1 Anɛ ehuhamɛ ibɔ la Yelusalɛmɛ, ntutentute la Betipaze la Betani, bakitɛ nde Ngomba e Olive. Yesu atindɛ bakɛndi la nde bape ababelɛ: 2 «Lɔkɛndɛ nde ehe iiko elwɛlɛlɛ; nga lookita, lokootaana lyaha i mpunda itungi, la bonto ɔmɔɔ takondeli laino nde ɛkɔ. Lobotungolaka mpe loboyelaka. 3 Kaki bonto angolubolɛ: "Itina iikela nyo ngako nɔ!" Lobobelaka: "Nkolo ayali la mpoha la ɛkɔ, akootinda ɛkɔ nko la bɔkɛkɛ."»

4 Bakɛndi la nde batɛ mpe batanɛ lyaha i mpunda itungi nde bongala, ntute la buuho bo botumba. Babotungolɛ. 5 Banto bankina bayalaki aiko babaubolɛ: «Uuko okela nyo nɔ? Itina nɔ iitungola nyo bona o mpunda uuko?» 6 Babapɛ mbuto ɛnɛ ebabelaki Yesu mpe babahenɛ batu la ɛkɔ. 7 Bayelɛ Yesu bona o mpunda ɛkɔ; baetandelɛ bihenda nde bɔkɔngɔ, mpe Yesu akihɛ nde liko iiki ɛkɔ. 8 Banto buuke batandɛ bamputa baaki ibɔ nde ndjela, bamɔɔ batikaki babundja baumaki la ibɔ nde ngonda. 9 Banto baayalaki lontondo la baayalaki la lombuha looki Yesu babobɛ la nguya: «Ozana! bokako boyali eka bonto ɔnɛ ooye nde lina iiki Nkolo! 10 Bokako boyali nde bonkumu bɔnɛ booye, bonkumu booki Nkaa eekinso Dawidi! Ozana mpiko nte nde lobola!» 11 Yesu aɔtwɛ Yelusalɛmɛ mpe atɛ nde tɛmpɛlo. Anɛ eheyaki nde yolenda mbo inkuma iilekaki aiko, atɛ Betani nde la bakɛndi la nde lyomu la bape itina buuna bohilaki.

12 Buuna bɔnɛ bɔmɔɔ, elaka ɛnɛ ehenyaki ibɔ Betani, Yesu aokɛ ndjala. 13 Aɛnɛ ima botale bote bo figi* boyalaki la nkaha buuke, atɛ itolenda nga boyali la muma; anɛ ayaundjɛ nde ntute la bote bɔkɔ, atanɛ nko nkaha, itina teyala eleko eki muma i figi. 14 Yesu abelɛ bote buuko bo figi: «La bonto ɔmɔɔ tangɔɔlɛ lenkina la muma ikiɛ!» Mpe bakɛndi la nde baokaki iitepelaki nde.

15 Bakitɛ Yelusalɛmɛ. Yesu aɔtwɛ nde tɛmpɛlo mpe apandjɛ baatɛkɛ la baahomba byomba nde tɛmpɛlo; abumbolɛ mesa iki baendji ba bɔhɔlɔ la bikihelo biiki batɛki ba bimenga, 16 mpe tahena la bonto ɔmɔɔ ahɛkɛte la yomba ɛmɔɔ nde tɛmpɛlo. 17 Nkamba abalakɛ ngɔnɛ: «Nde Nkɔti, Ndjakomba ahanga: "Botumba booki emi bongobekala botumba bo lɔbɔndɔ itina iki bekundi benkuma." Yaa nyo, lokityɛ bɔkɔ nganda eeki biiba!» 18 Nkanga i benkondi la balaki ba bobeko baokɛ mbo ikɔ mpe batilɛ yolyaka Yesu; baboobokaki bɔɔmɔ, itina banto bankuma bakimaki la balako bakinde. 19 Anɛ ekitɛ ikɔlɔ, Yesu la bakɛndi la nde baolɛ nde imonga.

20 La nkɛhɛ eeki buuna bɔnɛ bɔmɔɔ, aiko yoleke ibɔ nde ndjela, baɛnɛ bote bo figi: boomɛ tii nde belubo. 21 Petelo abopwɛ inɛ ilekaki, abelɛ Yesu: «Bolaki, lenda bote bo figi bɔnɛ bolimyaki wɛ, bongoomɛ bonkuma.» 22 Yesu abelɛ bakɛndi la nde: «Loyala la waambi la Ndjakomba! 23 Ndobela nhɔhɔlɔ, kaki bonto angobelɛ ngomba ɛnɛ: "Ima aiko mpe yaboka nde ndjale e bɔnɛnɛ", mpe nga tayala la lɔmpɛnyɛ nde botema bookinde, yaa aumeya iiko itepela nde ikookelama, ingokelama. 24 Ɛkɔiko ndobela: Inkuma inga nyo lobondele nde lɔbɔndɔ, luumeyaka longobatɛ, mpe ingokokyama. 25 Mpe nga ongwemalɛ kela ɔbɔndɛle, nga oyali la lobo la bonto, sabinya nde, kela Ihe eki nyo eyali nde liko akosabinye basumu baakiɛ. [26 Yaa kaki loposabinye baninga, ihe eki nyo ɛnɛ eyali nde liko tangosabinya basumu bakiinyo*.]»

27 Baunwɛ lenkina Yelusalɛmɛ. Aiko eta eunwa Yesu nde tɛmpɛlo, la Nkanga i benkondi la balaki ba bobeko la bingambi bayɛ eka nde. 28 Boboubolɛ: «Iiko ikela wɛ, okela nde nguya eeki nɔ? Bonto ookopɛ bonkumu bo yokela ikɔ nɔ?» 29 Yesu ababelɛ: «Nduubola nko buubo bɔmɔɔ; kaki loombutola, emi mpe nkolohangela nga nkela mbo iiko la nguya eeki nɔ. 30 Nyunama eemba Yowane akelakɛ, yumaki eka Ndjakomba laa eka banto ? lonsangele.» 31 Yaa ibɔ babangɛ yoyaubola ibɔ kiika: «kaki tongobobelɛ yumaki eka Ndjakomba, akoohanga: "Itina ipa nyo taloboumeya nɔ?" 32 Yaa kaki tobohangela: "Yumaki eka banto, aiko…"?» – Baokaki banto bɔɔmɔ, itina banto bankuma baɛnɛki Yowane nga ntepeli mpendja. – 33 Baunoyelɛ Yesu: «Nso topwebe.» – Mpe Yesu ababelɛ: «Emi mpe mpolohangele nga nkela mbo inɛ la nguya eeki nɔ.»