1 Aiko yoyole Yesu nde tɛmpɛlo, ɔmɔɔ oki bakɛndi la nde abobelɛ: «Bolaki, lenda betindo be babɔkɔ banɛ, lenda betindo be betumba biiko!» 2 Yesu abobelɛ: «Wɛnɛ betumba biiko be bɛnɛnɛ? Tengotikala nkola la ibɔkɔ imɔɔ nde liko iiki inkina: binkuma bingobukutana.»

3 Yesu akihaki nde ngomba e Ba olive ndjɛlɛlɛ la tɛmpɛlo. Petelo, Yakɛ, Yowane la Andele bayalaki nko ibɔ la nde, babuubolɛ: 4 «Otohangele, bakambo bakɔ bangookelama lainga, mpe elembetelo engoolakya mbɔ balanga bakelame nnɔ.»

5 Yesu ababelɛ: «Loyalaka la nkɛpɔ mpe la bonto ɔmɔɔ taloundjoyake. 6 Itina banto buuke bangoya nde lina iikimi mpe bangohanga: "Masiya emi nde ɔnɛ!" Mpe bangoyuundjoya banto buuke. 7 Anɛ enga looke nsango i bitumba mpe biimiimi be bitumba, talookake bɔɔmɔ; iiko inkuma yɛɛli ikelame, yaa tengoyala laino nsuki e bokili. 8 Bokundi bɔnɛ bongomuna la bokundi boni, bonkumu bɔnɛ bangoomuna la bonkumu boni; babu bangoobilima la nguya nde ndye buuke mpe ndjala ingoyala. Bakambo baiko bangoyala nga ibangako i lyale i ilamatwa. 9 Nga la nyo, loyalaka la nkɛpɔ nyo bamɛlɛ. Bangolotomba nde bihambelo mpe bangolokula bebambo nde betumba be lɔbɔndɔ. Longosamba ntondo eeki bɛndɛlɛ mboka la nkumu itina iiki emi, engolopa mpe epohe yotatola itina ikimi. 10 Itina etindama ntondo nko Nsango e Bɔlɔti elakeme eka banto bankuma. 11 Anɛ enga balobute itina iki balotombe nde bihambelo, taloyatungyake la yeeba inga nyo lotepele, yaa lotepelaka nko ingooyola nde elaka iiko, itina tainguma eka nyo, ingoyuma eka Bolimo bo Bɔyɛngwa. 12 Bohibotonga angokapa bohibotonga ookinde tii nde iwa, ihe angokela bona nko ngauko ko bana bangoyemalela baboti baakibɔ mpe bangobalyaka. 13 Banto bankuma bangolotona itina iki lina iiki emi. Yaa boonto ongoyutela tii nde nsuki, angobika.»

14 «Anɛ enga lwɛne ɔnɛ weta ibɔ "bobe boopenda": booya yoyakihya ndye ɛɛpwɛli bɔkɔ la yoyala – bonto ootanga atingolaka! – aiko, banɛ bangoyala Yudeya, balotaka nde ngomba; 15 bonto oongoyala nde mbalahani ɛnɛ liko e botumbo tahulwake yota yɔkɔhɔ yomba nde botumba; 16 mpe bonto oongoyala nde ngonda, taunwake nde botumba itɔkɔhɔ ehenda ekinde. 17 Biina biiko, engoyala ihɛi itina iki bainto bangooyala la baemi la banɛ bangɔlɔmya! 18 Lɔbɔndɛlɛ Ndjakomba kela bakambo baiko tabakelamake nde eleko e mpyɔ! 19 Itina , lyale iingoyala biina biiko, iipa taikelami ima bobangɛ Ndjakomba yokela bokili, tii lɔlɔkɔ, lyale i ngauko taingoyala lenkina. 20 Nkolo tapokutole biina biiko, nko bonto oopobika. Yaa itina iiki banɛ bahɔlɛ nde, akutolɛ biina bɛkɔ. 21 Kaki bonto aolobela: "Lolenda, Masiya ayali anɛ!" laa mpe: "Lolenda, ayali mpeni!", taloboumeyake. 22 Itina la Masiya i beyanga la ntepeli i beyanga bangoyoola, bangokela mpapo la bihumwa kela baundjoye la banɛ bahɔlɔmɛ, nga yɔhɔ yokelama. 23 Nga la nyo, lɔyalaka la nkɛpɔ! Ngolobopolɛ inkuma botako.»

24 «Yaa nde biina biiko, mbuha e lyale iiko, waane bongoyuula, wɛɛli tabongoongala, 25 baɔti bangɔkɔ ima nde liko mpe nguya iiyali nde lobola ingonyonga. 26 Nkamba, bangɔyɛnɛ Bona ooki Bonto aohulwe nde batute la nguya enkuma mpe la nkɛmbɔ. 27 Angotinda bentomwa beekinde mpe angohangania baahɔlɛ nde bakono bankuma banɛi, ima nde nsuki e nse tii nde nsuki e liko.»

28 «Lotingola lwɛlya lɔnɛ loki bote bo figi: Aiko eyali etape boyoyo mpe yoolya nkaha, lwebake nyo kiika nko la baiho mbɔ eleko e bohenge* bɔyɛ ntute. 29 La nyo mpe nko ngauko, mbɔkɔ lɔhwɛnɛ bakambo baiko baokelama, aiko looyebaka wambɔ Bona ooki Bonto ayɛ ntute, ntondo i bikuke biikinyo. 30 Ndohangela nte nhɔhɔlɔ mpendja: ekeke ɛnɛ tengoleka bakambo baiko bankuma nkokelama. 31 Liko la nse ingoleka, baoy baatepela emi tabangoleka.»

32 «Nde iilenda buuna la ngonga, bonto la ɔmɔɔ apwebe, eyale bentomwa be liko, eyale la Bona; nko Ihe nde amɛlɛ ɔnɛ weba. 33 Loyalaka la nkɛpɔ, talolalake, itina lopwebe buuna bongoya elaka iiko. 34 Engoyala nko nga bonto ɔmɔɔ ooli lɔkɛndɔ: ahenyɛ botumba bokinde mpe apɛ bahali baakinde bonkondi booki bɔkɔ, aɛniɛ bonto la bonto bohala bokinde mpe abelɛ bɔhɛndjɛli talaalake. 35 Talolalake, itina lopwebe elaka engoya bomongo botumba: laa la ikɔlɔ, laa la ngina e botyo, laa la belonge, laa la nkɛhɛ. 36 Kaki ahoola hohomo, taolotana lolaali. 37 Bakambo baiko balobela emi aiko, mbela mpe banto bankuma bakɔ: Talolalake!»