1 Bɔɔmɔɔ buuna, Yesu ayalaki nde ibongo i ndeko e Yenesalɛtɛ, buuke bo banto bayalaki ntute la nde itina iiki baoke nsango e bɔlɔti eeki Ndjakomba. 2 Aɛnɛki byato bepe nde ibongo; eyalaki byato beeki bahaki bahulwaki kela baɔhɔle bɛtɛi beekibɔ. 3 Yesu akondelɛ nde waato bɔmɔɔ. Eyalaki waato booki Simo, mpe abobelɛ ayaundje bona o botale la ibongo. Akihɛ nde waato mpe abangɛ yolaka banto.

4 Anɛ eheyaki nde yolaka, abelɛ Simo: «Indja waato looko lo bonino mpe lolika bɛtɛi bekinyo itina iiki lotungole nsi.» 5 Simo abuunoyelɛ: «Bolaki, tongohakɛ botyo bonkuma, tatobata yomba. Yaa nko aiko eha wɛ ombela, nkolika bɛtɛi.» 6 Baunwɛ yolika bɛtɛi mpe batungɔlɛ nsi imɔɔ i buuke, bɛtɛi bekibɔ ntute la yatwa. 7 Ibɔ banɛ baetɛ baninga banɛ bayalaki nde wato bonkina baye yobabutya. Baninga bayɛ, mpe bayoyɛ byato beyape la nsi mpe byato beyɛ ndɛndɛ. 8 Anɛ e ɛnɛki Simo Petelo ngauko, akɔ bakulubɔngɔ ntondo eeki Yesu mpe nde ɔnɛ abobelɛ: «Nkolo, ima ntute la emi, itina emi ndjali bonto o bahumu.» 9 La Simo la ekambi enkuma eyalaki la nde bahoka bɔɔmɔ la yɛnɛ buuke bo nsi itungolaki ibɔ. 10 La Yakɛ la Yowane, bana baaki Zebede, baninga baaki Simo baayalaki la nde baokɛ mpe bɔɔmɔ. Yesu nde ɔnɛ abelɛ Simo: «Tookake bɔɔmɔ; ima lɔlɔkɔ, ongotungolakɛ wante banto.» 11 Nko aiko ibɔ banɛ baunoyɛ byato nde ibongo, bahenɛ byomba binkuma biyalaki la ibɔ, bayelɛ Yesu.

12 Bɔɔmɔɔ buuna, Yesu ayalaki nde imɔɔ imɔnga, mpe bonto ɔmɔɔ ɔkɔnɛ bohale ayalaki aiko. Anɛ ɛnɛki nde Yesu, aɔkɔ bakulubongɔ mpe aɔbɔbɔndɛlɛ: «Nkolo, kaki olanga, ɔhɔ yɔmpɛtɔlɔ.» 13 Yesu ahembolɛ lɔbɔ, abobutɛ mpe aobelɛ: «Ndanga, pɛtwa.» La mbala ɛmɔɔ, nkandi ehilɛ. 14 Yesu nde ɔnɛ abokokomyɛ tahangelake la bonto ɔmɔɔ: «Kɛndɛ toyaɛnie eka nkanga eeki Ndjakomba mpe opa ikapo itina inga wɛ ɔpɛtwɛ, botindo bɔkɔtɔki Mose, kela banto baɛne onga wɛ obikɛ.» 15 Lokumo looki Yesu loopenda yoanga; banto buuke bayɛɛ bayake yoka balako baakinde mpe yobika nde nkandi ikibɔ. 16 Nga la nde, ayɛɛ atake nko nde kiika ndye ipa la banto itɔbɔndɛlɛ.

17 Buuna bɔmɔɔ boyalaki nde yopa balako, la bafalisaya* la balaki ba bobeko bayalaki aiko; baumaki ima bihe binkuma biki Ngalilaya la biki Yudeya tii Yelusalɛmɛ. Nguya eeki Nkolo eyalaki la nde itina iiki abikyake banto. 18 Nko aiko ɛkɔ, banto bayaki yobilaka entumbe ɛmɔɔ nde bobanga; batilaki babɔtɛye nde botumba mpe babohuloye ndye eyalaki Yesu. 19 Tabata epohe yɔbɔtɛyɛ itina banto bapendaki buuke. Ibɔ banɛ bayobokondeyaka nde nsamba, baotondola itundu mpe baohuloya bobanga nde boloyi bo banto, ntondo eeki Yesu. 20 Anɛ ɛnɛki Yesu nyumeya ekibɔ, aobela bɔkɔni: «Bahumu bakiɛ bangolibwɛ.» 21 Anɛ yokaki bafalisaya la balaki ba bobeko ngauko, baokanena: «Ɔkɔ bonto otola Ndjakomba nnɔ? Oki nnɔ ɔhɔ yolibola bahumu kaki teyali Ndjakomba nde kiika?» 22 Nga boebaki Yesu botindo bo bikaneno biikibɔ, aobaubola: «Itina iyali nyo la bikaneno bi ngauko nnɔ? 23 Lobo loopa taloyali la lyale nnɔ? Yohanga: "bahumu bakiɛ bangolibwɛ" la mpe yohanga: "Emala mpe kɛndɛ"? 24 Lolendaka, ndanga lwebe mbɔ Bona ooki Bonto ayali anɛ nde bokili la nguya yolibola bahumu» , nde ɔnɛ aobela entumbe: «Nkobela, emala, kɔhɔ bobanga bookiɛ mpe inwa eka wɛ!» 25 La mbala ɛmɔɔ, bonto uuko alangwɛ, aambolɛ bobongo bobetamaki nde mpe aunwɛ ekande mpe atɛ itokumyaka Ndjakomba. 26 Banto bankuma bayalaki baitɛ byoli. Bakumyɛ Ndjakomba, bɔɔmɔ bobabutɛ mpe baototepele: «Lɔlɔkɔ tɔngwɛnɛ biɛnywa!»

27 Mbuha eeki aiko, Yesu aolɛ mpe aɛnɛ botaakoli bo mputi bɔmɔɔ, lina ikinde Lewi, akihi nde ndye eputyaka ibɔ mputi. Yesu aobelɛ: «Ondjele.» 28 Lewi aemalɛ, ahenɛ binkuma biyalaki la nde mpe aoyelɛ. 29 Nko aiko, Lewi atɛ itokelela Yesu ekola e ilambo ekande nde botumba; buuke bo bataakoli ba mputi la banto bankina bayalaki la ibɔ nde ilambo iiko. 30 Bafalisaya la balaki ba bobeko baayalaka la ibɔ lwɛmbɛ lɔmɔɔ baokɛ bobe; ibɔ banɛ bahangelɛ bakɛndi la Yesu: «Itina nnɔ ilɛ nyo mpe imɛlɛ nyo la bataakoli ba mputi la banto baiko bankina ba bahumu?» 31 Yesu ababelɛ: «Banto baapa tabayali la nkandi bapoyalake la mpoha la nkanga, nko banto baakɔnɔ bayalaka la mpoha laa nde. 32 Emi ntiya yotila banto ba bɔlɔti, ndjaki yotila banto banɛ ba bahumu kela baɔhɔle betema.»

33 Nko ibɔ banɛ baobohangela: «Banto bakɛndɛ la Yowane la banɛ baakinso bakilake byomba mbala la mbala; banɛ baakiɛ, bokibɔ bohala nko yɔlɛkɛ la yɔmɛlɛkɛ.» 34 Yesu aobabela: «Nyo nko lokihya banto baambwete ibɔ nde ntɛkɔ e ibala ndjala elaka iiko eyali ibɔ la mbali? La bonwema poo. 35 Yaa, buuna bongoyale mbɔ mbali tayali lenkina la ibɔ, aiko bangoolala ndjala.»

36 Yesu nde ɔnɛ obapa mpe lwɛlya lɔnɛ: «Bapwatolake etate e ehenda e ntɛmu kela baɔhɔle ehenda e kala; kaki okela ngauko, aiko opita ehenda ɛnɛ e ntɛmu mpe etate e ehenda ɛnɛ e ntɛmu tengoyakɔhɔ la ɛnɛ e kala. 37 Bapotikake baana ba bɔntɔngu nde ekutu e kala, baana ba bɔntɔngu baobola ekutu e kala: bana baoyutumwa mpe ekutu yobolya. 38 Batikake baana ba bɔntɔngu nko nde bikutu bi ntɛmu. 39 Bonto ɔhɔmɛlɛ baana ba kala apuunwake yolanga ahangye banɛ ba bɔntɔngu. Ɛkɔiko ehangaka ibɔ: "Baana ba kala balekola bɔlɔti."»