1 Nko nde elaka iiko, banto bankina bayɛ yohangela Yesu ikambo iiki banto ba Ngalilaya banɛ bae Pilato alyakake nko nde elaka ɛnɛ etumbelaka ibɔ Ndjakomba mbeka. 2 Yesu abaunoyelɛ: «Lokamba banto baiko ba Ngalilaya baawaki nyɔi e bobe ngauko bayalaki bahumuki penda banto ba Ngalilayi bankuma? 3 Nkola, emi ndobela; yaa nga talɔbɔngya betema, nyo bankuma longowa nko ngauko. 4 Mpe banto lyomu la mwambi baawaki anɛ yakɔyɛlɛki eliko e Silowe, lokamba ibɔ bapenda banto bankuma ba Yelusalɛmɛ la bobe? 5 Nkola, emi ndobela; yaa nga talɔbɔngya betema, nyo bankuma longowa nko ngauko.»

6 Mpe Yesu aobapa lwɛlya lɔnɛ: «Bonto ɔmɔɔ ayalaki la bompela* bokinde boonaki nde nde elanga. Atɛ itotila mmuma nde bote bɔkɔ, tabata la lommuma lɔmɔ. 7 Ahangelɛ bonto ɔhɛndjɛlɛkɛ elanga: "Lenda, ɛyɛ mbula ihato lonkundu iya emi yotila mmuma nde bolala bɔnɛ, mpe mpobatake yomba. Pupola bɔkɔ. Itina nnɔ ɛlɛ bɔkɔ babu nko intomba?" 8 Bɔhɛndjɛli bo elanga abelɛ bɔmɛlɛ: "Nkolo, opohenyakɛ laino mbula ɛnɛ, ntimole babu nde itina, ndjutumole luula. 9 Ɛmɔɔ mbala nko bobota mmuma mbula iiko yoye. Kaki mpe tabobota, okataka."»

10 Buuna bɔmɔɔ bo sabata, Yesu alakaki nde botumba bo lɔbɔndɔ. 11 Buunto ɔmɔɔ oyali la bɔlɛmɛ ayalaki aiko. Bolimo bo bobe bobuunɛ betiti ima mbula lyomu la mwambi mpe apɔɔhe yoyahembola bɔlɔti. 12 Anɛ ɛboɛnɛki Yesu, aoboeta mpe aobobela: «Buunto, ongobikɛ la bɔlɛmɛ bokiɛ!» 13 Yesu aboapyɛ bɛbɔ, mpe la mbala ɛmɔ, betiti byohembwɛ mpe buunto ɔkɔ atotyɛ Ndjakomba. 14 Bonkondi bo botumba bo lɔbɔndɔ aokɛ bobe mpendja itina Yesu abikiɛ bonto nde buuna bo sabata. Ɛkɔiko, abelɛ boloy boyalaki aiko: «Toyali la biina botoba be bosala. Loyaka nde biina biiko yotila balobikie, nde buuna bo sabata nkola!» 15 Nkolo abuunoyelɛ: «Nyo banto ba bilongi bipe! Aiko eyali nyo, opoolyake ngɔmbɛ ekinde laa mpunda* ekinde nde elongo buuna bo sabata aobotombi yɔmɛlɛ bahi nnɔ? 16 Yaa buunto ɔnɛ, bona ooki Abalayama, otungyɛ Satana mbula liomu la mwambi lonkundu, tɛɛli babotungole bɛlɔkɔ biiko buuna bo sabata?» 17 Aiko etepelaki nde ngauko, banto bankuma bapobolangake baokɛ nsɔni epululu; yaa boloy bonkuma boyalaki la ibulwako la yɛnɛ mbo i mpapo iiko ikela nde.

18 Nkamba Yesu aubolɛ: «Bonkumu booki Ndjakomba bɔɛli la nnɔ? Ndjɔhɔ yoɛlya bɔkɔ la nnɔ? 19 Bɔɛli la boopo bo nsɛmbɛ e lobambo bɔnɛ boonɛ bonto ɔmɔɔ nde ngonda ekinde. Lomuma lɔkɔ loolɛ, lokitɛ bote bo bɔnɛnɛ mpe mpulu iiyaaka nde liko batongɛ baimbu baakiibɔ nde bitape biki bɔkɔ.»

20 Yesu aunwɛ yuubola: «Ndjɛlie Bonkumu booki Ndjakomba la nnɔ? 21 Boɛli la bote bo mampa bɔhɔpɔ buunto la katini ihato i falini mpe boyuuleya lopate lonkuma.»

22 Yesu ataki yolekaka nde bamonga la bihe, aolakake ilako mpe aotake looko lo Yelusalɛmɛ. 23 Bonto ɔmɔɔ abuubolɛ: «Nkolo, banto baangobika bangooyala bɔkɛ?» Yesu ababelɛ: 24 «Lokelaka nguya lɔɔtwe nde buuho bo nkaka, itina, ndobela, buuke bangotila baɔtwe, yaa tabangɔhɔ.»

25 «Elaka engoyala bɔmɛlɛ botumba ahwemala mpe aolipa ebala, nyo baangotikala nde bongala, longobanga yokɔkɔmɔ ebala mpe yuubola: "Nkolo, otolipole", nde angoluunoyela: "Emi mpolwebe". 26 Aiko longotila lohange: "Yaa nso nga tɔlɛki mpe tɔmɛlɛki nso la wɛ nnɔ, wɛ mpe ombolakake nde beboko beekinso!" 27 Nde angoolobela lenkina: "Emi mpolwebe. Luuma aiko ntute la emi, nyo bankuma banto baapa la sembo." 28 Mpiko, engooyala la baangolela mpe la baangolamata baino, elaka enga loɛne Abalayama, Izaka, Yakobo la ntepeli inkuma nde Bonkumu booki Ndjakomba, mpe nyo bangolobokɛ nde bongala. 29 Nde elaka iiko, banto bangooyuma looko loolaka inyɛlɛ mpe looko loolalaka ikɔ, bangooyuma nde liko mpe nde nse, bangooya nde ntɛkɔ e Bonkumu booki Ndjakomba. 30 Ɛkɔiko, baamɔɔ banto batikalaki mbuha bangooleka ntondo, bankina mpe baataki ntondo bangooyunwa mbuha.»

31 Nko elaka iiko, bafalisaya bankina batɛ eka Yesu mpe babohangelɛ: «Ima anɛ, kɛndɛ looko lonkina, itina Elode atila akolyake.» 32 Yesu ababelɛ: «Talohangele bobanga* buuko: Mpandja belimo be bobe mpe mbikya banto lɔlɔkɔ la lobi, nde buuna bo behato, nhoheya bohala bookimi. 33 Yaa, ntondo ntondo nkela laino lɔkɛndɔ lokimi lɔlɔkɔ, lobi mpe laipe, itina ɛpɔɔhe yokelama mbɔ ntepeli ɛmɔɔ awu botale la Yelusalɛmɛ.»

34 «Yelusalɛmɛ, Yelusalɛmɛ, wɛ ɔkɔ olyakaka ntepeli mpe olikaka banto baatindaka Ndjakomba babɔkɔ, ntilaki mbala la mbala nsanganie baaha bakiɛ nga bokukaka nkɔkɔ e waali bana baakinde nde nse e bapapu baakinde, lendaka nyo talolanga. 35 Aiko ekeeko, balohokokyela botumba bɔkɔ bookinyo. Mpe ndobela, talongunwa yɔnyɛnɛ tii buuna bonga lohange: "Bokako boyale la ɔnɛ ooye nde lina iiki Nkolo!"»