1 Yesu aumɛ aiko, mpe atɛ eka ibɔ. Bakɛndi la nde baboyelɛ. 2 Anɛ ekitɛ buuna bo sabata, alakɛ nde botumba bo lɔbɔndɔ. Banto baabokaki bakulɛ nko bakoto. Bahangɛ: «Aobata inɛ nko? Ɔnɛ ndenge e waanya bobopayemɛ nɔ, mpe mpapo ye ngɔnɛ ikelama nde bɛbɔ beekinde? 3 Epa nde sapate, bona oki Balia, bohibotonga oki Yakɛ la Yose la Yuda la Simo? Mpe nkana ikinde tatoyali nso la ibɔ anɛ?» Ɛkɔiko ekelaki tababoumeyake. 4 Yesu ababelɛ: «Ntepeli babototyake ndye inkuma imola nko eka ibɔ, nde bokundi bookinde, la nde ikundi iikinde.» 5 Mpiko taɔhɔ yokela la mpapo ɛmɔɔ, nko ndambo e banto ekɔnɔki bayɛ eka nde, abapyɛ bɛbɔ mpe baobika. 6 Yesu akamwɛ la bobya waambi bookibɔ.

La lombuha luuko, Yesu atɛ bihe biiko bi ntute itina iki yolaka. 7 Aetɛ bakɛndi la nde lyomu la bape mpe abatindɛ bape bape. Abapɛ bonkumu nde belimo be bobe 8 mpe abakokomyɛ ngɔnɛ: «Talɔkɔhɔke la yomba ɛmɔɔ itina iki lɔkɛndɔ, imola nko bontuma; mampa nkola, mbango nkola, bɔhɔlɔ nde ipɔtɔ iikinyo nkola. 9 Lɔlɔtɔkɔ bikote, yaa talotombake bakakya bape.»

10 Ababelɛ lenkina: «Kaki longokitɛ ndye ɛmɔɔ, lokihaka nde botumba bonga balwambɛ tii nko elaka enga luume aiko. 11 Mpe nga eyali la ehe ɛmɔɔ epatelanga elwambe la mpe telanga elooke, loolaka nde ehe iiko mpe lopupolaka buutu booki bekolo beekinyo. Engoyala lolambo itina iiko ibɔ.» 12 Bakɛndi la nde batɛ yoebyaka la banto bankuma mbɔ baendje bihɛlɛlo. 13 Baolyaki belimo be bobe buuke, mpe baɔlɔki banto buuke ba nkandi bohuku mpe babikaki.

14 Nkumu Elode aokɛ batepela itina iki Yesu, itina lina iikinde yebetanaki epululu. Bamɔɔ bahangaki: «Yowane Buuni angokundwɛ! Ɛkɔiko eyali nde la nguya yokela mpapo.» 15 Yaa bamɔɔ batepela: «Eyali Elia.» Mpe bankina bahanga: «Eyali ntepeli ɛmɔɔ nde inɛ i kala.» 16 Anɛ yookɛ Elode mbo iiko inkuma, ayahangelɛ: «Ɔɔkɔ Yowane! ɛnɛ epupolaki emi bɔtɛ, yaa aokundwa!»

17 Wambɔ Elode nde kiika atindaki babute Yowane, babotungye mpanga mpe babɔtɛye bɔlɔkɔ. Eyalaki itina angolaki Elodiade, waali ɔnɛ we bohibotonga okinde Pilipo. 18 Yowane abelaki Elode: «Epoyali bɔlɔti ɔkɔhe waali ooki bohibotonga okiɛ la ibala!» 19 Elodiade aunaki Yowane mpe alangaki abolyake, yaa taɔhɔ. 20 Elode amboyokakɛ Yowane bɔɔmɔ, aboebaki ayali bonto o sembo mpe o bɔyɛngwa; ambobobatelakɛ. Lombuha lo yobooka, apunwe yoeba ndenge yokela; yaa bombolangakɛ nde abooke. 21 Nko aiko ɛkɔ, buuna bo mbo lohuo bokitɛ, nde buuna bo mbotwa eki Elode, aetɛ banto ba bɔnɛnɛ nde ntɛkɔ, benkondi be bahola la baome ba bihe baaki Ngalilaya. 22 Bona ooki Elodiade o buunto aɔtwɛ mpe aembɛ nsambo; Elode la baayaki nde ntɛkɔ balangaki ndenge eembaki nde. Nkumu abelɛ eboha iiko e buunto: «Ondjotye yomba enkuma elanga wɛ, mpe nkookopa ɛkɔ.» 23 Mpe aotia etio ɛnɛ: «Yomba enkuma eka wɛ ondjotya, nkookopa, eyale la empulu e bokopo bookimi.» 24 Anɛ eolɛ eboha e buunto uuko nde bongala, aubolɛ nyango: «Ndjotye yomba nɔ?» Nyango abobelɛ: «Otya bɔtɛ booki Yowane Buuni.» 25 Eboha e buunto apuhwɛ, aunwɛ eka nkumu mpe abohangelɛ mpoha ekinde: «Ndanga ompa nko aiko ekeeko bɔtɛ booki Yowane Buuni nde saani!» 26 Nkumu aokɛ ihɛi; yaa tangɔɔhɔ lenkina yotona itina i etio eetiaki nde ntondo eeki baayaki nde ntɛkɔ. 27 Nko aiko, nkumu atindɛ ihola imɔɔ nde banɛ babɔhɛndjɛlɛkɛ, abopɛ botindo ayele bɔtɛ booki Yowane Buuni. Ihola iiko atɛ nde bɔlɔkɔ mpe apupolɛ bɔtɛ booki Yowane. 28 Ihola iiko ayelɛ bɔtɛ buuko nde saani mpe apɛ eboha iko e buunto, mpe nde apɛ nyango eekinde. 29 Anɛ eebɛ bakɛndi la Yowane lobo lɔkɔ, bayɛ yɔkɔhɔ ebembe ekinde mpe batɛ itokunda.

30 Bɛnkɔmwa bahokamɛ ntute la Yesu mpe babohangelɛ inkuma yoyume ibɔ yokela mpe yolaka. 31 Nga boyalaki banto buuke bata baunwa mpe tababata la ngonga yɔɔlɛ, Yesu abelɛ bakɛndi la nde: «Loyaka toyaɔngɔle nde ekele kela luutye bona o eema.» 32 Bakondelɛ nde waato, batɛ nko ibɔ bamongo nde ekele. 33 Banto buuke babaɛnɛ booli ibɔ mpe baebɛ looko lɔnɛ looli ibɔ. Banto bapuhwɛ lobango nko nde bekolo ima nde bihe biiko binkuma mpe bakitɛ ndye iiko ntondo eeki ibɔ.

34 Anɛ ehulyɛ Yesu nde waato, aɛnɛ banto buuke; abaokelɛ ihɛi itina bayalaki nga botonga bo mpata bopokati bɔhɛndjɛli. Mpe abangɛ yobalaka bakambo buuke. 35 Nga bohilaki buuna, bakɛndi la Yesu bayaundjɛ ntute la nde mpe babobelɛ: «Anɛ toyali nde ekele mpe buuna bohuula. 36 Unoya banto banɛ batu nde bahala la nde bihe biiyali ntute la anɛ kela bahombe byomba bi ndɛɛlɛ.» 37 Yesu ababelɛ: «Nyo bamɛlɛ lobapaa bi ndɛɛlɛ!» Yaa ibɔ babuubolɛ: «Nko toohomba benkuka be nkɛhi nkama ipe mpe tobapa bale?» 38 Yesu ababelɛ: «Loyali la benkuka benga? taloolende.» Batɛ itolenda mpe babobelɛ: «Toyali nko la benkuka betano la nsi ipe.» 39 Yesu abatindɛ bakihye bonto onkuma bihoke bihoke nde baɔmbi. 40 Banto bakihɛ nde bihoke bi bonkama la bi ntuku itano. 41 Yesu akɔhɛ benkuka betano la nsi ipe, auleyɛ baiho nde liko mpe atotyɛ Ndjakomba. Abɔmbɔlɛ benkuka mpe apɛ bakɛndi la nde bakapele banto. Bakapɛ mpe nsi ipe la banto bankuma. 42 Banto bankuma balɛ mpe bakindɛ. 43 Bakɛndi la Yesu baambolɛ bitate bi benkuka la bimpulu bi nsi biitikalaki, bayoyɛ nhandi lyomu la ipe. 44 Baalɛki benkuka bɛkɔ bayalaki banto nkoto itano.

45 La mbala ɛmɔɔ, Yesu atindɛ bakɛndi la nde bakondele nde waato mpe batu ntondo eekinde, looko lo imonga i Besaida, elaka iiko nde amɛlɛ aunoya boloy. 46 Anɛ eha nde aunoya banto, aulelɛ nde ngomba yɔbɔndɛlɛ. 47 Anɛ elingɛ ikɔlɔ, waato bokitɛ nde ngina e ndjale mpe Yesu atikalɛ nde amɛlɛ nde bokonda. 48 Aɛnɛ bakɛndi la nde bapuuhe lenkina yoluka itina bɔmpɛmpɛ bobaunoyaki; aiko elanga nkɛhɛ ɛkie, Yesu atɛ eyali ibɔ itɔkɛndɛkɛ nde liko i bahi mpe alangaki abalekane. 49 Anɛ ɛbɔɛnɛ ibɔ aɔkɛnde nde liko i bahi, baokamba elima mpe baoboba. 50 Itina ibɔ bankuma babɔɛnɛki, mpe baokaki bɔɔmɔ. La mbala ɛmɔɔ, Yesu ababelɛ: «Lokahwa! Eyali emi; talookake bɔɔmɔ!» 51 Akondelɛ nde waato booyalaki ibɔ, mpe bɔmpɛmpɛ bohilɛ. Bakulɛ nko bakoto, 52 itina tababuteya itina i mpapo eeki benkuka: lyanya iiki ibɔ tayɔhɔ yotingola iiko ikelamaki.

53 La lombuha loyopendya ndjale, bayɛ nde ehe eki Ngenezalɛti mpe bahulwɛ aiko. 54 Nko baohulwe nde waato, banto baebɛ Yesu. 55 Banto batɛ lobango nde etuka enkuma mpe bayelɛ banto ba nkandi nde betombo, ndye inkuma yokaki ibɔ Yesu ayali. 56 Ndye enkuma yɔtwaki Yesu, eyale nde bamonga eyale nde bihe la nde bahala, banto bambooyelakɛ banto ba nkandi nde biponanelo, mpe bambɔbɔndɛlɛkɛ Yesu abahene babɛnge nkya lolemba lo ehenda eekinde; mpe bonto onkuma obutaki Yesu abikaki.