1 Yesu abelɛ bakɛndi laa nde: «Bakambo baakitya banto nde bobe bapohambake. Yaa nko ihɛi la bonto ootomba banto nde bobe. 2 Bɔlɔti babotungye ibɔkɔ i bolito nde nkingo mpe baboboke nde ndjale kela tatombake ɔmɔɔ oki bana baiko nde bobe. 3 Lɔbɔngyaka weema bookinyo.»

«Kaki bohibotonga angokokelɛ bobe, ɔbɔpɔndɔlɔkɔ; kaki mpe anguumeyɛ bobe bokelaki nde, obosabinyaka. 4 Eyale angokokelɛ bobe mbala nsambo nde bɔkɔlɔ bɔmɔɔ mpe anguunwɛ mbala nsambo yɔkɔbɔndɛlɛ: "Ngokelɛ bobe, ntingoyunwela", obosabinyaka.»

5 Bɛnkɔmwa babelɛ Nkolo: «Pulya nyumeya ekinso.» 6 Nkolo abaunoyelɛ: «Lopooyalaka la nyumeya ɛnkɛnkɛ nkya nga lomuma lo nsɛmbɛ e lobambo, ntiki lopoobela bokungu bɔnɛ: "Yakuma anɛ kela otu itoyaemya nde ndjale", mpe bokoolookela.»

7 «Nga boyali nyo aiko, kaki ɔmɔɔ ayali la bohali bɔnɛ boona ngonda la bɔɔhɛndjɛlɛ bibwa, aiko ya nde aoyume nde ngonda, aɔhɔ yobobela: "Tookihe nde mesa ɔle byomba?" 8 Aohamba yobobela: "Ondambele yomba, lɔɔtɔ bihenda bi bohala kela ontikele byomba nde mesa, laino emi nde, mmɛle, nkamba wɛ ɔle mpe ɔmɛle la lombuha"? 9 Angoyumeya bohali buuko itina akelaki mbo inkuma ibotindaki nde akele? 10 Nyo mpe nko ngauko. Kaki longokelɛ inkuma ilotindaki ibɔ, lohangaka: "Toyali nko bahali. Tongokelɛ nko imbwɛlɛme tokele."»

11 Yesu alangaki atu Yelusalɛmɛ, alekɛ looko lo Samalia la Ngalilaya. 12 Nko aoyɔtwe nde ehe ɛmɔɔ, banto lyomu baayalaki la nkandi e bohale baboolelɛ. Baemalɛ bona o botale la nde 13 mpe babobɛ: «Yesu Nkolo, otookele ihɛi.» 14 Anɛ ebaɛnɛki Yesu, ababelɛ: «Lɔkɛndɛ loyaɛnie eka Nkanga iiki Ndjakomba.» Nko aiko yoli ibɔ, bapɛtwɛ. 15 Anɛ ɛnɛki ɔmɔɔ okibɔ angobikɛ, aunwɛ, aokumiake Ndjakomba la lyoyi i nguya. 16 Ayakɔyɛ nde bekolo beeki Yesu, elongi tii nde babu, kela aopaaye itotya ikinde. Bonto ɔkɔ ayalaki bosamalia. 17 Yesu aubolɛ: «Ɔkɔ wambɔ ibɔ bankuma lyomu tabapɛtwa? Yaa banɛ bankina ibwa bayali nko? 18 Nkola la ɔmɔɔ okibɔ onguunwɛ yototya Ndjakomba, ohunwa nko bobutu bɔnɛ?» 19 Nkamba aobobela: «Emala mpe kɛndɛ, nyumeya ekiɛ engokobikyɛ.»

20 Bafalisaya baubolɛ Yesu: «Bonkumu booki Ndjakomba bongoya lainga?» Yesu abaunoyelɛ: «Bonkumu booki Ndjakomba tabongoya nga yoomba ɛmɔɔ engwɛnie nde baiho baaki banto bankuma. 21 Talongooka: "Bɔkɔ bɔnɛ" la "Bɔkɔ boni". Itina Bonkumu booki Ndjakomba bongoyɛ ekanyo.» 22 Ekɔiko abelɛ bakɛndi laa nde: «Engoyala la biina benga lolange lwɛne nkya buuna bɔmɔɔ botoo booki biina beeki Ndjakomba, yaa talɔngwɛnɛ. 23 Bangoolohangela: "Lenda nde ɔnɛ, lenda nde ɔni." Talotake, talopuhwake mpiko. 24 Itina, nko nga wɛnɛkɛ nyo bokalyali anɛ yolaka bɔkɔ bokalima nde liko looko la looko, engoyala nko ngauko buuna boongoya Bona ooki bonto. 25 Yaa lontondo luuko, angɔɔnyɔkwa buuke mpe bangoobotona la banto baaki ekeke ɛnɛ. 26 Nko nga boyalaki nde eleko eeki Nowa, engoyala mpe nko ngauko nde eleko eeki Bona ooki bonto: 27 banto baambɔlɛke, bambɔɔmɛlɛke, beele la bainto bambooyabalake, tii buuna bɔnɛ bɔɔtwaki Nowa nde ihwa: mpela ɛkɛnɛ eyoyaka mpe yobalyaka ibɔ bankuma. 28 Engoyala mpe nga boyalaki nde eleko eeki Lɔti: banto bambɔɔlɛke, bambɔɔmɛlɛke, bamboohombe mpe bambɔɔtɛke, bambooyone mpe bambootonge betumba. 29 Yaa, buuna bɔnɛ boolaki Lɔti Sodoma, Ndjakomba alwɛyɛ mbula e ntyɛ la nhahe ilyakɛ banto bankuma. 30 Engoyala nko ngauko buuna bonga Bona ooki bonto ayaɛnie.»

31 «Nde buuna buuko, bonto oongoyala nde nsamba e botumba bokinde, tatilake ahulwe yɔkɔhɔ byomba bikinde; bonto mpe oongoyala nde ngonda tatilake aunwe nde botumba. 32 Lobopwaka lobo loolekelaki waali ooki Lɔti! 33 Bonto ongotila abombe lobiko lokinde angoolobungya, mpe ongobungya lokinde angoolobomba. 34 Ndohangela, botyo buuko, banto bape bangooyala nde ntange ɛmɔɔ: bangookɔhɔ ɔmɔɔ, baohenya onkina. 35 Bainto bape bangɔtɔkɔ mmuma ndye ɛmɔɔ: bangɔɔkɔhɔ ɔmɔɔ, baohenya onkina. [36 Beele bepee bengoyala nde ngonda ɛmɔɔ: bangookɔhɔ ɔmɔɔ, baohenya onkina.» ] 37 Bakɛndi la Yesu babuubolɛ: «Nkolo, bakambo baiko bangookelama nko?» Yesu abaunoyelɛ: «Engoambeme ebembe, engohokame bibeke.»