamun'umba dzabomambo. 9 Maka muyendilani ngono? Kunobona nlebesambeli? Ee, ndomubudza, unopinda nlebesambeli kakale. 10 Ndiye kwakakwagwa nekukwe kuyi, ‘Linga, ndotuma ntumwa wangu mbeli kuko, unowhokubaakanyila zila iwe usanhu waswika.’ 11 Lebeswa, ndoti kumuli, pakati kwayibabo bakazwagwa nebetjikadzi akuna unkulu pana Johane Mbvubiki; koga iwhoyo untukunu mubumambo gwekudzimu unkulu pawunli. 12 Kubvila mumahhuba aJohane Mbvubiki kudza kube ngwenuwali bumambo gwekudzimu gwagwisiwa nemasimba, nebanhu bemasimba banogutola ngemasimba. 13 Ngobe whalo dzebalebesambeli bose kose nenlayo kwakalebesambeli kudza kuwhoswika lubaka gwaJohane; 14 ndizo hapa kuli kuti moda kuwamutjila, ndiye Elija wakayi unobuya. 15 Unazebe dzowha, ngaawhe."

16 "Tjizekugwana itjetji ndingatjifananisa neni wali? Tjonga bana bagele panotengesegwa banodana bamwe babo beti, 17 ‘Tamulidzila nyele, amuzozana; tikamba njimbo dzelufu amuzolila.’ 18 Ngobe Johane wakabuya esingadle esingan'we, banoti, ‘Una meyambi’; 19 Nkololo wenhu wakabuya edla kakale en'wa, banoti, ‘Lingani, tjidli nenlaladzi, unkwinya webaketisi nebatjinyi!’ Koga ke butjenjebvu golayidziwa ngemihingo yago kuti gumalebeswa."

20 Wakatangisa sola imwe mizi-mikulu kwaakathama mihingo mikulu minjinji, nentha yekuti abazohanduka. 21 Eti, "Khorazini! neBhethisayida! kwakamubangalalila, ngobe kadzene mihingo mikulu yakayetiwa mumuli yaka yayetiwa muTire nemuSidoni, banoba bakahanduka ntolo, baligele pamilota bakambala zwiyambalo zwemasaka. 22 Koga ndoti kumuli, kowhoba kuhine kuTire neSidoni muhhuba letongewa pana kumuli. 23 Iwe bo, Khaphenawume, nowhomilidzigwa pehhugwi kudzimu? Nowhojitisigwa pasi kuHhedesi*. Ngobe kadzene mihingo mikulu yakayetiwa mukuli yaka yayetiwa muSodoma, inoba iliyapo kuswika nasi. 24 Koga ndomubudza kuti kowhoba kuhine kuhango yeSodoma muhhuba letongewa pana kukuli."

25 Nayigogo lubaka Yesu wakati, "Ndomuboka, Tate, He wekudzimu nehango, kuti makasumbikila zwinhu izwezwi batjenjebvu nebanowhisisa, mukazwilayidza bana batjetjana, 26 ee, Tate, ngobe ikoku ndiko kwakabe kumuhanhisa."

27 "Zose zwinhu zwapiwa imi naTate bangu, kakale akuna unoziba Nkololo kuhhe kwaTate, kakale akuna unoziba Tate kuhhe kweNkololo nayiwhoyo Nkololo waanohala wunlayidza."

28 "Ihhani kundili, moseni imwi makanyala munolemegwa, ndowhomunyalulusa. 29 Sengani jogwe langu, mudiyike kubva kundili, ngobe ndozwitebamisa kakale ndina moyo nyolo, mowhowana kunyaluluka mumeya dzenyu. 30 Ngobe jogwe langu lilelu, nentolo wangu awutolema."