1 Bɔkɔlɔ bɔmɔɔ, Yesu ayalaki nde lɔbɔndɔ looko lɔmɔɔ. Anɛ eheyaki nde yɔbɔndɛlɛ, ɔmɔɔ oki bakɛndi laa nde aobelɛ: «Nkolo, otolake yɔbɔndɛlɛ nga bolakaki Yowane bakɛndi la nde.» 2 Yesu ababelɛ: «Nga lɔbɔndɛlɛ, lotepelaka ngɔnɛ: Papa, banto baebe oyali Boyɛngwa, Bonkumu bokiɛ boye, 3 otopaka wengi buuna ilɛ yɛɛli la buuna buuko, 4 otolibole bahumu baakiinso itina nso kiika tolibolake baaki banto batokela bobe. Totohenyake tɔkɔ nde bolengoli.» 5 Yesu aunwɛ yobabela: «Kaki ɔmɔɔ okinyo ayali la boninga mpe ayoli yootila la nginangina e botyo mpe aobobela: "Boninga la emi, ɔnsɔmbya mampa ihato, 6 itina boninga ɔmɔɔ okimi ayali nde lɔkendɔ aoyume yonkitela mpe mpokati yoomba yobopa." 7 Mpe kaki boninga uuko oyali nde botumba aobobela: "Tontungyake! botumba bongolipamɛ; emi la bana tongolalɛ; mpɔɔhe yolangwa kela nkopa mampa." 8 Ndobela: la kaki talangwa itina i ininga ikibɔ kela aopa mampa iikɔ, akolangwa nko ndangwa kela aopa byomba binkuma biyali la nde mpoha itina boninga aopenda itungya. 9 Ekɔiko emi ndjolobela: Lobondelaka, bangoolopa; lotilaka, longobata; lɔkɔkɔmɔkɔ ekuke, bangoololipoya. 10 Itina bonto onkuma obondela bopake, otila abatake, mpe ɔkɔkɔmɔ babolipolake. 11 Nga boyali nyo aiko, ihe lina nnɔ epɛɛ bona ikati* nga akana nsi? 12 la mpe ɔnɛ opɛɛ bona nkoto nga akana bokele nnɔ? 13 Ɛkɔiko, kaki nyo baayali banto ba bobe, lweba yopa bana baakinyo byomba bi bɔlɔti, Ihe ekinyo eyali nde lobola tangopa Bolimo bo Bɔyɛngwa eka banɛ bobondela?»

14 Buuna bɔmɔɔ, Yesu apandjaki bolimo bo bobe bokityaki bonto luumi. Anɛ eha nde abopandja, bonto oyalaki luumi aobanga yotepela mpe banto bayuula nko nkimo. 15 Yaa nko baamɔɔ banto bayalaki aiko baohanga: «Nde apandja belimo be bobe la nguya eeki Bezebule, bonkondi booki belimo be bobe.» 16 Bankina balangaki balenge Yesu baoboubola abaɛnie elembetelo mbo nde auma eka Ndjakomba. 17 Yesu aebaki bikaneno bikibɔ, nde ɔnɛ oyobabeleka: «Bonkumu bonkuma boyakapolɛ bongotyangwa mpe betumba bɛngɔkɔ bɔmɔɔ la bɔmɔɔ. 18 Kaki Satana aoyamunia, bonkumu bokinde bongoyemala ngamo? Itina nyo lohanga mbɔ emi mpandja belimo be bobe la nguya eeki Bezebule. 19 Yaa kaki emi mpandja belimo be bobe la nguya eeki Bezebule, aiko bakɛndi la nyo babapandja la nguya eeki nnɔ? Ibɔ kiika bangooyala ntɛndi ikinyo. 20 Kaki emi mpandja belimo be bobe la nguya eeki Ndjakomba, aiko wambɔ Bonkumu booki Ndjakomba bongolokitelɛ. 21 Kaki bonto o nguya ahɛndjɛlɛ botumba bokinde la bakɔngɔ la ngwa ikinde, byomba bikinde bibombi bɔlɔti. 22 Yaa kaki bonto ɔnɛ obopenda nguya aoya yobomunia mpe aobolonga, aobɔpɔmɔlɔ bakɔngɔ la ngwa baamba nde atikelake botema, mpe lokutu loomba nde atane aokapa. 23 Bonto opa toyali la emi looko lɔmɔɔ ayali bonto oontila la ikambo mpe bonto opohanganie la emi, ootyangola.»

24 «Kaki bolimo bo bobe bohola nde byonge biki bonto, botolyaleke nde batungu baapa la yomba, yotilaka looko lɔɔhɔ nde yɔlya. Kaki bohwɛnɛ bopobate ndye yɔlya, bayabelɛ: "Bɔlɔti nyunwe nko nde botumba bokimi, bɔnɛ boyalaki emi." 25 Anɛ eha bolimo bo bobe buunwa, botana baɔmbɛ botumba mpe babɔngyɛ bɔlɔti. 26 Nde ɔnɛ otaka yɔkɔhɔ belimo benkina nsambo byopenda la bobe, bɛyɔtwa mpe byokihi mpiko. Byonge biki bonto uuko byoyunwa yokita bobe epapo, penda ndenge eyalaki ntondo.»

27 Nko atepela, buunto ɔmɔɔ auleyɛ lyoi nde ngina e banto baiko mpe abobelɛ: «Ɛmɛngɔ la nyango ekobotaki mpe ɛkɔlɔmyaki.» 28 Yesu abekolɛ: «Ɛmɛngɔ ependa eka banto banɛ baoka Lyoi iiki Ndjakomba mpe bakela itinda Lyoi ikɔ.»

29 Banto buuke bayaki yoka Yesu, aobabela: «Ekeke ɛnɛ e lɔlɔkɔ eyali bobe. Baibola babaɛnie mbo i mpapo. Tabangwɛne mpapo enkina nko ɛnɛ ekelamelaki Yona. 30 Itina, nko nga boyalaki Yona elembetelo eka banto ba Niniwe, Bona oki bonto angooyala mpe elembetelo eka ekeke ɛnɛ e lɔlɔkɔ. 31 Buuna bo bɔntɛndi, buunto oyalaki bonkondi booki Saba angoohamba nde la ekeke ɛnɛ e lɔlɔkɔ mpe angɔɔbɔkɔyɔ, itina nde aumaki nde nsuki eeki bokili yoka wanya booki Salɔmɔ. Lolendaka, bonto oyali anɛ apenda Salomo kwali. 32 Buuna bo bɔntɛndi, banto ba Niniwe bangooyemala ibɔ la ekeke ɛnɛ e lɔlɔkɔ mpe bangoobɔkɔyɔ, itina ibɔ babɔngyaki bihɛlɛlo bikibɔ anɛ yokaki ibɔ ilako iiki Yona. Lolendaka, bonto oyali anɛ apenda Yona kwali.»

33 Yesu aunwɛ yobabela: «Bapopɛtyake moinda kela batike nde nongi e mbomama, batikake nde ikondi kela banto banɛ baɔtwa nde botumba baɛnɛ lwɛya.» 34 «Liho ikiɛ iyali moinda eeki byonge bikiɛ. Kaki baiho bakiɛ baɛnɛ bɔlɔti, byonge bikiɛ binkuma mpe biyali nde lwɛya. Yaa kaki liho ipwɛne bɔlɔti, la byonge bikiɛ mpe biyali nde buulima. 35 Ɛkɔiko, lenda bɔlɔti kaki lwɛya loki byonge bikiɛ taloyali buulima. 36 Kaki byonge bikiɛ binkuma biyali nde lwɛya, nkola la endjwa ɛmɔɔ nde buulima, bingoyala binkuma nde lwɛya nga ndenge ɛkwɛlya moinda la lwɛya lokinde.»

37 Nko Yesu atepela, bofalisaya bɔmɔɔ aboetɛ atu yɔɔlɛ ekande. Aɔtwɛ nde botumba mpe akihɛ nde mesa. 38 Bofalisaya aulɛ nkimo liyɛnɛ mbɔ Yesu takola bakata ntondo yɔlɛ. 39 Yesu abobelɛ: «Nyo bafalisaya, lokolake bakɔpɔ la saani nde bongala, yaa nde betema loyolɛ la iiba mpe la bobe. 40 Bitula! Lokamba uuko okelaki bongala takela la ntei? 41 Lopaka byomba biyali nde betema bekinyo, nkamba binkuma bingɔpɛtwa ekanyo.»

42 «Ihɛi la nyo bafalisaya, nyo baapaaka eteni e lyomu eeki nholo la batungulu la binkuma bitɔkɔ nde ngonda, yaa lwɛnɛke bosembo la lolango loki Ndjakomba nko itina. Lopokelaka lontondo bosembo la lolango nko bopela biiko bipaka nyo.»

43 «Ihɛi la nyo, bafalisaya, nyo baalangaka lokihe nde bikili bi ntondo nde betumba be lɔbɔndɔ, mpe lolangake banto balolikelake nsako nde beloy. 44 Ihɛi la nyo baayali nga bapoku ba banto baapa la ndembetelo mpe banto banyatake bakɔ itina bapwebe.»

45 Bolaki booki bobeko bɔmɔɔ aobela Yesu: «Bolaki, aiko eya wɛ otepela ngauko, ototola la nso!» 46 Yesu nde ante: «La nyo mpe, balaki baaki bobeko, ihɛi la nyo, nyo babilyaka banto bekumba be bolito mpendja, mpe nyo kiika lɔpɔbɛnge nkya bona o ema. 47 Ihɛi la nyo batongelaka ntepeli baombo, eke ngɔkɔ ba ihe baakinyo banto banɛ babalyakaki. 48 Lwɛnia mbɔ luumeya mbo ikelaki ba ihe baakinyo, itina ibɔ balyakaki ntepeli, mpe nyo lobatongela baombo. 49 Ɛkɔiko Ndjakomba, la wanya bokinde, ahangaki: "Ngobatindela ntepeli la bɛnkɔmwa; bangoolyaka baamɔɔ mpe bangɔɔnyɔkɔlɔ bankina". 50 Ɛkɔiko bakila baaki ntepeli inkuma iwɛ ima ibangakako iiki bolongo bangooyala nde bɛtɛ beki banto ba ekeke ɛnɛ e lɔlɔkɔ, 51 ima nko bakila baaki Abɛlɛ tii bakila baaki Yakalia olyakaki ibɔ ihambi i etumbelo la Ilɔngɔ i Ndjakomba. Ndobela nte hɔlɔ, bakila baiko bangooyala nde bɛtɛ beki banto ba ekeke ɛnɛ e lɔlɔkɔ.»

52 «Ihɛi la nyo, balaki baaki bobeko, itina nyo lohekyɛ yɔtwɛlo eeki ndjebi: nyo kiika talɔtwa mpe balangaki baɔtwe, lobahukaki.»

53 Anɛ yolaki Yesu nde botumba buuko, balaki ba bobeko la bafalisaya babookelɛ nkɛlɛ mpe baboubole buuke bo biibo belenda bakambo ndenge la ndenge, 54 bolengɛ kela bobate la mbo i bobe nde inɛ itepela nde nkamba babopunde.