1 Nko aikɛkɔ, nga boyalaki boloy bɔ bɔnɛnɛ mpe banto bobanga yoyanyata, Yesu abangɛ yobela bakɛndi laa nde: «Loyalaka la nkɛpɔ la baanya bape baaki bafalisaya, eyali nga bote bɔnɛ boamyaka mampa. 2 Nkola la yoomba ɛmɔɔ yuuhi epa tengoyala nko uhwa, nkola la yoomba ɛmɔɔ ebombi epa tengoyala nko ola nde bongala. 3 Itina inkuma inga lotepele nde buulima ingoyokya la nkatala e waane; inga loyahangele nde ndenge ndjuhama ingoyokya tii nde nsamba i betumba.»

4 «Ndobela, nyo baninga bakimi: banto balyaka byonge mpe, la lombuha, baapa la lobo lonkina lo mpondo lɔhɔ ibo yokela, talobaokake bɔɔmɔɔ! 5 Ndjolwɛnia bonto ɔnɛ ɔhɔ nyo yoka bɔɔmɔ: lookaka bɔɔmɔɔ bonto oyali la nguya yoloboka nde ntyɛ i botako lombuha lo yololyaka. Ndohangela mpendja, uuko wambɔ ɔnɛ oɛli nyo looka bɔɔmɔ.»

6 «Bapotɛkɛke bihɔya bitano la mpata ipe? Nkya ngauko, Ndjakomba apobopele nkola la ehɔya ɛmɔɔ 7 Aeba la botango bo bayoo bankuma bayali nde bɛtɛ bekinyo. Talokake bɔɔmɔ, nyo loleka bihɔya binkuma la botuya.»

8 Ndobela: «bonto onkuma ongonyumeya nde baiho baaki banto ayali bonto okimi, Bona ooki Bonto mpe angoobumeya nde baiho baaki bentomwa beki Ndjakomba; 9 yaa bonto ongonyangana nde baiho baaki banto, emi mpe ngoboangana nde baiho baaki bentomwa beki Ndjakomba. 10 Bonto onkuma ongotepele bobe itina iiki Bona ooki Bonto, bangoobookela ihɛi, yaa ongotole Bolimo bo Bɔyɛngwa, tangobookela ihɛi.

11 «Kaki bangotɛ itolohambya nde betumba be lɔbɔndɔ, eka nkumu la benkondi, taloyatungyake yotila lwebe ndenge enga nyo losambe la mpe ndenge enga lotepele. 12 Itina Bolimo bo Bɔyɛngwa angoololakania elaka iiko iinga nyo lotepele.»

13 Bonto ɔmɔɔ oyalaki nde boloy abelɛ Yesu: «Bolaki, bela bohibotonga okimi atokapoye lokutu lɔnɛ lwe ihe ekinso atoheneyake.» 14 Yesu abobelɛ: «Bonto oontikɛ ntɛndi kela ndokapele lokutu lokinyo nnɔ?» 15 Nko nde ɔnɛ obabela ibɔ bankuma: «Loyalaka la nkɛpɔ ! Talopendake yoyapa la mpoha e lokutu; teyali itina bonto ayolɛ la ikulaka, wambɔ bɔmɛngɔ buuko bohekya lobiko lokinde.»

16 Nko nde ɔnɛ obahangelɛ lwɛlya lɔnɛ: «Bokulaka bɔmɔɔ ayalaki la bilanga bikinde bibobotelɛ byomba buuke. 17 Ɛkɔiko ayaubolɛ: "Nkele ngamo? Ntiyali lenkina la nongi yotika byomba binɛ bikimi binkuma bitɔyɛ emi nde bilanga." 18 Aoyahangela nko nde kiika: "Bɔlɔti nkele ngɔnɛ: nkɔye beliko bɛnɛ beekimi kela nɔnge bependa bɔnɛnɛ, ntike mmuma ikimi inkuma la byomba bikimi." 19 Nkamba ndjoyabela emi mɛlɛ: "Wɛ nde ɔnɛ oyɛ la buuke bo lokutu nde beliko mpe lokutu lo mbula la mbula; yakihya, lɛkɛ, mɛlɛ, kela ntɛkɔ." 20 Eke ngɔkɔ Ndjakomba aobobela: "Lenda etula ɛnɛ! Nko la botyo bo lɔlɔkɔ, bakooya yɔkɔkɔhɔ. Yaa oongotikala la biko binkuma bibombaki wɛ nnɔ?" 21 Uuko wambɔ ikambo ibata bonto obomba lokutu itina ikinde kiika ndye eki ayale bokulaka nde baiho baaki Ndjakomba.»

22 Yesu nde ɔnɛ obela bakɛndi laa nde: «Ɛkɔiko elobela emi: Taloyatungyake itina iiki byomba bindɛlɛ nde lobiko lokinyo, la mpe itina iiki bihenda byɔhɔ nyo yɔlɔtɔ. 23 Lobiko loki bonto loleka byomba bi ndɛlɛ la itina mpe byonge biki bonto bileka bihenda la itina. 24 Lolenda byanganga: biponake la yomba, biponikake mmuma, bipa la bibombelo bi muma, bipa mpe la boliko bobomba ibo byomba bi ndɛlɛ; nko Ndjakomba ɔnɛ obalehya. Endaka nyo lopenda mpulu. 25 Aiko eyali nyo la batungya baakinyo, bonto ɔnɛ ɔhɔ yohangya nkya empulu e buuna nde lobiko lokinde nnɔ? 26 Kaki nyo lɔpɔhe yokela nkya yoomba e nkɛnkɛ, boyatungya nyo itina iiki binɛ binkuma nnɔ? 27 Lolenda ndenge yolwa pulɛlɛ iiko: ipokelake bosala, ipotongake bihenda; yaa ndohangela, nkya Salɔmɔ nde kiika, la ikulaka ikinde inkuma, ɔmbwɛne bomboyahɔnɔkɛ nde, takita nga pulɛlɛ ɛmɔɔ. 28 Kaki Ndjakomba alɔɔtya ngauko baɔmbi baiko bayali lɔlɔkɔ nde ngonda bangobokama lobi nde ntyɛ, loopa nde tangɔhɔ yokela itina ikinyo nnɔ, nyo banto ba nyumeya bɔkɛ? 29 Nga la nyo, taloyatungyake la bindɛlɛ la bimɛmɛlɛ; talopendake yoyatungya. 30 Iiko inkuma, wambɔ banto ba bokili bapenda yotilya-tilya bikɔ. Ekanyo, Ihe ekinyo aeba bɔlɔti mbɔ loyali la mpoha la bikɔ. 31 Nyo, lotilaka lontondo Bonkumu booki Ndjakomba, nkamba binɛ binkuma bangoolohangyela nde loliko.»

32 «Tookake bɔɔmɔ, wɛ botonga bo nkɛnkɛ, itina Ihe ekinyo aokɛ bɔlɔti yolopa Bonkumu. 33 Lɔtɛkɛkɛ byomba biyali la nyo, lokapelaka bakelela bɔhɔlɔ bokaa lobata. Loyakelelaka mango ipotondwake, lotilaka lokutu lopopitanake nde Lobola, mpiko epokite bonto onɛ o iba la nsɛlɛlɛ. 34 Itina looko loyali bɔmɛngɔ bokiɛ, botema bokiɛ bongoyala mpe nko mpiko.»

35 «Loyalaka la bihenda bi bohala mpe meinda bekinyo bɛpɛtɛke. 36 Loyalaka nga basali balila buuma nkolo nde ntɛkɔ e ibala, kela babolipole nko aokitele mpe aokɔkɔme. 37 Ɛmɛngɔ la basali baanga nkolo atane bahɛndjɛlɛ anɛ enga nde akite. Ndohangela nte nhɔhɔlɔ mpendja, nkolo angɔɔlɔɔtɔ bihenda bi bosala, angoobakihya nde mesa mpe angooya yobatandela byomba. 38 Nkolo akite la koko e botio la mpe la ikya i nkɛhɛ, kaki angotaanɛ bahɛndjɛlɛ, ɛmɛngɔ eyali la ibɔ.»

39 «Lwebaka bɔlɔti, kaki bɔmɛlɛ botumba aebaki elaka ɛnɛ yoye buubi, tapohena abole etutu e botumba bokinde. 40 Nyo mpe loyɔhɔlɔkɔ, itina Bona ooki Bonto angooya elaka ɛpa nyo talongwepwa.»

41 Petelo aubolɛ Yesu: «Nkolo, otepela lwɛlya luuko itina ikinso laa mpe itina iiki banto bankuma?»

42 Nkolo abuunoyelɛ: «Uuko bɔhɛndjɛli bo lokutu bo semba mpe bo lyanya botikɛ nkolo lontondo loki basali baakinde bankuma kela abakapelake byomba nde elaka ɛnɛ ɛɛli nnɔ? 43 Ɛmɛngɔ eka bosali buuko nga nkolo angoobotane akela bohala buuko elaka enga nde aunwe! 44 Ndohangela nte hɔlɔ mpendja, nkolo angoobotika ahɛndjɛlɛ byomba bikinde binkuma. 45 Yaa kaki bosali buuko aoyahangela nde kiika: "Nkolo ekimi angɔtɛmɛ nde lɔkɛndɔ lootɛ nde" mpe aobanga yokula basali, la beele la bainto, yɔlɛ, yɔmɛlɛ la yootwa, 46 nkolo eeki bosali buuko angooya buuna boopa nde aolile mpe nde elaka epa nde aebe; angoobopandja mpe angoobotika ndye ɛmɔɔ la banto banɛ ba bobe. 47 Bosali bɔnɛ weba mpoha eeki nkolo ekinde mpe tabɔngya la yoomba ɛmɔɔ mpe takela mpoha eeki nkolo ekinde, bangoobokula bebambo; 48 Bosali bopa taeba mpoha eeki nkolo mpe aokela bakambo banɛ baɛli la etumbo, bangoobokula bebambo bɔkɛ. Bonto opaki ibɔ byomba buuke, bangooboubola mpe buuke; bonto obutyaki ibɔ byomba buuke, bangoobootya mpe buuke.»

49 Yesu aunwɛ yotepela: «Ndjaki yɔpɛtya ntyɛ nde bokili, mpe ndjali la mpoha nyɛne bɔpɛtɛ ntyɛ ikɔ. 50 Ndjali la mpoha mbate nyunama ɛmɔɔ, mpe ndjali botema nko ntyɛ-ntyɛ aiko epa lobo lɔkɔ talokelami. 51 Nyo lokambake emi ndjaki yotika nyɛ nde bolongo? Nkola, ndjaki yokapola. 52 Itina, ima lɔlɔkɔ, kaki banto bayali batano nde botumba bɔmɔɔ, bangookapwa: bahato loko, bape loko. 53 Ihe ayuna bona okinde o loondo, bona mpe ayuna ihe; nyango ayuna bona okinde o buunto, bona mpe ayuna nyango, nyango e bokilo ayuna waali ooki bona, waali ooki bona mpe ayuna nyango e bokilo.»

54 Yesu abelɛ mpe boloy boyalaki aiko: «Kaki lɔngwɛnɛ bailu bangoolɛ looko loolalaka inyɛlɛ, lohangake mbala ɛmɔɔ: "Mbula ɛkɔlwa", mpe ekelamake nko ngauko. 55 Kaki lohoka bɔmpɛmpɛ buuma looko lo nse, lohangake: "Ngangeli ekoyala", mpe ekelamake nko ngauko. 56 Nyo banto ba bilongi bipe! Lwebake yolimbola mbo inɛ yɛnɛ nyo nde bokili la nde liko, itina ipa lwebe yɔkɔtɔlɔ ekeke ɛnɛ e lɔlɔkɔ nnɔ?»

57 «Itina mpe ipa lwebake yɛnɛ nyo kiika bakambo ba semba nnɔ? 58 Kaki ooli wɛ la bonto ongokopundɛ eka ntɛndi, otilaka loyaoke wɛ la nde aiko eyali nyo nde ndjela. Kaki ngauko nkola, angokohenya eka ntɛndi, ntɛndi aokobutya bapulusi mpe bapulusi baokotika nde bɔlɔkɔ? 59 Nkobela: Tongoola nde bɔlɔkɔ kaki toheyi yoputa bɔhɔlɔ bonkuma.»