1 Nayigogo lubaka Hherodi, ntungamili wentunhu weGalile*, wakawha nekwegudzo laYesu; 2 akati kubahingi babe, "NdiJohane Mbvubiki, wamuka kubafi; ndizo wali masimba iyawa ehinga muwunli."

3 Ngobe Hherodi waka abhata Johane akawuhhalilila mujele, ngentha yaHherodiyasi, nkadzi wenkulu uwe Filiphi; 4 kana Johane waka ati kuwunli, "Akuta munlayo kuti abe nkadzi uwo." 5 Nekene waka ehaka wumbulaya, wakahla banhu, ngobe bakabewuziba senlebesambeli.

6 Koga kwakati hhuba lezwagwa kwaHherodi laswika, nkololokadzi waHherodiyasi wakazana mbeli kwabo, akahanhisa Hherodi, 7 kwakata akawunghadzabgwe etuna kuti unowhowumpa kene ini tjaangakumbila.

8 Abudziwa namayi, wakati, "Mundipeni n'holo waJohane Mbvubiki uli mundilo."

9 Mambo wakawha zogwadza; koga ngentha yetuna kwaakata mbeli kwebezi babe wakati ngaawumpiwe; 10 wakalaya kuti Johane anothubugwa n'holo kujele, 11 n'holo uwe wakahhisiwa uli mundilo ukaswiswiwa nsikana, akawuyendisa kuna meyabe. 12 Badiyiwa babe bakabuya bakatola mbili bakawumbiganya; bakakotjinobudza Yesu.

13 Yesu wakati ekuwha ikoku, akamilika ipapo nekepe akayenda kubugalo gwakanyalala aliyega. Koga banhu bakati beziba kuti wayenda poni, bakawuntobela nemakumbo bebva mumizi. 14 Wakati ebhuda mugungwa akabona mbunga webanhu banjinji; akabawhila ngoni, akalapa banogwala.

15 Kwatjiba madekwana, badiyiwa babe bakahha kuwunli beti, "Pano ihango, kakale kwahwa; paladzani banhu bayende kumizi banotenga zodliwa zwabo."

16 Yesu wakati, "Abazofanila yenda; mubapeni tjabangadla."

17 Bakawun'handula beti, "Tina zwinkwa zwihanu newhobe mbili koga."

18 Eba eti, "Mukuhhiseni ngeno." 19 Eba eti banhu bagale pabuhwa; akatola zwinkwa izwezo zwihanu newhobe idzedzo mbili, akalinga pehhugwi kudzimu, akakombolela, akapemulanya akaswiswa badiyiwa zodliwa, badiyiwa bakapa banhu. 20 Bose bakadla bakaguta. Bakawolela zwipemu zwezodliwa zwasala zwikahhala zwitundu zwiligumi nezwibili. 21 Banhu bakadla bakabengaswika zwiwulu zwihanu, betjilume boga, kusingabagwe betjikadzi nebana.

22 Wakakotjiti badiyiwa bangine mukepe babe beyenda, bayende seli yeyaa, iye etjapaladza banhu. 23 Hule kwekuti banhu bayenda, wakayenda kudombo aliyega enotembezela. Kwakadza kukaba madekwana atji ikweno, aliyega, 24 nayigogo lubaka kepe tjaka tjatjiyenda tjatjiba kulekule kwazo nehango, tjikuligwa nemabundo evula; kana mhepo yaka ileyana natjo.

25 Mahhakuyedza wakabuya kubali, eyenda pehhugwi kwevula. 26 Koga badiyiwa bakati bewumbona eyenda pehhugwi kwegungwa bakalobgwa nehana, bakati, "Ipuku!" bakamimila nentha yehla.

27 Koga tjinyolotjo Yesu wakalebeleka eti kubali, "Gadzikanani, ndimi, musihle."

28 Phethiro wakawun'handula eti, "He, hapa kuli imwi, itini ndibuye kumuli ndili pehhugwi kwevula."

29 Wakahandula eti, "Buya." Ndizo Phethiro wakabhuda mukepe akatangisa yenda pehhugwi kwevula eyenda kuna Yesu. 30 Koga wakati ebona mhepo akahhigwa nehla, akatangisa nyula muvula emimila eti, "He, munditjidzeni."

31 Tjinyolotjo Yesu wakawuwabilila neluboko akawubvubula, wakati kuwunli, "Nhu unabugalimoyo gutukununu, nentha yeni wasola?"

32 Bakati bengina mukepe mhepo iba inyalala. 33 Ibabo baka beli mukepe bakawunamata, beti, "Lebeswa muNkololo weNdzimu."

34 Bakati batjibe seli yeya, bakaswika muhango yeGenesareti. 35 Banhu bekubugalo igogo bakati bewumbona, bakahaka banhu bose banogwala bentunhu iwhoyo bakabahhisa kuwunli, 36 bakakumbila kuti abvumile bagwele bakunhe mpeto wetjiyambalo tjitje; bose bakatjikunha bakanaya.