1 Buuna bɔmɔɔ bo sabata, Yesu alekaki nde ngonda i bele*. Bakɛndi la nde bayaki yonikaka mmuma, baomukolake nko nde bakata mpe baɔlɛke. 2 Bafalisaya bankina bayalaki aiko, baobaubola: «Itina ikela nyo mbo iihuka bobeko nde buuna bo sabata nnɔ?» 3 Yesu abainoyelɛ: «Talotanga iikelaki Dawidi buuna bookaki nde la bakɛndi laa nde ndjala? 4 Botindo bɔnɛ bɔɔtwaki nde nde botumba booki Ndjakomba, aɔkɔhɔ mampa ikapelaki banto Ndjakomba, aɔlɛ nde kiika mpe aopa la bakɛndi la nde, eke ngɔkɔ mampa iiko banto bankina tabaɛlɛmɛ bale ikɔ, iyalaki nko itina iiki nkanga iiki Ndjakomba ibɔ kiika» 5 Nkamba ayunwa yobabela: «Bona ooki bonto ayali bonkondi booki sabata.»

6 Bonkina buuna bo sabata, Yesu aɔtwaki nde botumba bo lɔbɔndɔ mpe alakaki. Bonto ɔmɔɔ ayalaki aiko la bobuka nde lɔbɔ lo loome. 7 Balaki ba bobeko la bafalisaya bayalaki aiko. Baiho baakiibɔ nko nde Yesu itina baɛne nga akobikya bonto uuko buuna bo sabata, nkamba babopɔtye ikambo. 8 Yesu aebaki bikaneno bikiibɔ. Nde ɔnɛ aobela bonto oyali la bobuka: «Langwa mpe emala aiko ntondo eeki banto bankuma.» Bonto uuko alangwɛ mpe aemalɛ. 9 Yesu nde ɔnɛ obabelɛ: «Ndanga nduubole kaki buuna bo sabata elongi yokela bɔlɔti la mpe yokela bobe, elongi yobikya bonto la mpe yobohenya abu?» 10 Yesu abakɛ bonto ɔmɔɔ la ɔmɔɔ baiho, la lombuha abelɛ bonto ɔnɛ oyali la bobuka: «Hembola lɔbɔ lokiɛ.» Bonto ɔkɔ ahembolɛ lɔbɔ mpe lɔbɔ lohembwɛ. 11 Balaki ba bobeko la bafalisaya baulwɛ la nkɛlɛ mpe bayaubolɛ lobo lɔhɔ ibɔ yokela Yesu.

12 Nko nde biina biiko, Yesu akondelɛ nde ngomba itɔbɔndɛlɛ mpe alekyɛ botyo lonkundu yɔbɔndɛlɛ Ndjakomba. 13 Anɛ ɛhɔkya nkɛhɛ, aetɛ bakɛndi laa nde mpe ahɔlɛ lyomu la bape, abapɛ lina bɛnkɔmwa: 14 Simo, ɔnɛ obekyaki nde Petelo, la Andele wakume okinde, Yakɛ la Yowane, Pilipo la Batɛlɛmi, 15 Matayo la Toma, Yakɛ, bona ooki Alafe, la Simo, ɔmɔɔ oki banɛ batila epanda eeki Isalaɛlɛ, 16 Yuda, bona ooki Yake, la Yudasi Isikaliɔtɛ, ɔnɛ ɔngɔtɛkɛ Yesu.

17 Yesu aohulwa ngomba nde la bɛnkomwa bekinde, baokita nde ndye ɛmɔɔ e palaa, eyalaki buuke bo bakɛndi laa nde, la mpe buuke bo banto baimɛ looko la looko: banto ba Yudeya, banto ba Yelusalɛmɛ, la banto ba ibu i bahi, looko lo Tilɛ la Sido. 18 Ibɔ bankuma bayaki nko yobooka mpe la yotila babike la nkandi iyalaki la ibɔ. Baayalaki la belimo be bobe mpe babikaki. 19 Bonto onkuma atilaki nko abute Yesu, itina nguya ɛmɔɔ yola nde byonge bikinde mpe ebabikya ibo bankuma.

20 Yesu nde ɔnɛ olenda bakɛndi laa nde mpe aobabela nde wambɔ:

«Ɛmɛngɔ laa nyo bɛmbɔlɔ:

Bonkumu booki Ndjakomba boyali bookinyo.

21 Ɛmɛngɔ laa nyo baayali la ndjala aikekeko: longo kinda byomba.

Ɛmɛngɔ laa nyo baalela aikekeko: lɔngɔyɔlɔ ntɔɔlɔ.»

22 «Ɛmɛngɔ laa nyo kaki banto baluuna, kaki balotona, kaki balotoola mpe batepela bitepela tepela itina ikinyo, itina iiki Bona ooki bonto. 23 Lohulaka nde buuna buuko mpe lobulwaka, itina boputo bookinyo bongoyala bɔnɛnɛ nde lobola. La bankaa ikibɔ banyɔkɔlɔki ntepeli nko ngauko.

24 Nyo banɛ bayali bekulaka, ihɛi laa nyo:

lohilɛ yobata boputo bookinyo.

25 Ihɛi laa nyo baayali la kuukuu la ngɛɛngɛɛ aikekeko:

longowa la ndjala !

Ihɛi laa nyo banɛ bɔɔlɔ aikekeko,

longokiha nde batale mpe longolela.

26 Ihɛi laa nyo kaki banto bankuma balototya, la ba ihe baakiibɔ bambookelake la ntepeli inɛ i boyanga nko botindo buuko.»

27 «Aiko mpe emi ndjolobela, nyo baandjoka: Lolangaka banto baayali la nyo ilanga; banto baalunaka, luakelaka bɔlɔti. 28 Banto baalolimya, lwatɔmɛyaka bekako, baalɔnyɔkɔlɔ, lɔbɔndɛlɛkɛ itina ikibɔ. 29 Mbɔɔkɔ bonto angokokulɛ lotaka nde itama imɔɔ, ɔwɛniaka inɛ inkina. Kaki angɔkɔpɔmɔlɛ kasaka, ohenaka akɔhe la ikakya. 30 Bonto onkuma ohokobondela yoomba, obopaaka, ɔngɔkɔpɔmɔlɛ yoomba ekyɛ, tobuubolake akounoyele. 31 Ndenge elanga nyo banto balokelele, nyo mpe lobakelelaka nko ngauko. 32 Kaki nyo lolangake nko banto baalolanga, yoomba e mpondo etila nyo lobate nnɔ? La banto ba bahumu balangake mpe banɛ balanga! 33 Kaki nyo lokelake bɔlɔti nko banto balokela bɔlɔti, yoomba e mpondo etila nyo lobate nnɔ? La banto ba bahumu bakelake nko ngauko. 34 Kaki mpe nyo lɔhɔmbyake nko banɛ baɔhɔ yoluuta, yoomba e mpondo etila lobate nnɔ? La banto ba bahumu bahɔmbyake banto ba bahumu kela bangobaute botuya bobapaki ibɔ. 35 Nga la nyo, lolangaka banto bapololangake, lobakelaka bɔlɔti mpe lɔhɔmbyaka nkolila baluute. Aiko longobata boputo bɔnɛnɛ mpe longoyala bana baaki Ndjakomba ɛnɛ e lobola, nde oyali bɔlɔti la itina iiki banto bapobumeye la itina iiki banto ba bobe. 36 Nyo, lookelaka banto ihɛi nko nga bookelaka Ihe ekinyo banto ihɛi.»

37 «Talohambyake banto, la nyo mpe Ndjakomba tangolohambya; talɔkɔyɔke baninga nde bakambo, Ndjakomba mpe tangɔlɔkɔyɔ; losabinyaka baninga, nyo mpe bangoolosabinya. 38 Lokapaka mpe bangoolokapela: bangooluutumoyela nde bihaka biikinyo babondo bamɔɔ ba buuke, baanyongyɛ ibɔ mpe bayolɛ nte mɛkɛ tii byomba biyutumwa. Lwɛli lootikela nyo baninga byomba, bangoolotikela la nyo kiika nko nde lwɛli lɔkɔ.»

39 Yesu aobabela lenkina lwɛlya lɔnɛ: «Bonto obolyɛ baiho nko aolakya onkina obolyɛ la nde baiho ndjela? Tabangɔkɔ ibɔ bayaape nde ipoku? 40 Bonto olaka ibɔ apolekake ɔnɛ olaka, yaa kaki babolakaki bɔlɔti, angookita nga bolaki bokinde. 41 Itina ilenda wɛ lopumbu nde liho iiki boninga nnɔ? Empulu e bote eyali nde liho ikiɛ ɔpwɛne? 42 Ndenge nnɔ ɔhɔ yohangela boninga okiɛ: "Ondile nyumole lopumbu luuko loyali nde liho ikiɛ", wɛ bonto opwɛne bote boyali nde liho ikiɛ? Wɛ boyanga, imola laino bote boyali nde liho ikiɛ, kela uɛne bɔlɔti, nkamba uumole lopumbu loyali nde liho iiki boninga.»

43 «Bote bo bɔlɔti bopobotake mmuma i bobe, nko nga boyali mpe bote bo bobe tabongobota mmuma i bɔlɔti. 44 Bote la bote boebetanake la botindo bo mmuma ikinde: tonguba balala nde weenge mpe tongotana nyanga nde bokungu. 45 Bonto o bɔlɔti aumyake bɔlɔti nde mbo i bɔlɔti ibombi nde botema bokinde, bonto ɔnɛ o bobe aimyake bobe bokinde nde inɛ i bobe ibombi nde botema bokinde. Itina bonya booki bonto boolyake nko baoyi baayolɛ nde botema bokinde.»

46 «Londjetake Nkolo, Nkolo, yaa itina ipa lokelake ilobela emi nnɔ? 47 Bonto onkuma oya eka emi, ɔnɛ ooka mbo itepela emi mpe okela ikɔ, ndjolohangela kaki aɛli la nnɔ. 48 Aɛli la bonto ɔnɛ otonga botumba: atimɔlɛ ekole e ipoku tii nde nse e babu kela botumba bobakeme nte nde babɔkɔ. Anɛ eyɛ mpela, bahi baaki botema bo bɔkɛli bakondelɛ tii nde ndye epiki botumba, yaa tabɔɔhɔ yɔkɔyɔ botumba, itina botumba botongamɛ bɔlɔti. 49 Yaa bonto onkuma ɔnɛ ooka mbo itepela emi mpe apokele ikɔ, aɛli la bonto ɔnɛ otongɛ botumba nko nde liko i bɔkɔngɔ nkobutya bitutu tii nde babɔkɔ. Anɛ ekondelɛ bahi ba mpela tii ndye eyali botumba, botumba bɔkɔɔ bongulu: bopitanɛ bonkuma.»