1 Yesu aetɛ bɛnkɔmwa bekinde lyomu la bepe, abapɛ nguya la bonkumu nde liko iiki belimo be bobe la mpe nguya yobikya banto la nkandi. 2 Abatindɛ bahangele Nsango e Bonkumu booki Ndjakomba mpe babikye banto bayali la nkandi. 3 Ababelɛ ngɔnɛ: «Talɔkɔhɔke la yoomba ɛmɔɔ itina iki lɔkɛndɔ: bontuma nkola, mango nkola, mpaki nkola, bɔhɔlɔ mpe nkola; bonto ɔmɔɔ takɔhɔke bihenda bipe. 4 Lokihaka nko nde botumba boonga balwambe, tii nko enga nyo lohenye ndye iko. 5 Kaki banto bangotonɛ yolwamba, loolaka nde imonga iiko, lopupola la buutu bokibɔ nde bekolo bekinyo: engoyala lolambo itina iiki ibɔ.» 6 Ibɔ banɛ bayotaka, baolekake nde ehe ɛmɔɔ la ɛmɔɔ yohangelaka Nsango e Bɔlɔti la mpe yobikyaka banto baayali la nkandi nde bihe binkuma.

7 Nkumu Elode aokɛ bakambo bankuma baleka mpe ayatungyɛ buuke, itina banto baamɔɔ bahangɛ mbɔ Yowane akundwɛ, 8 bankina bahangɛ mbɔ Elia ayɛ, bankina laino mbɔ ntepeli ɛmɔɔ e kala akundwɛ. 9 Elode ayaubolɛ: «Yowane, emi bonto otindaki bopupole bɔtɛ. Yaa ɔkɔ ɔmɔɔ wa emi ndjoka batepela mbo iko inkuma nnɔ?» Nde uuko otila aɛne Yesu.

10 Anɛ inwaki bɛnkɔmwa beki Yesu, bayɛ yɔbɔkɔtɛlɛ wamba nde ikelaki ibɔ. Yesu abakohɛ mpe abatombɛ nde ekele looko lo imonga inɛ yeta ibɔ Besaida. 11 Anɛ yokaki banto ngauko, baoyelɛ. Yesu abaambɛ, abalakɛ itina iiki Bonkumu booki Ndjakomba mpe abikiɛ baayalaki la mpoha babike. 12 Anɛ eha ikɔlɔ ilinga, bɛnkɔmwa lyomu la bepe bayɛ ntute la Yesu mpe babobelɛ: «Inoya banto baiko bankuma, batu itotilaka ndye yokiha nde bihe la bahala baayali ntute la anɛ, batu itotilaka la byomba bi ndɛlɛ, itina anɛ toyali nde ekele.» 13 Yesu ababelɛ: «Lwapa nyo kiika byomba bi ndɛlɛ.» Babobutolɛ: «Toyali nko la mampa itano la nsi ipe. Mɔɔnde olanga totu yohomba byomba itina iiki banto bankuma ?» 14 Banto baayalaki aiko, nko beele botoo, ntute la nkoto itano. Yesu abelɛ bakɛndi laa nde: «Lokihya banto bihoke bi ntuku itano ntuku itano.» 15 Bakelɛ nko ngauko mpe babakihyɛ ibɔ bankuma. 16 Yesu akohɛ mampa ikɔ itano la nsi ikɔ ipe, aileyɛ baiho nde liko, abɔndɛlɛ lɔbɔndɔ lo bokako nde byomba bikɔ, apupolɛ bimpulu bimpulu mpe apɛɛ bakɛndi laa nde kela ibɔ bakapele banto. 17 Balɛ byomba lɛkɛ lɛkɛ mpe bakindɛ. Baambolɛ bimpulu bitikalaki, bayoyɛ bihaka lyomu la bipe bonkundu.

18 Buuna bɔmɔɔ, Yesu ataki nde lɔbɔndɔ ndye ɛmɔɔ e mbombama. Bakɛndi la nde mpe bayalaki ibɔ la nde. Yesu abaubolɛ: «Banto bahangake emi ndjali nnɔ?» 19 Babounoyelɛ: «Baamɔɔ bahangake wɛ Yowane Buuni, bankina wɛ Elia, bankina mpe bahanga wɛ oyali ntepeli ɛmɔɔ nde inɛ i kala angokundwɛ.» 20 Yesu abaubolɛ: «Yaa nyo, lohangake emi ndjali nnɔ?» Petelo aambolɛ: «Wɛ oyali Kilito eeki Ndjakomba.»

21 Yesu abakokomyɛ la boolo tabahangelake la bonto ɔmɔɔ. 22 Abalimboyɛ: «Bona ooki Bonto angɔɔyɛnɛ lyale i bɔnɛnɛ, bangoobotona la baome ba bihe, la nkanga i benkondi mpe la balaki ba bobeko, bangoobolyaka mpe nde bɔkɔlɔ bo behato, angookundwa.» 23 Nkamba ahangelɛ banto bankuma: «Bonto olanga aye mbuha ekimi, ayatonaka nde kiika, abilaka ekulusu ekinde biina benkuma mpe andjelaka. 24 Itina bonto otila abikye lobiko lokinde angoolobungya; bonto ɔnɛ oumeya abungye lobiko lokinde itina ikimi, angoolobikya. 25 Intomba nnɔ ikobata bonto kaki atila akɔhe bokili lonkundu nko nde kiika mpe la mbuha ayundjwa nde kiika mpe aopita lobiko lokinde? 26 Bonto ondjoka la emi la baoyi bakimi nsɔni, Bona ooki Bonto angoobooka la nde nsɔni anɛ enga nde aunwe la nkɛmbɔ ekinde, la eeki Ihe ko la ɛnɛ eki bentomwa be bɔyɛngwa. 27 Ndobela nte nhɔnhɔlɔ, banto bankina bayali anɛ tabangowa nko ɛnɛ Bonkumu booki Ndjakomba.»

28 Bɛkɔlɔ nga mwambi mbuha yotepela ngauko, Yesu akohɛ Petelo, Yowane la Yakɛ, akondelɛ nde la ibɔ nde liko i ngomba itɔbɔndɛlɛ. 29 Aiko ebɔndɛlɛ nde, lɔbɔ loki elongi ekinde lokengwɛ mpe bihenda bikinde byɛlɛ mpɛmbɛ nga bokalyali. 30 Lendaka nko aiko ɛkɔ, banto bape bayɛ yoholola la nde: eyalaki Mose la Elia; 31 bangwɛlɛ la lwɛya looki Ndjakomba mpe batepela itina iiki etwelo ekiinde engokelame Yelusalɛmɛ. 32 Aiko Petelo la ekambi ekinde bangokindɛ ilɔ. Anɛ eha baemwa, bahwɛnɛ lwɛya lonkuma loki Yesu la banto bape baayalaki ntute la nde. 33 Anɛ ya banto baiko bape bakapwa la Yesu, Petelo aohangelɛ: «Bolaki, eyali bɔlɔti toyale anɛ; totonge benganda behato: bɔmɔɔ itina ikyɛ, bɔmɔɔ itina iiki Mose, bɔmɔɔ itina iiki Elia.» Petelo wambɔ taeba la itina i lobo lotepela nde. 34 Nko aiko etepela nde ngauko, ekola e itute iimɛ nde liko, iyɛ yobapema. Baokɛ bɔɔmɔɔ aiko yɔtwa ibɔ nde itute iiko. 35 Lyoi imɔɔ iimɛ mpiko nde itute ikɔ, ihangɛ: «Ɔnɛ ayali Bona okimi ɔhɔlɛ emi, lobookaka!» 36 Aiko eha lyoi yokya, Yesu atikalɛ nko nde kiika. Bakɛndi la Yesu babombɛ ikambo ikɔ nko ibɔ banɛ bayalaki, tabahangela la bonto ɔmɔɔ, biina biiko, inkuma yɛnɛki ibɔ.

37 Pukya, anɛ ehulwaki ibɔ nde ngomba, banto buuke bayɛ yoponanaka la Yesu. 38 Nde boloy buuko, bonto ɔmɔɔ abobɛ: «Bolaki, nkɔbɔndɛlɛ, ondendele bona onɛ okimi, bona nko ɔkɔ ɔmɔɔ oyali la emi. 39 Mbala la mbala, bolimo bɔmɔɔ bobotungyake. Nga boobobuta, bona aoboba la mbala ɛmɔ, aokatwa mpe aotanga nko bɛlɛlu. Bolimo bɔkɔ bopobohenake kwa mpe mbɔkɔ bomboobobute, bobohololake byonge! 40 Mbɔndelɛ bakɛndi la wɛ baboolye, tabakondwa.» 41 Yesu nde ɔnɛ otepela: «Nyo elele e banto epa la nyumeya mpe e bahumu. Ngoyala lenkina la nyo bikeke binga mpe ngolumeya la bihɛlɛlo bye ngauko tii lainga?» Nkamba aobela ihe eeki bona: «Yaka la bona okiɛ anɛ.» 42 Nko bona aokite, bolimo bo bobe bɔbɔkɔyɛ nde nse mpe bobopukuhɛ la nguya mpendja. Yesu aangwelɛ bolimo buuko bo bobe, abikiɛ bona mpe abounoyelɛ ihe ekinde. 43 Banto bankuma nko byɔli la yɛnɛ bɔnɛnɛ booki Ndjakomba.

Nga boyalaki banto bankuma nko nkimo la yɛnɛ mbo inkuma ikela nde, Yesu abelɛ bakɛndi laa nde: 44 «Lookaka bɔlɔti iko yolohangela emi aikekeko: Bangookapa Bona ooki Bonto nde bɛbɔ beki banto.» 45 Yaa nko ibɔ bapotingole mbo inɛ ibabela nde; bababombɛ batina baaki ikɔ tabaoyeba; ibɔ mpe baokɛ bɔɔmɔ yobuubola ikambo ikɔ.

46 Bakɛndi la nde bawɛ lɔmpɛnyɛ kela baebe oleka baninga. 47 Yesu aebɛ bikaneno bikibɔ, akɔhɛ bona o nkɛnkɛ, aboemyɛ ntute la nde, 48 mpe abahangelɛ: «Bonto ongwambɛ bɔna ɔnɛ nde lina ikimi, angonyambɛ emi kiika; mpe bonto ongonyambɛ, angwambɛ bonto onsokolaki; itina bonto openda bɔkɛ aiko eyali nyo, uuko wambɔ oyali bonto o bɔnɛnɛ.»

49 Nko aikɛkɔ, Yowane nde ɔnɛ obobela: «Bolaki, twɛnɛki bonto ɔmɔɔ apandja belimo be bobe nde lina ikiɛ; mpe nso totilaki tobohuke, itina nde apoyali nde bɔlɔngɔ bokinso banto baakoyela.» 50 Yesu abuunoyelɛ: «Talobohukake, itina bonto opolotone, ayali looko lɔmɔɔ la nyo.»

51 Anɛ ekitaki elaka baumole Yesu nde bokili bɔnɛ, Yesu aangɛ atu nko ndjela e Yelusalɛmɛ. 52 Atindɛ bentomwa lontondo looki nde. Bentomwa batɛ, baɔtwɛ nde ehe ɛmɔɔ eki ba Samalia kela batu itɔhɔlɔ eyeelo ekinde. 53 Banto baiko tabalanga baboambe, itina nko aoleke Yelusalɛmɛ. 54 Anɛ ɛnɛki ibɔ ngauko, bakɛndi laa nde Yakɛ la Yowane bahangɛ: «Nkolo, olanga twete ntyɛ yuume nde liko kela lobatumbe?» 55 Yesu abalendɛ mpe abapɛlɛ. 56 Nkamba ibɔ banɛ bayotaka nde ehe enkina.

57 Nde ndjela, bonto ɔmɔɔ abelɛ Yesu: «Emi ngookoyela ndjoko inkuma inga wɛ otu.» 58 Yesu abobelɛ: «Bebanga bayalake la bankunda ba yoyaiha mpe mpulu nde liko iyalake la baimbu; Bona ooki bonto, nde, apokati nkya la ndye yolalya bɔtɛ.» 59 Ahangelɛ bonto onkina: «Ondjeele.» Bonto uuko abuunoyelɛ: «Onhenye laino ntu itokunda ihe ekimi.» 60 Yesu abobelɛ: «Hena baawɛ bakunde baakiibɔ baawɛ; nga la wɛ, kɛndɛ itwebya Bonkumu booki Ndjakomba.» 61 Bonto onkina abobelɛ: «Nkookoyeela, Nkolo, yaa onhenye ntu laino yoheha botonga bokimi.» 62 Yesu abunoyelɛ: «Bonto ohobuta loongo mpe ayunwa yolenda lombuha, apwɛli la Bonkumu booki Ndjakomba.»