1 Yesu ahuma ndjale e Yɔlɔdani ebataki nde nguya eeki Bolimo bo Bɔyɛngwa. Bolimo botombɛ nde bokili bo bɛkɔngɔ. 2 Mpiko, satana abolengolɛ bɛkɔlɔ ntuku inɛi. Bɛkɔlɔ biiko benkuma, talɛ la yomba. Anɛ elekɛ bɛkɔlɔ bɛkɔ, aokɛ ndjala. 3 Aiko ɛkɔ, satana abobelɛ: «Kaki oyali bona ooki Ndjakomba, bela ibɔkɔ inɛ ikalimwe ihɔɔ.» 4 Yesu abuunoyelɛ: «Ɛkɔti nde Bonkanda bo Ndjakomba: "Bonto tangobika nko la byomba bi ndɛlɛ botoo."»

5 Lombuha luuko, satana abotombɛ nde ndye ɛmɔɔ e liko, abɔɛniɛ la mbala ɛmɔɔ bihe binkuma biyali la banto nde bokili 6 mpe abobelɛ: «Ngokopa bokopo bonkuma la lokutu loyali nde bihe biiko binkuma. Byomba biiko binkuma bampɛ emi, emi mpe ndjɔhɔ yopa bonto olanga emi mpa. 7 Nko bɔnkwɛlɛ wɛ bakulubɔngɔ, biiko binkuma biyɛ bikiɛ.» 8 Yesu abuunoyelɛ: «Bonkanda booki Ndjakomba botepela ngɔnɛ: "Ongokumya nko Nkolo Ndjakomba ekiɛ, mpe ɔngɔbɔbɔndɛlɛ nko nde kiika".»

9 Lombuha luuko, satana abɔkɔhɛ mpe aotombɛ Yelusalɛmɛ, abotikɛ nde liko i Tɛmpɛlo mpe aobelɛ: «Kaki oyali bona ooki Ndjakomba, yaboka ima anɛ tii nde nse; 10 ntina Bonkanda bo Ndjakomba botepela ngɔnɛ: "Ndjakomba angoopa betindo eka bentomwa bekinde bakobatele". 11 Mpe lenkina: "Bangookobila nde bɛbɔ bekibɔ kela lokolo lokiɛ talɔtɛke la ibɔkɔ imɔɔ."» 12 Yesu aobelɛ: «Bonkanda bo Ndjakomba botepela: "Tomekake yolengola Nkolo Ndjakomba ekiɛ."» 13 Anɛ eha satana aheya yolengola Yesu ndenge inkuma yɔhɔki nde, abohenyɛ tii nko buuna bo lohuo.

14 Yesu aunwɛ Ngalilaya, ayolɛ la nguya eeki Bolimo bo Bɔyɛngwa. Ahwebetana nde bihe biki etuka iiko enkuma. 15 Alakake nde betumba be lɔbɔndɔ beekibɔ mpe banto bankuma babokumya.

16 Yesu ayɛ Nazalɛti, ndye ɛnɛ yolwaki nde. Buuna bo sabata, aɔtwɛ nde botumba bo lɔbɔndɔ, nga wekehelɛ nde yokela. Aemalɛ kela atange Bonkanda bo Ndjakomba. 17 Baopɛ buku eeki ntepeli Isaya. Alingolɛ lokaha mpe atɛ itɔkɔ nde ndye ɛkɔtɛ ibɔ ngɔnɛ:

18 «Bolimo bo Nkolo boyali la emi,

itina andubolɛ mpe andɔtyɛ bontolo kela nsangele bɛmbɔlɔ Nsango e bɔlɔti.

Antindɛ nsangele baatungi nde bɔlɔkɔ bangooyola,

nsangele babolyɛ baiho bangooyunwa yɛnɛ,

banyokwa bangookita nsɔmi,

19 ndjebye mbula enga Nkolo aokele banto ihɛi.»

20 Nko aoheye, Yesu alingɛ lokaha lɔkɔ, aunoyelɛ bosali mpe atɛ itokiha. Banto bankuma baayalaki nde botumba bo lɔbɔndɔ baobolenda nko nde. 21 Nde mpe aobanga yobabela: «Iiko imba looke aiko, wambɔ lɔlɔkɔ ingokelamɛ itina ikinyo baandjoka.» 22 Banto bankuma bahimɛ Yesu mpe baulɛ nko nkimo la mbo i bɔlɔti yola nde bonya bokinde mpe bayaubɔlɛ: «Ɔnɛ apa bɔna ooki Yosepu?» 23 Yesu ababelɛ: «Ndjeba aiko lokontangela ekolongo ɛnɛ: "Nkanga, yabikyaka wɛ amɛlɛ". Lokonsangela mpe: "Tookɛ nsango i mbo inkuma ikelɛ wɛ Kapalanaumu, kelaka ikɔ mpe anɛ eka wɛ."» 24 Aunwɛ yobabela: «Ndohangela nte nhɔhɔlɔ, nkola la ntepeli ɛmɔɔ ɛnɛ imeyɛ ibɔ ekabɔ. 25 Lolenda ndjolwebya nhɔhɔlɔ: nde eleko eeki Elia, bituka biyalaki buuke Isalaɛlɛ, anɛ eyalaki mbula ipunwe yɔlwa mbula ihato la sanza botoba mpe ndjala e bɔnɛnɛ yɔtwaki nde ehe. 26 Nkya ngauko, Ndjakomba tatinda Elia eka la ɔmɔɔ okibɔ, aobotinda nko eka etuka emboyalakɛ Salepeta, nde bokili bo Sido. 27 Lolenge lɔmɔɔ, banto ba behale bayalaki buuke Isalaɛlɛ elaka eeki ntepeli Eliseyo, lendaka nkola la ɔmɔɔ okibɔ ɔpɛtwamaki, nko Namana bohi Silia.»

28 Banto bankuma nga boyalaki ibɔ nde botumba bo lɔbɔndɔ baokaki nkɛlɛ anɛ yokaki ibɔ ngauko. 29 Baemalaki, baotombi Yesu botale la ehe, nde liko i ngomba etongaki ibɔ Nazalɛtɛ, kela babolike nde nse. 30 Lendaka Yesu abapusumwɛ, atɛ ekande.

31 Nko aiko, Yesu atɛ Kapalanaumu, imonga imɔɔ i Ngalilaya, atɛ itolaka banto buuna bo sabata. 32 Banto bankuma nko byoli la yɛɛnɛ ndenge elaka nde, itina alaka la ipiki inkuma. 33 Mpiko nde botumba bo lɔbɔndɔ, eyalaki la bonto ɔmɔɔ oyalaki la bolimo bo bobe. Anɛ ɛnɛki nde Yesu, nde ɔnɛ oboba: 34 «Ah! lokinso la wɛ nnɔ Yesu e Nazalɛti? Omboye anɛ itina otolyake? Nkweba bɔlɔti: oyali bɔyɛngwa botindamɛ la Ndjakomba!» 35 Yesu amamɛ la nguya enkuma bolimo bo bobe mpe abotamelɛ: «Lipa bonya bookiɛ mpe ola nde byonge biki bonto ɔnɛ!» Bolimo bo bobe akɔyɛ bonto uuko nde babu nde baiho baaki banto bankuma mpe aolɛ, nkobokela la lobo lɔmɔɔ lo bobe. 36 Banto bankuma nko byoli mpe bayaubolɛ: «Ɔnɛ botindo bo itepeli nnɔ? Bonto ɔnɛ atepeya belimo be bobe la ipiki inkuma mpe la nguya, mpe baola nde byonge biki banto!» 37 Lokumu loki Yesu loho anga nde etuka iiko enkuma.

38 Yesu aolɛ nde botumba bo lɔbɔndɔ, atɛ nde botumba booki Simo. Nyango e bokilo eeki Simo ayalaki la pɛpɛlɛ e nguya mpe babɔndɛlɛ Yesu akele bona o lobo itina ikinde. 39 Yesu ahunamɛ mpe ataamelɛ pɛpɛlɛ. Pɛpɛlɛ ebohilɛ, mpe la mbala ɛmɔɔ aemalɛ, nde nduuko aobapeka.

40 Anɛ eha ikɔlɔ ikita, baayalaki la banto ba nkandi ndenge inkuma babayelɛ eka Yesu. Ahangyɛ bonto la bonto bakata mpe ababikiɛ. 41 Belimo be bobe byolɛ mpe eka buuke bo banto baayalaki la nkandi, byobobake: «Wɛ oyali Bona ooki Ndjakomba!» Yesu abamamɛ la nguya mpe abahukɛ batepele, itina ibo baebaki boyali nde Masiya.

42 Anɛ eha nkɛhɛ ɛkya, Yesu aolɛ, atɛ ndye ɛmɔɔ nko nde kiika. Buuke bo banto botilɛ; anɛ eha ibɔ babobata, balangaki atikale nko nde la ibɔ kela tatake looko lonkina. 43 Yesu ababelɛ: «Bɔlɔti nsangele Nsango e Bɔlɔti eeki Bonkumu booki Ndjakomba la nde bihe binkina, bantindaki itina iiki lobo luuko.» 44 Ekɔiko etaki nde itolakaka nde betumba be lɔbɔndɔ beki etuka e Yudeya.