1 Ntɛkɔ ɛnɛ ɛlɛkɛ ibo mampa ipa la bote, etaka ibɔ Pasika yokita ntute. 2 Nkanga i benkondi la balaki ba bobeko batilɛ ndenge yolyaka Yesu, yaa baokaki banto bɔɔmɔ.

3 Endaka, Satana aɔtwelɛ Yudasi ɛnɛ eetaka ibo Isikaliɔtɛ, ayalaki ɔmɔɔ oki bakɛndi lyomu la bape baaki Yesu. 4 Yudasi atɛ itoyaoka nde la nkanga i benkondi la benkondi beeki bahɛndjɛli ba Tɛmpɛlo lolenge lɔnɛ lɔɔhɔ nde yatɛkɛlɛ Yesu. 5 Baokɛ bɔlɔti baa mpe baokanɛ babopaa bɔhɔlɔ. 6 Yudasi aumeyɛ mpe atilɛ elaka e bɔlɔti kela abapa Yesu nongi epa banto tabayali.

7 Nde eleko e ntɛkɔ ɛnɛ ɛlɛkɛ ibɔ mampa ipa la bote, buuna boolyakaka ibɔ mpata kela bale Pasika bokitɛ. 8 Yesu atindɛ Petelo la Yowane lontondo, ababelɛ: «Lokɛndɛ lɔtɔbɔngyɛle elambo e Pasika.» 9 Ibɔ babuubolɛ: «Olanga tɔbɔngye elambo ɛkɔ nko ?» 10 Yesu ababelɛ: «Anɛ eka lokita nde imonga, lokooponana la loondo lɔmɔɔ aobile ibuka i bahi. Loboyelaka tii nde botumba bonga nde aɔtwe 11 mpe lohangelaka bɔmɛlɛ botumba: "Bolaki aubola: Mpuku ekaa emi ndɛ elambo e Pasika emi la bakɛndi la emi eyali nko?" 12 Akɔlwɛnia nde liko, mpuku ɛmɔɔ e bɔnɛnɛ mpe eyali la byomba binkuma. Lɔtɔbɔngiɛlɛkɛ elambo aiko.» 13 Batɛ, bataanɛ binkuma nko nga bobahangelaki nde, mpe babɔngyɛ elambo e Pasika.

14 Elaka e ilɛ yokita, Yesu akihɛ nde mesa nde la bɛnkɔmwa bekinde. 15 Ababelɛ: «Ndangaki buuke mpendja nde elambo ɛnɛ e Pasika emi la nyo ntondo eeki yɔnyɔkwa! 16 Itina, ndobela, ntingɔlɛ lenkina elambo ɛnɛ tii nko elaka enga ndimbo eeki ɛkɔ ekokyame nde Bonkondi booki Ndjakomba.» 17 Akɔhɛ mongo, akumiɛ Ndjakomba mpe ahangɛ: «Lɔkɔhɔ mbongo ɛnɛ mpe loyakapoya. 18 Itina, ndohangela, ntinguunwa yɔmɛlɛ vino tii nko elaka enga Bonkumu booki Ndjakomba bokite.» 19 Nkamba, akohɛ mampa, lombuha lo yɔbɔndɛlɛ Ndjakomba, apupolɛ mampa ɛkɔ mpe apɛɛ bɛnkomwa bekinde, abahangelɛ: «Ɔnɛ eyali byonge bikimi, ngolokapelɛ. Lokelaka ngauko itina lonkanene.» 20 Lombuha lo ilɛ, akelɛ ndenge ɛmɔɔ la mbongo, ahangɛ: «Onɛ mbongo e boheka bo ntɛmu nde bakila bakimi, bautumwɛ itina ikinyo.»

21 «Lolendaka: bonto ɔngɔntɛkɛ ayali nko anɛ, alɛ byomba nde mesa ɛmɔ la emi. 22 Hɔlɔ, Bona ooki Bonto nde uuko ayoli nko ndenge ɛlɛmɛki. Yaa nko ihɛi buuke eka bonto ɔngɔbɔtɛkɛ.» 23 Mpe bentomwa beki nde bayaubola ibɔ la ibɔ ɔkɔ bonto ɔhɔ yokela ikambo ye ngauko nnɔ.

24 Baoyatika lɔmpɛnyɛ itina yweba ooleka baninga aiko eyali ibɔ nnɔ. 25 Yesu ababelɛ: «Nkumu iiki bihe baemalake lontondo looki banto nga nkolo iikibɔ mpe benkondi balangake babaete banto baakela bɔlɔti. 26 Tɛɛli eyale ngauko eka nyo. Ooyali bonto o bɔnɛnɛ ekanyo, akɔhɔkɔ ndye eeki bonto o nkɛnkɛ, mpe ooyali la mpipo ayatikaka nga bosali. 27 Bonto openda bɔnɛnɛ oonko? Ɔnɛ okihi nde mesa laa mpe ɔnɛ osalela ookihi nde mesa? Epa ɔnɛ okihi nde mesa? Lolendaka emi ndjali ekanyo nga bonto oosalela ɔnɛ okihi nde mesa. 28 Nyo wambɔ banto bayalɛ la emi biina buuke nde bɛnyɔkɔ beekimi. 29 Mpe, nko nga bompaki Ihe ekimi bonkondi, emi mpe ndjolopa la nyo bonkondi: 30 kela lɔngɔle mpe lɔngɔmɛle la emi mesa ɛmɔɔ nde bonkondi bokimi, longokihe nde ekili e bokopo kela lɔngɔtɛnde bakundi lyomu la bape baaki Isalaɛlɛ.»

31 Nkolo abelɛ Simo Petelo: «Simo, Simo, Satana aubolaki kela alɔkɔnge nga bɔkɔngɔkɔ ibɔ bakɔngɔ. 32 Emi, mbɔndɛlɛki itina ikiɛ kela nyumeya tekopitanake. Nga la wɛ, elaka enga wɛ onyunwele, okembyaka bahibotonga bakiɛ.» 33 Petelo abobelɛ: «Nkolo, ngumeyɛ ndjɔtwe la nde bɔlɔkɔ la mpe mbu emi la wɛ bɔlɔngɔ.» 34 Yesu abobelɛ: «Petelo, nkohangela ngɔnɛ: lɔlɔkɔ luuko, nkɔkɔ tengobeka laino kaki wɛ twangani mbala ihato wɛnte ante opondjebe.»

35 Nkamba Yesu abaubolɛ: «Anɛ e ndotindake nko bɔhɔlɔ, nko mbango, nko bikote, lokelelaki yoomba?» Baunoyɛ: «Tatokelela yoomba.» 36 Yesu ababelɛ: «Aikekeko, ooyali la bɔhɔlɔ bokinde, aɔkɔhɔkɔ bɔkɔ, ooyali ba mbango ekinde, akɔhɔkɔ ɛkɔ, oopa la ibaka, aɔtɛkɛkɛ bonkoto bo mpyɔ bokinde kela ahombe imɔɔ. 37 Itina, ndjolohangela, iikɔtɔmɔki itina ikimi ingokelama: "Babotikaki nde botango booki balyaki banto." Mpe iiko indenda, ingokelama.» 38 Bɛnkɔmwa beeki nde batepelɛ: «Nkolo, enda babaka bape bakɔ banɛ.» Yesu ababelɛ: «Engopulɛ.»

39 Yesu aolɛ mpe atɛ nde ngomba e Olive, bakɛndi laa nde mpe boyelɛ. 40 Anɛ ekitaki ibɔ nde nongi ɛkɔ, abelɛ bakɛndi laa nde: «Lɔbɔndɛlɛ kela talɔkɔke nde bolengoli.» 41 Nde kiika atɛ bona o lontondo. Akihɛ bakulubɔngɔ mpe abɔndɛlɛ ngɔnɛ: 42 «Papa, kaki olanga, umola mbongo ɛnɛ e lyale lontondo lokimi. Yaa, tokelake ndenge elanga emi, okelaka nko ndenge elanga wɛ.» 43 Nko nde elaka iiko, bontomwa bɔmɔɔ booki Ndjakomba aumɛ nde lobola mpe ayɛ yobopa nguya. 44 Bɔɔmɔ bopenda yobobuta, Yesu aunwɛ yɔbɔndɛlɛ la nguya. Botoki bokinde bokitɛ nko nga batɔi ba bakila mpe bɔɔkɔ tii nde babu.

45 Anɛ eheyaki nde lɔbɔndɔ luuko, aemalɛ mpe aunwɛ looko looyalaki bakɛndi la nde, abatanɛ balaali, itina ihɛi ipendɛ yobabuta. 46 Abaubolɛ: «Ngamo, lolali? Lwemala mpe lɔbɔndɛlɛ kela talɔkɔke nde bolengoli.»

47 Nko atepela, ehoke ɛmɔɔ e banto ebaolelɛ. Lontondo lokibɔ, ɔnɛ wetaka ibɔ Yudasi, ɔmɔɔ oki bakɛndi lyomu la bape baaki Yesu. Ayahundje ntute la Yesu itina iiki abolinge ɛkɔpi. 48 Nko Yesu nde ɔnɛ obobela: «Ao Yudasi, ongotɛkɛ Bona ooki Bonto la ɛkɔpi?» 49 Anɛ ɛnɛki banto baayalaki la Yesu ikambo iilanga ikelame, babuubolɛ: «Nkolo, tobatɔke babaka?» 50 Ɔmɔɔ okibɔ atɔkɛ bohali booki nkanga e bonkondi ibaka mpe abopupolɛ itoi i boome. 51 Yesu ababelɛ: «Lohenaka, engopulɛ ngauko!» Lombuha luuko, abutɛ itoi ikɔ mpe abobikiɛ. 52 Nkamba Yesu abelɛ banto baayaki yobokembaka, nkanga i benkondi, benkondi beeki bahɛndjɛli ba Tɛmpɛlo bɔlɔngɔ la nkumu inkina: «Emi laa nhokita nkumu eeki banto ba boyongo ɛnɛ eha nyo loya yobuta la babaka la bɛmbɔndu nnɔ? 53 Anɛ emboyake emi la nyo biina benkuma nde Tɛmpɛlo, ntiɛnɛ boya nyo yombuta. Lɔlɔkɔ wambɔ elaka ekinyo mpe bokopo booki banto ba buulima.»

54 Babutɛ Yesu, batɛ la nde mpe babɔtɛyɛ nde botumba booki Nkanga e bonkondi. Petelo ayaki yabayelaka la lombuha. 55 Nga bɔpɛtyaki ibɔ ibeba i ntyɛ nde ngina la ngina e lompango mpe ibɔ nkuma bakihi baɔkɔ ntyɛ ikɔ, Petelo la nde mpe akihɛ nde la ibɔ. 56 Bosali bɔmɔɔ bo buunto aɛnɛ Petelo aɔkɔ ntyɛ, abohihimyɛ mpe ahangɛ: «Bonto ɔnɛ ambooyale nde la Yesu.» 57 Petelo aanganɛ: «Ipoku, emi mpwebe bonto uuko.» 58 Lombuha luuko, bonto onkina wɛnɛki Petelo, ahangɛ: «La wɛ oyali ɔmɔɔ oki banto baiko.» Petelo aunoye: «Ntiyali ɔmɔɔ okibɔ.» 59 Lombuha lo ngonga ɛmɔɔ ngauko, bonto onkina aunwɛ yokobeya: «Eyali nko nhɔhɔlɔ, bonto uuko ambooyale bɔlɔngɔ la nde; la nde mpe ayali bonto o Ngalilaya.» 60 Petelo aunoyɛ: «Mpwebe yoomba elanga wɛ ohange.» Nko Petelo atepela, nkɔkɔ ebekɛ. 61 Nkolo aɛbwɛ, ahihimyɛ Petelo; Petelo ayabopolɛ lobo lɔnɛ lobohangelaki Yesu: «Ntondo nkɔkɔ ebeke, okonyangana mbala ihato.» 62 Petelo aolɛ nde bongala mpe alelɛ buuke mpendja.

63 Banto banɛ bahɛndjɛlɛ Yesu babangɛ yɔbɔɔlɔ la yobokula. 64 Baolipɛ elongi mpe babuubolake: «Kaki oyali ntepeli, hangaka oombokokule.» 65 Mpe babotolɛ bitoli buuke.

66 Anɛ eha nkɛhɛ ɛkya, nkumu iiki ehe la nkanga i benkondi la balaki ba bobeko baponanɛ mpe baangɛ baolye Yesu nde boloy bo bɔnɛnɛ booki Bayuda 67 mpe babobelɛ: «Otohangelake kaki wɛ oyali Masiya.» Yesu abaunoyelɛ: «Kaki ngolohangelɛ, talonguumeya 68 kaki mpe emi ngoluubolɛ, talongompa mbuto. 69 Yaa nko ima lɔlɔkɔ, Bona ooki Bonto angookihakɛ nde lɔbɔ lo loome looki Ndjakomba ɛnɛ e nguya inkuma.» 70 Ibɔ bankuma baoboubola: «Wɛ wambɔ oyali Bona ooki Ndjakomba ?» Yesu mpe abaunoyelɛ: «Nyo kiika longohangɛ ndjali Bona ooki Ndjakomba.» 71 Ibɔ bankuma bahangɛ: «Itina nnɔ itilɛ nso lenkina banto baye yotepela? Nso bamɛlɛ tongookɛ nde bonya bokinde kiika.»