1 Mbuha e biina, Yesu aunwɛ Kapalanaumu, banto baokɛ nsango mbɔ ayali nde botumba. 2 Bayɛ buuke yohokama, mpe la ntondo e buuho botumba ndye e yoemala teyala. Yesu abalakɛ Nsango e Bɔlɔti. 3 Nko aiko, banto baboyelɛ bonto ɔmɔɔ o ɛhɛlɛ onga banto banɛi babilɛ. 4 Nga boyalaki lyale yokita eyali nde, itina i banto buuke, bakondelɛ nde nsamba, batondolɛ itundu mpe bahuloyɛ ɛhɛlɛ ndye eyalaki Yesu, la lokala lokinde. 5 Yesu aɛnɛ waambi booki ibɔ, abelɛ ɛhɛlɛ: «Bona oki emi, basumu baakiɛ bangolibwɛ.» 6 Bamɔɔ balaki ba bobeko baayalaki aiko, bakihɛ mpe babangɛ yoyabela nde betema: 7 «Itina iitepela bonto ɔnɛ ngɔnɛ nɔ? Atoola Ndjakomba. Ɔnɛ ɔɔhɔ yolibola bahumu nɔ nga teyala Ndjakomba nde amɛlɛ?» 8 Yesu tatɛmɛ yweba bikaneno biiyalaki la ibɔ, ababelɛ: «Itina nɔ iyali nyo la bikaneno bi lolenge luuko nde betema bekinyo? 9 Yobela ɛhɛlɛ: "Basumu bakiɛ bangolibwɛ", laa yobobela: "Langwa, kɔhɔ lokala lookiɛ mpe kɛndɛ" yomba eependa lyale nɔ? 10 Yaa, itina iki lwebe mbɔ Bona ooki Bonto ayali la bonkumu nde bokili bo yolibola basumu», abelɛ ɛhɛlɛ: 11 «Nkobela, langwa, kɔhɔ lokala lookiɛ, inwa eka wɛ!» 12 Nko aiko ɛkɔ, ayaemyɛ, abilɛ lokala lokinde mpe aolɛ ntondo eeki banto bankuma. Bautɛ byɔli, babangɛ yokumya Ndjakomba mpe bahangɛ: «Tatwɛni lɔnɛ!»

13 Yesu aolɛ lenkina, atɛ looko lo ndjale e bɔnɛnɛ. Boloy bonkuma boyɛ ekaande mpe abalakɛ. 14 Anɛ yoleke nde, aɛnɛ Lewi, bona oki Alafe akihi nde botumba bo mputi. Abobelɛ: «Ondjele!» Aemalɛ mpe aboyelɛ. 15 Nga bokihaki Yesu nde mesa yɔlɛ byomba nde botumba booki Lewi, buuke bo bataakoli ba mputi la banto bankina ba bahumu bakihaki nde mesa ɛmɔɔ ibɔ la nde mpe la bakɛndi la nde, bamboboyelakɛ bayalaki buuke. 16 Balaki ba bobeko baayalaki Bafalisaya, babɔɛnɛ alɛ nde la bataakoli ba mputi la banto ba bahumu, bayɛ yobela bakɛndi la nde: «Itina nɔ ilɛ nde nde la bataakoli ba mputi la banto ba bahumu?» 17 Anɛ eokɛ Yesu, ayɛ yobabela: «Banto baapa la nkandi bapotilake nkanga, nko baayali la nkandi. Ntiya yweta banto ba sembo yaa ndjaki yweta banto ba bahumu.»

18 Bakɛndi la Yowane la Bafalisaya bambookilakɛ. Banto bayɛ yuubola Yesu: «Itina nɔ bakɛndi baki Yowane la Bafalisaya bakilake, baakiɛ bapokile?» 19 Yesu ababelɛ: «Lokanena elaka eekihi baamboye ntɛkɔ e ibala ibɔ la mbali, nko baokila byomba? Elaka enkuma eyali ibɔ la mbali, bapɔɔhe yokila byomba. 20 Yaa elaka yoye, anɛ enga mbali aume; bangokila. 21 La bonto ɔmɔɔ apɔɔhe yohamba ehenda e ntɛmu la e tɛkɛ; nga ngauko, etate ɛnɛ e ntɛmu engoyatola etate ɛnɛ e tɛkɛ mpe engopenda ywatwa. 22 La bonto ɔmɔɔ apɔɔhe yotika baana ba bɔntɔngu nde bikutu bi kala; nga ahotika, baana baoyatola bikutu bi kala mpe la baana la bikutu byopitana; batikake baana ba ntɛmu nko nde bikutu bi ntɛmu!»

23 Buuna bo sabata bɔmɔɔ, Yesu alekɛ nde ngonda e muma i bele*. Nde ndjela, bakɛndi la nde babangɛ yonika bele. 24 Bafalisaya babobelɛ: «Lenda, itina nɔ ikela bakɛndi la wɛ ipa bobeko booki nso botinde nde buuna bo sabata?» 25 Yesu ababelɛ: «Talotangi laino iikelaki Dawidi, anɛ eyalaki nde la mpoha mpe la ndjala nde la baayalaki la nde? 26 Anɛ yɔtwaki nde nde botumba bo Ndjakomba nde elaka eeki Nkanga e bonkondi Abiatale. Mpe aɔlɛ mampa i bakapo iilɛkɛ nko Nkanga i Ndjakomba, mpe aopa la banto baayalaki la nde?» 27 Yesu ababelɛ: «Sabata ekelamaki itina iki bonto; bonto takelama itina iki sabata. 28 Ɛkɔiko, Bona oki Bonto ayali bonkondi booki la sabata.»