1 Aafalisai nayamwe yomaalongimhango mba ya za kuJerusalem, oya ongala puYesus. 2 Oya koneka kutya yamwe yomaalongwa yaYesus oya li taa li oikulya neenyala inavi kohwa nawa.

3 Aafalisai nAayuuda ayehe ohaa landula omalongo yaakulu yonale, iha ya li mhanga ina ya koha eenyala vawo she ikwatelela keenghulunghevi voohekulu,

4 yo iha ya li sha, sha za komalandifilo ina shi kohwa. Ohaa landula eenghulunghevi vikwawo vimwe nganhyi, omukalo mbu ye na okukoha omakopi, eembiya, oiyaha yongopolo noiketifa.

5 Opo nee, Aafalisai naalongimhango oya pula Yesus ya ti, "Omolwashi aalongwa yoye ihaa landula omalongo yaakulu yonale, ndele ohaa li neenyala ina vi kohwa nawa."

6 Yesus okwe ya yamukula a ti, "Aanaineya nye, Jesaya okwe mu hunganekela oshili nghanhyi a shanga kutya,

Kalunga ota ti, ‘Aanhu ohaa simanekenge nomapopyo yawo,

ndele omitima vawo ovi li kokule naame.

7 Oku simaneka nge kwawo okwongaho,

otaa longo omalongo yoipango yopaunhu.’

8 Amu efa oipango yaKalunga, nye amu viinine omalongo yopaunhu."

9 Yesus okwe ya lombwela a ti, "Omu na omikalo veni vomakoto vokwaanya eemhango vaKalunga nye amu landula omalongo yeni yene! 10 Moses okwa tile, ‘Simaneka ho nanyoko. Nangu ta tuku he nenge yina oku na oku vipawa.’ 11 Ndele omwa longa kutya, omunhu nge oku na sha, nhyi ta vulu oku kwafa nasho he nenge yina, oshi li mondjila okutya, ‘Nhyi oKorban’ sha hala kutya nhyi osha Kalunga, 12 nena inamu mu pitika a kwafe he nenge yina. 13 Momukalo mbu, amu ningi eehapu vaKalunga vi kale vafa kavi na eenghono, molwanhyi omwa longa aanhu ya landule omalongo nomifiyululwakalo veni. Nye amu ningi natango oinima ikwawo oyindji yafa mha.

14 Yesus okwa ifana natango ongudu yaanhu, ye uye kuye, ndele te ya lombwele ta ti, "Pwaikineni kwaame amuhe, nye mu uve ko. 15 Kape na nhyi shili kombada, nge ashi yi momunhu, ashi mu ningi a kale ina hokiwa kuKalunga, ndele oshonhyi ashi zi momunhu osho ashi mu ningi a kale ina hokiwa kuKalunga!.* 16 Ngu ena omakutwi, na uve ko!"*

17 Yesus nhyi a topoka nongudu yaanhu, okwa ya meumbo lyonhumba. Aalongwa yaye oye mu pula a fatulule nhyi a popya. 18 Yesus okwa ti kuyo, "Hamba nanye kamu na eenduge? Kamu uvite nani kutya oikulya mbi tayi yi momunhu tayi zi pondje, hayo tayi kakeke omunhu, 19 molwanhyi oikulya ihayi yi momutima waye, ndele otayi yi mepunda, ndele tayi zimo pomukalo wopaushitwe." Mokupopya nhyi, Yesus okwa koleka kutya oikulya ayihe oya yela.

20 Natango Yesus okwa ti, "Nhyi ashi zi momunhu, osho ashi mu ningi a kale ina kohoka. 21 Molwanhyi okuza meni momutima womunhu omo hamu zi omavilaavilo omayi, oipala, oulunga, evipao, 22 oluhondelo, onyanya, ekoto, okuhena eiviliko, efupa, okusheka, einenepeko, noulai. 23 Ouyi mbu auhe ohau zi meni momutima womunhu wo owo tawu mu ningi a kale ina kohoka."

24 Yesus okwa fiya po ehala ndyo, ndele ta yi komikunda vopopepi noshilando shaTilus. Okwa ya meumbo lyonhumba, ka li a hala aanhu ya shiwe mha e li, ndele nee ina vula oku shi holeka. 25 Moshilando mo omwa li omukiinhu, e na omonakavona e niwe keemhepo va kaka. Nhyi a uva kombiga ya Yesus, meendelelo okwa ya kuye, ndele ta tu eengolo peemhavi vaye. 26 Omukiinhu ngu ka li Omuyuda. Okwa li a valelwa muFoinikia shomuSiria. Okwa indila Yesus a te mo eemhepo va kaka momonakavona. 27 Yesus okwa ti kuye, "Efa ounona wu lye tango, shaanhyi inashi opala okukufa oikulya younona, ndele toyi pe eembwa."

28 Omukiinhu okwe mu yamukula a ti, "Eeno, Omwene, neembwa kohi yoshitaafula oha vi li oundjaumuke wounona!"

29 Yesus okwa ti kuye, "Omolweyamukulo lyoye, inda keumbo, eemhepo va kaka ova za mo momumwoyekavona!"

30 Omukiinhu okwa ya keumbo nokwa hanga omona a nangala kombete, neemhepo va kaka va za mo muye.

31 Yesus nhyi a za ko komikunda vopopepi naTilus, okwa pitile moshitopolwa shaSidon, ndele ta yi nondjila yauka koshitopolwa shoilando omulongo yi kefuta lyaGalilea. 32 Aanhu oye mu etela omulumenhu ha kokoma, ye iha uvu ko noya indila Yesus e mu tenheke oshikaha. 33 Yesus okwe mu kufa mo maanhu, ye ke ikalele. Okwa tula ominwe vaye momakutwi yomufitamakutwi, ndele te isiile omate komunwe waye, ndele ta piya elaka lyomulumenhu. 34 Yesus okwa tala keulu, ta fuva mopale, ndele ta ti, "Efata!" nhyi ashi ti, "Fituluka!"

35 Viyaviya, omakutwi yaye oya fituluka, ndele ta tameke oku uva ko nawa, nelaka lyaye olya manguluka, ndele ta tameke ku popya nawa. 36 Yesus okwa keelela aanhu opo ina ye shi popya nande okulye. Ndele nande ongaanhyo, oye shi hokolola. 37 Aanhu oya li ya kumwa unene, ndele taa ti, "Kehe shimwe nhyi ta longo oshiwa! Aafitamakutwi ote ya ningi ya uve ko, neembolo ote vi ningi vi popye!"