1 Buuna bɔmɔɔ, Bafalisaya la balaki ba bobeko bankina baumɛ Yelusalɛmɛ, bayɛ eka Yesu. 2 Baɛnɛ bamɔɔ bakɛndi la nde balɛ bakata mbindo, elimbola wambɔ nkoho ola bakata. 3 Ɛkɔiko, Bafalisaya la Bayuda bankuma bapɔlɛke kaki tabakoli bakata bɔlɔti, lolenge lwɛli la bɔnkɔkɔ booki ibɔ. 4 Mpe nga bahuuma nde bihoke, balɛke nko nga bahoyapɛtɔlɔ. Bayali la bɔnkɔkɔ booki ibɔ bokelaka ibɔ bo enga yokola mbongo, mpoke la saani i banyandja.

5 Bafalisaya la balaki ba bobeko babuubolɛ: «Itina ipa bakɛndi la wɛ bakele itinda bɔnkɔkɔ nɔ? Yaa balɛke bakata mbindo!» 6 Yesu ababelɛ: «Banto ba bilongi bipe, Isaya aebaki yotepela itina iikinyo, anɛ ɛkɔtɔki nde:

"Banto banɛ bandangake nko nde mbɛbu,

betema beeki ibɔ beyali botale la emi.

7 Bankumyake nko loliko loliko,

itina balako baalaka ibɔ

bayali nko bebeko beeki banto*."

8 Lotonake bebeko beeki Ndjakomba mpe loyapake la bɔnkɔkɔ booki banto.»

9 Yesu ababelɛ lenkina: «Lweba bɔlɔti yotona bebeko beeki Ndjakomba itina iiki lobombake bɔnkɔkɔ bookinyo! 10 Itina Mose atepelaki: "Omangaka ihe la nyango eekiɛ", mpe ahangaki lenkina "Ootola laa ihe laa nyango eekinde aɛli la etumbo e iwa." 11 Yaa nyo lolakake, kaki bonto ɔmɔɔ aobela ihe ekinde laa mpe nyango ekinde: "Yomba eepa emi ndjookopa eyali Nkoloba* wambɔ ibondo iingobombelɛ emi Ndjakomba" –, 12 tangookambola nyango la ihe ekinde. 13 Ndenge iiko ekela nyo ngauko, luumola iikana Lyoi iki Ndjakomba nde ndjela eeki bɔnkɔkɔ bookinyo boolaka nyo. Mpe lwela mbo inkina i buuke ikelaka nyo ngauko.»

14 Yesu aetɛ lenkina buuke bo banto mpe ababelɛ: «Londjalye nyo bankuma, mpe lwebaka ngɔnɛ: 15 Nkola la yomba ɛmɔɔ euma nde bongala ɛɔtwa nde bonto ko yobopita. Yaa inɛ yoola nde bonto bibokityake mbindo.[ 16 Ooyali la batoi ba yooka, aoke*!]»

17 Anɛ ehenɛ Yesu boloy, aɔtwɛ nde botumba, bakɛndi la nde babuubolɛ ndimbo eeki lwɛlya luuko. 18 Ababelɛ: «La nyo mpe lopokati lyanya? Lɔpɔɔhe yeeba mbɔ inɛ yɔtwaka nde byonge biiki bonto ipobopitake, 19 itina ipotake nde botema yaa nko nde ikundi, nkamba iyooli nde ibela?» Aebyɛ aiko mbɔ byomba binkuma biyali pɛtɔ la yɔlɛ. 20 Mpe aunwɛ yotepela: «Inɛ yola eka bonto ibopitake. 21 Yaa nkani i bobe yumake nde ntei, nde betema beeki banto, bɔkɛlwa, iiba, yolyaka, 22 iye, mpoha e bɔhɔlɔ, botema bobe, boyanga, ipuka, inkunya, bitooli, ipolo la lokilo. 23 Mbo iiko inkuma i bobe yumake nde ntei eeki bonto mpe ibopitake.»

24 Yesu aumɛ aiko, atɛ Tilɛ. Aɔtwɛ nde botumba bɔmɔɔ mpe talanga la bonto ɔmɔɔ aebe mbɔ ayali aiko, yaa taɔhɔ yuhama. 25 Nko aiko, buunto ɔmɔɔ ayalaki la bona ookinde o buunto otungyamaki la bolimo bo bobe. Anɛ yokɛ nde batepela itina iiki Yesu; ayɛ ntute la nde mpe ayakɔyɛ nde bekolo beekinde. 26 Buunto ɔkɔ ayalaki bopakano, bohi Fenisi e Sili. Abɔndɛlɛ Yesu aolye bolimo bo bobe eka bona ookinde o buunto. 27 Yaa, Yesu abobelɛ: «Hena laino bana bale bakinde; itina epoyali bɔlɔti yɔkɔhɔ ihɔɔ iiki bana olikele baaha ba mbwa.» 28 Buunto uuko abounoyelɛ: «Nkolo, eyali nko ngauko, yaa baaha ba mbwa balɛke mpuha iiko ikɔyɔkɔ bana nde nse e mesa.» 29 Yesu abobelɛ: «Itina iki mbuto eekiɛ, inwa eka wɛ: bolimo bo bobe boongolɛ eka bona ookiɛ o buunto.» 30 Aunwɛ ekande mpe atanɛ bona alali nde ntange: bolimo bo bobe bongoolɛ.

31 Yesu aumɛ Tilɛ mpe alekɛ lo Sido, yota looko lo ndjale e Ngalilaya, apendyɛ lobandja lo Dekapoli. 32 Baboyelɛ bonto ɔmɔɔ o luumi, babɔbɔndɛlɛ aboapye lɔbɔ. 33 Yesu abɔkɔhɛ, abotombɛ bona o botale la banto mpe abɔɔtɛyɛ behai nde batoi, atwɛ nhɔi nde bohai ko aobobuti nde lolemu. 34 Yesu auleyɛ baiho nde liko, ayoomɛ mpe abobelɛ: «Efata!» – Nga ambɔ «Lipwa!» – 35 Nko nde elaka iko, batoi bakinde balipwɛ, lolemu lokinde lolitwɛ mpe atepelɛ bɔlɔti. 36 Yesu abakokomyɛ tabahangelake la bonto ɔmɔɔ; yaa nkya ngauko ebahukaki nde, ibɔ batɛ nko yopalanganiaka nsango. 37 Banto baulɛ nkimo mpe batepelɛ: «Inkuma ikela nde iyali bɔlɔti! Aokya la bikinda mpe atepeya la bibubu!»