Milagres de Jesus

Yesus ta eluva omulumenhu omuposi puBetsaida

22 Nhyi ya fika muBetsaida, aanhu yamwe oya eta omulumenhu omuposi kuYesus, ndele oya indila Yesus e mu kume. 23 Yesus okwa kwata omuposi meke, ndele te mu fala kondje yoshilando. Okwe mu siila omate pomeho, ndele te mu tenheke omake yaye, ndele te mu pula ta ti, "Ou wete sha?"

24 Omulumenhu okwa yelula omeho, ndee ta ti, "Ondi wete aanhu, ndele ondi ya wete ya fa omiti avi ende."

25 Yesus natango okwa tenheka omake yaye pomeho yomulumenhu, nomulumenhu okwa kala ewete ko, naayihe okwa li e yi wete nawa. 26 Yesus okwe mu lekela a ye keumbo ta ti, "Ino shuna mo ali moshilando."

Yesus ta eluva omulumenhu ha kokoma ye omufitamakutwi

31 Yesus nhyi a za ko komikunda vopopepi naTilus, okwa pitile moshitopolwa shaSidon, ndele ta yi nondjila yauka koshitopolwa shoilando omulongo yi kefuta lyaGalilea. 32 Aanhu oye mu etela omulumenhu ha kokoma, ye iha uvu ko noya indila Yesus e mu tenheke oshikaha. 33 Yesus okwe mu kufa mo maanhu, ye ke ikalele. Okwa tula ominwe vaye momakutwi yomufitamakutwi, ndele te isiile omate komunwe waye, ndele ta piya elaka lyomulumenhu. 34 Yesus okwa tala keulu, ta fuva mopale, ndele ta ti, "Efata!" nhyi ashi ti, "Fituluka!"

35 Viyaviya, omakutwi yaye oya fituluka, ndele ta tameke oku uva ko nawa, nelaka lyaye olya manguluka, ndele ta tameke ku popya nawa. 36 Yesus okwa keelela aanhu opo ina ye shi popya nande okulye. Ndele nande ongaanhyo, oye shi hokolola. 37 Aanhu oya li ya kumwa unene, ndele taa ti, "Kehe shimwe nhyi ta longo oshiwa! Aafitamakutwi ote ya ningi ya uve ko, neembolo ote vi ningi vi popye!"

Yesus ta eluva omuposi Baltimeus

46 Opo nee Yesus naalongwa yaye oye ya muYeliko. Nhyi yali taa zi mo moshilando pamwe nongudu onene yaanhu, Bartimeus yaTimeus, omuheheli omuposi, okwa li omutumba peeha vondjila.

47 Nhyi a uva kutya OYesus Omunasareta a li ta ende po, okwa tameka okwiingiva mopale ta ti, "Yesus Omonamati waDavid, sila nge onghenda!"

48 Oyendji yomaanhu oye mu ngada a mwene, ndele ye okwa twikila nokwiingiva mopale unene ta ti, "Omonamati wa David, sila nge onghenda!"

49 Yesus okwa fikama, ndele ta ti, "Mu ifaneni, e uye."

Oya ifana omuposi, taa ti kuye, "Kala nomukumo, fikama, Ye ote ku ifana."

50 Viyaviya okwa kufa mo onguwo yaye, ta fikama viya, ndele te ya kuYesus.

51 Yesus okwe mu pula a ti, "Owa hala ndiku ningile shike?"

Omuposi okwe mu yamukula a ti, "Mulongi, onda hala ndi mone ko natango."

52 Yesus okwa ti kuye, "Inda, eitaelo lyoye, olye ku yeluva."

Viyaviya okwa monako, ndele ta landula Yesus.

Yesus ta yeluva omweeheli omuposi

35 Yesus nhyi e ya popepi naYeliko, opwa li omulumenhu omuposi ta ehela peeha vondjila. 36 Nhyi a uva ongudu yaanhu tayi ende po, okwa pula a ti, "Oshishi nhyi?" 37 Aanhu oye mu lombwele ya ti, "OYesus ngu a za kuNasaleta ta ende po." 38 Opo nee okwa ingiva a ti, "Yesus! Omona waDavid! Sila nge onghenda!" 39 Aanhu mba ya li komeho oye mu ngada, a mwene, ndee okwa viinine okwiingiva mopale a ti, "Omona waDavid! Sila nge onghenda!" 40 Yesus okwa fikama ndee teya lombwele ya ete omuposi kuye. Nhyi e ya lwopopepi, Yesus okwe mu pula, 41 "Owa hala ndi ku ningile shike?" Ye okwa ti,

"Omwene, onda hala ndi mone ko natango."

42 Opo nee Yesus okwa ti kuye, "Mona ko! Eitaelo lyoye olye ku yeluva."

43 Viyaviya okwa mona ko, ndele ta landula Yesus nokupandula Kalunga. Aanhu nhyi ye shi mono, ayehe oya hambelele Kalunga."

30 Yinamweno yaSimoni okwa li e li mombete youyehame taaluka olwiivi, ndele Yesus nhyi a fika, aanhu oye mu popya kuye. 31 Yesus okwe ya kuye, temu kwata monyala, e mu fikameke, nolwiivi olwa zamo muye, ndele ta tameke oku ya yakula.

Yesus ta eluva omunashilundu

40 Omunashilundu okwe ya kuYesus, ta tu eengolo te mu indile ta ti, "Nge oweshi hala, oto vulu okuyeleka nge." 41 Yesus okwe mu uvila onghenda, nokwa nana eke lyaye, ndele te mu kwata ta ti, "Onda hala, yela!" 42 Viyaviya oshilundu osha za mo momulumenhu ngo, nokwa yela.

3 Ongudu yaanhu oya eta omusilombada kuYesus, a hindwa kaalumenhu yane. 4 Molwoundji waanhu, oya nyengwa oku mu fikifa puYesus. Onghee oya ulula ombululu kombada yonduda, ya ukilila mha puna Yesus, ndele taa kulukifa omusilombada, a nangala poshiinda shaye. 5 Nhyi Yesus a mona eitaelo lyao, okwa lombwela omusilombada, "Mumwange, eendjo voye ova vimwa po."

6 Aalongimhango yamwe mba ya li mo omutumba, oya vilaavila momitima vao, 7 "Omolwashi ta popi ngaanhyi? Ota tuku Kalunga! Olye ta vulu okuvima po eendjo, keshi ike Kalunga?"

8 Viyaviya Yesus okwa vibulula momhepo yaye, kutya osho taa vilaavila ngaanhyo, ndele ta ti kuyo, "Omolwashi mu na omavilaavilo ya fa mho momitima veni? 9 Nhyi oshipu shipi? Okulombwela omusilombada, ‘Eendjo voye ova vimwa po,’ nenge okulombwela omusilombada, ‘Fikama, kufa oshiinda shoye ndele to ende’? 10 Andi mu kwashilipaleke mu kale mu shi shii kutya Omona wOmunhu oku na eenghono nepangelo okuvima po eendjo kombada yevu." Opo nee Yesus okwa ti komusilombada, 11 "Andi ku lombwele, fikama, kufa oshiinda shoye, ndele toyi kolyoye."

12 Omulumenhu okwa fikama, ndele ta kufa po oshiinda shaye, ndee ta yi, monhaneho yaayehe. Aanhu ayehe oya li ya kumwa noya hambelela Kalunga ya ti, "Inatu mona nande onale oshiima sha fa mha!"

Yesus ta eluva omulumenhu e na onyala ya lemana

1 Nhyi pwa pita omasiku omashona, Yesus okwa shuna kehala nghu Aayuda haa ongalele hali ifanwa Oshinagoga. Mehala mo omwa li mu na omulumenhu e na onyala ya lemana. 2 Aanhu yamwe mba ya li mo, oya li taa tala nge Yesus ote mu eluva mesiku lyEsabati, opo ya vule oku mu lundila, kutya ota longo nhyi inashi pitikwa okuningwa mEsabati. 3 Yesus okwa lombwela omulumenhu ngu e na onyala ya lemana a ti, "Ila u fikame komeho yaayehe." 4 Yesus okwe ya pula a ti, "Oshishi sha pitikwa okuningwa pamhango mesiku lyEsabati? Okulonga ouwa nenge okulonga ouyi? Okuhupifa omwenyo nenge okuvipaa?" Ndele inaa yamukula sha.

5 Yesus okwe ya tala ayehe noshipala sha handuka, a nyika oluhovi omolwoukukutu womitima vao. Okwa lombwela omulumenhu ngo ta ti, "Ukililifa oshikaha shoye." Omulumenhu okwe shi ukililifa, noshikaha shaye osha eluka.

Yesus ta eluva omulumenhu e na oshilundu

12 Esiku limwe Yesus okwa li moshilando shonhumba, mo omwa li omulumenhu e na oshilundu. Omunashilundu nhyi a mona Yesus, okwa twa eengolo koshipala shaYesus, ndee te mu indile ta ti, "Omusimanekwa, nge ouna ehalo, yeleka nge."

13 Yesus okwa elufa eke lyaye, ndee te mu kumu, ndee ta ti, "Onda hala, yela." Viyaviya oshilundu oshe mu efa ndee ta yela.

18 Aalumenhu yamwe oya etela Yesus omusilombada ye mu hinda poshiinda. Oya kambavala oku mu fala meni lyeumbo ndyo, ye mu nangeke komeho yaYesus, 19 ndele molwoundji waanhu, oya li ya nyengwa okushi ninga. Oya londa naye kombada yeumbo, ndee taa ulula ombululu kombada yonduda, ndee taye mu kulukifile noshiinda shaye pevu, mokati kaanhu siyo ta fiki puYesus. 20 Yesus nhyi a mona eitaelo lyao, okwa lombwela omusilombada, "Eendjo voye ova vimwapo kaume kange." 21 Ndele aalongimhango nAafalisai oya tameka okupopya taa ti, "Ngu oye lye ta tuku Kalunga? Kaku na nande omunhu ta vulu okuvima po eendjo, oKalunga auke." 22 Yesus nhyi a vibulula nhyi taa vilaavila, okwa ti kuyo, "Omolwashi amu vilaavila ngaanhyo? 23 Nhyi oshipu shipi? Oku lombwela omusilombada, ‘Eendjo voye ova vimwa po, nenge oku mu lombwela, fikama u ende?’ 24 Onda hala mu kale mu shi shii kutya, Omona wOmunhu oku na epangelo kombada yevu okuvima po eendjo." Yesus okwa ti komusilombada, "Andi ku lombwele, fikama, kufa oshiinda yoye, ndee toyi keumbo." 25 Omulumenhu okwa fikama viya monhaneho yaanhu, ta kufa ombete yaye, ndee ta yi kolyawo, ta ende ta hambelele Kalunga.

Omulumenhu e na oshikaha sha lemana

6 Mesiku lyEvululuko ekwao, Yesus okwa ya mOshinagoga, ndee ta longo aanhu. MOshinagoga omwa li omulumenhu e na oshikaha shokolulyo sha lemana.

7 Yamwe yomaalongimhango nayamwe yomAafalisai oya li ya hala etomhelo lyokulundila Yesus, onghee oya kala ye mu kotokela, ya tale nge ota eluva mEsabati. 8 Yesus okwa vibulula omavilaavilo yao, nokwa ti komulumenhu woshikaha sha lemana, "Fikama, ila komeho." Omulumenhu okwa fikama, ndee ta yi komeho. 9 Yesus okwe ya pula a ti, "Oshishi sha pitikwa okulongwa mEsiku lyEvululuko, okulonga ouwa ile okulonga ouyi, okuhupifa omwenyo ile okuwu kanifa?" 10 Yesus okwa tala oipala yaayehe mba ya li po omutumba, ndee ta lombwele omulumenhu ngo ta ti, "Ukililifa oshikaha shoye." Omulumenhu okwe shi ukililifa, noshikaha shaye osha yeluka.

Yesus ta eluva omupiya womukulunhu waakwaita waLooma

1 Yesus nhyi a mana okupopya kaanhu ayihe mbi, okwa ya kuKapelenaum. 2 Omukulunhu waakwaita waLooma okwa li e na omupiya waye, ngu a li a simaneka, taaluka e li pokusa. 3 Nhyi omukulunhu waakwaita a uva kombiga yaYesus, okwa tuma aakulunhu yaaYuuda kuYesus, ye mu indile opo a ye a ka eluve omupiya waye. 4 Oye ya kuYesus ndee taye mu indile ya manamo ya ti, "Omulumenhu ngu okwa wana okukwafwa kwooye, 5 molwanhyi okuhole aanhu yetu, ye okwetu tungila nOshinagoga."

6 Yesus okwa ya nayo, ndee mhanga ye li pokufika, omukulunhu waakwaita okwa tuma ookaume kaye kuYesus ye mu lombwele taa ti, "Omwene, inandi hala wu ihepeke, oshonhyi ame inandi opala wuuye mo meumbo lyange. 7 Sho osho naame inandi opala nduuye kwooye. Popya ike ohapu imwe, omupiya wange ota eluka. 8 Oshonhyi naame omunhu ndi li kohi yepangelo, nondi na aakwaita mepangelo lyange. Andi lombwele ngu, ‘Inda!’ Ndee ota yi. Andi lombwele mukwao, ‘Ila’! Ndee ote ya. Andi lombwele omupiya wange, ‘Ninga nhyi’, Ndee oteshi ningi."

9 Nhyi Yesus eshi uva, okwa li eshi kuminwa. Okwa punguluka ndee ta taalele kongudu yaanhu ndji ya li ye mu landula, ndee ta ti, "Andi mu lombwele, inandi mona nande onale eitaelo lya fa mha, nomuIslaeli inandi li mona mo."

10 Hano mba ya li ya tumwa oya shuna keumbo lyomukulunhu waakwaita, ya hanga omupiya a eluka.

11 Omwa li mu na omukiinhu e niwe komhepo ya kaka, ndji ye mu etela ouvu eevula omulongo nahetatu. 12 Nhyi Yesus e mu mona, okwa ti kuye, "Mukiinhu, owaeluka kouvu woe!" 13 Yesus okwa tenheke omake yaye kombada yomukiinhu, viyaviya omukiinhu okwa fikama, ndee ta tameke okuhambelela Kalunga.

Yesus ta eluva omunauvu omulumenhu

1 Esiku limwe lyEsabati, Yesus okwa li a ya a ka lya meumbo lyaumwe womaaleli Aafalisai. Aanhu oya li yemu kotokela. 2 Komeho yaye okwa li ku na omulumenhu a zida omaulu nomaako. 3 Yesus okwa pula aalongimhango nAafalisai, "Omhango oya pitika tuu oku eluva mesiku lyEsabati nenge ahawe?"

4 Ndele inaa yamukula sha. Yesus okwa kufa omulumenhu ngo, ndee temu yeluva, ndee temulombwele a ye.

Yesus ta eluva aalumenhu omulongo

11 Mokuya kuYelusalema, Yesus okwa enda ta kunghula neengaba vopokati kaSamalia naGalilea. 12 Nhyi e ya momukunda umwe, okwa shakenekwa kaalumenhu omulongo ye na oshilundu. Oyali ya fikama kokule naye, 13 noya ingiva ya ti, "Yesus! Omwene! Tusila onghenda!

14 Yesus okwe ya tala ndee ti kuyo, "Indeni muke iyulike komuyambi." Mhanga ya li mondjila taa yi, oya eluka. 15 Ndele umwe womuyo nhyi a mona kutya okwa yeluka, okwa shuna kuYesus, ndee ta hambelele Kalunga newi li li pombada. 16 Okwa twa eengolo peemhavi vaYesus ndee temu pandula. Omulumenhu ngu okwa li Omusamaria. 17 Opo nee Yesus okwa ti, "Aalumenhu mba ya yeluvwa kaye li omulongo? Omungoyi oye li peni? 18 Omolwashike omukwailongo oye ike a aluka ahambelele Kalunga." 19 Yesus okwe mu lombwela, "Fikama u ye, eitaelo lyoye olye ku yelula."

25 Okwa li ku na omukiinhu e na ouvu wetiko lyohonde eevula omulongo nambali, 26 okwa li a mona oihuna neenghono mokuya keendudu ovidji, noku vi futa ashihe nhyi a li e na, ndele ina kala nawa, ouvu owa ya ike komeho neenghono. 27 Omukiinhu ngu, nhyi a uva kombinga ya Yesus, okwe ifiinika mokati kaanhu a ye kuYesus, e mu zilila konima, ndele ta kumu onguwo yaye, 28 shaanhyi okwa vilaavila kutya, "Shamha nda kumu onguwo yaYesus, andi yeluka."

29 Viyaviya, etiko lyohonde olya mwena, nokwa uvu molutu lwaye kutya okwa yeluka.

43 Mokati kao omwa li mu na omukiinhu taaluka ouvu wetiko lyohonde oule weevula omulongo nambali, nonande okwa li a longifa oiniwe yaye ayihe mokukonga epango kaayakuli, kapuna ngu ali a vula oku mu yeluva. 44 Omukiinhu ngu okwe ya, a zilila Yesus konima ndee te mu kumu komungege woikutu yaYesus. Viyaviya etiko lyohonde olya kanghama. 45 Opo nee Yesus okwa pula, "Ngu a kuma nge olye?"

Kehe umwe okwe shi anya, ndee Peetulusa okwa ti, "Mulongi, owa kundukiva kaanhu oyendji."

46 Ndele Yesus okwa ti, "Onde shi vibulula kutya opuna umwe a kuma nge, shaanhyi onda uva mwaame mwa za eenghono." 47 Hano omukiinhu nhyi a vibulula kutya, okwa vibululwa, okwe ya ndee ta tu eengolo koshipala shaYesus, a tila ta kakama. Okwa lombwela Yesus momeho yaanhu ayehe kutya omolwashike e mu kuma nonghee a yeluka meendelelo. 48 Yesus okwa ti ku ye, "Mumwange, eitaelo lyoye olye ku yeluva. Inda nombili."

22 Okwa za umwe womaawiliki yOsinagoga, evina lyaye oJailus. Nhyi a mona Yesus okwa wila pohi peemhavi vaYesus, 23 ndele okwe mu indila neenghono ta ti, "Okamwangekavona otaka aluka unene, ila, uka tenheke eke lyoye, opo uka hupife, ko ka kale ke na omwenyo.

24 Yesus okwa ya pamwe naJairus. Aanhu oyendji oye mu landula, ndele oye mu fininika.

38 Nhyi ye ya peumbo lyomuwiliki wOshinagoga, okwa mona engwagwano maanhu, taa lili mopale yo taa hekumuna. 39 Yesus okwa ya meni, ndele ta ti kuyo, "Oshishi mwa ngwagwana? Omolwashi a mu lili? Okakavona inaka sa, oka kofa ike!"

40 Aanhu oye mu yola. Yesus okwa ta mo aanhu ayehe ya ye pondje, ta kufa he nayina yokakavona, namba ya li naye, ndele taa yi meni mu mwa nangala okakavona. 41 Yesus okwa kwata oshikaha shokakavona, ndele ta ti ku ko, "Talita, kumi," nhyi a shi ti, "Kakavona, andi ku lombwele, penduka!"

42 Viyaviya okakavona oka penduka, a ka tameke okweenda noya li ya kwatwa kehaluko enene. Okakavona oka li ke na eevula omulongo nambali.

31 Yesus okwa twikila ko, "Nganhyii, aanhu yopefimbo ndi andi ya yeleke nashi? Oya fa shi? 32 Oya fa ounona u li omutumba pomalandifilo tau ingivile ukwao tau ti, ‘Otwe mu pandulila, ndele ina mu tutula ouvano. Otwa imba omaimbilo yeesa, ndele ina mu lila.’ 33 Oshonhyi Yohanesa omushashi okwe ya, te ivilike, ye iha mu omaviinyu, ndele nye amu ti, ‘Ye oku na eemhepo va kaka.’ 34 Omona wOmunhu okwe ya, ta li ye ta mu. Ndee amu ti, ‘Tala komufukanhu nokongholwe, kaume kaafendelifi nokaalunde.’ 35 Ounongo waKalunga owa hololwa wa yuuka kwaayehe mba yemu tambula".

Yesus molyaSimoni Omufalisai

36 Wumwe womAafalisai okwa hiya Yesus a ka lye oulalelo pamwe naye. Yesus okwa ya meumbo lyOmufalisai, ndee ta kala omutumba poshililo a lye. 37 Moshilando omwa li omukiinhu a lumba moulunde. Nhyi a uva kutya Yesus oku li meumbo lyOmufalisai ta li, okwe ya mo e na oshikola shomaavi ya nyika nawa unene.

41 Ndee omulumenhu wevina Jairus, omukulunhu wOshinagoga, okwe ya kuYesus. Okwa twa eengolo peemhavi vaye, ndee te mu indile aye keumbo lyaye, 42 oshonhyi okwa li e na omonakavona, weevula omulongo nambali, e li poku sa.

Yesus mhanga ta yi pamwe naJairus, aanhu oye mu ongakanene.

49 Mhanga Yesus ali ta popi, opwe ya omulumenhu a za kolyawo yomukulunhu wOshinangoga a ti, "Omonakavona woe okwa mana eengeda. Oto monifile ali shi Omulongi oihuna?"

50 Ndele Yesus nhyi eshi uvu, okwa ti ku Jairus, "Ino tila, kala una eitaelo, omumwoe ota yeluka."

51 Yesus nhyi e ya meumbo, ina pitika nande omunhu umwe aye mo pamwe naye kakele kuPeetulusa naYohanesa naYakopo nahe nayina yokaana. 52 Aanhu ayehe mba yali mo oya lila nokuuva oluhovi omolweso lyako. Ndee Yesus okwa ti, "Ina mu lila, oshonhyi okaana inaka sa, oka kofa ike."

53 Aanhu oya yola Yesus, oshonhyi oyali ye shi shii kutya, okaana oka sa. 54 Yesus okwe ka kwata moshikaha, ndee ta popi mopale, "Mumwange, penduka!" 55 Omhepo yaye oyaaluka, ndee ta fikama viya. Yesus okwe ya lombwela ya pe okaana oikulya. 56 Aakulunhu yokaana oya li ya kumwa, ndele Yesus okwe ya kunghulila opo inaa hokololela nande omunhu, nhyi sha ningwa po.

37 Okwa za omhepo onene tayi pepe kombada yomeya, nomakufikufi oya li taye ivege mokawato, nokawato hanga ka uva omeya. 38 Yesus okwa li a nangala kosindo yokawato a kofa, nomutwe waye wu li koshiwilo. Aalongwa oye mu pendula, ndele taa ti, "Mulongi, mboli ku na ko nasha nanhyi tu li po kusa?"

39 Yesus okwa penduka, ndele ta ngada omhepo a ti, "Mwena!" Ta lombwele omakufikufi a ti, "Kanghama!" Omhepo oya mwena, nomakufikufi oya lootela. 40 Yesus okwa ti kaalongwa yaye, "Oshishi hano mwa tila? Kamu na natango eitaelo nani?"

41 Aalongwa oya li ya haluka, yo ya tila neenghono, ndele oya pulafana taa ti, "Omulumenhu ngu oye olye naana? Nomhepo nomakufikufi tayi vulika kuye!"

35 Nhyi kwa toka, aalongwa yaye oye ya kuye taa ti, "IOtu li mehala kamu na omaumbo, netango olya toka, 36 lekela aanhu ya ye keehambo nokomikunda vopoushiinda, ye ke ilandele oikulya."

37 Yesus okwe ya yamukula a ti, "Ya peni oikulya."

Oya ti kuye, "Ondado yoikulya yaanhu ye fike mha, oi li pomafele yaali. Natu ye tu ka longife po oimaliwa ayihe mbi, tuka lande eemboloto tu ya pe ya lye?"

38 Yesus okwe ya pula a ti, "Omu na po eemboloto ngapi? Indeni, muka tale kutya ovi li ngapi."

Nhyi ya mona kutya ovili ngapi, oya ti, "Otu na eemboloto nhano neehi mbali."

39 Yesus okwa lombwela aalongwa yaye, ya lombwele aanhu ayehe, ya kale omutumba meengudu, pomwiivi wa ziza. 40 Aanhu oya kala omutumba meengudu, eengudu vimwe ova li vi na aanhu efele navimwe ova li vi na aanhu omilongo nhano. 41 Yesus okwa kufa eemboloto nhano neehi mbali, ta tala keulu, ndele ta pandula Kalunga. Okwa topola eemboloto ndele, te vi pe aalongwa yaye, ye vi topolele aanhu. Okwa topola natango eehi mbali va wana aanhu ayehe. 42 Aanhu ayehe oya lya, ndele taa kuta. 43 Aalongwa oya toola oupambu weemboloto noweehi auhe mbu wa hupa po, wa uva oimbale omulongo naiyali. 44 Omwaalu waalumenhu mba ya li ya kutifwa owa li omayovi yatano.

48 Yesus okwa mona kutya aalongwa yaye oye na oupyakavi mokuhinga owato yao, molwomhepo ndji ya li tai ya zilile komeho. Ndele efimbo lyopokati konhatu nohamano yongula, Yesus okwe ya kuyo ta ende kombada yomeya nokwa li e li poku ya pitilila. 49 Ndele nhyi ye mu mona ta ende kombada yomeya, oya li ye shii oshiluli. Oya kuu mopale, 50 shaanhyi oya li ya tila hnyi ye mu mona.

Ndele viyaviya Yesus okwe ya popifa a ti, "Kaleni nomukumo, Aame, ina mu tila." 51 Okwa ya nayo mowato, nomhepo oya lotela. Aalongwa oya li ya kumwa ko unene,

Yesus ta kutifa aanhu yefike lwopomaovi yane

1 Pomasiku ngo, ongudu onghwawo onene yaanhu oya ongala oku pwaikina Yesus. Ndele nhyi kaya li ye na nhyi taa li, Yesus okwa ifana aalongwa yaye, ndele ta ti kuyo, 2 "Aanhu mba ondi ya uvitile onghenda, shaanhyi oya menekela pwaame omasiku yatatu, onghee nganhyi kaye na ali nhyi taa lile po mha. 3 Ndele nge onde ya lekela ya ye komaumbo yawo inaa lya sha, otaa ka pundukila mondjila, shaanhyi yamwe yomuyo oya za kokule."

4 Aalongwa yaye oye mu yamukula, "Oikulya otayi zi peni mokuti mu, yi vule okukutifa aanhu yefike mha?"

5 Yesus okwe ya pula, "Omu na po eemboloto ngapi?"

Yo oya ti, "Opu na eemboloto heyali."

6 Yesus okwa lombwela aanhu, ya kale omutumba pevu. Okwa kufa eemboloto vo heyali, ndele ta pandula Kalunga. Okwe vi pambula, ndele te vi pe aalongwa yaye, ye vi topolele aanhu. Aalongwa oya ninga nganhyi Yesus e ya lombwela ya ninge. 7 Oya li ye na po nouhi oushona, ndele Yesus okwa lombwela aalongwa yaye yewu topolele po aanhu. 8 Aanhu oya lya, ndele taa kuta. Konima aalongwa oya toola po oupambu mbu wa hupa po, oimbale oinene iheyali ya uva. 9 Opwa li pu na aanhu yefike lwopomauvi yane, na Yesus okwe ya lekela.

Yesus ta fingi omukwiyu

12 Esiku lya landula ko, Yesus naalongwa yaye nhyi ya li taa zi kuBetania, Yesus okwa li a sa ondjala. 13 Okwa mona omukwiyu wu li kokule, wa ziza nawa. Okwa ya kuwo, a tale nge ota mono mo eenghwiyu. Nhyi a ya ko, ina mona mo sha, omafo ike, shaanhyi efimbo lyeenghwiyu olya li inali fika.

14 Yesus okwa ti komukwiyu, "Kaku na ali ngu ta li oiyimati yoye siyo aluhe."

Naalongwa yaye oye shi uva nhyi eshi popya.

Oshilongwa okuza komuti womukwiyu

20 Ongula yesiku lya landula nhyi ya li taa ende mondjila, oya mona omukwiyu wa sa siyo okomivi. 21 Peetulusa okwa vibuluka oshiningwanima nhyo, ndele ta ti kuYesus, "Tala, Mulongi, omukwiyu mbu wa finga, owa sa."

22 Yesus okwe ya yamukula a ti, "Kaleni muna eitaelo muKalunga. 23 Oshili andi mu lombwele, nge ope na ngu ta lombwele ondudu ndji ta ti, ‘Itumba po mha, wu iyekele mefuta,’ nge ke na omalimbililo momutima waye, ndele okwa itaela kutya nhyi ta ti ashi ningwa, nena ote shi ningilwa. 24 Onghee andi mu lombwele, "Kehe nhyi amu indile mokuyalikana, itaeleni kutya, omwe shi pewa, no amu ka pewa kehe nhyi a mu pula. 25 Nge amu yalikana, viminenipo kehe nghaa ngu e mu ninga nayi, opo naHo yeni womeulu a vime po omanyono yeni.*

Yesus ta ifana aalongwa yotango

1 Esiku limwe Yesus nhyi a li a fikama pefuta lyaGenesaleta, aanhu oye mu ongalela, ya pwaikine ohapu yaKalunga. 2 Okwa mona eewato mbali vili pomukunghulo wefuta, ndele aakwati yeehi oya hangika kaye li po yaka koha eenhete vao. 3 Yesus okwa ya muimwe yomeewato vo, mundji yaSimoni, nokwe mu pula e yi heenife komeho kanhiki, yi ze ko komunghulo wefuta. Yesus okwa kala omutumba mowato ndjo, ndee ta longo ongudu yaanhu.

4 Nhyi a mana okupopya, okwa lombwela Simoni a ti, "Ukifa owato mokati kefuta, ndee amu umbile eenhete veni momeya mu kwate eehi."

5 Simoni okwe mu yamukula a ti, "Mulongi, ousiku auhe otwa longa nouviinini ndele inatu kwata ko sha, ndele shaanhyi owa popya, eenhete andi vi tula mo." 6 Nhyi ye shi ninga, oya kwata eehi ovidji, neenhete vao ova li a vi hala okutokoka. 7 Oya lapa yakwao ya li mowato onghwao, opo ye uye ye ya kwafele. Oye ya, ndee taa uvifa eewato avihe mbali neehi, neewato ova li a vi hala okuningina molwouviyu. 8 Ndee Simoni Peetulusa nhyi a mona nhyi sha ningwa po, okwa twa eengolo koshipala shaYesus ndee ta ti, "Omwene, za po pwaame, shaanhyi ame ondimulunde!."

9 Peetulusa naayehe mba ya li naye oya li ya kuminwa eehi ovidji vi ya kwata. 10 Osho nghaa naYakopo naYohanesa, oyana yaSebedeus, mba ya li aakwati yeehi naSimoni. Yesus okwa ti kuSimoni, "Ino tila, okuza nena oto ningi omukwati waanhu." 11 Konima yanhyo, oya fala eewato vao komutunda, ndee taa fiipo oinima yao ayihe ndee taa landula Yesus.

Yesus ta lotifa oshikungulu

22 Esiku limwe Yesus okwa londa mowato pamwe naalongwa yaye, ndee ti kuyo, "Tu taulukeni tuyeni kombiga onghwao." Oya ya. 23 Mokweenda kwawo Yesus okwa kofa. Okwa tukuluka omhepo onene nowato oyali ya ya omeya, noya li yeli mouviyu. 24 Aalongwa oye ya kuYesus, ndee taye mu pendula ya ti, "Omwene, Omwene, atu sile mo, penduka!"

Yesus okwa penduka, ndee ta ngada oshikungulu, nomakufikufi oya mwena, nefuta olya lota. 25 Yesus okwa ti kuyo, "Eitaelo lyeni oli li peni?"

Aalongwa oyali ya tila noya kumwa, ndee taa pulafana, "Ngu olye hano, ta ngada omhepo nomakufikufi, ndee otaa vulika kuye?"

Yesus ta lotifa oshikungulu

22 Esiku limwe Yesus okwa londa mowato pamwe naalongwa yaye, ndee ti kuyo, "Tu taulukeni tuyeni kombiga onghwao." Oya ya. 23 Mokweenda kwawo Yesus okwa kofa. Okwa tukuluka omhepo onene nowato oyali ya ya omeya, noya li yeli mouviyu. 24 Aalongwa oye ya kuYesus, ndee taye mu pendula ya ti, "Omwene, Omwene, atu sile mo, penduka!"

Yesus okwa penduka, ndee ta ngada oshikungulu, nomakufikufi oya mwena, nefuta olya lota. 25 Yesus okwa ti kuyo, "Eitaelo lyeni oli li peni?"

Aalongwa oyali ya tila noya kumwa, ndee taa pulafana, "Ngu olye hano, ta ngada omhepo nomakufikufi, ndee otaa vulika kuye?"

Yesus ta eluva omulumenhu e na eemhepo va kaka

26 Yesus naalongwa yaye, oya ya koshitopolwa shaGelasene, sha taalelafana naGalilea.

12 Nhyi etango lyali li li pokuningina, aalongwa yaye omulongo nayaali oye ya kuye, ndee taa ti, "Poima mha omombuwa ike, onghee lekela aanhu ya ye momikunda nomomaumbo yopoushiinda, ya ka konge oikulya nomilele." 13 Yesus okwa ti kuyo, "Ya peni oikulya."

Ndele oya tya kuYesus, "Mha otuna po ike eemboloto nhano neehi mbali. Owa hala tuye tuka landele aanhu ayehe mba oikulya?" 14 Aalumenhu mba ya li po oye fike pomayovi yatano. Yesus okwa lombwela aalongwa yaye ta ti, "Ningeni aanhu ya kale omutumba meengudu, kehe ongudu naikale ina aanhu omilongo nhano."

15 Oye shi ninga, ya kaleka aanhu ayehe omutumba. 16 Yesus okwa kufa eemboloto vo nhano neehi mbali, ndee ta liyamene keulu, ndee te vi yambeke, te vi pambula, ta pe aalongwa yaye ya topolele aanhu. 17 Aanhu ayehe oya lya, ndee taa kuta. Aalongwa oya toola oihupe youpambu, oimbale omulongo naiyali.

23 Pefimbo mho, mOshinagoga omwe ya omulumenhu e na omhepo ya kaka noya ingiva mopale, 24 ya ti, "Yesus Omunasaleta, owe tu halela shi? Owe ya u tu hanaune po? Ondi ku shi kutya, ooye Omuyapuki waKalunga!"

25 Yesus okwa ngada omhepo ya kaka, a ti, "Mwena filu, ndele to zi mo muye!"

26 Omhepo ya kaka oye mu mbugaambuga, yo tai ingiva mopale, ndele tai zi mo muye.

Yesus ta eluva omulumenhu e na eemhepo va kaka

1 Yesus naalongwa yaye oya fika komunghulo wefuta lyaGalilea, koshilongo shaGerasa. 2 Yesus nhyi a za mo mokawato, okwa shakenekwa komulumenhu e niwe keemhepo va kaka ta zi momaendo. 3 Omulumenhu okwa kala meembila vi va li va panda momamanya, ndele kakwa li kuna nande omunhu ta vulu oku mu manga nande onomalyenge shaanhyi okwa li e na eenghono. 4 Olundji okwa li ha mangwa nomalyenge noiketanga keenyala nokeemhavi, ndele kehe efimbo omalyenge noiketanga ohe yi tokaula mo. Okwa li ena eenghono, no kakwa li nande omunhu ta vu lu oku mu mweneka. 5 Omutenya nousiku okwa kala aluhe momaendo nomeendudu, ta ingiva mopale ye te itete nomamanya.

6 Omulumenhu okwa monena Yesus kokule nokwa tondoka, ndele ta tu eengolo koshipala shaye. 7 Okwa ingiva mopale ta ti, "Yesus, Omonamati waKalunga wokombadambada! Owa halela nge shike? Andi ku indile koshipala shaKalunga, ino hepeka nge!" 8 Omhepo ya kaka oya popya ayihe mbi, molwanhyi Yesus okwa popya tango petameko kutya, "Mhepo ya kaka, za mo momulumenhu ngu!"

9 Yesus okwe mu pula, "Evina lyoye olye?"

Omhepo ya kaka oya yamukula ya ti, "Aame Ongudu, shaanhyi otu li oyendji." 10 Omhepo ya kaka oya twikila noku indila Yesus neenghono, opo ina ta mo eemhepo va kaka mehala ndyo.

11 Opwa li pu na oshuunda oshinene shoingulu tayi li popepi neendudu. 12 Eemhepo va kaka ova indila Yesus avi ti, "Tu tumina moingulu, oye totu pitike tu kale muyo." 13 Yesus okwe vi pitike, neemhepo va kaka ova za mo momulumenhu ndele avi yi moingulu. Oshuunda ashihe shoingulu yi fike pomayovi yaali, osha nhuka okuza komutunda omuleka, ndele tashi iyumbile mefuta, ndele tashi sile mo.

14 Aasita yoingulu oya matuka, ndele taa yi momikunda nomoshilando, ndele taa ka hokolola nhyi sha ningwa po. Aanhu oya ya, opo ya ka tale nhyi sha ningwa ko.

11 Ndele omwa longa kutya, omunhu nge oku na sha, nhyi ta vulu oku kwafa nasho he nenge yina, oshi li mondjila okutya, ‘Nhyi oKorban’ sha hala kutya nhyi osha Kalunga, 12 nena inamu mu pitika a kwafe he nenge yina. 13 Momukalo mbu, amu ningi eehapu vaKalunga vi kale vafa kavi na eenghono, molwanhyi omwa longa aanhu ya landule omalongo nomifiyululwakalo veni. Nye amu ningi natango oinima ikwawo oyindji yafa mha.

Oinima mbi tai kakeke omunhu

14 Yesus okwa ifana natango ongudu yaanhu, ye uye kuye, ndele te ya lombwele ta ti, "Pwaikineni kwaame amuhe, nye mu uve ko. 15 Kape na nhyi shili kombada, nge ashi yi momunhu, ashi mu ningi a kale ina hokiwa kuKalunga, ndele oshonhyi ashi zi momunhu osho ashi mu ningi a kale ina hokiwa kuKalunga!.*

Eitaelo lyomukiinhu ngu keshi Omuyuda

24 Yesus okwa fiya po ehala ndyo, ndele ta yi komikunda vopopepi noshilando shaTilus. Okwa ya meumbo lyonhumba, ka li a hala aanhu ya shiwe mha e li, ndele nee ina vula oku shi holeka. 25 Moshilando mo omwa li omukiinhu, e na omonakavona e niwe keemhepo va kaka. Nhyi a uva kombiga ya Yesus, meendelelo okwa ya kuye, ndele ta tu eengolo peemhavi vaye. 26 Omukiinhu ngu ka li Omuyuda. Okwa li a valelwa muFoinikia shomuSiria. Okwa indila Yesus a te mo eemhepo va kaka momonakavona. 27 Yesus okwa ti kuye, "Efa ounona wu lye tango, shaanhyi inashi opala okukufa oikulya younona, ndele toyi pe eembwa."

28 Omukiinhu okwe mu yamukula a ti, "Eeno, Omwene, neembwa kohi yoshitaafula oha vi li oundjaumuke wounona!"

29 Yesus okwa ti kuye, "Omolweyamukulo lyoye, inda keumbo, eemhepo va kaka ova za mo momumwoyekavona!"

30 Omukiinhu okwa ya keumbo nokwa hanga omona a nangala kombete, neemhepo va kaka va za mo muye.

17 Wumwe womongudu okwe mu yamukula, "Mulongi, onda eta kooye omumwangemati ena omhepo ya kaka ndji ye mu ninga a kale iha popi. 18 Shaa omhepo ya kaka nhyi tayi mu ponokele, ota yi mu vege pohi, ndele ta zi onhutu mokanya, nokwiikeha komayoo, ye te yi kukutile. Onda li nda lombwela aalongwa yoye, ye yi temo, ndele oya nyengwa."

19 Yesus okwa ti kuyo, "Onye epipi kali na eitaelo, siyo onaini andi kala punye? Siyo onaini ndi noku mu ivivimikila? Eteni omumati kwaame." 20 Oye mu eta ku Yesus.

Nhyi omhepo ya kaka ya mona Yesus, oya mbugaambuga omumati, ndele te ivege pevu, ta alangata, ye ta zi onhutu mokanya. 21 Yesus okwa pula he yomumati,

"Okwa kala nasho efimbo li fike peni?" He yomomati okwa ti, "Okuza kounona waye. 22 Olundji omhepo ya kaka oya kambavala oku mu vipaa, oku mu undulila momundilo nomomeya. Ndele oye nge oto vulu okuninga po sha, tu sila onghenda, oye u tu kwafe!"

23 Yesus okwa ti kuye, "Omolwashike to ti, nge andi shi vulu? Kehe shimwe ashi vulu okuningilwa omunhu ngu a itaela."

24 Meendelelo, he yomumati okwa ingiva a tya omahovi, "Ondi na eitaelo, ndele eshona, kwafa okuhaitayela kwange!"

25 Yesus nhyi a mona aanhu taa ngudumanene po, okwa hanyena omhepo ya kaka a ti, "Mhepo oye iho popi oye iho uvu ko, za mo muye, na ino ya mo ali muye nande!"

26 Ndele omhepo ya kaka oya ingiva, yo ta yi mu mbugaambuga neenghono, ndele ta yi zi mo muye. Konima, omumati okwa li a fa ke na omwenyo, naanhu oyendji oya ti, "Okwa sa." 27 Ndele Yesus okwe mu kwata monyala yaye, te mu yambiviva a fikame.

Yesus ta eluva aanhu oyendji

38 Yesus okwa za mo mOshinagoga ndee ta yi meumbo lyaSimoni. Yinamweno yaSimoni okwa li ta aluka olwiivi neenghono, noya pula Yesus e mu kwafele. 39 Yesus okwa heena kuye, ndee ta hanyene olwiivi, nolwiivi olwe mu efa. Meendelelo okwa fikama po ndee te ya longekivile oikulya.

27 Yesus nhyi e ya koukukutu, okwa shakenekwa komulumenhu womoshilando mo, e niwe keemhepo va kaka, a ninga efimbo iha zala oikutu, ye iha kala meumbo, ndele okwa kala momakololo yeembila. 28 Ndele nhyi a mona Yesus okwa ingiva mopale, ta wile pohi puye, ndee ta popi mopale, "Yesus Omona waKalunga Wopombadambada! Owa halela nge shi? Andi ku yalikana, ino hepeka nge." 29 Nhyi okwe shi popya shaanhyi Yesus okwa lombwela omhepo ya kaka yi zemo muye. Efimbo olindji nge yemu hanga, okwa kala ha evililwa, a mangwa nomalyenge neemwiya komaako nokomaulu, ndele oheitokola mo, nomhepo ya kaka ohai mu fala mombuwa. 30 Yesus okwe mu pula, "Ooye lye?" Ye okwa ti, ‘Ose ongudu yaakwaita,’ oshonhyi muye omwa li eemhepo va kaka ovidji. 31 Eemhepo va kaka ova indila Yesus ine vi undulila moshaasi.

32 Popepi nondudu opwa li oshuunda oshinene shoingulu sha napa. Eemhepo va kaka ova indila Yesus evi tule moingulu. Yesus okwe vi pitika vi ye moingulu. 33 Eemhepo va kaka ova zamo momulumenhu nova ya moingulu. Oshuunda ashihe shoingulu osha nhuka okuza komutunhu omuleka, ndele ashi iyumbile mefuta nosha sila mo.

34 Aasita yoingulu nhyi ya mona nhyi sha ningwa, oya matuka po, ndele taa ka hokolola oshiningwanima meendoolopa nomomikunda. 35 Aanhu oya ya, yaka tale nhyi sha ningwa ko. Oye ya kuYesus noya hanga omulumenhu ngu a li ena eemhepo va kaka e li omutumba puYesus, a zala nawa, ye okuna eenduge, noya li ya tila.

27 Oshili andi mu lombwele, opuna yamwe yomumba ye li ofika mha, ihaa makele eso mhanga ina ya mona Ouhamba wa Kalunga."

Yesus ta lundululwa

28 Nhyi pwa piti oule woshiike lwaamho konima nhyi Yesus a popya nhyi, Yesus okwa kufa Peetulusa, naYohanesa na Yakopo, ndee ta yi nayo kondudu ya ka yalikana. 29 Mhanga a li ta yalikana, olupe lwoshipala shaye olwa lundululuka, noikutu yaye oya avima, ya fa ouyelele. 30 Ombaavilila, opwa li aalumenhu yaali taa popi naYesus. Aalumenhu mba oya li oyo Moses naElia. 31 Oya li ya holoka meyavimo lyomeulu, ndee taa kundafana naYesus nhgee ena okuwanifa ehalo lya Kalunga, nhyi ta ka sa muYelusalema.

32 Ndele Peetulusa nayakwawo oya li ye kwetwe keemhosi, ndee nhyi ya papala, oya mona eyavimo lyaYesus naalumenhu yaali ya fikama pu ye. 33 Ndee Moses na Elia nhyi ya fiya po Yesus, Peetulusa okwa ti kuye, "Mulongi, mha opouwa nokukala mha. Natu vikeni po omatwali yatatu, limwe olyoe, limwe olya Moses, na limwe olya Elia." Peetulusa kali eshii nhyi ta popi.