1 Nde mbula e lyomu la itano ima ekondelaki Kaisalo Tibelio nde bokopo, aiko Posi Pilato ayali bɔndɛlɛ-mboka booki etuka e Yudeya, Elode abuti etuka e Ngalilaya mpe eboto ekinde Pilipo bonkondi bo Ituleya la Talakonitide, Lisaniasi abuti babu ba Abilɛnɛ, 2 elaka iiko Ana la Kaifa bayali nkanga i benkondi, Ndjakomba aolelɛ Yowane, bona ooki Yakalia, nde bokili bo bɛkɔngo. 3 Yowane alingolɛ bokili bonkuma botuti la ndjale e Yɔlɔdani. Alikelɛ banto lobela lɔnɛ: «Lɔbɔngya bihɛlɛlo biikinyo, luunama, kela Ndjakomba angolibole bahumu baakinyo.»

4 Yokelama nko ndenge ɛkɔtɔki ntepeli Isaya:

«Bonto ɔmɔɔ alika bobeki nde bokili bo bɛkɔngɔ:

Lobɔngya ndjela eeki Nkolo,

lohembola bɛlɔli biiko.

5 Bibɔkumela binkuma bingoyoyama,

ngomba la byɔngɔ benkuma bingohulwa,

ndjela i bakumba ingohembwa mpe beboko be babɔkɔ benkuma bengoyalema. 6 Nkamba banto bankuma bangwɛne lobiko lɔnɛ luuma eka Ndjakomba.»

7 Banto buuke bambooyake eka Yowane kela abaune. Yowane aobabela ngɔnɛ: «Lenda ibɔ bongala nga batupa bapili! Ololakɛ lolote nkɛlɛ iiko eki Ndjakomba yoye nnɔ? 8 Loolya besala be bɔlɔti belakya mbɔ lwendjɛ bihɛlɛlo; talotake yohangaka nyo bamɛlɛ: "Abalayama ayali ihe ekinso." Itina ndobela Ndjakomba aɔhɔ yɔkɔhɔ babɔkɔ banɛ baɛnɛ nyo anɛ, akitye bakɔ bana baaki Abalayama! 9 Aiko wambɔ ihwa ingwɛlɛmɛ nde belubo: Bote bopobote mmuma i bɔlɔti bangoobopupola mpe baoboboka nde ntyɛ.»

10 Banto baayalaki aiko baoboubola: «Aiko tokele ngamo?» 11 Aobabela: «Bonto oyali la bakakya bape, akapele opa tokati; okati byomba bi ndɛlɛ, akele nko ngauko.»

12 Bataakoli ba mputi bayɛ la ibɔ yuunama mpe baibole Yowane: «Bolaki, tokele ngamo?» 13 Aobabela: «Taloweyake banto bapute behɔlɔ beleka bɛnɛ bibola ibɔ.»

14 La bahola mpe babuubolɛ: «Yaa nso tokele nnɔ?» Aobabela: «Talɔpɔɔmɔlɔke banto bɔhɔlɔ la longuya mpe talobalimbeyake bakambo, lɔlɛkɛkɛ nko bɔhɔlɔ bolongi la boputo bookinyo.»

15 Banto balilaki elaka ɛmɔɔ ekokyame, ko bonto la bonto aoyaubola itina iiki Yowane: epoyali nde Masiya? 16 Yowane abahangelɛ ibɔ bankuma: «Emi, nduuna nde bahi; bonto uuko oye mbuha ekimi, andeka emi la nguya: emi ntiɛli la la ilɛngɛ ilitola bonsinga nde bikote bikinde. Nde, angooluuna la nguya eeki Bolimo bo Bɔyɛngwa mpe la ntyɛ. 17 Abuti nde lɔbɔ lookinde inyongela yokapola mmuma la baɔmbi. Angooyoya mmuma nde boliko, nkamba aotumba bentembe nde ibeba i ntyɛ ipolimake.»

18 Wambɔ la botindo bo balako baiko ba ngauko Yowane ahangelaki banto Nsango e Bɔlɔti. 19 Nko nde lolenge luuko mpe Yowane apɛlɛki Elode, oyalaki bonkondi nde etuka e Ngalilaya, itina ayobala Elodiade, waali oyalaki eboto ekinde, mpe la mpɔhɔ inkina ikelaki nde i bobe. 20 Elode aohangya lɔɔmɔɔ lobo lo bobe: aobuta Yowane mpe aobotika nde bɔlɔkɔ.

21 Anɛ ehilaki banto bankuma yunama, Yesu mpe aunamɛ. Elaka eyalaki nde nde lɔbɔndɔ, liko yolipwa 22 mpe Bolimo bo Bɔyɛngwa bobohulwelɛ lɔnsɛi embenga. Lyoi imɔɔ yokiɛ ima nde lobola: «Wɛ oyali bona okimi opendɛ emi yolanga; ibulwako ikimi inkuma iyali nko eka wɛ.»

23 Yesu akitaki la mbula ntute la ntuku ihato elaka ebangaki nde bohala bokinde. Banto bambookambakɛ ayali bona ooki Yosepu, Yosepu ɛnɛ e bona ooki Eliya, 24 Eliya bona ooki Mata, Mata bona ooki Lewi, Lewi bona ooki Mɛlɛki, Mɛlɛki bona ooki Yanai, Yanai bona ooki Yosepu, 25 Yosepu bona ooki Matatiasi, Matatiasi bona ooki Amosi, Amosi bona ooki Nahumu, Nahumu bona ooki Ehili, Ehili bona ooki Nangai, 26 Nangai bona ooki Maati, Maati bona ooki Matatiasi, bona ooki Nsɛmɛi, Nsɛmɛi bona ooki Ndjosɛkɛ, Ndjosɛkɛ bona ooki Yoda, 27 Yoda bona ooki Yohana, Yohana bona ooki Lesa, Lesa bona ooki Yolobabɛlɛ, Yolobabɛlɛ bona ooki Salatiɛlɛ, Salatiɛlɛ bona ooki Neli, 28 Neli bona ooki Mɛlɛki, Mɛlɛki bona ooki Adi, Adi bona ooki Kosama, Kosama bona ooki Elemada, Elemada bona ooki Ɛlɛ, 29 Ɛlɛ bona ooki Yesu, Yesu bona ooki Eliɛsɛlɛ, Eliɛsɛlɛ bona ooki Yolime, Yolime bona ooki Matati, Matati bona ooki Lewi 30 Lewi bona ooki Simeyo, Simeyo bona ooki Yuda, Yuda bona ooki Yosepu, Yosepu bona ooki Yonami, Yonami bona ooki Eliakimi, 31 Eliakimi bona ooki Meleya, Meleya bona ooki Mena, Mena bona ooki Matata, Matata bona ooki Natana, Natana bona ooki Dawidi, 32 Dawidi bona ooki Yese, Yese bona ooki Obɛdɛ, Obɛdɛ bona ooki Boasi, Boasi, bona ooki Sala, Sala bona ooki Nasɔne, 33 Nasɔne bona ooki Aminadaba, Aminadaba bona ooki Adimini, Adimini bona ooki Alini, Alini bona ooki Esɔlɔmɛ, Esɔlɔmɛ bona ooki Falɛsi, Falɛsi bona ooki Yuda, 34 Yuda bona ooki Yakobo, Yakobo bona ooki Izaka, Isaka bona ooki Abalayama, Abalayama bona ooki Tela, Tela bona ooki Nahɔlɔ, 35 Nahɔlɔ bona ooki Seluku, Seluku bona ooki Langu, Langu bona ooki Falɛki, Falɛki bona ooki Ebɛlɛ, Ebɛlɛ bona ooki Sala, 36 Sala bona ooki Kaina, Kaina bona ooki Alafase, Alafase bona ooki Sɛmɛ, Sɛmɛ bona ooki Nowa, Nowa bona ooki Lamɛkɛ, 37 Lamɛke bona ooki Matusalɛmɛ, Matusalɛmɛ bona ooki Ɛnɔki, Ɛnɔki bona ooki Yalɛtɛ, Yalɛtɛ bona ooki Malalaɛlɛ, Malalaɛlɛ bona ooki Kainame, 38 Kainame bona ooki Ɛnɔsi, Ɛnɔsi bona ooki Sɛti, Sɛti bona ooki Adamo, Adamo, bona ooki Ndjakomba.