Milagres de Jesus

Yesu abikyɛ bonto obolyɛ baiho

22 Bakitɛ Besaida; mpiko bayelɛ Yesu bonto ɔmɔɔ obolyɛ baiho mpe babɔndɛlɛ Yesu abobute. 23 Yesu akɔhɛ bonto uuko ɔpwɛnɛke nde lɔbɔ mpe aboumolɛ nde ehe mpe abotombɛ ndye enkina. Mpiko abohingɛ nhɔi nde baiho, aboapyɛ bɛbɔ mpe abuubolɛ: «Wɛnɛ nɔ?» 24 Bonto uuko alendɛ mpe ahangɛ: «Nyɛnɛ banto, mbaɛnɛ nga bete bɛkɛndɛ.» 25 Yesu aboapyɛ lenkina bɛbɔ nde baiho; bonto uuko ahihimyɛ: abikɛ, abangɛ ywɛnɛ bɔlɔti. 26 Yesu abounoyɛ ekande, abobelɛ: «Twɛlyake yɔtwa nde ehe.»

Yesu abikyɛ bonto ɔmɔɔ o luumi

31 Yesu aumɛ Tilɛ mpe alekɛ lo Sido, yota looko lo ndjale e Ngalilaya, apendyɛ lobandja lo Dekapoli. 32 Baboyelɛ bonto ɔmɔɔ o luumi, babɔbɔndɛlɛ aboapye lɔbɔ. 33 Yesu abɔkɔhɛ, abotombɛ bona o botale la banto mpe abɔɔtɛyɛ behai nde batoi, atwɛ nhɔi nde bohai ko aobobuti nde lolemu. 34 Yesu auleyɛ baiho nde liko, ayoomɛ mpe abobelɛ: «Efata!» – Nga ambɔ «Lipwa!» – 35 Nko nde elaka iko, batoi bakinde balipwɛ, lolemu lokinde lolitwɛ mpe atepelɛ bɔlɔti. 36 Yesu abakokomyɛ tabahangelake la bonto ɔmɔɔ; yaa nkya ngauko ebahukaki nde, ibɔ batɛ nko yopalanganiaka nsango. 37 Banto baulɛ nkimo mpe batepelɛ: «Inkuma ikela nde iyali bɔlɔti! Aokya la bikinda mpe atepeya la bibubu!»

Yesu abikyɛ Balatime, bonto obolyɛ baiho

46 Bakitɛ Yeliko. Anɛ eolɛ Yesu la bakɛndi laa nde nde imonga iiko la banto buuke, bonto ɔmɔɔ obolyɛ baiho o lina Balatime, bona o loondo ooki Time, ambookihakɛ nde bokili bo ndjela kela abondelake. 47 Anɛ eokɛ nde Yesu e Nazalɛti aoleke, abobɛ: «Yesu, Bona oki Dawidi, ondjokele ihɛi!» 48 Banto buuke babuukɛ kela apilame, yaa nde abobɛ lenkina la nguya: «Bona ooki Dawidi, ondjokele ihɛi!» 49 Yesu aemalɛ mpe ahangɛ: «Lobondjetele.» Baboetɛ mpe babobelɛ: «Emala, yala la lokaho, akweta.» 50 Abokɛ ehenda eekinde, alɛmwɛ mpe akitɛ ntute la Yesu. 51 Yesu abuubolɛ: «Olanga nkele nnɔ itina ikiɛ?» Bonto uuko obolyɛ baiho abobelɛ: «Bolaki, Ndanga nyɛnɛ leenkina.» 52 Mpe Yesu abobelɛ: «Kɛndɛ, waambi bookiɛ bongokobikyɛ.» Mbala ɛmɔɔ, aunwɛ yɛnɛ mpe ayelɛ Yesu.

Yesu abikiɛ bonto oboliɛ baiho

35 Anɛ ekitaki Yesu ntute la Yeliko, bonto ɔmɔɔ oboliɛ baiho ayalaki mpe nde bokili bo ndjela yobondelaka byomba. 36 Aokɛ boyoko booki banto buuke baoleke mpe aubolɛ ikambo iileka. 37 Babohangelɛ: «Uuko Yesu ɛnɛ e Nazalɛti ɔnɛ ooleke.» 38 Abobɛ: «Yesu, Bona ooki Dawidi, ondjokele ihɛi!» 39 Banto baayaki lontondo baboangoyɛ mpe babobelɛ alipe bonya; nde aunwɛ yoboba: «Bona ooki Dawidi, ondjokele ihɛi.» 40 Yesu aemalɛ mpe abelɛ baayalaki aiko baboyele bonto uuko. Anɛ ekitaki nde ntute, Yesu abuubolɛ: 41 «Olanga nkele nnɔ itina ikiɛ?» Aunoyɛ: «Nkolo, ndanga nyɛne lenkina.» 42 Yesu abobelɛ: «Ɛnɛ. Nyumeya ekiɛ engokobikiɛ!» 43 La mbala ɛmɔɔ, aunwɛ yɛnɛ mpe ayelɛ Yesu, aokumyake Ndjakomba. Anɛ yɛnɛki banto bankuma ngauko, la ibɔ mpe baokumya Ndjakomba.

30 Nyango e bokilo eki Simo abetamaki la pɛpɛlɛ; nko Yesu aokitele aiko, babopɛ nsango e nkandi ekinde. 31 Yesu ayaundjɛ ntute la nde, abobutɛ nde lɔbɔ, aboemyɛ mpe abikɛ. Mpe nyango e bokilo abapɛ byomba bi ndɛlɛ.

Yesu abikyɛ bonto oyali la behale

40 Bonto ɔmɔɔ oyali la behale ayɛ eyali Yesu, akɔɔ bakulubɔngɔ ntondo eekinde mpe abɔbɔndɛlɛ mbɔ: «Kaki olanga, ɔɔhɔ yɔmpɛtɔlɔ.» 41 Yesu abookɛ ihɛi; ahembolɛ lɔbɔ, abobutɛ mpe abobelɛ: «Ndanga, pɛtwa!» 42 Nko nde elaka iko behale behilɛ, mpe apɛtwɛ.

3 Nko aiko, banto baboyelɛ bonto ɔmɔɔ o ɛhɛlɛ onga banto banɛi babilɛ. 4 Nga boyalaki lyale yokita eyali nde, itina i banto buuke, bakondelɛ nde nsamba, batondolɛ itundu mpe bahuloyɛ ɛhɛlɛ ndye eyalaki Yesu, la lokala lokinde. 5 Yesu aɛnɛ waambi booki ibɔ, abelɛ ɛhɛlɛ: «Bona oki emi, basumu baakiɛ bangolibwɛ.» 6 Bamɔɔ balaki ba bobeko baayalaki aiko, bakihɛ mpe babangɛ yoyabela nde betema: 7 «Itina iitepela bonto ɔnɛ ngɔnɛ nɔ? Atoola Ndjakomba. Ɔnɛ ɔɔhɔ yolibola bahumu nɔ nga teyala Ndjakomba nde amɛlɛ?» 8 Yesu tatɛmɛ yweba bikaneno biiyalaki la ibɔ, ababelɛ: «Itina nɔ iyali nyo la bikaneno bi lolenge luuko nde betema bekinyo? 9 Yobela ɛhɛlɛ: "Basumu bakiɛ bangolibwɛ", laa yobobela: "Langwa, kɔhɔ lokala lookiɛ mpe kɛndɛ" yomba eependa lyale nɔ? 10 Yaa, itina iki lwebe mbɔ Bona ooki Bonto ayali la bonkumu nde bokili bo yolibola basumu», abelɛ ɛhɛlɛ: 11 «Nkobela, langwa, kɔhɔ lokala lookiɛ, inwa eka wɛ!» 12 Nko aiko ɛkɔ, ayaemyɛ, abilɛ lokala lokinde mpe aolɛ ntondo eeki banto bankuma. Bautɛ byɔli, babangɛ yokumya Ndjakomba mpe bahangɛ: «Tatwɛni lɔnɛ!»

Yesu abikyɛ bonto ɔmɔɔ nde buuna bo sabata

1 Yesu aunwɛ yɔtwa nde botumba bo lɔbɔndɔ. Bonto ɔmɔɔ owɛ lɔbɔ ayalaki aiko. 2 Bafalisaya balendɛ Yesu kaki aɔhɔ yobobikya nde buuna bo sabata, eyalaki itina iki babate ndjela yobopunda. 3 Yesu ayɛ yobela bonto owɛ lɔbɔ: «Emala aiko ntondo eki banto bankuma.» 4 Mpe abaubolɛ: «Bobeko botinda nɔ nde buuna bo sabata? yokela bɔlɔti laa yokela bobe? Yobikya bonto laa yobolyaka?» Tababounoya mbeko. 5 Yesu abalendɛ la lɔkɛlɛmɔli; aokɛ bobe ywɛnɛ ndenge epa ibɔ tabayali la ihɛi la bonto ɔnɛ oyali la nkandi, abelɛ bonto uuko: «Hembola lɔbɔ lookiɛ.» Nde mpe alohembolɛ, mpe lɔbɔ lookinde lɔbɔngɛ.

Yesu abikya bonto ɔkɔnɛ bohale

12 Bɔɔmɔɔ buuna, Yesu ayalaki nde imɔɔ imɔnga, mpe bonto ɔmɔɔ ɔkɔnɛ bohale ayalaki aiko. Anɛ ɛnɛki nde Yesu, aɔkɔ bakulubongɔ mpe aɔbɔbɔndɛlɛ: «Nkolo, kaki olanga, ɔhɔ yɔmpɛtɔlɔ.» 13 Yesu ahembolɛ lɔbɔ, abobutɛ mpe aobelɛ: «Ndanga, pɛtwa.» La mbala ɛmɔɔ, nkandi ehilɛ.

18 Nko aiko ɛkɔ, banto bayaki yobilaka entumbe ɛmɔɔ nde bobanga; batilaki babɔtɛye nde botumba mpe babohuloye ndye eyalaki Yesu. 19 Tabata epohe yɔbɔtɛyɛ itina banto bapendaki buuke. Ibɔ banɛ bayobokondeyaka nde nsamba, baotondola itundu mpe baohuloya bobanga nde boloyi bo banto, ntondo eeki Yesu. 20 Anɛ ɛnɛki Yesu nyumeya ekibɔ, aobela bɔkɔni: «Bahumu bakiɛ bangolibwɛ.» 21 Anɛ yokaki bafalisaya la balaki ba bobeko ngauko, baokanena: «Ɔkɔ bonto otola Ndjakomba nnɔ? Oki nnɔ ɔhɔ yolibola bahumu kaki teyali Ndjakomba nde kiika?» 22 Nga boebaki Yesu botindo bo bikaneno biikibɔ, aobaubola: «Itina iyali nyo la bikaneno bi ngauko nnɔ? 23 Lobo loopa taloyali la lyale nnɔ? Yohanga: "bahumu bakiɛ bangolibwɛ" la mpe yohanga: "Emala mpe kɛndɛ"? 24 Lolendaka, ndanga lwebe mbɔ Bona ooki Bonto ayali anɛ nde bokili la nguya yolibola bahumu» , nde ɔnɛ aobela entumbe: «Nkobela, emala, kɔhɔ bobanga bookiɛ mpe inwa eka wɛ!» 25 La mbala ɛmɔɔ, bonto uuko alangwɛ, aambolɛ bobongo bobetamaki nde mpe aunwɛ ekande mpe atɛ itokumyaka Ndjakomba.

Bonto oyalaki la bobuka nde lɔbɔ

6 Bonkina buuna bo sabata, Yesu aɔtwaki nde botumba bo lɔbɔndɔ mpe alakaki. Bonto ɔmɔɔ ayalaki aiko la bobuka nde lɔbɔ lo loome. 7 Balaki ba bobeko la bafalisaya bayalaki aiko. Baiho baakiibɔ nko nde Yesu itina baɛne nga akobikya bonto uuko buuna bo sabata, nkamba babopɔtye ikambo. 8 Yesu aebaki bikaneno bikiibɔ. Nde ɔnɛ aobela bonto oyali la bobuka: «Langwa mpe emala aiko ntondo eeki banto bankuma.» Bonto uuko alangwɛ mpe aemalɛ. 9 Yesu nde ɔnɛ obabelɛ: «Ndanga nduubole kaki buuna bo sabata elongi yokela bɔlɔti la mpe yokela bobe, elongi yobikya bonto la mpe yobohenya abu?» 10 Yesu abakɛ bonto ɔmɔɔ la ɔmɔɔ baiho, la lombuha abelɛ bonto ɔnɛ oyali la bobuka: «Hembola lɔbɔ lokiɛ.» Bonto ɔkɔ ahembolɛ lɔbɔ mpe lɔbɔ lohembwɛ.

Yesu aobikya bohali booki bonkondi bo bahola ba Loma

1 Anɛ eheyaki Yesu yopa balako baakinde ntondo eeki banto, atɛ Kapalanaumu. 2 Mpiko, bonkondi bɔmɔɔ bo bahola, bohi Loma, ayalaki la bohali bokinde bopendaki nde yolanga. Bohali bɔkɔ akɔnɔki nkandi, ihambi i iwa la lobiko. 3 Anɛ yokaki nde nsango eeki Yesu, bonkondi bo bahola atindɛ baome ba bihe baki Bayuda, batu yɔbɔbɔndɛlɛ aye yobikya bosali bokinde. 4 Anɛ ekitaki ibɔ eyalaki nde, baome ba bihe babɔndɛlɛ Yesu la botindo bonkuma: «Bonkondi bo bahola buuko ayali nsuki e bonto o bɔlɔti, ɛɛli nko obokambole, 5 itina alangake Bayuda buuke, nde bonto ototongelaki botumba bo lɔbɔndɔ.» 6 Yesu nde ɔnɛ otaka nde la ibɔ. Bakitɛ nko ntute la botumba, bonkondi buuko bo bahola aunwɛ yotinda baninga bankina kela babohangele: «Nkolo, toyatungyake. Emi wambɔ mpwɛli la yokwamba nde botumba bokimi; 7 ɛkɔikɔ epa ntiɔhɔ yoya emi kiika eyali wɛ; wɛ tepela nko lyoi imɔɔ, mpe bosali bokimi akoobika. 8 Lenda, la emi wambɔ ndjali nde lonse loki benkondi bempenda, ndjali mpe la bahola baayali nde lonse lokimi. Kaki ngobelɛ ɔmɔɔ: "Kɛndɛ", akɔkɛndɛ, mpe ɔnɛ onkina: "Yaka", akoya; mbɔ mpe nsangele bosali bokimi: "Kela ngɔnɛ", akokela.» 9 Anɛ yokaki Yesu ngauko, aohima bonkondi bo bahola buuko, aolenda banto baayaki yooyelaka mpe aobabela: «Ndobela, la boha nkɛndɛ anɛ Isalaɛlɛ, laino ntitani bonto oyali la nyumeya botindo bɔnɛ.» 10 Anɛ e inwaki baataki itweta Yesu nde botumba booki bonkondi bo bahola, bataanɛ bosali bɔkɔ angobikɛ.

11 Buunto ɔmɔɔ oyali la bɔlɛmɛ ayalaki aiko. Bolimo bo bobe bobuunɛ betiti ima mbula lyomu la mwambi mpe apɔɔhe yoyahembola bɔlɔti. 12 Anɛ ɛboɛnɛki Yesu, aoboeta mpe aobobela: «Buunto, ongobikɛ la bɔlɛmɛ bokiɛ!» 13 Yesu aboapyɛ bɛbɔ, mpe la mbala ɛmɔ, betiti byohembwɛ mpe buunto ɔkɔ atotyɛ Ndjakomba.

Yesu abikiɛ bonto o nkandi

1 Bɔkɔlɔ bɔmɔɔ bo sabata, Yesu ataki itɔlɛ eka bonkondi bɔmɔɔ boki bafalisaya, mpe bafalisaya bayeela inkuma ikela nde. 2 Lontondo lokinde, eyalaki la bonto ɔmɔɔ ɔkɔnɛ nkandi e ndjɔu. 3 Yesu aubolɛ balaki ba bebeko la Bafalisaya: «Bobeko bokinso bopake ndjela yobikya bonto buuna bo sabata la mpe nkola?» 4 Ibɔ tabalanga babutole. Yesu abutɛ bonto oyali la nkandi, abobikiɛ mpe abunoyɛ ekabɔ.

Yesu apetolɛ banto lyomu baakɔnɛ nkandi e bohale

11 Yesu alangaki atu Yelusalɛmɛ, alekɛ looko lo Samalia la Ngalilaya. 12 Nko aoyɔtwe nde ehe ɛmɔɔ, banto lyomu baayalaki la nkandi e bohale baboolelɛ. Baemalɛ bona o botale la nde 13 mpe babobɛ: «Yesu Nkolo, otookele ihɛi.» 14 Anɛ ebaɛnɛki Yesu, ababelɛ: «Lɔkɛndɛ loyaɛnie eka Nkanga iiki Ndjakomba.» Nko aiko yoli ibɔ, bapɛtwɛ. 15 Anɛ ɛnɛki ɔmɔɔ okibɔ angobikɛ, aunwɛ, aokumiake Ndjakomba la lyoyi i nguya. 16 Ayakɔyɛ nde bekolo beeki Yesu, elongi tii nde babu, kela aopaaye itotya ikinde. Bonto ɔkɔ ayalaki bosamalia. 17 Yesu aubolɛ: «Ɔkɔ wambɔ ibɔ bankuma lyomu tabapɛtwa? Yaa banɛ bankina ibwa bayali nko? 18 Nkola la ɔmɔɔ okibɔ onguunwɛ yototya Ndjakomba, ohunwa nko bobutu bɔnɛ?» 19 Nkamba aobobela: «Emala mpe kɛndɛ, nyumeya ekiɛ engokobikyɛ.»

25 Nde banto baiko, eyalaki la buunto ɔmɔɔ ɔkɔnɛ nkandi yotanga bakila, akelɛ la ɛkɔ mbula lyomu la ipe. 26 Anyɔkwɛ eka benganga buuke, aheyɛ lokutu lokinde lonkuma mpe tabika; yaa nkandi engalaki nko ngaangala. 27 Anɛ eokɛ nde nsango eeki Yesu, ayɛ la lombuha lo banto, mpe abutɛ ehenda eeki Yesu. 28 Itina ayahangelaki: «Kaki ngɔbɛngɛ nkya bihenda biikinde, nkoobika.» 29 La mbala ɛmɔɔ, bakila baatangaki batenɛ, mpe aokɛ nde byonge biikinde angobikɛ la nkandi eyalaki laa nde.

43 Nde banto baiko, eyalaki la buunto ɔmɔɔ ɔkɔnɛ nkandi yotanga bakila, akelɛ la ɛkɔ mbula lyomu la ipe. Aheyɛ lokutu lokinde eka benganga mpe nkola la ɔmɔɔ ɔɔhɔki yobobikya. 44 Ayaindjɛ nde lombuha loki Yesu, abobutɛ nde lolemba lo ehenda, mpe la mbala ɛmɔ, bakila batenɛ. 45 Yesu aubolɛ: «Ombombute nnɔ?» Nga opa la bonto ɔmɔɔ taumeya, Petelo abobelɛ: «Bolaki, uuko wambɔ boloy bongokolingɛ bokotika mpika.» 46 Yesu aunoyɛ: «Bonto ɔmɔɔ amboombute. Ngɔɔkɛ nguya ɛmɔɔ engondjolɛ.» 47 Anɛ ɛnɛki buunto uuko bangowebɛ, ayɛɛ yotutumaka yoyakɔyɔ nde bekolo beki Yesu. Alɔndɔlɛ nde baiho ba banto bankuma itina ibutaki nde Yesu mpe ndenge ebikaki nde la mbala ɛmɔ. 48 Yesu nde ɔnɛ obohangelɛ: «Eboha e buunto, nyumeya ekiɛ engokobikyɛ. Kɛndɛ bɔlɔti.»

22 Bonkondi bɔmɔɔ boki botumba bo lɔbɔndɔ bo lina Yailo ayɛ. Anɛ e ɛnɛ nde Yesu, ayalikɛ nde bekolo bekinde 23 mpe abɔbɔndɛlɛ la weembeli nde ante: «Bona okimi o buunto o eboha awa la nkandi, yaka mpe oboapye bɛbɔ kela abate lobiko mpe nkandi ehile!» 24 Batɛ nde la Yesu ndjela ɛmɔɔ. Banto buuke batɛ itoboyelaka mpe itoboukaka mpika la lombuha.

38 Bakitɛ nde botumba booki bonkondi bo botumba bo lɔbɔndɔ, Yesu aɛnɛ banto bata baunwa, balela mpe bayahaba la yoboba la nguya. 39 Aɔtwɛ mpe ababelɛ:«Lolyaleka mpe lolela ngauko itina nɔ? bona tawei, alali.» 40 Mpe banto babɔɔlɛ. Aolyɛ banto bankuma, akɔhɛ nko ihe la nyango eki bona la banɛ bayaki la nde, baɔtwɛ mpiko eyalaki bona. 41 Yesu abutɛ bona nde lɔbɔ mpe abobelɛ: «Talita kumi» – Elimbola wambɔ: «Eboha e buunto, nkobela, emala!».

42 Nko aiko, bona eboha e buunto aemalɛ mpe abangɛ yɔkɛndɛ – ayalaki la mbula lyomu la ipe. Mbala ɛmɔɔ, banto bankuma bautɛ byɔli.

31 Yesu nde ɔnɛ oyuubola: «Banto baaki ekeke ɛnɛ e lɔlɔkɔ, bayali nga ba nnɔ? Baɛli la ba nnɔ? 32 Bayali nga bana baakihi nde bongala mpe bayalika beendo: "Tolokulelaki bokwaha, talolanga lwembe nsambo! Twembaki nyembo i bahɛi, talolela." 33 Itina Yowane Buuni ayaki, apɔle la mampa, apɔmɛle baana, mpe nyo lohangaki: "Ɔnɛ ayɛɛ la bolimo bo bobe." 34 Bona ooki bonto mpe aoya, alɛ la banto mpe amɛlɛ, nyo baiko lohanga: "Enda nde mpendja la bɔmɛlɛlo, boninga ooki bataakoli ba mputi la banto ba bahumu." 35 Ɔmwɛnɛkɛ ngauko, waanya booki Ndjakomba boyali semba eka banto bankuma baboumeya.»

Yesu eka bofalisayi Simo

36 Bofalisaya bɔmɔɔ aetaki Yesu atu itɔlɛ ekande. Yesu nde ɔnɛ otaka ekande ko baobanga yɔɔlɛ. 37 Buunto ɔmɔɔ o bahumu ayake nde imonga iiko. Anɛ yokaki nde Yesu angotɛ itɔlɛ eka bofalisaya buuko, ayɛɛ la bolangi bɔmɔɔ bo bɔlɔti boyoli la balahi,

41 Loondo lɔmɔɔ ayɛ, lina ikinde Yailo, ayalaki bonkondi bo botumba bo lɔbɔndɔ. Ayakɔyɛ nde bekolo beki Yesu la yɔbɔndɛlɛ atu nde botumba bokinde, 42 itina mbɔ bona okinde o buunto nko ɔkɔ ɔmɔɔ, okitaki la mbula ntute la lyomu la ipe alangaki awu.

Aiko etaki Yesu mpiko, banto buuke bayaki yoboyelaka, mpe yobotikaka mpika.

49 Nko atepela, bonto ɔmɔɔ aumɛ eka bonkondi bo botumba bo lɔbɔndɔ mpe abohangelɛ: «Bona okiɛ o buunto angowɛ. Tunwake yotungya Bolaki.» 50 Yesu aokaki ndenge etepela ibɔ, aohangela Yailo: «Tookake bɔɔmɔ, yala nko la nyumeya, mpe bona akoobika.» 51 Anɛ ekitaki ibɔ nde botumba booki Yailo, akɔhɛ nko Petelo, Yowane la Yakɛ, la mpe ihe la nyango eki bona baɔtwɛ. 52 Banto bankuma balelaki mpe bayalaki la ihɛi itina iiki bona. Yesu abelɛ: «Lwambya yolela, bona tawei, alali nko ilɔ.» 53 Banto baɔlɛ Yesu nko ntɔɔlɔ, itina ibɔ baeba mbɔ bona angohilɛ yowa. 54 Yaa Yesu abutɛ bona nde lɔbɔ mpe aboetɛ la lyoi i boolo: «Eboha e buunto, emwa!» 55 Bona loyomo luunwɛ mpe la mbala ɛmɔɔ aemalɛ. Yesu ababelɛ babopaa byomba bi ndɛlɛ. 56 Ihe la nyango eki bona uuko o buunto baɛnɛ byɛnywa; nkamba Yesu aobakokomya tabahangelake la bonto ɔmɔɔ ikambo iiko yoyume yokelama.

37 Eeleele ekelɛ mpe buula bolikɛ bahi nde waato, ntute eeki waato boyole la bahi. 38 Endaka Yesu nde alalaki nde mbaka, bɔtɛ nde bokili. Bakɛndi laa nde baboemolɛ, mpe babohangelɛ la nguya: «Bolaki, toowa: epokokele la lobo lɔmɔɔ?» 39 Yesu aemwɛ, ataamelɛ eeleele mpe abeelɛ ndjale: «Pilama! yala nyɛ!» Eeleele ehilɛ mpe bolenge bɔkɔtɛ. 40 Mpe ayɛ yobela bakɛndi laa nde: «Itina imba nyo looke bɔɔmɔ nɔ? Taloyali laino la waambi?» 41 Bakɛndi laa nde bayalaki la bɔɔmɔ bɔmɔɔ bo bɔnɛnɛ mpe bayaubolɛ ibɔ la ibɔ: «Bonto ɔnɛ ae nɔ, la eeleele la ndjale ibookela?»

35 Nga bohilaki buuna, bakɛndi la Yesu bayaundjɛ ntute la nde mpe babobelɛ: «Anɛ toyali nde ekele mpe buuna bohuula. 36 Unoya banto banɛ batu nde bahala la nde bihe biiyali ntute la anɛ kela bahombe byomba bi ndɛɛlɛ.» 37 Yesu ababelɛ: «Nyo bamɛlɛ lobapaa bi ndɛɛlɛ!» Yaa ibɔ babuubolɛ: «Nko toohomba benkuka be nkɛhi nkama ipe mpe tobapa bale?» 38 Yesu ababelɛ: «Loyali la benkuka benga? taloolende.» Batɛ itolenda mpe babobelɛ: «Toyali nko la benkuka betano la nsi ipe.» 39 Yesu abatindɛ bakihye bonto onkuma bihoke bihoke nde baɔmbi. 40 Banto bakihɛ nde bihoke bi bonkama la bi ntuku itano. 41 Yesu akɔhɛ benkuka betano la nsi ipe, auleyɛ baiho nde liko mpe atotyɛ Ndjakomba. Abɔmbɔlɛ benkuka mpe apɛ bakɛndi la nde bakapele banto. Bakapɛ mpe nsi ipe la banto bankuma. 42 Banto bankuma balɛ mpe bakindɛ. 43 Bakɛndi la Yesu baambolɛ bitate bi benkuka la bimpulu bi nsi biitikalaki, bayoyɛ nhandi lyomu la ipe. 44 Baalɛki benkuka bɛkɔ bayalaki banto nkoto itano.

48 Aɛnɛ bakɛndi la nde bapuuhe lenkina yoluka itina bɔmpɛmpɛ bobaunoyaki; aiko elanga nkɛhɛ ɛkie, Yesu atɛ eyali ibɔ itɔkɛndɛkɛ nde liko i bahi mpe alangaki abalekane. 49 Anɛ ɛbɔɛnɛ ibɔ aɔkɛnde nde liko i bahi, baokamba elima mpe baoboba. 50 Itina ibɔ bankuma babɔɛnɛki, mpe baokaki bɔɔmɔ. La mbala ɛmɔɔ, Yesu ababelɛ: «Lokahwa! Eyali emi; talookake bɔɔmɔ!» 51 Akondelɛ nde waato booyalaki ibɔ, mpe bɔmpɛmpɛ bohilɛ. Bakulɛ nko bakoto,

Yesu alehyɛ banto nkoto inɛi

1 Nko nde biina biiko, banto buuke bahokamɛ lenkina, nga bopa ibɔ tabayala la yomba yɔlɛ, Yesu aetɛ bakɛndi la nde mpe ababelɛ: 2 «Ndjoka banto banɛ ihɛi, bookela biina behato bayali la emi ndye ɛmɔɔ, mpe bapala yomba yɔlɛ. 3 Nga nhobaunoya eka ibɔ la ndjala, bangoholwa byonge nde ndjela; itina bamɔɔ bakibɔ baumaki botale.» 4 Bakɛndi la nde babuunoyelɛ: «Nde ekele ngɔnɛ, tɔɔhɔ yobata benkuka nko kela bale mpe bakinde?» 5 Yesu abaubolɛ: «Loyali benkuka benga?» Babobelɛ: «Toyali benkuka nsambo.» 6 Nko aiko, abelɛ boloy booyalaki aiko bakihe nde babu. Akɔhɛ benkuka bɛkɔ nsambo, akumyɛ Ndjakomba, abɔmbɔlɛ mpe apɛ bakɛndi la nde kela bakapele banto bankuma. Bakɛndi la nde bakelɛ nko ngauko. 7 Bayalaki mpe la nsi i nkɛnkɛ. Mbuha eeki yɔtɔmɛyɛ nsi ikɔ bokako, Yesu abelɛ bakɛndi la nde baunwe yobakapela. 8 Balɛ mpe bakindɛ. Bakɛndi la nde baambolɛ nhandi nsambo iyoli la bimpulu biitikalaki. 9 Banto bayalaki ntute la nkoto inɛi. Nko aiko, Yesu abaunoyɛ.

Yesu alimyɛ bote bo figi

12 Buuna bɔnɛ bɔmɔɔ, elaka ɛnɛ ehenyaki ibɔ Betani, Yesu aokɛ ndjala. 13 Aɛnɛ ima botale bote bo figi* boyalaki la nkaha buuke, atɛ itolenda nga boyali la muma; anɛ ayaundjɛ nde ntute la bote bɔkɔ, atanɛ nko nkaha, itina teyala eleko eki muma i figi. 14 Yesu abelɛ bote buuko bo figi: «La bonto ɔmɔɔ tangɔɔlɛ lenkina la muma ikiɛ!» Mpe bakɛndi la nde baokaki iitepelaki nde.

Yesu la bote bo figi bɔnɛ boomɛ

20 La nkɛhɛ eeki buuna bɔnɛ bɔmɔɔ, aiko yoleke ibɔ nde ndjela, baɛnɛ bote bo figi: boomɛ tii nde belubo. 21 Petelo abopwɛ inɛ ilekaki, abelɛ Yesu: «Bolaki, lenda bote bo figi bɔnɛ bolimyaki wɛ, bongoomɛ bonkuma.» 22 Yesu abelɛ bakɛndi la nde: «Loyala la waambi la Ndjakomba! 23 Ndobela nhɔhɔlɔ, kaki bonto angobelɛ ngomba ɛnɛ: "Ima aiko mpe yaboka nde ndjale e bɔnɛnɛ", mpe nga tayala la lɔmpɛnyɛ nde botema bookinde, yaa aumeya iiko itepela nde ikookelama, ingokelama. 24 Ɛkɔiko ndobela: Inkuma inga nyo lobondele nde lɔbɔndɔ, luumeyaka longobatɛ, mpe ingokokyama. 25 Mpe nga ongwemalɛ kela ɔbɔndɛle, nga oyali la lobo la bonto, sabinya nde, kela Ihe eki nyo eyali nde liko akosabinye basumu baakiɛ. [

Yesu ahweta bakɛndi laa nde ba ntondo

1 Bɔɔmɔɔ buuna, Yesu ayalaki nde ibongo i ndeko e Yenesalɛtɛ, buuke bo banto bayalaki ntute la nde itina iiki baoke nsango e bɔlɔti eeki Ndjakomba. 2 Aɛnɛki byato bepe nde ibongo; eyalaki byato beeki bahaki bahulwaki kela baɔhɔle bɛtɛi beekibɔ. 3 Yesu akondelɛ nde waato bɔmɔɔ. Eyalaki waato booki Simo, mpe abobelɛ ayaundje bona o botale la ibongo. Akihɛ nde waato mpe abangɛ yolaka banto.

4 Anɛ eheyaki nde yolaka, abelɛ Simo: «Indja waato looko lo bonino mpe lolika bɛtɛi bekinyo itina iiki lotungole nsi.» 5 Simo abuunoyelɛ: «Bolaki, tongohakɛ botyo bonkuma, tatobata yomba. Yaa nko aiko eha wɛ ombela, nkolika bɛtɛi.» 6 Baunwɛ yolika bɛtɛi mpe batungɔlɛ nsi imɔɔ i buuke, bɛtɛi bekibɔ ntute la yatwa. 7 Ibɔ banɛ baetɛ baninga banɛ bayalaki nde wato bonkina baye yobabutya. Baninga bayɛ, mpe bayoyɛ byato beyape la nsi mpe byato beyɛ ndɛndɛ. 8 Anɛ e ɛnɛki Simo Petelo ngauko, akɔ bakulubɔngɔ ntondo eeki Yesu mpe nde ɔnɛ abobelɛ: «Nkolo, ima ntute la emi, itina emi ndjali bonto o bahumu.» 9 La Simo la ekambi enkuma eyalaki la nde bahoka bɔɔmɔ la yɛnɛ buuke bo nsi itungolaki ibɔ. 10 La Yakɛ la Yowane, bana baaki Zebede, baninga baaki Simo baayalaki la nde baokɛ mpe bɔɔmɔ. Yesu nde ɔnɛ abelɛ Simo: «Tookake bɔɔmɔ; ima lɔlɔkɔ, ongotungolakɛ wante banto.» 11 Nko aiko ibɔ banɛ baunoyɛ byato nde ibongo, bahenɛ byomba binkuma biyalaki la ibɔ, bayelɛ Yesu.

22 Bɔɔmɔɔ buuna, Yesu akondelɛ nde waato nde la bakɛndi laa nde mpe ababelɛ: «Topendye loko loni lonkina lo ndeko.» Ibɔ banɛ batɛ. 23 Aiko yoluke ibɔ, Yesu aɔngɔlɛ ilɔ. La mbala ɛmɔɔ, bonketi bɔmɔɔ bɔnɛnɛ bobaolelɛ nde ndeko; waato boyaki ibɔ booyoola la bahi, bayɛɛ nde ikuma nkɔlɛ. 24 Bakɛndi laa nde bayɛ ntute laa nde mpe baboemolɛ ibɔ baambɔ: «Bolaki, Bolaki, toowa!» Yesu aemwɛ, aangwelɛ bɔmpɛmpɛ la buula. La bɔmpɛmpɛ la buula beyahuloyɛ mpe ndeko enkuma ekitɛ way. 25 Nde ɔnɛ obabelɛ: «Nyumeya ekinyo eyali nko?» Bɔɔmɔ boobabuta, bakulɛ nko bakoto mpe bayahangelɛ: «Bonto ɔnɛ ayali mpendja nnɔ? Aangoya la bɛmpɛmpɛ la bahi mpe bebookela!»

22 Bɔɔmɔɔ buuna, Yesu akondelɛ nde waato nde la bakɛndi laa nde mpe ababelɛ: «Topendye loko loni lonkina lo ndeko.» Ibɔ banɛ batɛ. 23 Aiko yoluke ibɔ, Yesu aɔngɔlɛ ilɔ. La mbala ɛmɔɔ, bonketi bɔmɔɔ bɔnɛnɛ bobaolelɛ nde ndeko; waato boyaki ibɔ booyoola la bahi, bayɛɛ nde ikuma nkɔlɛ. 24 Bakɛndi laa nde bayɛ ntute laa nde mpe baboemolɛ ibɔ baambɔ: «Bolaki, Bolaki, toowa!» Yesu aemwɛ, aangwelɛ bɔmpɛmpɛ la buula. La bɔmpɛmpɛ la buula beyahuloyɛ mpe ndeko enkuma ekitɛ way. 25 Nde ɔnɛ obabelɛ: «Nyumeya ekinyo eyali nko?» Bɔɔmɔ boobabuta, bakulɛ nko bakoto mpe bayahangelɛ: «Bonto ɔnɛ ayali mpendja nnɔ? Aangoya la bɛmpɛmpɛ la bahi mpe bebookela!»

Yesu aleka belimo be bobe la nguya

26 Yesu la bakɛndi laa nde bakitɛ nde ibongo iiki bokili bo Ngelaza, ibu i mboka la Ngalilaya.

12 Anɛ eha ikɔlɔ ilinga, bɛnkɔmwa lyomu la bepe bayɛ ntute la Yesu mpe babobelɛ: «Inoya banto baiko bankuma, batu itotilaka ndye yokiha nde bihe la bahala baayali ntute la anɛ, batu itotilaka la byomba bi ndɛlɛ, itina anɛ toyali nde ekele.» 13 Yesu ababelɛ: «Lwapa nyo kiika byomba bi ndɛlɛ.» Babobutolɛ: «Toyali nko la mampa itano la nsi ipe. Mɔɔnde olanga totu yohomba byomba itina iiki banto bankuma ?» 14 Banto baayalaki aiko, nko beele botoo, ntute la nkoto itano. Yesu abelɛ bakɛndi laa nde: «Lokihya banto bihoke bi ntuku itano ntuku itano.» 15 Bakelɛ nko ngauko mpe babakihyɛ ibɔ bankuma. 16 Yesu akohɛ mampa ikɔ itano la nsi ikɔ ipe, aileyɛ baiho nde liko, abɔndɛlɛ lɔbɔndɔ lo bokako nde byomba bikɔ, apupolɛ bimpulu bimpulu mpe apɛɛ bakɛndi laa nde kela ibɔ bakapele banto. 17 Balɛ byomba lɛkɛ lɛkɛ mpe bakindɛ. Baambolɛ bimpulu bitikalaki, bayoyɛ bihaka lyomu la bipe bonkundu.

23 Nde botumba bo lɔbɔndɔ buuko, bonto ɔmɔɔ ayalaki la bolimo bo bobe mpe abobɛ: 24 «Lookiɛ la nso nɔ, wɛ Yesu e Nazalɛti? Ongoyɛ yotolyaka? Ndjeba ɔnwe wɛ: Bɔyɛngwa booki Ndjakomba!» 25 Yesu aangoyɛ bolimo bo bobe mpe abope botindo: «Pilama mpe ola eka bonto ɔnɛ!» 26 Mpe bolimo bo bobe bopukuhɛ bonto uuko la nguya, abobɛ mpe aolɛ ekande.

Yesu abikyɛ bonto ɔmɔɔ oyalaki la belimo be bobe

1 Bakitɛ looko lɔnɛ lɔmɔɔ lo ndjale nde bokili booki ba Ngelaza. 2 Nko Yesu aohulwe nde waato, bonto ɔmɔɔ oyalaki la bolimo bo bobe oumaki nde ngelo ayɛ yoponana la nde. 3 Bonto uuko ambookihake nko nde ngelo, mpe la bonto ɔmɔɔ taɔhɔ yuunwa lenkina yobotungya mpanga. 4 Mbala buuke imba babotungyakɛ mpanga la mpeko, ambootamolakɛ mpanga mpe amboopupolakɛ mpeko. Nko bonto oyalaki la nguya yobobuta. 5 Ambooyalakɛ bilaka binkuma la waane la botio nko nde ngelo la ngomba, yoboba mpe yoyaotalya la babɔkɔ. 6 Anɛ e ɛnɛki nde Yesu botale, apuhuwɛ yɔkɔ bakulubɔngɔ ntondo eeki nde, 7 mpe abobɛ la nguya: «Yesu Bona ooki Ndjakomba ɛnɛ e lobola, lookiɛ la emi nɔ? Nkɔbɔndɛlɛ nde lina iki Ndjakomba, tontungyake!» 8 – Atepelaki ngauko itina Yesu abobelaki: «Bolimo bo bobe, ola eka bonto ɔnɛ!» – 9 Yesu abuubolɛ: «Lina ikiɛ nɔ?» Aunoyɛ: «Lina ikimi "Botonga", itina toyali buuke.» 10 Bolimo bo bobe bɔbɔndɛlɛ Yesu la weembeli mbɔ tabatindake looko lonkina.

11 Mpeni looko lo ngomba, eyalaki la botonga bo bɔnɛnɛ bo ngulu bayaki yɔlɛkɛ. 12 Belimo be bobe bɛbɔndɛlɛ Yesu mbɔ: «Ototinde nde ngulu, tɔɔtwe nde ikɔ!» 13 Yesu abapɛ ndjela mpe belimo be bobe beolɛ, byɔtwɛ nde ngulu, mpe botonga boyabilingolɛ nde nkitibɔngɔ, boyaunɛ mpe bowɛ nde ndjale. Ngulu iyalaki ntute la nkoto ipe. 14 Baahɛndjɛlɛki ngulu balotɛ, mpe batɛ itopa nsango nde imonga mpe nde bahala. Banto bayɛ yolenda iilekaki.

11 Yaa nyo lolakake, kaki bonto ɔmɔɔ aobela ihe ekinde laa mpe nyango ekinde: "Yomba eepa emi ndjookopa eyali Nkoloba* wambɔ ibondo iingobombelɛ emi Ndjakomba" –, 12 tangookambola nyango la ihe ekinde. 13 Ndenge iiko ekela nyo ngauko, luumola iikana Lyoi iki Ndjakomba nde ndjela eeki bɔnkɔkɔ bookinyo boolaka nyo. Mpe lwela mbo inkina i buuke ikelaka nyo ngauko.»

Byomba biikityaka bonto mbindo

14 Yesu aetɛ lenkina buuke bo banto mpe ababelɛ: «Londjalye nyo bankuma, mpe lwebaka ngɔnɛ: 15 Nkola la yomba ɛmɔɔ euma nde bongala ɛɔtwa nde bonto ko yobopita. Yaa inɛ yoola nde bonto bibokityake mbindo.[

Buunto ɔmɔɔ o bopakano aambelɛ Yesu

24 Yesu aumɛ aiko, atɛ Tilɛ. Aɔtwɛ nde botumba bɔmɔɔ mpe talanga la bonto ɔmɔɔ aebe mbɔ ayali aiko, yaa taɔhɔ yuhama. 25 Nko aiko, buunto ɔmɔɔ ayalaki la bona ookinde o buunto otungyamaki la bolimo bo bobe. Anɛ yokɛ nde batepela itina iiki Yesu; ayɛ ntute la nde mpe ayakɔyɛ nde bekolo beekinde. 26 Buunto ɔkɔ ayalaki bopakano, bohi Fenisi e Sili. Abɔndɛlɛ Yesu aolye bolimo bo bobe eka bona ookinde o buunto. 27 Yaa, Yesu abobelɛ: «Hena laino bana bale bakinde; itina epoyali bɔlɔti yɔkɔhɔ ihɔɔ iiki bana olikele baaha ba mbwa.» 28 Buunto uuko abounoyelɛ: «Nkolo, eyali nko ngauko, yaa baaha ba mbwa balɛke mpuha iiko ikɔyɔkɔ bana nde nse e mesa.» 29 Yesu abobelɛ: «Itina iki mbuto eekiɛ, inwa eka wɛ: bolimo bo bobe boongolɛ eka bona ookiɛ o buunto.» 30 Aunwɛ ekande mpe atanɛ bona alali nde ntange: bolimo bo bobe bongoolɛ.

17 Bonto ɔmɔɔ nde banto baayalaki aiko abobelɛ: «Bolaki, ngokoyelɛ bona ookimi o loondo, atungyama la bolimo bo bobe bobokityake luumi. 18 Ndye inkuma iya bɔkɔ yobobuta, bobobokake nde babu, bona aolyake mpulo mpe akiɛtɛke baino, byonge biikinde byoketa. Mboobele bakɛndi la wɛ baolye bolimo buuko, yaa tabauha.» 19 Yesu ababelɛ: «Nyo elelo epa la waambi! Tii elaka nɔ eenga emi nkihe la nyo? Ngoluukela botema tii elaka nɔ? Londjele bona ɔkɔ anɛ.» 20 Baboyelɛ bona. Nko bolimo bo bobe bɔɔyɛne Yesu, bopukuhɛ bona la nguya; ayahombɛ nde babu, ayabilingolɛ mpe aolɛ mpulo nde bonya. 21 Yesu aubolɛ ihe eeki bona: «Mbo inɛ ibokelɛ mbula inga?» Mpe ihe abobelɛ: «Ima boboha bookinde. 22 Mpe mbala la mbala, bolimo bo bobe bobobokake nde ntyɛ laa mpe nde bahi itina iki bobolyake. Yaa kaki ɔɔhɔ yobobikya, yaka otokambole, otookele ihɛi!» 23 Yesu abobelɛ: «Itina iitepela wɛ kaki ɔɔhɔ nɔ! Yaa, inkuma yɔɔhɔ yokelama eka bonto oyali la waambi.» 24 Nko aiko, ihe eki bona abobɛ: «Nyumeya! onkambole nde bobya waambi!»

25 Anɛ e ɛnɛ Yesu banto baoye buuke, aangwelɛ bolimo bo bobe mpe abobelɛ: «Wɛ bolimo bɔnɛ bokitya bonto luumi mpe ekinda, nkopa botindo: ola eka bona ɔnɛ mpe tunwake yoya lenkina ekande!» 26 Bolimo bobe bobobɛ, bopukuhɛ bona la nguya, mpe boolɛ. Bona akitɛ lohi angowɛ, banto buuke bayalaki aiko bahangɛ: «Angowɛ.» 27 Yaa Yesu abobutɛ nde lɔbɔ, abouleyɛ mpe bona aemalɛ.

Yesu abikiɛ banto baayalaki la nkandi

38 Yesu aolɛ nde botumba bo lɔbɔndɔ, atɛ nde botumba booki Simo. Nyango e bokilo eeki Simo ayalaki la pɛpɛlɛ e nguya mpe babɔndɛlɛ Yesu akele bona o lobo itina ikinde. 39 Yesu ahunamɛ mpe ataamelɛ pɛpɛlɛ. Pɛpɛlɛ ebohilɛ, mpe la mbala ɛmɔɔ aemalɛ, nde nduuko aobapeka.

27 Anɛ ehulwa Yesu nde waato, bonto ɔmɔɔ oki imonga iiko ayɛ yoponana la nde. Bonto ɔkɔ ayalaki la belimo be bobe. Ima kala, tatindeya yɔlɔtɔ bihenda mpe apokihake nde botumba, nko nde baombo. 28 Anɛ ɛnɛki nde Yesu, aulɛ waandje mpe ayalikɛ nde bekolo bekinde, abobɛ la longuya: «Lokimi la wɛ nnɔ, Yesu, Bona ooki Ndjakomba ɛnɛ e lobola? Nkɔbɔndɛlɛ, tontungyake!» 29 Atepela ngauko itina wambɔ Yesu atindaki bolimo bo bobe buuko aole nde byonge biki bonto uuko. Mbala la mbala aɔtwake nde byonge bikinde. Mpe ɔmbwɛnɛkɛ bangotungyɛ bɛlɔkɔ, apupolake nko mpupola mpe bolimo bo bobe bobotindake nko nde bipoka. 30 Yesu abuubolɛ: «Lina ikiɛ nnɔ?» Abuunoyelɛ: «Botonga.» Itina belimo be bobe buuke bɛbɔtwɛlɛ nde byonge. 31 Belimo bɛkɔ be bobe bebɔbɔndɛlɛ tabatindake nde ipoku i lyale ipa la nsuki.

32 Ndye eyalaki ibɔ, botonga bɔmɔɔ bo ngulu boyaki yɔɔlɛ baɔmbi nde liko i ngomba. Belimo bɛkɔ be bobe bɛbɔndɛlɛ Yesu abapa ndjela batu yɔɔtwa nde ngulu iiko. Yesu abapɛ ndjela. 33 Belimo be bobe byolɛ nde bonto uuko, betɛ itɔɔtwa nde ngulu. La mbala ɛmɔɔ, botonga lonkundu boyabilingolɛ ima nde ngomba tii nde ndeko mpe boninɛ nde ndeko. 34 Anɛ ɛnɛki baahɛnjɛlɛ ngulu ehanha iiko, bayabɛlɛ lobango mpe batɛ itohangelaka banto ikambo iiko nde imonga mpe nde bahala batuti aiko. 35 Banto bayɛ yolenda ilekaki aiko. Bakitɛ loko loyalaki Yesu. Bataanɛ bonto ɔnɛ ombolye ibɔ belimo be bobe akihi nde bekolo beki Yesu, alɔti bihenda mpe bolimo bo bonto bongobuunwɛ. Banto baokɛ bɔɔmɔ.

27 Ndobela nte nhɔnhɔlɔ, banto bankina bayali anɛ tabangowa nko ɛnɛ Bonkumu booki Ndjakomba.»

Yesu aokengwa

28 Bɛkɔlɔ nga mwambi mbuha yotepela ngauko, Yesu akohɛ Petelo, Yowane la Yakɛ, akondelɛ nde la ibɔ nde liko i ngomba itɔbɔndɛlɛ. 29 Aiko ebɔndɛlɛ nde, lɔbɔ loki elongi ekinde lokengwɛ mpe bihenda bikinde byɛlɛ mpɛmbɛ nga bokalyali. 30 Lendaka nko aiko ɛkɔ, banto bape bayɛ yoholola la nde: eyalaki Mose la Elia; 31 bangwɛlɛ la lwɛya looki Ndjakomba mpe batepela itina iiki etwelo ekiinde engokelame Yelusalɛmɛ.

32 Aiko Petelo la ekambi ekinde bangokindɛ ilɔ. Anɛ eha baemwa, bahwɛnɛ lwɛya lonkuma loki Yesu la banto bape baayalaki ntute la nde. 33 Anɛ ya banto baiko bape bakapwa la Yesu, Petelo aohangelɛ: «Bolaki, eyali bɔlɔti toyale anɛ; totonge benganda behato: bɔmɔɔ itina ikyɛ, bɔmɔɔ itina iiki Mose, bɔmɔɔ itina iiki Elia.» Petelo wambɔ taeba la itina i lobo lotepela nde.

38 Nde boloy buuko, bonto ɔmɔɔ abobɛ: «Bolaki, nkɔbɔndɛlɛ, ondendele bona onɛ okimi, bona nko ɔkɔ ɔmɔɔ oyali la emi. 39 Mbala la mbala, bolimo bɔmɔɔ bobotungyake. Nga boobobuta, bona aoboba la mbala ɛmɔ, aokatwa mpe aotanga nko bɛlɛlu. Bolimo bɔkɔ bopobohenake kwa mpe mbɔkɔ bomboobobute, bobohololake byonge! 40 Mbɔndelɛ bakɛndi la wɛ baboolye, tabakondwa.» 41 Yesu nde ɔnɛ otepela: «Nyo elele e banto epa la nyumeya mpe e bahumu. Ngoyala lenkina la nyo bikeke binga mpe ngolumeya la bihɛlɛlo bye ngauko tii lainga?» Nkamba aobela ihe eeki bona: «Yaka la bona okiɛ anɛ.» 42 Nko bona aokite, bolimo bo bobe bɔbɔkɔyɛ nde nse mpe bobopukuhɛ la nguya mpendja. Yesu aangwelɛ bolimo buuko bo bobe, abikiɛ bona mpe abounoyelɛ ihe ekinde. 43 Banto bankuma nko byɔli la yɛnɛ bɔnɛnɛ booki Ndjakomba.

Yesu ahwebya iwa ikinde mbala ɛnɛ e bape

Nga boyalaki banto bankuma nko nkimo la yɛnɛ mbo inkuma ikela nde, Yesu abelɛ bakɛndi laa nde:

Yesu bohangema booki Bezebule ?

14 Buuna bɔmɔɔ, Yesu apandjaki bolimo bo bobe bokityaki bonto luumi. Anɛ eha nde abopandja, bonto oyalaki luumi aobanga yotepela mpe banto bayuula nko nkimo.

50 Ɔmɔɔ okibɔ atɔkɛ bohali booki nkanga e bonkondi ibaka mpe abopupolɛ itoi i boome. 51 Yesu ababelɛ: «Lohenaka, engopulɛ ngauko!» Lombuha luuko, abutɛ itoi ikɔ mpe abobikiɛ.

24 Anɛ eha banto banɛ baumaki eka Yowane baunwa, Yesu nde ɔnɛ otepela la banto baayalaki aiko itina ikinde: «Lotaki yolenda nde bokili bo bɛkɔngɔ nnɔ? Ibundja inyonga la bɔmpɛmpɛ? 25 Lotaki yolenda mpendja nnɔ? Bonto ɔmɔɔ angɔlɔɔtɛ bihenda bi botuya? Banto baalɔtɔkɔ bihenda bi botuya mpe baayali la ikulaka bakihake nde betumba beeki nkumu. 26 Yaa nyo lotaki yolenda nnɔ? Ntepeli? Ɔnde, ndobela, nde apenda la ntepeli. 27 Nkɔti itepela itina ikinde ngɔnɛ:

"Ngotinda bontomwa bokimi lontondo lokiɛ;

angotu yɔbɔngya ndjela lontondo lokiɛ ".»

28 «Ndobela: nde banto baabotaki bainto, teyali la openda Yowane la bɔnɛnɛ. Yaa bonto openda bɔkɛ nde Bonkumu booki Ndjakomba abopenda nde la bɔnɛnɛ.» 29 Banto bankuma baaya yoboka, eyale la bataakoli ba mputi, baɛnɛ bosembo booki Ndjakomba mpe bayɛ yɔkɔhɔ buuni booki Yowane. 30 Nko bafalisaya la balaki ba bobeko, ibɔ tabalanga yoomba elangaki Ndjakomba abakelele mpe bayotona bauname eka Yowane.