1 Yesu auleyɛ baiho, aɛnɛ banto batika bakapo baakiibo nde itonga. Baayalaki bekulaka. 2 Aɛnɛ mpe etuka ɛmɔɔ e bɔmbɔlɔ atika mpata ipe. 3 Ɛkɔiko abaebyɛ: «Ndobeela nte nhɔhɔlɔ mpendja, etuka iiko e bɔmbɔlɔ angopɛ penda bankuma baambotike bakapo. 4 Itina baiko bankuma bambɔɔkɔhe nde bɔhɔlɔ bo liko bopa ibɔ la itina, bootika nde itonga; endaka buunto uuko o etuka, opa la ibati angotikɛ bɔhɔlɔ bonkuma booyali laa nde itina yobika.»

5 Banto bankina batepelaki itina iiki Tɛmpɛlo, ndenge eyalaki ɛkɔ ilɔ, la mbɛi i babɔkɔ la mpe la byomba biipaki ibɔ bakapo. Yesu aobabela: 6 «Nde biina bɛnɛ byoye, biiko binkuma byɛnɛ nyo aiko, tengotikala nkola la ibɔkɔ imɔɔ nde liko iiki inkina: binkuma bingobulumwa.»

7 Bakɛndi la nde babuubolɛ: «Bolaki, bakambo bakɔ bangookelama lainga, mpe elembetelo engolakya mbɔ balanga bakelame nnɔ?» 8 Yesu abaunoyelɛ: «Lolendaka bɔlɔti mpe bonto ɔmɔɔ taloundjoyake! Itina banto buuke bangoya nde lina iikimi, bangoohanga: "Masiya wambɔ emi, " mpe: "Elaka yoyela!" Talobayelake. 9 Kaki longookɛ nsango i bitumba la i boyongo, talookake bɔɔmɔ. Mbo iiko inkuma ingookelama lontondo, yaa tengoyala nko mbala ɛmɔɔ nsuki e bokili.» 10 Abahangelɛ: «Ehe ɛnɛ engomuna la ehe eni, bonkumu bɔnɛ bangoomuna la bonkumu boni. 11 Babu bangoobilima la nguya, mpe ndye buuke nkandi ndenge la ndenge la ndjala, bakambo ba bɔnɛnɛ bangookelama mpe bilembetelo bi bɔnɛnɛ nde liko. 12 Yaa, ntondo eeki bakambo baiko bankuma, bangoolobuta, bangɔɔlɔnyɔkɔlɔ; bangoololoba nde betumba be lɔbɔndɔ, bangoolotungya nde bɛlɔkɔ; bangoolotomba lontondo looki nkumu la bɛndɛlɛ-mboka itina iiki lina ikimi. 13 Uuko engolopa mpe epohe yotatola itina ikimi. 14 Taloyatungyake yotila lwebe ndenge enga lohambe. 15 Emi kiika ngoolopa bitumo biinga lotepele la wanya bɔmɔɔ bopa banto bapololange tabangɔhɔ yotona la yoengola. 16 La ba ihe la ba nyango ikinyo, la bahibotonga la baninga baakinyo bangɔɔlɔtɛkɛ mpe bangootinda banto balyake baamɔɔ baakinyo. 17 Banto bankuma bangooluuna itina iiki lina iiki emi. 18 Nkya ngauko, la iyo imɔɔ iiki bɛtɛ bekinyo taingobunga. 19 Loyalaka nko la mpimba, aiko longoobata lobiko.»

20 «Anɛ enga lwɛne bɛlɔngɔ be bahola beolinga Yelusalɛmɛ, lwebaka wambɔ epiitanelo eeki nde yokita. 21 Nde elaka iiko, banto baangoyala nde Yudeya balotaka nde ngomba; baangoyale nte nde imonga i Yelusalɛmɛ baolaka; baangoyala nde ngonda tabaunuake nde imonga! 22 Itina wambɔ bɛkɔlɔ biiko bengoyala bɛkɔlɔ be yohamba, bɛkɔlɔ benga mbo inkuma ikɔtɔmɔki ikokyame. 23 Biina biiko, engoyala ihɛi buuke itina iki bainto bangoyala la baemi la banɛ bangɔlɔmya, itina lyale ingoyala bɔnɛnɛ nde bokili lonkundu mpe nkɛlɛ eeki Ndjakomba ɛngɔkɔya itina iki banto baiko. 24 Bangoobalyaka la ibaka, bangoobatomba balɛngɛ nde bihe binkuma biiki babutu; bapakano bangoonyata Yelusalɛmɛ tii engokite elaka ekibɔ.»

25 «Bilembetelo bingoyɛnia nde inyɛlɛ, nde nsɔngɛ la nde baoti. Mpe nde bokili, bihe bingoyala la bɔɔmɔ mpe bingolota lokito la bonketi booki ndjale, 26 banto bangoowa la bɔɔmɔ nko la yokanela bahɛi baangɔkɔ nde bokili; itina nguya iyali nde lobola ingonyonga. 27 Nkamba lɔngɔyɛnɛ Bona ooki Bonto aoye nde batute la nguya enkuma mpe la lokumo. 28 Kaki bilembetelo biiko binkuma byobanga yɛnia, lwemalaka mpe luleyaka bilongi, itina wante lobiko lokinyo loyɛ ntute.»

29 Nkamba nde ɔnɛ obapa lwɛlya lɔnɛ: «Lolendaka bote bo figi la mpe bete bɛnɛ benkina benkuma. 30 Kaki biobanga yolia nkaha, lwebake nyo kiika nko la lolendo mbɔ eleko e waane bo nguya eyɛ ntute. 31 La nyo mpe nko ngauko, mbɔkɔ lɔhwɛnɛ bakambo baiko bankuma baokelama, aiko loyebaka wambɔ Bonkumu booki Ndjakomba boyɛ ntute. 32 Ndohangela nte nhɔhɔlɔ mpendja, ekeke ɛnɛ tengoleka bakambo baiko nkokelama. 33 Liko la nse ingoleka, baoy baatepela emi tabangoleka.»

34 «Lolendaka weema bookinyo. Bɛtɛ bekinyo tabepitanake nko la ntɛkɔ, la ɛmɛlɛlo e baana mpe la mpoha e bokili, ntiki buuna bɔkɔ bo bɔntɛndi bongooya nkoeba, 35 lonsai ilonga imɔɔ; itina bongooya eka banto baayali nde bolongo bonkuma. 36 Talolalake, lɔbɔndɛlɛkɛ bilaka binkuma, kela longobate nguya yolonga bakambo baiko bankuma baoye, kela mpe longwebe yemala ki lontondo looki Bona ooki Bonto.»

37 Yesu ambooyalake la waane nde Tɛmpɛlo emba nde alakake, nkamba la ikɔlɔ ayoli kela alekye botyo nde ngomba ɛnɛ eetaka ibo Ngomba e Olive. 38 Mpe la nte belonge, banto bankuma, bambooyakɛ nde Tɛmpɛlo yobooka.