1 Anɛ eheyaki Yesu yopa balako baakinde ntondo eeki banto, atɛ Kapalanaumu. 2 Mpiko, bonkondi bɔmɔɔ bo bahola, bohi Loma, ayalaki la bohali bokinde bopendaki nde yolanga. Bohali bɔkɔ akɔnɔki nkandi, ihambi i iwa la lobiko. 3 Anɛ yokaki nde nsango eeki Yesu, bonkondi bo bahola atindɛ baome ba bihe baki Bayuda, batu yɔbɔbɔndɛlɛ aye yobikya bosali bokinde. 4 Anɛ ekitaki ibɔ eyalaki nde, baome ba bihe babɔndɛlɛ Yesu la botindo bonkuma: «Bonkondi bo bahola buuko ayali nsuki e bonto o bɔlɔti, ɛɛli nko obokambole, 5 itina alangake Bayuda buuke, nde bonto ototongelaki botumba bo lɔbɔndɔ.» 6 Yesu nde ɔnɛ otaka nde la ibɔ. Bakitɛ nko ntute la botumba, bonkondi buuko bo bahola aunwɛ yotinda baninga bankina kela babohangele: «Nkolo, toyatungyake. Emi wambɔ mpwɛli la yokwamba nde botumba bokimi; 7 ɛkɔikɔ epa ntiɔhɔ yoya emi kiika eyali wɛ; wɛ tepela nko lyoi imɔɔ, mpe bosali bokimi akoobika. 8 Lenda, la emi wambɔ ndjali nde lonse loki benkondi bempenda, ndjali mpe la bahola baayali nde lonse lokimi. Kaki ngobelɛ ɔmɔɔ: "Kɛndɛ", akɔkɛndɛ, mpe ɔnɛ onkina: "Yaka", akoya; mbɔ mpe nsangele bosali bokimi: "Kela ngɔnɛ", akokela.» 9 Anɛ yokaki Yesu ngauko, aohima bonkondi bo bahola buuko, aolenda banto baayaki yooyelaka mpe aobabela: «Ndobela, la boha nkɛndɛ anɛ Isalaɛlɛ, laino ntitani bonto oyali la nyumeya botindo bɔnɛ.» 10 Anɛ e inwaki baataki itweta Yesu nde botumba booki bonkondi bo bahola, bataanɛ bosali bɔkɔ angobikɛ.

11 La lombuha luuko, Yesu ataki nde imonga imɔɔ i lina Naimi. Ayalaki nde la bakɛndi laa nde mpe la buuke bo banto. 12 Anɛ ekitaki nde ntute la bɔtwɛlo bo ehe, aɛnɛ baoli la bolyo nde ngelo: eyalaki ɛtɔi e loondo eeki etuka ɛmɔɔ. Banto buuke baaki ehe iiko bayalaki ibɔ la nde. 13 Anɛ ɛnɛki Nkolo etuka, abokelaki ihɛi mpe aobobela: «Tookolela.» 14 Ayɛ ntute mpe abutɛ ibaya. Banto baayaki yobilaka ibaya baemalɛ. Yesu aotepela: «Bona o eboha, nkobela, emwa!» 15 Bonto owaki aokihi mpe aotepela. Mpe Yesu aobounoyela nyango ekinde. 16 Banto bankuma bohoka bɔɔmɔ, baokumya Ndjakomba mpe baotepela: «Ntepeli ɛmɔɔ e bɔnɛnɛ angoolɛ eka nso !» mpe: «Ndjakomba angoyɛ yobikya banto baakinde.» 17 Nsango iiko eki Yesu etyangwɛ nde etuka e Yudeya lonkundu mpe nde bihe biiko bi ntute.

18 Bakɛndi la Yowane babohangelɛ mbo iiko inkuma. Yowane aetɛ bakɛndi laa nde bape 19 mpe abatindɛ eka Nkolo baboubole: «Wɛ oyali Bonto ɔnɛ oye laa mpe tolile bonto onkina?» 20 Anɛ ekitaki ibɔ eka Yesu, baobohangela: «Yowane Buuni amboototinde eka wɛ tokuubole: "Wɛ oyali ɔnɛ ooye laa mpe tolile bonto onkina?"» 21 Nko nde elaka iiko, Yesu abikya buuke bo banto baayalaki la nkandi, la batungya, la belimo be bobe mpe alipola baiho baaki bapwɛne. 22 Nko aobela bakɛndi la Yowane: «Talohangele Yowane bakambo baamba nyo lwɛne la baamba looke: banto babolyɛ baiho baɛnɛ, bɛlɛmɛ bakɛndɛ bɔlɔti, baayali la behale bapɛtwa, bikinda baoka, baawɛ bakundwa, bɛmbɔlɔ baoka Nsango e bɔlɔti, 23 ɛmɛngɔ eka banto baapa tangobungya nyumeya ekibɔ itina ikimi.»

24 Anɛ eha banto banɛ baumaki eka Yowane baunwa, Yesu nde ɔnɛ otepela la banto baayalaki aiko itina ikinde: «Lotaki yolenda nde bokili bo bɛkɔngɔ nnɔ? Ibundja inyonga la bɔmpɛmpɛ? 25 Lotaki yolenda mpendja nnɔ? Bonto ɔmɔɔ angɔlɔɔtɛ bihenda bi botuya? Banto baalɔtɔkɔ bihenda bi botuya mpe baayali la ikulaka bakihake nde betumba beeki nkumu. 26 Yaa nyo lotaki yolenda nnɔ? Ntepeli? Ɔnde, ndobela, nde apenda la ntepeli. 27 Nkɔti itepela itina ikinde ngɔnɛ:

"Ngotinda bontomwa bokimi lontondo lokiɛ;

angotu yɔbɔngya ndjela lontondo lokiɛ ".»

28 «Ndobela: nde banto baabotaki bainto, teyali la openda Yowane la bɔnɛnɛ. Yaa bonto openda bɔkɛ nde Bonkumu booki Ndjakomba abopenda nde la bɔnɛnɛ.» 29 Banto bankuma baaya yoboka, eyale la bataakoli ba mputi, baɛnɛ bosembo booki Ndjakomba mpe bayɛ yɔkɔhɔ buuni booki Yowane. 30 Nko bafalisaya la balaki ba bobeko, ibɔ tabalanga yoomba elangaki Ndjakomba abakelele mpe bayotona bauname eka Yowane.

31 Yesu nde ɔnɛ oyuubola: «Banto baaki ekeke ɛnɛ e lɔlɔkɔ, bayali nga ba nnɔ? Baɛli la ba nnɔ? 32 Bayali nga bana baakihi nde bongala mpe bayalika beendo: "Tolokulelaki bokwaha, talolanga lwembe nsambo! Twembaki nyembo i bahɛi, talolela." 33 Itina Yowane Buuni ayaki, apɔle la mampa, apɔmɛle baana, mpe nyo lohangaki: "Ɔnɛ ayɛɛ la bolimo bo bobe." 34 Bona ooki bonto mpe aoya, alɛ la banto mpe amɛlɛ, nyo baiko lohanga: "Enda nde mpendja la bɔmɛlɛlo, boninga ooki bataakoli ba mputi la banto ba bahumu." 35 Ɔmwɛnɛkɛ ngauko, waanya booki Ndjakomba boyali semba eka banto bankuma baboumeya.»

36 Bofalisaya bɔmɔɔ aetaki Yesu atu itɔlɛ ekande. Yesu nde ɔnɛ otaka ekande ko baobanga yɔɔlɛ. 37 Buunto ɔmɔɔ o bahumu ayake nde imonga iiko. Anɛ yokaki nde Yesu angotɛ itɔlɛ eka bofalisaya buuko, ayɛɛ la bolangi bɔmɔɔ bo bɔlɔti boyoli la balahi, 38 aokihi la lombuha lo bekolo beki Yesu. Aobanga yolela, aɔbɔbya bekolo beki Yesu la biihɔni bekinde; nkamba abiɔndɔlɔke la bayo baakinde, aobelinga ekɔpi mpe aobeutumola balahi. 39 Anɛ ɛɛnɛki bofalisaya bɔnɛ boetaki Yesu ngauko, aoyahangela nde kiika: «Bonto ɔnɛ apoyala mpendja ntepeli, ntiki angwebɛ buunto uuko obobuti mpe oyali nde buunto o bahumu.» 40 Yesu aobela bofalisaya: «Simo, ndjali la bona o lobo lo yokobela.» Simo aobuunoya: «Nkolo, tepela.» 41 Yesu nde wante: «Bonto ɔmɔɔ ayalaki la banto bape baayalaki la bembale bekinde. O ntondo ayalaki la mpata benkama betano, ɔnɛ o bape mpata ntuku itano. 42 Ibɔ bayaape nko ɔnɛ ɔhɔki yoputa bombale. Nde mpe aobabela tababokoputa lenkina bembale biiko. Nde ibɔ bayaape, okopenda yolanga bonto uuko nnɔ?» 43 Simo ayunoya: «Nkamba ɔnɛ oliboyaki ibɔ bombale bopenda bɔnɛnɛ.» Yesu aobela Simo: «Ongotepele bɔlɔti.»

44 Yesu nde ɔnɛ olenda buunto mpe aobela Simo: «Ɔngwɛnɛ buunto ɔnɛ? Enda, emi ngɔtwɛ nde botumba bokiɛ, wɛ tompa bahi ndjakole nkya bekolo; endaka buunto ɔnɛ angokolɛ bekolo beekimi la biihɔni bekinde mpe angɔbyɔndɔlɛ la bayo baakinde. 45 Wɛ tompa bobekolo bo lokumu; yaa nde, ima nko ɛmbɔtwe nde anɛ, angolingɛ bekolo beekimi ɛkɔpi yompa bobekolo bo imɛmɔ. 46 Wɛ tompa bohuku bo mpimbo ndjahinge nde byonge; yaa nde, angondjutumolɛ balahi bamɔɔ ba botuya nde bekolo beekimi! 47 Endaka emi ndjokobela: kaki buuke bo bahumu baakinde bangolibwɛ, itina wambɔ angwɛniɛ lolango lopenda. Bonto ongolibolɛ ibɔ bahumu bɔkɛ, aɛniake nko lolango lonkɛnkɛ.» 48 Nde ɔnɛ mpe ohangela buunto uuko: «Bahumu bakiɛ bangolibwɛ.» 49 Baalɛki laa nde, bonto la bonto aoyaubola: «Bonto ɔnɛ ayali mpendja nnɔ, nde ɔnɛ okita tii yolibola bahumu?» 50 Nkamba Yesu aobela buunto uuko: «Nyumeya ekiɛ engokobikyɛ. Kendɛ bɔlɔti.»