1 Buuna bɔmɔɔ boyalaki Yesu yolaka banto nde Tɛmpɛlo mpe yoebya Nsango e bɔlɔti, nkanga i benkondi la balaki ba bobeko bɔlɔngɔ la baome ba bihe bankina bayɛ. 2 Babobelɛ: «Otohangele kaki mbo iiko inkuma ikelaka wɛ, okelake ikɔ la mpapo eeki nnɔ? Bonto ookopaki mpapo iiko nnɔ?» 3 Yesu aobaunoyela: «Emi mpe Nduubola buubo bɔmɔɔ: 4 Nyunama eeki Yowane, ɛkɔ iimaki nde liko la mpe eka banto?» 5 Bayaubɔlɛ laino ibɔ la ibɔ: «Kaki tongohangɛ: "Iimaki nde liko", akotoubola: "Itina iipa taloboumeya nnɔ?" 6 Kaki mpe tongohangɛ: "Iimaki eka banto", banto bankuma bakotolika babɔkɔ, itina ibɔ bankuma bahangake Yowane ayali ntepeli.» 7 Ɛkɔiko baunoyɛ mbɔ: «bapwebe looko lɔnɛ luumaki ɛkɔ.» 8 Yesu abaunoyelɛ: «La emi mpe ntingolohangela kaki mbo iiko ikelaka emi nkelake la mpapo eeki nnɔ.»

9 Nkamba, abapɛ lwɛlya lɔnɛ: «Bonto ɔmɔɔ aonɛ elanga e vino, apɛɛ ɛkɔ eka bahali ba bilanga kela baputele, mpe nde kiika atɛ lɔkɛndɔ lo elie. 10 Anɛ ekitaki eleko yonika mmuma, atindɛ bohali bɔmɔɔ eka baaputela elanga kela baopaa ekinde ndambo e mmuma i vino. Baputeli baiko babokulɛ mpe babounɔyɛ bapombo botoo. 11 Bɔmɛlɛ elanga aunwɛ yotinda bohali bonkina. La nde mpe babokulɛ, babotolɛ mpe babounoyɛ nko bapombo botoo. 12 Bɔmɛlɛ elanga aunwɛ yotinda bonto ɔnɛ o bahato; la nde mpe babɔkɔtɛ mpe babopandjɛ nde elanga. 13 Bɔmɛlɛ elanga e vino ayahangelɛ: "Aiko nkele ngamo? Ntinda nko bɔna ɔnɛ okimi o loondo openda emi yolanga. Ɛmɔɔ mbala bangoobomanga." 14 Anɛ ɛnɛki baputeli elanga bona, bayabelɛ ibɔ la ibɔ: "Enda bonto oongotikala la lokutu. Tobolyake kela lokutu longotikale la nso!" 15 Ngauko, baboolyɛ nde elanga e vino mpe babolyakɛ.»

«Bɔmɛlɛ elanga iiko e vino angookela la banto baiko nnɔ? 16 Angooya nde kiika, angoolyaka bahali baiko mpe angoopa elanga eka banto bankina.» Anɛ yokaki ibɔ ngauko, baohanga: «Nkola, ɛpɔɔhe yokelama ngauko.» 17 Yesu abahihimyɛ mpe ababelɛ: «Yaa Nkɔti inɛ iiki Bonkanda bo Ndjakomba ilimbola nnɔ: " Ikondi inɛ yee batongi ba botumba baumolake, ikinɛ yookita ikondi i ndombe ibuti botumba lonkundu." 18 Bonto onkuma ongoyabonge la ikondi iiko, angoopupwa bimpulu bimpulu; bonto onga ikondi iiko ikɔyɛle, angooyandwa.»

19 Balaki ba bobeko la nkanga i benkondi batilɛ babute Yesu elaka iko, yaa baokɛ banto bɔɔmɔ. Baebaki mbɔ lwɛlya loko loyalaki itina ikibɔ. 20 Ima nko aiko, babangɛ yɔlɔndɔ Yesu, babotindelɛ banɔngi baayali nga banto ba sembo. Batilaki babobateye nde mbo itepela nde kela babolobe eka ntɛndi la eka bɔndɛlɛ-mboka. 21 Banto baiko babuubolɛ: «Bolaki, tweba mbɔ wɛ otepelake mpe olakake mbo i semba, ɔpɔhɔlɔke bilongi mpe olakake nhɔhɔlɔ ndjela eeki Ndjakomba. 22 Otohangelake, topa mputi eeki Kaisalo laa mpe tatopake?» 23 Yesu aebɛ bolenga bokibɔ mpe ababelɛ: 24 «Lɔnyɛnie mpata ɛmɔɔ. Elongi la nkɔti iiko iiki nnɔ?» Babuunoyɛ: «Iiki Kaisalo.» 25 Yesu ababelɛ: «Kaki ngauko, lopaaka Kaisalo biiki Kaisalo, mpe Ndjakomba biiki Ndjakomba.» 26 Tabayobobateya kela babobute nde ndjela eeki bakambo baatepelaki nde ntondo eeki banto; nga mpe bohaa mbuto ekinde ebatika hukɛ, baopili nko mpilama.

27 Ndambo e ba Saduseyo, banɛ bahangaka nkundwa teyali, bayɛ eka Yesu, babuubolɛ ngɔnɛ: 28 «Bolaki, Mose atoheneyaki bobeko bɔnɛ: "Kaki loondo lɔmɔɔ loyali la waali aowa, mpe nde la waali tababota, bohibotonga okinde akɔhɔkɔ waali uuko itina abotele bowei bana." 29 Lendaka, eyalaki la bahibotonga nsambo. Ɔnɛ o ntondo abalaki mpe awaki nko bota. 30 Ɔnɛ o bape akohɛ buunto ɔkɔ; 31 ɔnɛ o bahato abalɛ mpe nko buunto ɔkɔ, tii ibɔ bayaankuma nsambo, bawɛ nko bota bana. 32 Nsuki nsuki, buunto ɔkɔ mpe awɛ la nde. 33 Buuna bonga banto bakundwe, buunto uuko angooyala waali ɔki nnɔ, itina ibɔ bankuma nsambo babobalaki?» 34 Yesu abaunoyelɛ: «Banto baayali nde bokili bɔnɛ boyali nso, bakɔhɔke baali la baome. 35 Yaa banto baahɔlɔmɛ yɔtwa nde bokili bɔnɛ booye mpe yokundwa nde baawɛ, ibɔ tabangobala. 36 Ibɔ tabangunwa yowa, itina bayɛ nga bentomwa: bayali bana baaki Ndjakomba itina iki nkundwa 37 Mose aɛniaki potya mbɔ banto baawɛ bangookundwa anɛ etepelaki nde nde iholo i ibundja inɛ ipɛtɛ nko longola, ayeeta Nkolo "Ndjakomba eeki Abalayama, Ndjakomba eeki Izaka mpe Ndjakomba eeki Yakobo." 38 Wambɔ Ndjakomba tayali Ndjakomba eeki baawɛ, ayali Ndjakomba eeki banto baabika, itina nga laa nde banto baiko bankuma bayali la lobiko.» 39 Bɛɛmɔɔ balaki ba bobeko bahangɛ: «Bolaki, ongotepelɛ bɔlɔti.» 40 Mpe tabaunwa lenkina yoboubola nkya lobo lɔmɔɔ.

41 Yesu abaubolɛ: «Ndenge nnɔ ehangaka ibɔ mbɔ Kilito ayali bona ooki Dawidi? 42 Dawidi nde kiika atepela nde buku e Nyembo: "Nkolo abelɛ Nkolo ekimi: Kiha nde lɔbɔ lo loome lokimi, 43 tii enga emi nkitye baapokolange enyatelo e bakaka baakiɛ." 44 Kaki Dawidi aeta Kilito Nkolo, ndenge nnɔ yɔɔhɔ nde yoyala lenkina bona okinde?»

45 Yesu abelɛ bakɛndi laa nde ntondo eeki banto bankuma baayaki yobooka: 46 «Loyalaka la nkɛpɔ la balaki ba bobeko! Ibɔ balangake bakɛnde la benkoto be ntale; balangake banto bababekole nde ndye iiponanaka banto; balangake bakihe nde bikili bii ntondo nde betumba be lɔbɔndɔ la nde nongi i lokumu nde ntɛkɔ. 47 Ibɔ baibake byomba biiki bituka mpe bakelake mbɔndɔ i ntale ntale kela banto babahime. Bangoobata etumbo ekibɔ mpe engoyala e boolo.»