1 Hano nhyi kwa li ku na omasiku yaali oshitufi shOpaasa neemboloto inavi ya efulika shi fike, aayambi aakulunhu naalongimhango oya li taa kongo nghee ye na okukwata Yesus mekotokelo, yo ye mu vipaye. 2 Ndele oya ti; "Inatu shi ninga pefimbo lyoshitufi, opo epiyaano ina li tukuluka maanhu.

3 Yesus nhyi a li muBetania meumbo lyaSimoni ngu a li e na oshilundu. Mhanga a li omutumba poshililo, omwe ya omukiinhu e na oshikola sha uva omaavi yondilo. Okwa suukula oshikola, ndele ta tile omaavi komutwe waYesus. 4 Aanhu yamwe oya li ye uvite nayi, ndele oya popyafana ya ti; "omolwashike omaavi yondilo ya hepifwa osima yongaho? 5 Omaavi nga ngeno oya li ya landifwapo, ngeno omwa za eeDenari, yo yi pewe eehepele." Oya umanena omukiinhu.

6 Yesus okwa ti; "Mweefeni, omolwashike tamu mu piyaaneke? Okwa longela nge oshilonga oshiwa. 7 Eehepele omu li navo efimbo alihe. Efimbo kehe mwa hala amu vulu oku vi ningila ouwanawa. Ndele ame ihandi kala punye aluhe. 8 Omukiinhu okwa ninga nhyi ta vulu oku ninga. Okwa tetekela oku tila olutu lwange omaavi, e lu longekivile efundiko. 9 Oshili andi mu lombwele; "Kehe nghaa nghu onghundana oiwa ta yi ka uvifwa mouyuni auhe, oshilonga nhyi a longa otashi ka hokololwa moku mu vibuluka."

10 Opo nee Yudas Iskalioto umwe womaalongwa omulongo nayaali, okwa ya kaawili yaayambi, opo ya ka ninge elandulafano lyokuvipaa Yesus. 11 Aayambi aakulunhu nhyi ye shi uva, oya hafa, ndele ta ye mu uvanekele oku mu pa oimaliwa. Onghee hano Yudas okwa li ta kongo efimbo lya opala oku yandja Yesus moikaha yaayambi aakulunhu.

12 Mesiku lyotango lyoshitufi sheemboloto inavi fulikwa, mu hamu vipawa ozona yOpaasa, aalongwa ya Yesus oye mu pula ya ti; "Openi wa hala, tu ke ku longikivile, opo u lye oulalelo wOpaasa?"

13 Yesus okwa tuma yaali yomaalongwa yaye ndele ta ti kuyo; "Indeni moshilando, amu ka shakanekwa komulumenhu a hinda oshishuma shomeya. Mu landuleni 14 siyo meumbo mu ta yi, lombweleni mwene weumbo tamu ti, ‘Omulongi ota pula, onduda yaayenda oyaama peni, ndi ka lile mo oulalelo wOpaasa pamwe naalongwa yange?’ 15 Ote mu ulikile onduda onene yopombada, ya longekivwa noinima ayihe omoyili, mo omo nee amu ka longekivila ayihe."

16 Aalongwa oya ya moshilando, naayihe oya li nganhyi Yesus e ya lombwela. Ndele oya longekiva oulalelo wOpaasa.

17 Nhyi kwa toka, Yesus okwe ya pamwe naalongwa yaye omulongo nayaali. 18 Mhanga ye li omutumba taa li oulalelo, Yesus okwa ti; "Oshili andi mu lombwele, umwe womunye ngu ta li pamwe naame, ota ka kengelelange."

19 Aalongwa oya li yanyika oluhovi, noya tameke oku mu pula kooumwe nooumwe taya ti; "Haame ndishi?" 20 Yesus okwe ya yamukula a ti; "Oumwe womokati keni nye omulongo nayaali, ngu ta yelele omboloto yaye metiti pamwe naame. 21 Omonamati wOmunhu ota ka sa nganhyi sha shangwa momishangwa, ndele oihuna oyi fike peni komulumenhu ngu ta ka kengelela Omonamati wOmunhu! Omunhu ngo ngeno okwa li ina valwa, ngeno oshi hwepo."

22 Mhanga ya li taa li, Yesus okwa kufa omboloto, ndele ta hambelele, ndele te yi pambula, ta pe aalongwa yaye ta ti; "Tambuleni, ndele a muli, omboloto ndji olutu lwange."

23 Ndele okwa kufa eholo, ndele ta pandula, ndele te ya pe noya mwa mo ayehe. 24 Ye okwa ti kuyo; "Ndji oyo ohonde yange, ndji ta yi kwashilipaleke ehangano lyaKalunga, ndji ta yi tilwahi omolwoyendji. 25 Oshili andi mu lombwele, ihandi ka mwa ali omaviinyu nga siyo esiku ndi a ndi ka mwa nga omape mOuhamba waKalunga."

26 Oya imba eimbilo lyepandulo, ndele taa yi kondudu yeeholivi.

27 Yesus okwa ti kuyo, "Nye amuhe amu ka matuka po, ndele amu fii nge po, oshonhyi okwa shangwa, ‘Kalunga ota vipaa po omusita, neezi avi ka halakana.’ 28 Ndele nge nda yumuvwa, andi mu tetekele kuGalilea."

29 Peetulusa okwa ti kuye; "Ihandi ku fiye po, nande ayehe naye ku fiye po!"

30 Yesus okwa ti ku Peetulusa; "Oshili, andi ku lombwele kutya ousiku mbu wonena mhanga ekondobolo inali lila lwaali, oye oto ke ivibika nge lwoikando itatu."

31 Peetulusa okwa yamukula neenghono a ti; "Nande otashi ka pula oku sa pamwe nooye, ihandi ke ku ivibika!"

Naalongwa yakwayo ayehe oya popya shafaafana.

32 Oye ya pehala evina lyalyo Getsemane, ndele Yesus okwa ti kaalongwa yaye; "Kaleni omutumba mha, mhanga andi ka yalikana." 33 Okwa kufa Peetulusa, Yakopo na Yohanesa, ndele okwa tameka okuuva nai unene, 34 ndele okwa ti kuyo; "Omutima wange owa nyika oluhovi olunene, kaleni mha nye mu kale mwa pahuka, inamu kofa."

35 Nhyi a ya komeho kashona, okwa twa eengolo ndele ta sizimike oshipala shaye pevu, nokwa yalikana, opo a pitililwe po kefimbo lyomahepeko nge ashi vulika. 36 Ye okwa ti; "Tate, Tate wange, ayihe oto yi vulu, kufa nge eholo ndi lyokuhepekwa, hanganhyi Ame nda hala, ndele onganhyi wa hala."

37 Ndele Yesus okwa yalukila kaalongwa mba yatatu, ndele okwa hanga ya kofa, ndele ta ti ku Peetulusa; "Simoni! Owa kofa? Ino vula nande oku pahuka nande owili yimwe?" 38 Okwa ti kuyo; "Pahukeni, nye mu yalikane, opo ina mu wila momashongo. Omhepo oya hala, ndele ombelela onghundi.

39 Okwa za po natango, ndele ta ka yalikana ta popi eehapu va faafana. 40 Nhyi a yalukila kaalongwa, okwe ya hanga ya kofa, inaa vula okukaleka omeho yawo ya pahuka. Ndele yo kaya li ye shii nhyi ye na oku mu yamukula.

41 Nhyi a yaluka olutitatu okwa ti kuyo; "Natango otamu kofa ike nye tamu fuvapo? Osha wana nee. Efimbo olya fika. Tala, Omonamati wOmunhu ota yandjwa momake yaalunde. 42 Fikameni, tu yeni. Tala, ngu ta kengele nge oku li popepi!"

43 Mhanga Yesus ta popi, Yudas umwe womumba omulongo nayaali okwe ya nongudu onene yaanhu ya tya omaongamwele neendibo, ya tumwa kaawiliki yaayambi, kaalongimhango nokaakulunhu. 44 Omukengeleli, okwa pa mba ali nayo oshivibulukifo ta ti; "Ngu andi ka kunda ne hupito komhanda, oye mwahala. Mu kwateni po, nye mu ye naye mwe mu viinina."

45 Yudas nhyi a fika, okwa endelela okuya kuYesus ndele ta ti; "Mulongi!" Ndele okwe mu kunda ne hupito komhanda. 46 Opo nee oye mu kwata po, ndele ta ye mu manga ya viinina. 47 Ndele umwe womumba ya li pamwe naYesus, okwa kufa mo eongamwele, ndele ta ponokele omupiya womukulunhu waayambi, temu tete okutwi. 48 Yesus okwa ti kuyo; "Omwe ya okukwata nge po mu na omaongamwele neendibo ndafa omukolokohi? 49 Kehe esiku onda kala nanye mEumbo lyaKalunga andi longo aanhu, ndele ina mu kwata nge po. Ndele nhyi oshi na okuningwa, opo omishangwa vi wanifwe.

50 Opo nee aalongwa ayehe oye mu fiyi po, ndele taa matuka po.

51 Opwa li omumati umwe omunyasha, a zala elapi etokele, a landula Yesus. Oya kambavala oku mu kwata. 52 Ndele okwa fiya po elapi lyaye nokwa matuka po e li olutu kondje.

53 Oya fala Yesus keumbo lyomuyambi omukulunhu, nghu kwa ongala aawiliki yaayambi ayehe, naalongimhango naakulunhu. 54 Peetulusa okwa landula Yesus e li konima kokule, siyo omoluumbo lweumbo lyomuyambi omukulunhu. Okwa ka kala omutumba pomundilo, ta huhulukwa pamwe naatonateli. 55 Ndele aawiliki yaayambi, aakulunhu noshoongi ashihe shaatokoli, oya li taa kongo aanhu ya yandje oumbagi wooli, ya lundile Yesus, opo ye mu vipaye, ndele inaye wu mona. 56 Oyendji oye mu lundila, ndele omalundilo yawo inaa twa kumwe.

57 Opo nee aalumenhu yamwe oya fikama, ye mu lundila ya ti, 58 "Se otwe mu uva ta ti, ‘Andi kumuna po Eumbo lyaKalunga ndi lya tungwa komunhu, ndele momasiku yatatu andi tungu yimwe, ndji inayi tungwa komunhu.’" 59 Nande ongaanhyo, omapopyo yawo inaya twa kumwe.

60 Omuyambi omukulunhu okwa fikama komeho yawo ndele ta pula Yesus a ti; "Ku na eyamukulo komapopyo nga to popilwa?"

61 Ndele Yesus okwa mwena, ina ya mukula sha. Omuyambi omukulunhu okwe mu pula a ti; "Ooye Kilistus, Omonamati waKalunga omuyambekwa?"

62 Yesus okwa yamukula; "Eeno, Aame. No, amu ka mona Omonamati wOmunhu e li omutumba kolulyo lwaKalunga ngu e na eenghono, no amu ke mu mona nhyi ta ka aluka ta ende moikoo yokeulu!"

63 Omuyambi omukulunhu okwa taula oikutu yaye, ndele ta ti; "Inatu pumbwa ali eembagi! 64 Etukano lyaye omwe li uva. Etokolo lyeni lipi?

Ndele ayehe oya kala ye li omhinge naYesus, ndele ayehe oye mu mona ondjo, noya ti na vipawe.

65 Opo nee yamwe yomuyo oya tameka okusiila Yesus omate, nokumu siikila koshipala, ndele taye mu vege neengonyo, ndele taa ti kuye; "Hunganeka ngu eku vega!" Aatonateli oye mu kufa, ndele ta ye mu vege nomanghaa.

66 Ndele mhanga natango Peetulusa nhyi e li moluumbo lwomeni, opwe ya umwe womaayakuli aakavona yomuyambi omukulunhu. 67 Ndele nhyi a mona Peetulusa ta huhulukwa, okwe mu tala ndele ta ti; "Nooye owa li pamwe na Yesus Omunasareta."

68 Ndele Peetulusa okwe ivibika, ndele ta ti; "Kandi mu shii nokandi uvite nhyi wa hala okutya." Okwa za po a uka lwoposheelo shopondje nekondobolo olya lila.

69 Natango omuyakuli omukavona okwe mu mona, ndele ta lombwele aanhu mba ya li ya fikama mho ta ti, ‘Omulumenhu ngu naye umwe womuyo." 70 Peetulusa okwe ivibika natango.

Konima yokafimbo aanhu mba ya li po ya fikama, oya lombwela Peetulusa ya ti; "Oshili, ooye umwe womuyeenya, shaanhyi nooye Omugalilea."

71 Peetulusa okwa ana ta ti; "Andi mu lombwele oshili! Kalunga na handukilenge nge ihandi popi oshili! "Omulumenhu ngu amu popi, kandi mu shi."

72 Efimbo ndjo, ekondobolo olya lila olutiyali. Peetulusa okwa vibulula eehapu vi Yesus e mu lombwela, nhyi a tile; "Ekondobolo mhanga inali lila lwaali, oto ivibike nge lutatu." Peetulusa okwa uvu nayi unene, ndele ta lili neenghono.