1 Yesu wakati ejita padombo, akatobegwa nebanhu banjinji; 2 kukahha nghwele wemapele kuwunli, akapfigama pawunli eti, "He, hapa muhaka mungandiyeta ndikapola*."

3 Yesu wakatambunudza luboko gugwe akawumbhata, eti, "Ndohaka, pola*!" Tjinyolotjo mapele akapela, akapola. 4 Yesu eba eti kuwunli, "Usibudze nhu. Koga yenda, unozwilakidza kumphirisiti, kakale upe tjipo selaya kwaMozisi, kuyetila kuti gube busupi kubanhu."

5 Yesu wakati angina muKhaphenawume, kukahha kuwunli nlawuli webagwi bengwa bali gulu, ekumbila lubhatsho, eti, 6 "He, n'hingi wangu ulele kanyi wakalobgwa negulukadzi atotubula muka, unowha zogwadza kwazo."

7 Yesu eba eti kuwunli, "Ndowhobuya ndiwhowunlapa."

8 Nlawuli webagwi bengwa bali gulu wakahandula eti, "He, andizolizanila kuti mungangina mun'umba yangu. Lebani dama koga, n'hingi wangu unowhonaya. 9 Namibo ndinhu upasi kwemasimba ebapehhugwi kwangu bo, ndina bagwi bengwa bapasi kwangu. Ndoti kuna whoyu, ‘Yenda,’ akayenda; kuwumwe ndoti, ‘Ihha ngeno,’ unohha. Ndoti kunlandalume wangu, ‘Thama whoku,’ akakuthama."

10 Yesu wakati ewha matama iyawa, akatjenama, akati kuna baka bewuntobela, "Lebeswa ndoti kumuli, kene iko mu Isirayeli andizotongowana bugalimoyo gwakajali. 11 Ndomubudza, banjinji banowhobva kubhehhuba nekumahwahhuba, banowhogala bakadla na Abhurahhamu na Isaka naJakobe mubumambo gwekudzimu, 12 koga bakololo bebumambo banowhoposegwa kuhhe, kuhhele hhalima; imhomo banhu banowholila bakalobanya meno." 13 Yesu wakati kunlawuli webagwi bengwa, "Yenda! Ngakuyetikale segalamoyo kuko kuti kowhoyetikala."

N'hingi wakabva anaya tjinyolotjo.

14 Yesu wakati engina mun'umba yaPhethiro akabona mezwale babe balilele, begwala bugwele gweluhhahhamo; 15 wakababhata luboko, bakabva banaya, bakamilika bakawumpakulila zodliwa.

16 Madekwana iyawo bakahhisa kuwunli banhu banjinji baka baligegwe nemeyambi; akadzitata meya ngedama, akapodza bose baka begwala. 17 Kuyetila kuti kuhhadzisike tjakalebgwa nenlebesambeli Isaya, eti, "Wakatidusa gwala akalapa nghwele dzedu."

18 Yesu wakati ebona atjikubunganigwa nebanhu banjinji kwazo akadusa dama kuti kuyendiwe seli yeya. 19 Nkwali wakahha kuna Yesu eti, "Ndhiyi, ndowhomutobela kose kwamunoyenda."

20 Yesu wakawun'handula eti, "Mhungubgwe dzina mimwina nenyunyi dzemumhepo dzina zwihaka; koga Nkololo wenhu haana paangaladzika n'holo."

21 Umwe webadiyiwa wakati kuwunli, "He, mundibvumileni nditange ndanobuluka tate bangu."

22 Koga Yesu wakati kuwunli, "Unditobele, usiye bafi babuluke bafi babo."

23 Paakangina mukepe, badiyiwa babe bakawuntobela. 24 Tjinyolotjo, kwakamilika dutu linabuhongola mugungwa, kwekuti kepe tjaka tjatjihhaligwa nemabundo evula; koga iye waka alilele. 25 Bakayenda benowumusa beti, "He, mutitjidze, topalala."

26 Eba eti kubali, "Eke banhu bana bugalimoyo gutukununu. Nentha yeni muhla?" Eba emuka etjemela mhepo negungwa; kube kunyalala.

27 Bakatjenama beti, "Unhu wakatini iwhoyu, unowhiligwa nemhepo kose negungwa?"

28 Wakati eswika seli yeya, kuhango yebaGadarini, akahanganidziwa nebalume babili bagegwe nemeyambi, bebhuda mumakuwhu aka ali zwikumbu, baka behlisa kwekuti kwaka kusina nhu angapinda nezila iyeyo. 29 Bakamimila beti, "Mohakani kutili, imwi Nkololo weNdzimu? Mahhila kuti muwhotidziyidza lubaka gusanhu gwaswika?"

30 Kwaka kuna ngubi yewhotji dzaka dzifula tjakulenyana nabo. 31 Meyambi dzakawunkumbilisisa dziti, "Hapa mutitata, mutitatile kungubi yewhotji."

32 Wakadzihandula eti, "Yendani." Ndizo dzakabhuda dzikanongina muwhotji; whotji dzose dzakakulumuka dzijitila nepakakungulukila dzikanowila mugungwa, dzikafila muvula.

33 Balisi bakatihha, bakati bengina munzi-nkulu bakabudza banhu kose ikoku, netjaka tjayetika kubalume baka baligegwe nemeyambi. 34 Banhu bose bakabhuda bakayenda kuna Yesu; bakati bewumbona, bakawunkumbila kuti abhude muntunhu wabo ayende.