1 Yesu aɔtwɛ Yeliko mpe akɛndɛ imonga lonkundu. 2 Bonto ɔmɔɔ, lina ikinde Zakayo, ayɛ la nde aiko. Ayalaki bonkondi booki balɛmbɔli ba mputi mpe ayalaki bokulaka. 3 Atilaki aɛne mpe aebe Yesu, yaa taɔhɔ yɔbɔɛnɛ itina banto bapendaki buuke, nde mpe ayalaki buube. 4 Apuhwɛ bona o lontondo, atɛ itokondela nde bote bɔmɔɔ* kela aɛne Yesu anɛ ekoleka nde aiko. 5 Anɛ ekitaki Yesu nongi ɛkɔ, auleyɛ baiho nde liko mpe abobelɛ: «Zakayo, hulwa kwa; lɔlɔkɔ nkihɛ nde botumba bokiɛ.» 6 Zakayo ahulwɛ lobango lobango mpe aboambɛ la bohahalo bonkuma. 7 Anɛ e ɛnɛki banto bankuma ngauko, baumumɛ mpe bahangɛ: «Lenda, angotɛ itokiha wambɔ eka bonto o bahumu !» 8 Zakayo aemalɛ ntondo eeki Yesu mpe abohangelɛ: «Nkolo, nkapela bɛmbɔlɔ eteni e bape e byomba bikimi, mpe nga mpɔmɔlɔki bonto yomba ekinde, mbunoyela ɛkɔ mbala inɛi.» 9 Yesu nde ɔnɛ ootepela itina ikinde: «Lɔlɔkɔ, lobiko lɔngɔɔtwɛ nde botumba bɔnɛ, itina wambɔ bonto ɔnɛ ayali la nde bonkana ooki Abalayama. 10 Nhɔhɔlɔ, Bona ooki bonto ayaki yotila mpe yobikya binɛ biundjwɛ.»

11 Nko aiko eyalaki banto yobooka, Yesu ahangyɛ lwɛlya lɔmɔɔ itina akitaki ntute la Yelusalɛmɛ mpe banto bakambaki Bonkumu booki Ndjakomba bongoyɛnia nko nde elaka iiko. 12 Ahangɛ: «Bonto ɔmɔɔ obotwɛ nde bokundi booki banto ba bɔhɔlɔ, atɛ lɔkɛndɔ nde ehe ɛmɔɔ e buuli itina batu itobɔlɔtya bokopo kela aoyunwake. 13 Lontondo lo yota, aetɛ basali baakinde lyomu mpe akapelɛ bɔhɔlɔ bo nkɛhi lyomu, mpe ababelɛ: "Lolukola bɔhɔlɔ bɔnɛ bokimi tii enga emi nyunwe." 14 Ehe ekinde bamboobuunakɛ mpe batindɛ banto bankina batu yohanga: "Toboyi bonto uuko ale bokopo ekanso." 15 Anɛ e inwɛ nde lombuha lo yɔɔlɛ bokopo, aetɛ basali bakɔ baheneyaki nde bɔhɔlɔ kela aebe ndenge ee luukolɛ bonto la bonto. 16 Bohali bo lontondo ayɛ mpe ahangɛ: "Nkolo, nkɛhi ekiɛ ebotɛ nkɛhi lyomu nde liko." 17 Nkolo abobelɛ: "Bɔlɔti, wɛ bosali bo bɔlɔti. Ongoyaɛniɛ bosali bo sembo nde byomba bi nkɛnkɛ, nkokitya bonkondi bo bamonga lyomu." 18 Bohali bo bape ayɛ mpe ahangɛ: "Nkolo, nkɛhi ekiɛ ebotɛ nkɛhi itano." 19 Nkolo abohangelɛ: "Wɛ, nkotika bonkondi bo bamonga batano." 20 Bosali bonkina ayɛ mpe ahangɛ: "Nkolo, nkɛhi ekiɛ ɛkɛnɛ, nkebombaki nde nduku. 21 Itina nkookaki bɔɔmɔ, wɛ oyalake bonto ɔmɔɔ o mbo boolo: ɔkɔhɔke byomba biipa wɛ tobomba mpe onikake mmuma iipa wɛ toona." 22 Nkolo abuunoyelɛ: "Bohali bo bobe, nkobuta nko la itepela wɛ mɛlɛ. Webaki ndjali bonto ɔmɔɔ o mbo boolo, nkɔhɔke byomba bipa ntibomba mpe nikake mmuma ipa ntyona. 23 Yaa itina iipa wɛ totika bɔhɔlɔ bokimi nde botumba bonɛ bobombaka ibɔ bɛhɔlɔ nnɔ? Ntiki nde baunwelo bakimi, mpɔkɔhɔ bɔhɔlɔ buuko la intomba." 24 La mbuha iiko, Nkolo abelɛ banto baayalaki aiko: "Lɔbɔpɔɔmɔlɔ nkɛhi iko ekinde, lopa ɛkɔ eka bonto oyali la nkɛhi lyomu." 25 Banto baiko bayalaki aiko babobelɛ: "Nkolo, uuko ayali la nkɛhi lyomu!" 26 Nkolo abaunoyelɛ: "Ndohangela: bonto oyali la byomba, bangoopoba binkina, yaa ɔnɛ opa tokati, bangɔɔbɔpɔmɔlɔ la yoomba eyali laa nde. 27 Nga la nyo baanyuna, banto bankuma baapa tabalanga ndjale bonkondi booki ibɔ, loyaka la ibɔ anɛ, lobapupola nkingo aiko nde baiho bakimi."» .

28 Anɛ eheyaki Yesu yotepela ngauko, alekɛ lontondo kela atu Yelusalɛmɛ. 29 Anɛ ekitaki nde ntute la Betipaze mpe la Betani, looko lo ngomba ɛnɛ eetaka ibɔ Ngomba e Olive, Yesu atindɛ bakɛndi laa nde bape, 30 ababelɛ: «Lɔkɛndɛ nde ehe iiko eyali ibu i mboka, lokotana bona o mpunda* etungi la bokulu, mpunda epa la bonto ɔmɔɔ takondeli laino. Lotungola ɛkɔ mpe loyaka la ɛkɔ. 31 Kaki bonto angoluubolɛ: "Itina iitungola nyo mpunda iiko nnɔ? " lobohangelaka: "Nkolo ayali la mpoha la ɛkɔ."»

32 Banto batindaki Yesu batɛ mpe bataanɛ inkuma nko botindo bɔnɛ bobahangelaki nde. 33 Anɛ etungolaki ibɔ mpunda, bamɛlɛ baobaubola: «Itina itungola nyo mpunda nnɔ?» Ibɔ baunoyɛ 34 «Nkolo ayali la mpoha la ɛkɔ.» 35 Ibɔ banɛ bayotombelaka Yesu mpunda ɛkɔ, baetandelɛ bihenda nde bɔkɔngɔ, mpe bakihiɛ Yesu nde liko iiki ɛkɔ. 36 Aiko yokɛnde Yesu (nde liko i mpunda), banto batandɛ bihenda biikiibɔ nde ndjela. 37 Anɛ ekitaki nde ntute la Yelusalɛmɛ, nde nkitibɔngi eeki ngomba e Olive, bakɛndi laa nde bankuma bayolɛ la bosalangano, bakumyɛ Ndjakomba la lyoyi i nguya itina i mpapo inkuma inɛ yɛnɛɛ ibɔ. 38 Bahangɛ: «Bokako boyale la nkumu, ɔnɛ oye nde lina iiki Nkolo. Palaa nde liko mpe lwɛya looki Ndjakomba nde lobola!» 39 Bafalisaya baayalaki nde boloy babelɛ Yesu: «Nkolo, huka bakɛndi la wɛ!» 40 Yesu ababelɛ: «Ndohangela, kaki ibɔ bangopilamɛ, babɔkɔ bangooboba.»

41 Anɛ eha nde akita ntute la Yelusalɛmɛ mpe eha nde aɛnɛ ɛkɔ, Yesu alelɛ itina iiki imonga ikɔ. 42 Ahangɛ: «Kaki la wɛ opoyeba lɔlɔkɔ lɔnɛ inɛ ikopaa way! Lendaka, iiko inkuma ibombamɛ nde baiho bakiɛ. 43 Nhɔhɔlɔ, biina be lyale bengoya itina ikiɛ, beenga baakuuna batimole benkenga be yɔkɔhɛndjɛlɛ, bangookolinga mpe bangookomɛtɛ ndjoko inkuma; 44 bangookonyata la wɛ la banto bakiɛ bankuma; nkola la etutu ɛmɔɔ engwemala, itina wɛ tweba elaka eyaki Ndjakomba yokolenda.»

45 La lombuha luuko, Yesu aɔtwɛ nde Tɛmpɛlo mpe abangɛ yopandja banto batɛkɛkɛ byomba mpiko. 46 Abahangelaki: «Ɛkɔti nde bonkanda boki Ndjakomba: "Botumba bokimi bongoyala botumba bo lɔbɔndɔ; nyo lokalimɔlɛ bɔkɔ nganda eeki biibi."» 47 Yesu amboolakakɛ nde Tɛmpɛlo biina benkuma. Nkanga i benkondi la balaki ba bobeko batilaki babolyake, la ibɔ la ba nkumu iiki Bayuda, 48 yaa nko tabata ndenge yokela, itina banto bankuma balangake baoke balako baakinde.