1 Nkamba, Yesu abalakɛ nde ndjɛlya: «Bonto ɔmɔɔ aonɛ elanga e vino; akombɛ ɛkɔ, akelɛ booko bo yoama muma i vino mpe atongɛ eliko itina iiki yɔhɛndjɛlɛ. Apɛɛ bahali ba bilanga kela baputele ɛkɔ, mpe nde kiika atɛ lɔkɛndɔ. 2 Anɛ ekitaki eleko e yonika muma, atindɛ bohali bɔmɔɔ eka baputeli kela babopaa iikinde muma i vino. 3 Yaa baputeli baiko babutɛ bohali buuko, babokulɛ mpe babounɔyɛ bapombo botoo. 4 Bɔmɛlɛ elanga aunwɛ yotinda bohali bonkina; la nde mpe babokulɛ nde bɔtɛ mpe babohabolɛ. 5 Atindɛ bosali bonkina, la uuko, babolyakɛ; bamɔɔ buuke bakulamaki loli mpe balyakaki banɛ bankina. 6 Nhuki e bonto ootikalaki la bɔmɛlɛ elanga nko bona ookinde o loondo o lolango. Abotindɛ bonto o nsuki, itina ayahangelaki mbɔ: "Bakoomanga bona ookimi." 7 Yaa baputeli bayabelɛ ibɔ la ibɔ: "Lenda bonto oongotikala la lokutu! Loyaka, tobolyake, kela lokutu lokite looki nso!" 8 Ngauko, babutɛ bona, babolyakɛ mpe babobokɛ nde bongala bo elanga e vino.

9 «Bɔmɛlɛ elanga iiko e vino angookela nnɔ? Angooya, angoolyaka bahali baiko mpe angoopa elanga iiko e vino eka baputeli bankina. 10 Talotangi laino Nkɔti ɛnɛ:

"ikondi inɛ yee batongi ba botumba baumolake

ikinɛ yookita ikondi i ndombe ibuti botumba la bonkundu.

11 Uuko eyali waango booki Nkolo,

eka nso eyali ɛɛnwa!"»

12 Bakondi baaki Bayuda batilɛ ndjela yobuta Yesu, itina baebaki mbɔ atepelaki lwɛlya luuko itina iiki ibɔ. Yaa baokaki banto bɔɔmɔ; babohenɛ mpe bonto la bonto ayaunoyɛ.

13 Batindelɛ Yesu bamɔɔ Bafalisaya la banto baaki Elode babɔlɛbɛle ilonga la mbo itepela nde. 14 Babobelɛ: «Bolaki, tweba mbɔ wɛ otepelake nhɔhɔlɔ; mpe opolotake bonto itina opelendake bilongi biiki banto, yaa olakake ndjela iiki Ndjakomba nhɔhɔlɔ. Otohangele, bobeko booki nso botopa ndjela topute mputi eeki Kaisalo laa nkola? Tɔɔhɔ yoputa laa tatoputake?» 15 Yesu aebaki boyali ibɔ bilongi bipe; ababelɛ: «Londenga itina nɔ? Londjele nkɛhi ɛmɔɔ, ndende.» 16 Baboyelɛ ɛmɔɔ mpe Yesu abaubolɛ: «Elongi la lina inɛ ikɔti anɛ biyali biiki nɔ?» – Babobelɛ: «Biiki Kaisalo». 17 Yesu ababelɛ: «Lopaka Kaisalo biikinde, mpe lopaka Ndjakomba biikinde.» Bakulɛ bakoto la mbuto eekinde.

18 Ba Saduseyo* bankina bayɛ eka Yesu. – Ibɔ bahangake nkundwa teyali. – Babuubolɛ ngɔnɛ: 19 «Bolaki, Mose atoheneyaki bobeko bɔnɛ: "Kaki loondo looyali la waali aowa, mpe nde la waali tababota, bohibotonga okinde akɔhɔkɔ waali uuko itina iiki abotele bowei bana." 20 Lendaka, eyalaki la bahibotonga nsambo. Ɔnɛ o lontondo abalaki mpe awaki nko bota. 21 Ɔnɛ o bape abalɛ buunto ɔkɔ, awɛ, tababota. La ɔnɛ o bahato nko ngauko, 22 tii ibɔ bayaankuma nsambo babalɛ waali uuko mpe bawɛ nko bota bana. Mbusa eekibɔ bankuma, buunto ɔkɔ mpe awɛ la nde. 23 Nde buuna bonga banto bakundwe, anɛ enga ibɔ mpe bakundwe, buunto uuko angooyala waali ɔki nnɔ, itina ibɔ bankuma nsambo babobalaki!» 24 Yesu abaunoyelɛ: «Luunguhana ngauko itina lopwebe la Nkɔti la nguya eki Ndjakomba. 25 Anɛ enga banto bakundwe nde baawɛ, beele la bainto tabangoyabala, bangooyala nga bentomwa nde lobola. 26 Nde iilenda nkundwa eeki baawɛ, talotangi nde buku eki Mose nde bonkanda bɔnɛ botepela iholo i ibundja inɛ ipɛtɛ nko longola? Totanga mpiko Ndjakomba abela Mose: "Ndjali Ndjakomba eeki Abalayama, Ndjakomba eeki Izaka mpe Ndjakomba eeki Yakobo." 27 Wambɔ Ndjakomba ayali Ndjakomba eeki banto baabika, tayali Ndjakomba eeki baawɛ. Loyali nde ibunga.»

28 Ɔmɔɔ oki balaki ba bobeko abaokaki babɛkɛtɛnɛ. Aɛnɛki Yesu abutolaki ba Saduseyo bɔlɔti; ayaudjɛ ntute la nde mpe abuubolɛ: «Bobeko bo lontondo nde bebeko benkuma nɔ?» 29 Yesu abounoyɛ: «Lendaka bobeko boo lontondo: "Isalaɛlɛ, oka! Nkolo Ndjakomba eekinso, ayali Nkolo nko nde kiika. 30 Olangaka Nkolo Ndjakomba ekiɛ la botema bɔmɔɔ, la bolimo bonkuma, la lyanya inkuma mpe la nguya ekiɛ enkuma." 31 Lenda bobeko bɔnɛ boboyela: "Olangaka boninga okiɛ nga boyalangaka wɛ kiika." Nko bobeko bonkina bopenda biiko bepee.» 32 Bolaki bo bobeko abobelɛ: «Bɔlɔti, Bolaki! Ongotepelɛ nhɔhɔlɔ: Nkolo ayali Ndjakomba nko nde kiika, mpe teyali la Ndjakomba enkina nko nde kiika. 33 Mpe yobolanga la botema bonkuma, la lyanya inkuma, la nguya enkuma, mpe olange boninga okiɛ ndenge eyalangaka wɛ kiika, iiko iyali la botuya penda bakapo bankuma la mbeka» 34 Yesu aɛnɛ angobutolɛ la lyanya; abobelɛ: «Toyali botale la Bonkumu booki Ndjakomba.» Mbuha iiko, nko bonto ɔnɛ o unwaki yoboubola biibo.

35 Aiko elaka Yesu nde tɛmpɛlo, aubolɛ buubo bɔnɛ: «Itina iihangaka balaki ba bobeko mbɔ Masiya ayali bona ooki Dawidi nɔ? 36 Itina Dawidi nde amongo atepelaki nde ndjela eeki Bolimo bo bɔyɛngwa:

"Nkolo abelɛ Nkolo ekimi:

Kiha nde lɔbɔ lookimi lo loome,

tii enga emi nkitye baapokolange enyatelo e bakaka baakiɛ."

37 Kaki Dawidi nde kiika aboeta "Nkolo": ndenge nnɔ yɔɔhɔ Masiya yoyala lenkina bona ooki Dawidi?»

Banto bankuma baokaki Yesu la ibulwako. 38 Lenda iilakaki nde banto: «Loyalaka la nkɛpɔ la balaki ba bobeko! Ibɔ balangake bakɛnde la benkoto be ntale; balangake banto bababekole nde bihoke; 39 balangake bakihe nde bikili bi ntondo nde betumba be lɔbɔndɔ la nde nonge i lokumo nde ntɛkɔ. 40 Ibɔ baibake byomba biiki bituka bi bainto mpe bakelake mbɔndɔ i ntale ntale kela banto babahime. Bangoobata etumbo eekibɔ mpe engoyala e bɔnɛnɛ.»

41 Yesu akihɛ ntute la itonga i bakapo nde tɛmpɛlo mpe alenda botindo bootika banto bɔhɔlɔ. Bekulaka buuke bapaaki bɛhɔlɔ buuke. 42 Etuka ɛmɔɔ e buuntɔ e bɔmbɔlɔ ayɛ mpe atikɛ mpata ipe, iyali la botuya bɔkɛ mpendja. 43 Ɛkɔiko, Yesu abelɛ bakɛndi la nde: «Ndohangela nte nhɔhɔlɔ: etuka iiko e buunto e bɔmbɔlɔ angopɛ penda bankuma baambotike bakapo nde itonga. 44 Itina baiko bankuma bambɔɔkɔhe nde bɔhɔlɔ bo liko bopa ibɔ la itina, bootika nde itonga; endaka buunto uuko o etuka opa la ibati angotikɛ bɔhɔlɔ bonkuma bombooyale laa nde itina iiki yobikela.»