1 Yesu aunwɛ lenkina yolaka banto nde bokili bo ndjale e bɔnɛnɛ. Boloy bonkuma boyɛ yohokama ntute la nde, akondelɛ nde waato mpe akihɛ. Boloy bonkuma boyalaki nde bokili bo ndjale e bɔnɛnɛ. 2 Abalakɛ mbo buuke nde ndjɛlya, mpe nde ilako iki nde ababelɛ: 3 «Lolangola! Bɔmɔɔ buuna, booni bɔmɔɔ atɛ itoona byomba nde ngonda eekinde. 4 Aiko yoyone nde, ɛmɔɔ ndambo e byopo bɛkɔɔ nde bokili bo ndjela: mpulu bayɛ mpe batɔnɛ. 5 Byopo benkina bɛkɔ nde ndye e babɔkɔ epa la babu buuke; byɔbɛlɛ byolɛ lobango itina babu tabayala. 6 Elaka ebalelɛ bɛkɔ waane, benyitelɛ mpe byomɛ itina belubo tabetela. 7 Byopo benkina bɛkɔ nde nsɛndɛ. Nsɛndɛ yolwɛ mpe ibatikɛ mpika, mpe tabeunwa yolia muma. 8 Yaa byopo benkina bɛkɔ nde babu ba bɔlɔti; byolwɛ, bebotɛ, muma yolwɛ mpe itundɛ, mpe bɔɔbɛlɛ bɔmɔɔ bobotɛ muma ntuku ihato, bɔɔmɔ ntuku botoba, mpe bonkina muma bonkama.» 9 Yesu ababelɛ: «Ooyali la batoi ba yooka aoke!»

10 Anɛ etikalɛ ibɔ nko ibɔ bamɛlɛ, bɛnkɔmwa lyomu la bepe la baayalaki aiko babuubolɛ itina iiki ndjɛlya. 11 Ababelɛ: «Nyo, balopɛ babomba baaki bonkumu booki Ndjakomba; yaa banɛ bankina baokake nko nde ndjɛlya, 12 kela

"nkya balenda tabaɛnɛke,

nkya baoka tabatingolake,

oolongi tabaoyendja bihɛlɛlo biikibɔ, mpe bahumu baakibɔ tabaolibwa!"»

13 Yesu ababelɛ: «Aiko epa nyo lotingole lwɛlya lɔnɛ, longotingola ndjɛlya inɛ imɔɔ inkuma ngamo? 14 Booni aona Lyoi iiki Ndjakomba. 15 Banto bamɔɔ bayali nga bokili bo ndjela aiko yonama Lyoi iiki Ndjakomba: anɛ eha ibɔ balioka, nko aiko Satana ayoye mpe aopapola lyoi iko yonamaki eka ibɔ. 16 Banto banɛ bamɔɔ, lolenge nko lɔkɔ, baoyamba boopo nde babu ba babɔkɔ: nko baoyoke Lyoi iki Ndjakomba, baumeyake ikɔ la ibulwako. 17 Yaa tabayali la belubo, baumeyake lyoi iiki Ndjakomba nko elaka ɛmɔɔ. Mpe nga batungya la bekakatano behoya itina iki Lyoi iki Ndjakomba, bapɔtɛmɛke yotona waambi booki ibɔ. 18 Banto bankina babatake boopo nde nsɛndɛ; eyali banɛ baoka Lyoi iiki Ndjakomba, 19 yaa bayali la mpoha i bokili, bolengoli bo bɔmɛngɔ mpe mpoha yobata inkuma ibaɔtwɛlɛ, inyatɛ Lyoi iki Ndjakomba mpe ipobote muma. 20 Banto bankina babatake boopo nde babu ba bɔlɔti: baiko baokake Lyoi iiki Ndjakomba, baambake ikɔ mpe babotake muma, bamɔɔ ntuku ihato, bamɔɔ ntuku botoba, mpe bamɔɔ bonkama.»

21 Yesu ababelɛ: «Bayelake moinda kela batike nde nse e ehaka, laa nde nse e bobanga? Epoyali yɔlɛlya nde ikondi? 22 Itina nkola la yomba ɛmɔɔ ebombi engoyala nko ola nde boponga, nkola la ɛmɔɔ iihi engoyala nko ebetana mpe nko ola nde bongala. 23 Nga bonto ayali la batoi ba yoka aoke!» 24 Ababelɛ lenkina: «Lobataka nkɛpɔ la inɛ yooka nyo! Botindo boomekela wɛ banto, bangokomekela la wɛ nko ngauko mpe ɛmɔɔ mbala engopenda. 25 Itina bonto okati bangoobopa lenkina; opa tokati bangɔɔbɔpɔmɔlɔ la yoomba iiko eyali la nde.»

26 Yesu ahangɛ lenkina: «Bonkumu booki Ndjakomba wɛɛli nga booni aolike boopo nde babu. 27 La alale la aɛtɛtɛle, la waane la botio, boopo booyole mpe booyolwe nde apwebe. 28 Babu bayolia bakɔ bamɛlɛ ntondo bɔɔbɛlɛ nkamba mpongo, mpe nde nsuki mpongo eyolɛ la muma. 29 Mpe anɛ eha lomoma lwɛlɛ, baɔkɔhɔ lokula itina i yopupola, aiko wambɔ eleko e ninika yookita.» 30 Ababelɛ lenkina: «Yomba ɛnɛ yɔɔhɔ nho yɛɛlya la Bonkumu booki Ndjakomba nɔ? Lwɛlya nnɔ lɔɔhɔ nso yoopa? 31 Eyali nko nga lomoma lo nsɛmbɛ e lobambo; anɛ yonaka ibɔ nde babu, loyali lomoma looleka bɔkɛ nde byopo benkuma beyali nde bokili. 32 Anɛ eha baona, loolɛ mpe loolwɛ penda bete benkuma, loolyɛ bitape bi bɔnɛnɛ ko la mpulu i liko yɔɔhɔ yotonga baimbu baakibɔ aiko.»

33 Yesu alakaki Lyoi iiki Ndjakomba nde ndjɛlya buuke ye ngauko; nde lolenge lɔɔhɔki ibɔ yotingola. 34 Tabalaka nko ɔtɛya lwɛlya; yaa nga aotikala nde la bakɛndi laa nde, amboobalimboyake inkuma.

35 Nko nde buuna buuko la ikɔlɔ, Yesu abelɛ bakɛndi la nde: «Topendye ndjale.» 36 Anɛ eha bahena banto, bakɛndi la Yesu babotombɛ nde waato booyalaki nde; byato benkina mpe beyalaki aiko. 37 Eeleele ekelɛ mpe buula bolikɛ bahi nde waato, ntute eeki waato boyole la bahi. 38 Endaka Yesu nde alalaki nde mbaka, bɔtɛ nde bokili. Bakɛndi laa nde baboemolɛ, mpe babohangelɛ la nguya: «Bolaki, toowa: epokokele la lobo lɔmɔɔ?» 39 Yesu aemwɛ, ataamelɛ eeleele mpe abeelɛ ndjale: «Pilama! yala nyɛ!» Eeleele ehilɛ mpe bolenge bɔkɔtɛ. 40 Mpe ayɛ yobela bakɛndi laa nde: «Itina imba nyo looke bɔɔmɔ nɔ? Taloyali laino la waambi?» 41 Bakɛndi laa nde bayalaki la bɔɔmɔ bɔmɔɔ bo bɔnɛnɛ mpe bayaubolɛ ibɔ la ibɔ: «Bonto ɔnɛ ae nɔ, la eeleele la ndjale ibookela?»